Cakacaka 8

1E a dodonu vinaka tu vei Saula na vakamatei nei Sitiveni.

Sa Vakacacana na Lotu o Paula

A vakatekivu sara talega ena siga o ya e dua na veivakacacani levu vei ira na i soqosoqo lewenilotu ka ra tiko mai Jerusalemi. Era a mani veiseyaki kece kina na lewenilotu ki na loma ni yasana o Jutia kei Samaria, ka vakavo ga o iratou na i apositolo. 2Era a mani buluti Sitiveni eso na tamata yalodina ka ra sa tagicaki koya vakalevu sara.

3A sa vakacacana vakalevu na i soqosoqo lewenilotu o Saula. E a curuma na nodra veivale ka yarataki ira ki tuba, na tagane kei na yalewa, ka biuti ira ki na valeniveivesu.#Caka 22.4,5; 26.9-11

Sa la'ki Vunautaki na Kosipeli ki Samaria

4Era sa qai veilakoyaki voli ena veiyasana o ira ka veiseyaki, ka vunautaka na i Tukutuku Vinaka. 5Sa mani lako sobu o Filipe ki na koro o Samaria, ka vunautaki Karisito kina vei ira na lewena. 6Era sa vakarogoca vakavinaka sara na lewe vuqa na ka e tukuna vei ira o Filipe, ka sa ra raica na cakacaka mana eso e cakava. 7Era sa vakasavi tani e lewe levu na yalo velavela, ka ra sa lako tani mai vei ira na tamata ena qoqolou; era sa vakabulai talega e lewe vuqa ka tauvi paralasi tu kei na lokiloki. 8A sa levu na marau ena koro o ya.

O Saimoni na Daucakaisausau

9E tiko ena koro o ya e dua na tamata, a yacana o Saimoni. E tamata daucakaisausau, ka dau vakurabuitaki ira vakalevu na lewe i Samaria ena veika mana e cakava. Sa dau tukutukuni koya voli me sa bau dua toka na ka o koya. 10Era sa vakarogoci koya kece na tamata, o ira na lewe ni vanua wale kei ira na turaga, ka ra kaya, “Na tamata oqo, sai koya sara ga na kaukauwa ni Kalou ka dau kilai tu me Kaukauwa Vakadomobula!” 11Era vakarogoci koya tiko vaka o ya baleta ni sa dede na nona dau vakurabuitaki ira tiko ena nona caka mana. 12Ia ni ra sa vakadinata na i tukutuku vinaka sa vunautaka o Filipe me baleta na Matanitu ni Kalou, kei na Yaca i Jisu Karisito, era sa mani papitaisotaki kece sara, na tagane kei na yalewa. 13A mani yaco talega me vakabauta o Saimoni; ia ni sa papitaisotaki oti sa qai dau tiko vata voli ga kei Filipe. Sa kurabui vakalevu o koya ni sa vakaraica tiko na cakacaka veivakurabuitaki eso kei na veicakacaka mana lelevu eso sa vakayacora o Filipe.

14Ia ni ratou sa rogoca o iratou na i apositolo ka tiko mai Jerusalemi ni ra sa vakabauta na kai Samaria na vosa ni Kalou, e ratou sa qai talai Pita kei Joni vei ira. 15Ia ni rau sa yaco yani, e rau sa masulaki ira na vakabauta me soli vei ira na Yalo Tabu, 16ka ni se bera tiko ni sobuta e dua vei ira na Yalo Tabu ena gauna o ya. Era a sa papitaisotaki walega ena yaca ni Turaga o Jisu. 17E rau sa qai tabaki ira ena ligadrau, ka sa qai ciqoma na Yalo Tabu.

18Ni sa raica oqo o Saimoni na kena sa soli na Yalo Tabu ena veitabaki ni ligadrau na i apositolo, sa qai via soli i lavo vei rau, 19ka kaya, “Drau solia tale mada ga mai vei au na kaukauwa oqori, me curu talega kina na Yalo Tabu vei ira yadua ka'u na tabaka ena ligaqu.”

20Sa qai kaya vua o Pita, “Mo drau rusa vata kei na nomu i lavo, baleta ni o sa nanuma ni o na rawa ni volia na i solisoli ni Kalou ena i lavo! 21Sa sega ni dua na nomu i tavi se i votavota ena cakacaka oqo, baleta ni sa sega ni dodonu na yalomu ena mata ni Kalou. 22Mo veivutunitaka nomu i naki ca oqo, ka masuta na Turaga, kevaka e rawa, me vosoti iko ena vuku ni nanuma ni lomamu oqo. 23Ni'u sa kunea rawa ni o sa sinai tu ena yalo ca ka sa vesuki iko tu na i valavala ca.”

