Luke 10

Sa Talai Ira na Lewe Vitusagavulukarua o Jisu

1Ni sa oti o ya, sa qai lesia tale na Turaga e lewe 72 na tamata, ka talai ira me ra lakolako yarurua ka liu tiko vua ki na veikoro kece kei na veivanua e vakarau me lakova. 2A sa kaya vei ira o koya, “Sa levu sara na i teitei sa matua vinaka tu, ia sa lewe lailai ga na tamata cakacaka; mo ni masuti koya kina na Turaga ni tatamusuki me talai ira mai na tamata cakacaka ki na i teitei.#Maciu 9.37,38 3Mo ni lako; ka raica, au sa talai kemuni yani me vaka na lami ena kedra maliwa na olifa.#Maciu 10.16 4Ni kakua ni kau taga i lavo, se kau kakana, se kau i vava, ka kakua ni tu vakadua ka veikidavaki kaya kei na dua na tamata e gaunisala. 5Ena vale kecega o ni curu kina, ni kaya taumada kina, ‘Me yaco mada ga na vakacegu ena vale oqo!’ 6Kevaka e tiko kina e dua na tamata dau veivakacegui, ena yaco sara vua na nomuni veivakacegui; kevaka e sega, ena lesu tale mai vei kemuni. 7Ia mo ni tiko ga ena vale o ni sa dui curu kina, ka kania ka gunuva na veika e ratou solia; ni sa dodonu ga me taura na kena i sau na tamata cakacaka. Mo ni kakua ni veitokiyaki e veivale.#1Kori 9.14; 1Timo 5.18 8Ena gauna o ni sa curuma kina e dua na koro ka ra ciqomi kemuni vinaka na lewena, ni kania na ka e mai tauci e matamuni. 9Mo ni vakabulai ira na tauvimate era tiko kina, ka kaya vei ira, ‘Sa volekati kemuni mai na matanitu ni Kalou.’ 10Ia na koro kecega o ni curu kina, ka ra qai sega ni ciqomi kemuni, ni lako ki na kena veigaunisala ka kaya,#Caka 13.51 11‘Ia na kuvu ni soso ni nomudou koro ka sa kabita mai na yava i keimami, sa keimami qusia laivi tale vei kemuni. Ia mo ni nanuma ga ni sa voleka sara vei kemuni na Matanitu ni Kalou!’#Maciu 10.7-14; Mari 6.8-11; Luke 9.3-5 12Au sa kaya oqo vei kemuni, ena lailai cake na ka e yaco vei Sotoma ena siga o ya, ka na ca vakalevu na koro o ya.#Vteki 19.24-28; Maciu 11.24; Maciu 10.15

Na Veikoro Tawa Vakabauta

(Maciu 11.20-24)

13“O sa kalouca sara, Koresini! O sa kalouca sara, Pecisaita! Ni kevaka sa caka mai Taia kei Saitoni na cakacaka mana ka a caka vei kemudrau, ke rau a sa veivutuni makawa, ka dabe tiko ena i sulu taga kei na dravusa me i vakaraitaki ni nodra veivutuni.#Aisea 23.1-18; Isi 26.1–28.26; Joeli 3.4-8; Emo 1.9,10; Saka 9.2-4 14Ena rawa cake ni mamada na kedrau i totogi o Taia kei Saitoni ena Siga ni Lewa, ka na sega ga oi kemudrau. 15O iko talega Kapenaumi, mo na vakacerecerei iko li mo yaco ki lomalagi? O na biu sobu ga ki Etesi!#Aisea 14.13-15

16“O koya sa rogoci kemuni sa rogoci au, ia o koya sa besetaki kemuni sa besetaki au; ia o koya sa besetaki au sa besetaki koya sa talai au mai.”#Maciu 10.40; Mari 9.37; Luke 9.48; Joni 13.20

Na Nodra Lesu Tale Mai na Lewe Vitusagavulukarua

17Era sa qai lesu tale vua na lewe 72 ena marau ka kaya, “Turaga, era sa bau guce talega vei keimami na tevoro ena vuku ni yacamuni!”

18Sa qai kaya vei ira o Jisu, “Au a raici Setani ni sa lutu sobu mai lomalagi me vaka na livaliva. 19Mo ni kila, au sa solia na kaukauwa vei kemuni mo ni butuka kina na gata kei na batibasaga, ka rawa na kaukauwa kecega ni meca, ka na sega na ka me na vakacacani kemuni.#Same 91.13 20Ia mo ni kakua ni reki baleta ni ra sa talairawarawa vei kemuni na yalo velavela, ia mo ni reki ga ni sa volai na yacamuni mai lomalagi.”

Sa Reki o Jisu

(Maciu 11.25-27; 13.16-17)

21Ena gauna vata ga o ya, sa vakasinaiti koya ena reki na Yalo Tabu ka sa kaya, “Au sa vakavinavinaka vei kemuni Tamaqu, na Turaga ni lomalagi kei vuravura, ni o ni sa vunia na veika oqo vei ira na vuku kei ira na kila-ka, ka vakatakila ga vei ira na gone lalai. Io, Tamaqu, ni sa vaka oqori na i naki ni lomamuni.

