Marika 4

Na Vosa Vakatautauvata ni Daukabukaburaki

(Maciu 13.1-9; Luke 8.4-8)

1A sa tekivu me veivakatavulici o Jisu ena baravi mai Kalili. Era lewe vuqa sara era soqoni vata yani vua ka sa la'ki vodoka kina o koya e dua na waqa, ka la'ki dabe kina. Ia era a tu ga mai matasawa o ira na lewe vuqa.#Luke 5.1-3 2Sa qai vakatavulici ira o koya ena vuqa na ka ena vosa vakatautauvata; ia ni sa veivakatavulici tiko, sa kaya vei ira o koya:

3“Ni rogoca mada! Sa dua na dauteitei sa la'ki kabukaburaki. 4Ni sa kabukaburaki voli, sa qai lutu eso na i tei ni kau ena tutu ni sala, ka ra lako mai na manumanu vuka ka kania. 5Era a lutu eso tale ena vanua veivatu, ka sega soti ni levu kina na qele, ka ra sa tubu cake sara vakatotolo, ni sega soti ni vavaku na kena qele. 6Ni sa cabe na siga era sa malai mai, ia ni sa sega na wakadra era sa raqosa sara. 7E a lutu eso tale ena maliwa ni veiwavakavotona, ka ra sa tubu cake na veiwavakavotona ka vakaruguti ira, ka ra mani sega kina ni vua. 8Ia a lutu eso tale ena qele vinaka, era a tubu cake me levu mai ka mani yaco me ra vua, ka sa vua i tolusagavulu eso, ka onosagavulu eso, ka mani drau sara eso.”

9Sa qai tinia o Jisu ena vosa oqo, “O koya sa vakadaligana, ia me rogoca sara!”

Na Kedra i Naki na Vosa Vakatautauvata

(Maciu 13.10-17; Luke 8.9-10)

10Ia ni sa tiko taudua ga o koya, era sa qai tarogi koya o ira na tiko vata kaya kei iratou na lewe tinikarua me baleta na vosa vakatautauvata. 11Sa qai kaya o koya vei ira, “Sa soli vei kemuni mo ni kila na ka vuni ni matanitu ni Kalou; ia, vei ira ga e taudaku, sa tukuni na ka kecega ena vosa vakatautauvata, 12me rawa kina,

‘Ni ra vakararai voli ka sega ni kunea,

Era rogoca tiko ka lecava ga na kena i balebale.#Aisea 6.9,10 (LXX)

Ni kevaka era sa kitaka vakakina, era na saumaki mai vua na Kalou,

Ka na vosoti ira o koya.’ ”

Sa Vakamacalataka o Jisu na Vosa Vakatautauvata ni Daukabukaburaki

(Maciu 13.18-23; Luke 8.11-15)

13Sa qai kaya tale vei ira o Jisu, “O ni sega ni kila na vosa vakatautauvata oqo? O ni na qai kila vakacava na vosa vakatautauvata tale eso? 14Sa kaburaka na vosa ni Kalou na dauteitei. 15Eso na tamata era vaka na i tei ni kau ka kaburaki ena tutu ni sala; ni ra sa rogoca oti, sa qai lako sara mai o Setani ka kauta tani na vosa ka a kaburaki vei ira. 16E vakakina na kena ka ra kaburaki ena vanua veivatu, ni ra sa rogoca na vosa era sa vakabauta sara ena reki; 17ia me vaka ni sega na wakadra e lomadra, era mani tu dei vakalailai ga. Ia, ni sa qai tubu na rarawa se na veivakacacani ena vuku ni vosa, era sa tarabe sara. 18Eso tale ka kaburaki ena veiwavakavotona sai ira ka ra rogoca na vosa, 19ia sa qai curu yani na lomaocaoca ni vuravura oqo, na domona na i yau, kei na veimataqali gagadre tale e vuqa, ka vakaruguta na vosa ka sega kina ni vua. 20Ia na kena ka ra kaburaki ena qele vinaka, sai ira ka ra sa rogoca na vosa, ka vakabauta, ka ra la'ki vua sara; e tolusagavulu eso, ka onosagavulu eso, ka mani drau sara eso.”

