Cakacaka 9
9
Na Veisau i Saula
(Caka 22.6-16; 26.12-18)
1Ia sa sega ni cegu o Saula ena nona tauca tikoga na vosa ni via veivakararawataki kei na veivakamatei vei ira na tisaipeli ni Turaga. E a mani lako vua na Bete Levu, 2ka la'ki kerea kina eso na i vola ki na soqo vaka lotu mai na koro o Tamasiko, me rawa ni kauti ira kina vakavesu ki Jerusalemi na tamata ka ra dau muria tiko na Sala ni Turaga, se ra tagane se ra yalewa, o ya kevaka e mani kunea kina eso.
3Ia ni sa volekati Tamasiko yani, sa qai cila vakavolivoliti koya vakasauri e dua na rarama mai lomalagi. 4A sa bale sara ki na qele, ka sa rogoca sara e dua na domo ni kaya vua, “I Saula! I Saula! A cava o vakacacani au tiko kina?”
5Sa qai kaya o Saula, “O cei o kemuni, Turaga?”
Sa qai kaya mai na domo o ya, “Oi au o Jisu, o koya o sa vakacacana tiko! 6Ia mo duri cake, mo lako yani ki na koro, me qai la'ki tukuni kina vei iko na ka e dodonu mo cakava.”
7A ratou sa tu vakadua o iratou ka lako vata tiko yani kei Saula, ka sega ni cavuta rawa e dua na vosa. E ratou sa rogoca na domo, ia e ratou sa sega ga ni raica e dua. 8Sa qai tucake mai ena qele o Saula, ia ni sa via rai na matana, sa sega ni raica rawa e dua na ka. E ratou sa qai tubera na ligana ka kauta ki Tamasiko. 9E a mani sega tu ni rai o Saula ka tolu na siga; ka sega talega ni bau kana se gunu ena gauna o ya.
O Ananaiasa
10E tiko mai Tamasiko e dua na tisaipeli, ka yacana o Ananaiasa. E a vosa vua na Turaga ena dua na raivotu ka kaya, “Ananaiasa!”
A sauma o koya, ka kaya, “Oi au oqo, Turaga.”
11Sa qai kaya vua na Turaga, “Tu cake, lako mada ki na gaunisala ka vakatokai o Dodonu. La'ki taroga ena vale nei Jutasa e dua na kai Tarisu, a yacana o Saula. E masu tiko ena gauna oqo o koya, 12ka sa raica oti tiko ena dua na raivotu e dua na tamata, o Ananaiasa na yacana, ni sa lako yani vua ka tabaki koya ena ligana me rai rawa tale kina.”
13Ia sa qai sauma o Ananaiasa, ka kaya, “Kemuni na Turaga, au sa rogoca mai vei ira e lewe vuqa na levu ni ka ca sa cakava oti na tamata oqo vei ira na nomuni tamata yalo savasava mai Jerusalemi. 14Ia sa lako mai ki Tamasiko o koya ena nodra lewa na bete levu me mai vesuki ira kecega era sa masuta tiko na yacamuni.”
15Ia sa qai kaya ga vua na Turaga, “Mo lako ga, ni'u sa digitaki koya oti me qaravi au, me na kauta na yacaqu vei ira na kai matanitu tani, kei ira na tui, kei ira talega na luve i Isireli. 16Au na qai vakatakila vua na levu ni ka ena sota kaya ena vukuqu.”
17Sa mani lako o Ananaiasa, ka curu ki na vale ka tiko kina o Saula. Sa tabaki koya ena ligana, ka kaya, “Na wekaqu Saula, sa talai au mai na Turaga, o Jisu o koya ka a rairai vei iko ena sala o a lako mai kina, mo sa mai rai rawa tale, ka mo vakasinaiti talega ena Yalo Tabu.” 18Sa qai lutu vakasauri mai matana e dua na ka e vaka na vari ni ika, ka sa rai rawa; sa qai tu cake ka papitaisotaki.#Tb 11.13-15 19Ia ni sa kana oti o Saula, sa qai kaukauwa tale mai.
Sa Vunau mai Tamasiko o Saula
Sa mani mai tiko voli yani o koya kei ira na tisaipeli mai Tamasiko ka vica na siga. 20A sa vunautaka sara ena nodra veivalenilotu na lotu vaka-Jiu ni sa Luve ni Kalou o Jisu.
21Era sa kurabui kecega o ira era rogoci koya, ka kaya, “E sega li ni o koya oqo ka dau vakamatei ira era dau masuta na yaca i Jisu mai Jerusalemi? E sega beka ni nakita na nona lako mai oqo me mai vesuki ira na tamata ka kauti ira vei ira na bete levu?”