22“Sa solia mai vei au o Tamaqu na ka kecega. E sega ni dua e kila se o cei na Luvena, na Tamana duadua ga; ka sega ni dua e kila se o cei na Tamana, na Luvena duadua ga, kei ira sa digitaka o koya me vakaraitaki Tamana vei ira.”#Joni 3.35; Joni 10.15

23Sa qai vuki vei iratou na tisaipeli, o koya, ka kaya lo vei iratou, “Era sa kalougata na mata era raica na ka dou sa raica! 24Ni'u sa kaya vei kemudou ni ra lewe vuqa na parofita kei na tui era a gadreva me ra raica na ka dou sa raica, ka ra mani sega ni raica; me ra rogoca talega na ka dou sa rogoca, ka ra mani sega ni rogoca.”

Na Vosa Vakatautauvata ni Kai Samaria Dauloloma

25Raica, sa qai tucake e dua na daunilawa me vakatovolei koya, ka kaya, “Na i Vakavuvuli, na cava me'u cakava me'u taukena kina na bula tawamudu?”#Maciu 22.35-40; Mari 12.28-34

26Sa qai kaya vua o Jisu, “Na cava so era volai tu ena lawa? Ka cava na kedra i balebale o kila rawa?”

27Sa qai sauma o koya ka kaya, “Mo lomana na Turaga na nomu Kalou ena lomamu taucoko, kei na yalomu taucoko, kei na nomu kaukauwa taucoko, kei na nomu vakasama taucoko; ka lomana na kai nomu me vakataki iko.”#Vrua 6.5; Vsoro 19.18

28Sa qai kaya vua o Jisu, “O sa sauma vakadodonu; la'ki vakayacora na veika oqori, o na bula kina.”#Vsoro 18.5

29Ia ni sa via vakadonui koya vakai koya ga, sa qai kaya vei Jisu, “Ia o cei na kai noqu?”

30Sa qai sauma o Jisu ka kaya, “E a lako sobu e dua na tamata mai Jerusalemi ki Jeriko, ka ra mani vesuki koya vakasauri na daubutako; era a qai luvata na nona i sulu, ka mokuta, ka lako tani ka biuti koya tu, ni sa voleka tu ni mate. 31Sa qai lako sobu ena sala o ya e dua na bete, ia ni sa raici koya sa vakatikitikitaka ka lako sara. 32E vaka talega kina e dua na kawa i Livai, ni sa yaco yani ki kea ka raici koya sa vakatikitikitaka talega ka lako sara. 33Ia sa qai lako yani e dua na kai Samaria, ka mani yaco sara vua. Ni sa raici koya sa lomana sara, #2Vei 28.15 34ka sa lako yani vua, ka vauca na veitikina e mavoa, ka livia kina na waiwai kei na waini, ka sa vakavodoka ki na nona manumanu ka kauta ki na bure ni vulagi, ka qaravi koya kina. 35Ena siga ka tarava sa qai taura e rua na tiki ni siliva, ka solia vua na i vakatawa ni bure, ka kaya vua, ‘Qai qaravi koya tiko; ke so tale na ka o na vakayagataka vua, au na sauma vei iko ni'u sa lesu tale mai.’

36“O cei vei iratou oqo ena nomu vakasama, e kai nona na tamata ka ra a vesuka na daubutako?”

37Sa qai kaya o koya, “O koya ga ka sa yalololoma ki vua.”

Sa qai kaya vua o Jisu, “Lako, la'ki kitaka vakakina.”

Sa Sikovi Marica kei Maria o Jisu

38Ia ni ratou sa lako tiko ena nodratou i lakolako, e ratou sa qai yaco ki na dua na koro, ka tiko kina e dua na yalewa, a yacana o Marica. A sa kauti Jisu o koya ki na nona vale.#Joni 11.1 39Ia e dua tiko na tacina yalewa, a yacana o Maria. A dabe tiko ena yasa ni yava ni Turaga o Maria ka vakarorogo ki na nona vosa. 40Ia sa veidreyaki na loma i Marica ena levu ni ka me cakava. A sa mani lako kina vua ka kaya, “Turaga, o ni sega ni kauwaitaka ni laivi au o taciqu me'u veiqaravi duadua ga? Ni tukuna mada vua me mai vukei au.”

41Sa qai sauma o Jisu ka kaya vua, “I Marica, i Marica! O sa rui lomaocaocataka ka leqataka na veika e vuqa: 42ia sa dua bau ga na ka e yaga. Sa digitaka o Maria na i votavota vinaka, na ka ena sega ni kau tani rawa mai vua.”

Currently Selected:

Luke 10: FNVDC12

Highlight

Copy