Na Cina ena Ruku ni Bilo

(Luke 8.16-18)

21Sa qai kaya tale vei ira o Jisu, “E dua beka li sa dau kauta na cina ka ubia ena bilo se biuta ki na ruku ni mocemoce? E sega li ni dau la'ki biu ga ki na kena i tutu?#Maciu 5.15; Luke 11.33 22Ni sega na ka e tabogo me na sega ni vakaraitaki mai, ka sega na ka vuni, me na sega ni vakavotui.#Maciu 10.26; Luke 12.2 23Mo ni rogoca vinaka sara oqo, kevaka e tiko na daligamuni!”

24Sa qai kaya tale vei ira o koya, “Ni qarauni kemuni ena ka o ni rogoca; na i vakarau ga o ni vakarautaka, ena vakarautaki tale vei kemuni, ka na vakaikuritaki talega.#Maciu 7.2; Luke 6.38 25O koya sa tu vua eso na ka ena soli vakalevu tale vua, ia o koya e segai na ka e tu vua ena kau tani mai vua na ka e sa bau toka vua.”

Na Vosa Vakatautauvata ni Kau sa Tubu Tiko

26Sa qai kaya tale o Jisu, “Na matanitu ni Kalou sa vaka e dua na tamata sa kaburaka na i tei ni kau ena nona i teitei. 27A sa la'ki moce o koya ena bogi, ka sa yadra cake ka veilakoyaki voli ena siga, ia ena gauna kece oqori sa rovu ka tubu tikoga kina na kau sa teivaki. Ia sa sega ni kila o koya se yaco tiko beka vakacava na ka oqo. 28Ni sa vakavuna na qele me tubu na kau ka me vuataka na vuana; me na liu taumada na drauna, ka tarava na sena, qai muri na vuana. 29Ia ni sa matua mai na vuana, sa vakayagataka sara o koya na kena i sele me musulaka kina, ni sa gauna ni tatamusuki.”#Joeli 3.13

Na Vosa Vakatautauvata ni Sore ni Musita

(Maciu 13.31-32,34; Luke 13.18-19)

30Sa qai kaya tale o Jisu, “Me da vakatautauvatataka mada kei na cava na matanitu ni Kalou, se na vosa vakatautauvata cava beka me vakamacalataki kina? 31Sa vaka e dua na sore ni musita, ni sa kaburaki e dela ni qele, sa ka lailai duadua vei ira na i tei ni kau kecega e vuravura; 32ia ni sa tubu cake ka yaco me ka levu duadua vei ira na kau lalai kecega, a sa yaco me lelevu sara na tabana ka ra sa vakaitikotiko kina na manumanu vuka ena kena rurugu.”

33Sa dau vosa vei ira o koya ena vuqa na vosa vakatautauvata vakaoqo, me vaka na ka e rawa ni ra kila. 34Sa dau vosa ga vei ira o koya ena vosa vakatautauvata, ia ni ratou sa tiko vakai iratou ga sa qai dau vakamacalataka vei iratou na nona tisaipeli na veika kecega.

Sa Vakamaravutaka na Cava o Jisu

(Maciu 8.23-27; Luke 8.22-25)

35Ena siga o ya ni sa yakavi mai, sa qai kaya vei iratou na nona tisaipeli o Jisu, “Tou lako mada ki tai kadua.” 36E ratou sa qai laivi ira tu na lewe vuqa, ka ratou kauti koya sara ena waqa ga ka a tiko kina; era sa lako vata kei iratou eso tale na waqa. 37Sa qai tubu mai e dua na cagi ca levu sara ka sa seva na waqa na biau, ka sa tekivu kina me sinai mai na waqa ena wai. 38Ia sa tiko o koya ena mua i muri, ka moce koto ena i lokoloko. E ratou sa qai vakayadrata ka kaya vua, “Na i Vakavuvuli, o ni sega beka ni kauwaitaka ni datou sa voleka ni mate?”

39Sa qai tucake o koya ka vunauca na cagi, ka kaya, “Mo ruru mai!” ka kaya ki na ua ni wasawasa, “Mo maravu mai!” A sa ruru sara na cagi, ka mai lutu yani e dua na maravu levu. 40Sa qai kaya vei iratou, “A cava dou sa rere kina? E se segai tikoga vei kemudou na vakabauta?”

41Sa qai tuburi iratou e dua na rere levu, ka ratou sa veikayaka vakai iratou, “O cei beka na tamata oqo, ni sa talairawarawa vua na cagi kei na ua ni wasawasa?”

Currently Selected:

Marika 4: FNVDC12

Highlight

Copy