22Ia sa tubu cake tikoga mai na kaukauwa i Saula, ka ra sa veilecayaki kina na Jiu era tiko e Tamasiko, ka sega ni dua e saqata rawa na nona vakadinadinataka tiko ni sa Karisito dina sara ga o Jisu.
23Ni sa toso tiko na gauna, era sa qai bosea na Jiu me ra sa vakamatei Saula,#2Kori 11.32,33 24ia sa mani qai kila o koya na nodra bukivere. Era a yadrava na veimatamata ni koro ena siga kei na bogi, me ra vakamatei koya kina. 25Ia era sa qai kauti koya na tisaipeli ena bogi, ka tukuci koya sobu ena dua na sova ena daku ni bai.
Sa Yaco ki Jerusalemi o Saula
26Ni sa yaco o Saula ki Jerusalemi, sa tovolea sara me la'ki curu vei ira na tisaipeli. Ia era sega ni vakabauta ni sa tisaipeli o koya, ka ra sa rerevaki koya kece. 27Sa qai lako o Panapasa ka kauti koya vei iratou na i apositolo, ka la'ki vakamacalataki koya vei iratou. E a vakamacalataka na nona a raica na Turaga ena gaunisala, na nona a vosa na Turaga vua, kei na nona a vunau vakadoudou mai Tamasiko ena yaca i Jisu. 28Sa mani tiko o Saula ka lako vata voli kei ira mai Jerusalemi 29ka vunau voli vakadoudou ena yaca ni Turaga. E a veivosaki talega ka veileti kei ira na Jiu vosa Vakirisi, ka ra a tovolea me ra vakamatei koya. 30Ni ra sa kila na ka o ya o ira na vakabauta era sa qai kauti koya sobu ki na koro o Sisaria ka vakatala sara ki na koro o Tarisu.
31Sa mani mai mudu toka mada e kea na nodra vakacacani na i soqosoqo lewenilotu taucoko mai Jutia kei Kalili kei Samaria. Era sa vakaukauwataki ena veivuke ni Yalo Tabu, ka sa tubu cake tikoga na kedra i wiliwili, ni ra sa qarava tiko na Turaga ena vakarokoroko.
O Pita mai Lita kei Jopa
32E a lakova na veiyasana kecega o Pita, ka a lako sobu talega ena dua na gauna vei ira na tamata ni Kalou era tiko mai na koro o Lita. 33E kea sa kunea kina e dua na tamata ka yacana o Inia, ka sa yabaki walu na nona davo ni a tauvi koya tu na paralasi. 34Sa qai kaya vua o Pita, “I Inia, sa vakabulai iko o Jisu Karisito. Tucake, ka viviga na nomu i davodavo.” A sa tucake sara ena gauna ga o ya o koya. 35Era sa qai raici koya o ira kecega era tiko mai Lita kei na koro o Saroni, ka ra sa vuki vua na Turaga.
36E a tiko mai na koro o Jopa e dua na yalewa vakabauta, o Tavaita na yacana. (Na yacana ena vosa Vakirisi o Tokasa, ka kena i balebale, ‘e dua na dia.’) Sa dau vakaogai koya ena veicakacaka vinaka kecega kei na nona dau vukei ira na vakaloloma. 37E a tauvi koya e dua na mate ena gauna o ya ka mani mate kina. Era sa qai vakasavasavataka na yagona ka la'ki vakotora ena dua na i taba vale e cake. 38E sega soti ni yawa o Jopa mai Lita. Ia ni ra sa rogoca na tisaipeli ni tiko kina o Pita, era sa mani vakatala vua e rua na tamata me rau la'ki kerea me lako mada yani vakatotolo vei ira. 39A sa vakarautaki koya sara o Pita ka lako vata yani kei ira. Ni sa yaco yani, era sa kauti koya sara ki na i taba vale e cake. Era wavokiti koya na yada kece, ka ra tagi ka vakaraitaka vua na kote leleka kei na i sulu eso ka dau cula o Tokasa ni a se bula ka tiko vata kei ira. 40Sa qai vakatalai ira kece ki tautuba o Pita, ka mai tekiduru yani me masu. Sa qai goleva na yago ka kaya, “I Tavaita, mo tucake mai!” Sa mai rai sara na matana. Ia ni sa raici Pita, sa duri cake sara me dabe. 41Sa qai dodoka vua na ligana o Pita ka tuberi koya cake. Sa qai kacivi ira kece yani na vakabauta kei ira na yada o Pita, ka vakaraitaki koya vei ira ni sa bula tale. 42Sa mani tetevi Jopa taucoko na kena i tukutuku, ka ra sa lewe vuqa era vakabauta kina na Turaga. 43E a mani tiko voli mai Jopa ena dua toka na gauna balavu o Pita vata kei na dua na daucaka kuli-ni-manumanu ka yacana o Saimoni.
Currently Selected:
Cakacaka 9: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.
