Maciu 9

Sa Vakabula o Jisu e Dua na Tamata Tauvi-Paralasi

(Mari 2.1-12; Luke 5.17-26)

1Sa qai vodo ki na dua na waqa o Jisu ka lako ki tai kadua, ka yaco ki na nona koro. 2Ka raica, era sa qai kauta mai vua e dua na tauvi paralasi, sa koto ga ena nona i davodavo. Ni sa raica o Jisu na nodra vakabauta, sa qai kaya vua na tauvi paralasi, “Vakacegu, na luvequ! Sa bokoci na nomu i valavala ca.”

3Ia, era sa qai kaya e lomadra eso vei ira na daunilawa, “Na tamata oqo e sa vosavakacacataka na Kalou!”

4Ia ni sa kila na nodra vakasama o Jisu, sa qai kaya, “Na cava li dou sa vakasamataka kina na veika ca ena lomamudou? 5Evei e rawarawa cake me tukuni, ‘Sa bokoci na nomu i valavala ca,’ se me tukuni, ‘Tu cake ka lako’? 6Ia mo dou kila rawa kina oqo ni sa tu na kaukauwa vua na Luve ni Tamata e vuravura me bokoca na i valavala ca.” Sa mani kaya vua na tauvi paralasi, “Tu cake, taura cake na nomu i davodavo ka lako ki nomudou.”

7Sa qai tucake ka lako sara ki nona vale. 8Ni ra sa raica o ira na lewe vuqa era sa rere, ka vakacaucautaka na Kalou, o koya sa solia na kaukauwa vakaoqo vei ira na tamata.

Sa Kacivi Maciu o Jisu

(Mari 2.13-17; Luke 5.27-32)

9Ni sa lako yani mai kea o Jisu, sa qai raica e dua na tamata na yacana o Maciu ni dabe toka ena vale ni kumuni i vakacavacava, ka mani kaya vua, “Muri au.”

Sa tucake sara o Maciu ka muri koya.

10Ni sa kana tiko mai vale o koya, era sa qai lako mai e lewe vuqa na daukumuni i vakacavacava kei ira na tamata i valavala ca ka kana vata kei Jisu kei iratou na nona tisaipeli.#Luke 15.1,2 11Ia, ni ra sa raica o ira na Farisi, era sa qai kaya vei iratou na nona tisaipeli, “Na cava e kana kina na nomudou i Vakavuvuli kei ira na daukumuni i vakacavacava kei ira na tamata i valavala ca?”

12Ia, ni sa rogoca o koya, sa qai kaya, “E sega ni yaga na vuniwai vei ira na bula vinaka, vei ira ga na tauvimate. 13Dou la'ki vulica mada na i balebale ni vosa oqo ni Kalou: ‘Au sa vinakata ga na yaloveivosoti ka segai na i soro.’ Au sa sega ni lako mai me'u kacivi ira na yalododonu, ia o ira ga na i valavala ca.”#Maciu 12.7; Osea 6.6

Na Taro me Baleta na Lolo

(Mari 2.18-22; Luke 5.33-39)

14E ratou sa qai lako mai vua o iratou na tisaipeli i Joni, ka kaya, “Na cava sara mada keimami lolo ga kina kei ira na Farisi; ia, e ratou sa sega ni lolo na nomuni tisaipeli?”

15Sa qai kaya vei iratou o Jisu, “E rawa li ni ra rarawa na weka ni tagane vou ni sa tiko vata voli ga kei ira na tagane vou? Ia, ena yaco mai na siga ena kau tani kina na tagane vou mai vei ira, era sa na qai lolo kina.

16E sega e dua e dau cula na tiki ni sulu vou vata kei na i sulu madra, ni na kadresu laivi mai na i sulu na tikina botani ka sa qai kadresu vakalevu kina. 17E sega talega ni ra dau livia na waini vou ki na bolaniwaini kuli-ni-manumanu makawa, ke vakakina, era na kacabote na bolaniwaini kuli-ni-manumanu; ia era dau livia ga na waini vou ki na tavaya kuli-ni-manumanu vou, ka sa maroroi ruarua kina.”

