Maciu 19

Na i Vakavuvuli i Jisu me Baleta na Veisere

(Mari 10.1-12)

1Ni sa tukuna oti o Jisu na veika oqo, sa qai biuti Kalili ka yaco yani ki na yasayasa vaka-Jutia na tai kadua ni Joritani. 2Era sa lewe vuqa sara sa muri koya, ka sa vakabulai ira mai kea o koya.

3Era sa qai lako mai vei koya o ira na Farisi ka vakatovolei koya, ka kaya vua, “Sa tara li vua na tagane me veisere kei na watina kevaka e vuna e dua ga na ka?”

4A sauma o koya ka kaya, “Dou sa sega beka ni wilika ni sa buli rau ga me dua e tagane ka dua e yalewa o koya na Dauveibuli mai na i vakatekivu,#Vteki 1.27; 5.2 5ka kaya, ‘Ena vuku ni ka oqo sa na biuti tamana kei tinana kina na tagane ka kabita na watina, ka rau sa yaco me duabau ga na lewe rua?’#Vteki 2.24 6E rau sa qai sega ni lewe rua tikoga, e rau sa duabau ga. Na ka sa vauca vata na Kalou me kakua ni tawasea na tamata.”

7Era sa qai kaya vua, “Na cava ga sa qai vakarota kina o Mosese me solia ga vua na i vola vakadinadina ni veisere, ka qai sereki koya?”#Vrua 24.1-4; Maciu 5.31

8Sa qai kaya vei ira o koya, “Ena vuku ga ni nomudou yalo kaukauwa, sa vakatarai kemudou kina o Mosese mo dou veisere kei na watimudou, ia sa sega tu ni vakakina mai na i vakatekivu. 9Ia, au sa kaya vei kemudou, o koya sa veisere kei na watina, kevaka e sega ni vuna na dautagane, ka la'ki veiwatini kei na dua tale, sa dauyalewa.”#Maciu 5.32; 1Kori 7.10,11

10E ratou sa qai kaya vua na nona tisaipeli, “Kevaka sa vakaoqo na ka e yaco vua na tagane kei na watina, e vinaka cake me sa kakua ga na vakawati.”

11Sa qai kaya vei iratou o koya, “E sega ni ra na vinakata na tamata kece na vosa oqo, ia o ira ga sa soli vei ira. 12Ni ra sa tu ga eso sa sega ni vakawati ni ra a sucu vakakina mai na kete i tinadra, eso sa sega ni vakawati ni ra tarovi ira vakakina na tamata, ka so sa sega ni vakawati ni ra sa lewa vakakina ena vuku ni matanitu vakalomalagi. O koya sa rawata me muria oqori, me muria ga.”

Sa Vakalougatataki Ira na Gone Lalai o Jisu

(Mari 10.13-16; Luke 18.15-17)

13Era sa qai kau mai vua na gone lalai me tabaki ira o koya ena ligana, ka masulaki ira. Era sa qai vosataki ira na tamata na tisaipeli. 14Ia, sa qai kaya o Jisu, “Dou laivi ira na gone lalai me ra lako mai vei au ka kakua ni tarovi ira, baleta ni sa nodra o ira era sa vakaoqo na matanitu vakalomalagi.”

15Sa qai tabaki ira ena ligana, ka sa qai lako sara yani.

Na Cauravou Vutuniyau

(Mari 10.17-31; Luke 18.18-30)

16Sa qai lako mai vei koya e dua ka kaya, “Vakavuvuli, na cava mada na ka vinaka me'u cakava me noqu kina na bula tawamudu?”

17Sa qai kaya vua o koya, “A cava o tarogi au kina me baleta na ka vinaka? Sa dua ga o koya e vinaka. Ia, kevaka o via curu ki na bula, muria ga na i vakaro.”

18Sa qai kaya vua na cauravou, “A cava soti?”#Lako 20.13; Vrua 5.17; Lako 20.14; Vrua 5.18; Lako 20.15; Vrua 5.19; Lako 20.16; Vrua 5.20

Sa qai kaya o Jisu: “Mo kakua ni laba, mo kakua ni dauveibutakoci, mo kakua ni butako, mo kakua ni veibeitaki vakailasu, 19dokai rau na tamamu kei na tinamu, mo lomana na kai nomu me vakataki iko.”#Lako 20.12; Vrua 5.16; Vsoro 19.18

20Sa qai kaya vua na cauravou, “Au sa dau muria mai na veivakaro kecega oqo. Na cava tale e sa vo tiko vei au?”

21Sa qai kaya vua o Jisu, “Kevaka o vinakata me sa vinaka sara, mo lako, ka volitaka na nomu i yau ka solia vei ira na dravudravua, o na qai vakaiyau mai lomalagi, lako mai ka muri au.”

22Ia, ni sa rogoca na vosa oqo na cauravou, sa lako yani ena yalo rarawa; ni sa ka levu sara na nona i yau.

23Sa qai kaya vei ira na nona tisaipeli o Jisu, “Au sa kaya vakaidina vei kemudou ena dredre vua na tamata vutuniyau me curu ki na matanitu vakalomalagi. 24Au sa kaya vei kemudou, e rawarawa cake vua na kameli me curuma na mata ni cula, mai vua na tamata vutuniyau me curu ki na matanitu ni Kalou.”

25Ia, ni ratou sa rogoca na tisaipeli, e ratou sa kurabui sara, ka kaya, “O cei ga ena qai vakabulai rawa?”

26Sa qai rai yani vei iratou o Jisu, ka kaya vei iratou, “Sa dredre sara vei ira na tamata, ia sa rawarawa vua na Kalou na veika kecega.”

Na i Sau ni Muri Jisu

(Mari 10.29-31; Luke 18.28-30)

27Sa qai sauma o Pita ka kaya vua, “Ni raica mada, keitou sa biuta na ka kecega ka muri kemuni; na cava keitou na rawata kina?”

28Sa qai kaya vei iratou o Jisu, “Au sa kaya vakaidina vei kemudou, ni sa dabe tiko na Luve ni Tamata ena nona i tikotiko lagilagi, ena vuravura vou, dou na qai tiko talega oi kemudou ka muri au voli ena i tikotiko vakaturaga e tinikarua, ka lewai ira na mataqali e tinikarua ni Isireli.#Maciu 25.31; Luke 22.30 29O koya ga sa biuta na nona veivale, kei iratou na tacina kei na tuakana kei na ganena, se na tamana se tinana, se o iratou na luvena, se tiki ni qele, ena vuku ni yacaqu ena yayadrau sara tale na ka e taura kina, ka na taukena talega na bula tawamudu. 30Ia, e lewe vuqa vei ira sa liu era na muri, ka lewe vuqa vei ira sa muri era na liu.#Maciu 20.16; Luke 13.30

Currently Selected:

Maciu 19: FNVDC12

Highlight

Copy