24Sa qai sauma o Saimoni ka kaya, “Drau masulaki au mada vua na Turaga, me kakua kina ni yacovi au e dua na ka o drau kaya tiko oqo.”

25Ia ni rau sa tukuna ka vunautaka oti na vosa ni Turaga, e rau sa qai lesu tale ki Jerusalemi, ka rau a vunautaka na i Tukutuku Vinaka ena vuqa na koro kei Samaria ena nodrau i lakolako lesu.

O Filipe kei na Vakailesilesi ni Eciopia

26E a vosa vei Filipe e dua na agilosi ni Turaga, ka kaya, “Tu cake, ka lako vaka ki na ceva ena sala ka lako sobu mai Jerusalemi ki Qasa.” (Sa sega ni dau vakayagataki tu na sala o ya edaidai.) 27A mani cavutu o Filipe ka lako, ka rau mani sota sara kei na dua na enuki#8.27 A kena i balebale na tagane dauveiqaravi sa vakacacani se kau laivi na nona yago tabu. ni Eciopia, ka i vakailesilesi levu ni valeniyau nei Kadasi na ranadi ni Eciopia. A sa lako ki Jerusalemi o koya me la'ki qarava kina na Kalou, 28ia ni sa lesu tale tiko, ka vodoka tiko na nona qiqi, a sa wilika tiko na i vola i Aisea na parofita. 29Sa qai kaya vei Filipe na Yalo Tabu, “Toro yani ki na qiqi, ka toka volekata tikoga.” 30Sa mani cici o Filipe, ka rogoca sara ni wilika tiko o koya na i vola i Aisea na parofita. Sa mani tarogi koya o Filipe ka kaya, “O ni kila beka na ka o ni wilika tiko?”

31A sa sauma na i vakalesilesi, ka kaya, “Ena rawa vakacava vei au me'u kila kevaka e sega ni dua e tuberi au kina?” Oti o ya sa qai kerei Filipe me kaba cake yani me rau la'ki dabe vata. 32Oqo na wase ni Vola Tabu sa wilika tiko na turaga ni Eciopia o ya:

“Me vaka na sipi sa tuberi me la'ki vakamatei,

Ka vaka na lami sa galu ena mata i koya sa kotiva na vutina,

Sa vakakina o koya,

Ni sa sega ni tauca e dua na vosa.#Aisea 53.7,8 (LXX)

33Sa vakamaduataki, ka sega ni tau vakadodonu vua na lewa.

O cei ena bau tukuni ira na nona kawa?

Ni sa kau tani mai vuravura na nona bula.”

34Sa qai vosa vei Filipe na i vakailesilesi, ka kaya, “Tukuna mada vei au, e tukuni cei tiko na parofita ena tikina oqo, o koya ga, se dua tale?” 35Sa qai vosa o Filipe, ka vakatekivu mai na tiki ni Vola Tabu o ya, me vunautaki Jisu vua. 36Ia ni rau sa lako tiko, e rau sa yaco sara yani ki na dua na wai. A sa kaya sara na i vakalesilesi vei Filipe, “Raica, sa tu oqo na wai. Na cava e sega kina ni rawa me'u papitaisotaki?” 37Sa qai kaya vua o Filipe, “Sa rawa ni o papitaiso kevaka o sa vakabauta ena lomamu taucoko.” Sa qai sauma na i vakalesilesi ka kaya, “Au sa vakabauta ni sa Luve ni Kalou o Jisu Karisito!”

38Sa qai vakarota sara o koya me tu mada vakadua na qiqi, ka rau sa mai sobu ruarua sara yani ki wai, o Filipe kei na i vakalesilesi, ka sa papitaisotaki koya o Filipe. 39Ia ni rau sa cabe cake mai wai, sa kauti Filipe tani sara na Yalo ni Turaga, ka sa sega ni raici koya tale na i vakalesilesi; ka sa mai lako yani o koya ena marau. 40Sa qai la'ki kune sara tale o Filipe ena koro o Asota; a gole tiko ki Sisaria. E a lakova na veikoro kece e kea ka vunautaka kina na i Tukutuku Vinaka.

Currently Selected:

Cakacaka 8: FNVDC12

Highlight

Copy