Jemesa 3
3
Na Yame
1Oi kemuni na wekaqu, me kakua sara ni ra lewe levu vei kemuni me ra i vakavuvuli. Me vaka o ni sa kila, eda na lewai vakabibi cake oi keda na i vakavuvuli mai vei ira na kena vo. 2Oi keda kece eda dau caka cala. Ia kevaka e dua na tamata sa sega ni dau cala ena nona vosa, sa tamata vinaka sara o koya ka sa rawa talega ni vakatulewataka vakavinaka na nona bula raraba. 3Eda dau vakaciqira ena gusu ni ose na kena i tatarovi me rawa kina ni talairawarawa vei keda, ka sa rawa kina me da vagolea ki na vanua eda vinakata. 4Se vakasamataka mada na waqa levu: ni sa rui ka levu sara ka tosoi koya voli na cagi kaukauwa, ia sa vagolei rawa ga ena dua na i uli lailai sara, ka sa mua yani ki na vanua sa vinakata o koya na kavetani. 5Sa vakakina na yameda: sa dua na tiki ni yagoda lailai ga, ia sa rawa ni cibitaka na veika lelevu.
Ni vakasamataka mada na levu ni veikau e rawa ni vakamai ena dua na mata ni buka lailai walega! 6Na yame sa vaka e dua na mata ni buka. Sa okati na yame me dua na kaukauwa vakatani sa vakadukadukalitaka na vo ni veitiki ni yago, ka sa vakacaudreva na nona bula taucoko e dua na tamata ena bukawaqa sa bukani tiko mai eli. 7A sa vakamanoataki ira oti na veika buli eso na tamata, ka rawa talega ni ra vakamanoataka eso tale me vaka na manumanu yavaiva, kei na manumanu vuka, kei na manumanu era qasi voli, kei na ika. 8Ia sa sega sara ni dua na tamata sa vakamanoataka rawa na yame. Sa ca ga ka sega ni lewai rawa, ka sa sinai ena veika gaga e dauveivakamatei. 9#Vteki 1.26Eda vakayagataka na yame me da vakavinavinakataka kina na Turaga o Tamada, ka da vosavakacacataki ira talega vakakina na tamata, o ira sa buli me ra veiucui kei na Kalou. 10Sa lako mai na gusu vata ga na vakavinavinaka kei na veivakacacani. Oi kemuni na wekaqu, sa sega sara ni dodonu me vakaoqo! 11E dau basika vata ga mai na dua na mataniwai na wai kamikamica kei na wai gaga? 12Oi kemuni na wekaqu; e rawa beka ni vuataka na olive na vuni lolo, se me vuataka na lolo e dua na vuni vaini? Sa sega ni rawa vakakina me tovure na wai kamikamica mai na mataniwai ni wai masima.
Na Vuku Mai Cake
13O cei li vei kemuni sa vuku ka yalomatua? Me ra na vakatakila sara oqo mai na nodra i tovo vinaka kei na nodra cakacaka vinaka sa vakayacori ena yalomalumalumu kei na yalomatua. 14Ia kevaka sa tiko ga e lomamuni na dauvuvu kei na yalo ca kei na yalo e nanumi koya ga vakataki koya, mo ni kakua sara kina ni vakalasuya na ka dina ena nomuni dokadokataka na nomuni vuku. 15Na vuku vakaoqo sa sega ni lako sobu mai lomalagi; sa vakavuravura ga, sa vakayago, sa vakatevoro. 16Ni vanua e tiko kina na veivuvutaki kei na nanumi koya ga vakai koya, sa tiko talega kina na tatawasewase kei na veicakacaka duka kecega. 17Ia na vuku sa lako mai lomalagi sa liutaki keda me da savasava, me da yalovakacegu, me da yalomalua, me da yalo rawarawa; io sa sinai sara kina na yalololoma, sa vuataka na vua vinaka, sa sega ni vakaduiduitaka na tamata, ka sa sega ni dauveivakaisini. 18Ni ra sa kaburaka na i tei ni bula vakacegu o ira na dauveivakacegui, era na tamusuka ga na vinaka.
Currently Selected:
Jemesa 3: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.