Na Luvena Yalewa e Dua na i Liuliu kei na Yalewa ka Tara na Tutu ni Kote i Jisu

(Mari 5.21-43; Luke 8.40-56)

18Ni sa tukuna tiko na veika oqo, sa qai lako mai e dua na i liuliu ka mai cuva ena vakarokoroko e matana, ka kaya, “Sa qai mate walega oqo na luvequ yalewa. Ia, mo ni la'ki tabaki koya mada ena ligamuni, ka na bula kina.”

19Sa mani tucake o Jisu kei iratou na nona tisaipeli ka muri koya.

20Ia, e dua na yalewa sa turudrabalavu voli ka yabaki tinikarua sa lako mai vua mai dakuna ka tara na tutu ni nona i sulu, 21ni sa kaya e lomana, “Kevaka walega au tara na tutu ni nona i sulu, au na vakabulai.”

22Sa qai vuki o Jisu ka raici koya, ka kaya, “Mo vakacegu, na luvequ, sa vakabulai iko na nomu vakabauta.” Sa bula sara na yalewa o ya ena tiki ni gauna o ya. 23Ni sa tadu o Jisu ki na nona vale na i liuliu, sa raici ira na dauuvu i vakatagi, kei ira na lewe vuqa era sa tagiyaso tiko, 24sa qai kaya, “Ni lako mada, ni sa sega ni mate na goneyalewa, ia, e moce walega.” Era sa qai dredrevaki koya. 25Ia, ni ra sa vakatalai oti na lewe vuqa ki tautuba, sa curu yani o koya ka taura na ligana, ka sa duri cake sara na goneyalewa. 26Sa qai rogovaki yani ki na vanua taucoko o ya na kena i tukutuku.

Sa Vakabulai Rau e Rua na Tamata Mataboko o Jisu

27Ni sa lako tani mai kea o Jisu, e rau sa muri koya yani e lewe rua na tamata mataboko, ka rau kaci voli, ka kaya, “Na Luve i Tevita, ni yalololoma mai vei keirau.”

28Ni sa curu ki vale, e rau sa lako sara yani vua na tamata mataboko, ka qai kaya vei rau o Jisu, “Drau sa vakadinata li ni'u sa cakava rawa na ka oqo?”

E rau sa qai kaya vua, “Io, Turaga.”

29Sa qai tara na matadrau, ka kaya, “Me yaco vei kemudrau me vaka ga na nomudrau vakabauta.” 30Sa mani rai rawa na matadrau. Sa qai vakaroti rau matua sara o Jisu, ka kaya, “Qarauna, me kakua sara ni dua e kila.”

31Ia, e rau sa lako ga yani, ka vakateteya na kena i tukutuku ki na vanua taucoko o ya.

Sa Vakabula e Dua na Tamata Galu o Jisu

32Ni ratou sa lako tiko yani, sa qai kau mai vua e dua na tamata galu ka curumi tevoro. 33Ni sa vakasavi tani na tevoro, sa vosa sara na tamata galu; ka ra sa kurabui na lewe vuqa, ka kaya, “E se sega mada ni yaco e dua na ka vakaoqo e Isireli.”

34Ia era sa kaya ga na Farisi, “E vakasavi ira na tevoro o koya ena kaukauwa ni nodra turaga na tevoro.”#Maciu 10.25; 12.24; Mari 3.22; Luke 11.15

Sa Rui Lomani Ira na Tamata o Jisu

35Sa qai veilakoyaki voli o Jisu ena veikoro lelevu kece kei na veikoro lalai talega ka veivakatavulici ena nodra veivalenilotu, ka vunautaka na i Tukutuku Vinaka ni Matanitu, ka vakabulai ira na tauvimate kei na malumalumu kecega.#Maciu 4.23; Mari 1.39; Luke 4.44 36Ni sa raici ira na lewe vuqa, sa lomani ira sara, ni ra vakaleqai ka biu wale tu, me vaka na sipi sa sega na kedra i vakatawa. 37Sa qai kaya vei iratou na nona tisaipeli, “Sa levu dina tu na ka me tamusuki; ia, era sa lewe lailai ga na tamata cakacaka me ra kauta mai.#Luke 10.2 38O koya oqo, mo dou masuti koya kina na i taukei ni veiteitei, me talai ira yani na tamata cakacaka me ra la'ki kumuna vata mai na veika sa tamusuki ena nona i teitei.”

Currently Selected:

Maciu 9: FNVDC12

Highlight

Copy