Cakacaka 13

E Rau sa Digitaki ka Talai o Panapasa kei Saula

1Era tiko vei ira na i soqosoqo lewenilotu mai Anitioki eso na parofita kei na so na qasenivuli: o Panapasa, o Simione (ka vakatokai Na Driloa), o Lusiu na kai Kirini, o Manaeni (o koya ka rau a susugi vata kei Eroti na kovana), kei Saula. 2Ni ra sa qarava tiko na Turaga, ka lolo tiko, sa qai kaya vei ira na Yalo Tabu, “Lesi rau mai vei au o Panapasa kei Saula ki na cakacaka ka'u sa kacivi rau kina.”

3Ni sa oti na nodra lolo kei na masu, era sa qai tabaki rau ena ligadra ka talai rau yani.

Mai Saipurusi

4Me vaka na veitalai ni Yalo Tabu e rau sa qai lako sobu o Panapasa kei Saula ki na koro o Selusia. Mai kea e rau sa qai soko ki Saipurusi. 5Ni rau yaco ki na koro o Salamisa, e rau sa vunautaka na vosa ni Kalou ena nodra veivalenilotu na Jiu, ka a veivuke kina vei rau o Joni Marika.

6E rau a lakova na yanuyanu taucoko ka yaco sara ki na koro o Pafo. E kea e rau a sota kina kei na dua na daucakaisausau, e dua na Jiu, ka parofita vakailasu, o Ba-Jisu na yacana. 7E rau a tiko vata o Ba-Jisu kei na kovana, o Serikiu Paula; e dua na turaga vuku o koya na kovana. E a kacivi rau o Panapasa kei Saula o koya ni via rogoca na vosa ni Kalou. 8Ia sa qai saqati rau na daucakaisausau o Elima (o ya na yacana vaka-Kirisi), ka saga me vagolea tani na kovana mai na vakabauta. 9A sa qai vakasinaiti ena Yalo Tabu o Saula, (o koya sa yacana talega o Paula), ka sa vakawanonovi koya matua na daucakaisausau 10ka kaya, “O iko na luve ni Tevoro! O sa sinai ena veivakaisini, kei na ka ca kecega! O iko na meca ni veika kecega e dodonu! O na qai tinia e naica na nomu dau vakatanitaka tikoga na veika dodonu ni Turaga! 11Raica, sa na bikai iko na cudru ni Turaga; o sa na mataboko, ka na sega ni raica na matanisiga ena vica na siga.”

Sa qai lutu vakasauri vua na kabukabu kei na butobuto; ka sa vakayayamo voli ni vaqara e dua me tuberi koya. 12Ia ni sa raica na kovana na ka sa yaco o ya, sa vakabauta sara, ka sa dua tani talega na nona qoroya tiko na i vakavuvuli me baleta na Turaga.

Mai Anitioki e Pisitia

13E ratou sa qai soko yani o Paula kei rau na nona i tokani mai Pafo ka yaco ki na koro o Perika mai Pamifilia. Ia maikea sa mani biuti rau kina o Joni Marika ka lesu tale ki Jerusalemi. 14E rau sa qai biuti Perika oi rau ka lako ki Anitioki mai Pisitia. E rau a mani lako sara ki na nodra valenilotu na lotu vaka-Jiu ena Siga ni Vakacecegu ka la'ki dabe kina. 15Ia ni sa wiliki oti na i vola ni Lawa kei na nodra i vola na parofita, era sa qai kaya vei rau o ira na vakaitavi ena valenilotu, “Kemudrau na weka i keimami, kevaka e tiko vei kemudrau e dua na vosa ni veivakadreti vei ira na i vavakoso, drau vosa sara mada ena gauna oqo.”

Na Vunau i Paula

16Sa qai tu cake o Paula, ka dodoka yani na ligana me vakarau vosa, ka sa kaya:

“Oi kemuni na Isireli, kei kemuni na lewe ni veimatanitu tani o ni sa dau qarava na Kalou; ni vakarorogo mada! 17Na Kalou i Isireli sa digitaki ira na noda qase ka vakayacori ira me dua na matanitu levu ena gauna era tiko vakavulagi kina mai Ijipita. A sa kauti ira tani maikea na Kalou ena ligana kaukauwa,#Lako 1.7; Lako 12.51 18ka vosota voli na nodra i valavala ni bula me rauta e vasagavulu na yabaki ena loma ni vanua lala.#Tiko 14.34; Vrua 1.31 19E a qai vakawabokotaka e vitu na matanitu ena vanua o Kenani, ka solia na nodra vanua vei ira na Isireli me ra taukena#Vrua 7.1; Josua 14.1 20me va na drau limasagavulu na yabaki.

“Ni sa oti oqo, sa qai lesia vei ira o koya eso na dauveilewai me yacova na gauna i Samuela na parofita.#Dvei 2.16; 1Samu 3.20 21Ena gauna era sa vinakata kina me dua na nodra tui, a sa soli Saula kina vei ira na Kalou. O Saula, na luve i Kisi, e dua na tamata mai na yavusa i Penijamini, ka sa yabaki vasagavulu na nona veiliutaki.#1Samu 8.5; 1Samu 10.21 22Ni oti na nona biuti koya tani na Kalou, sa qai vakatuburi Tevita cake me nodra tui. Sa i koya oqo na ka e kaya na Kalou baleti Tevita, ‘Au sa kunei Tevita, na luve i Jese, a tamata ka'u sa vinakata e lomaqu, o koya ena vakayacora na veika kecega au gadreva.’#1Samu 13.14; 1Samu 16.12; Same 89.20 23Mai na kawa ni tamata oqo, me vaka na vosa ni yalayala, a sa vakatubura mai kina na Kalou vei ira na Isireli na i Vakabula, o Jisu. 24Ni se bera ni lako mai, a sa vunautaka oti o Joni vei ira na Isireli me ra veivutunitaka na nodra i valavala ca ka me ra papitaisotaki.#Mari 1.4; Luke 3.3 25Ni sa vakarau vakaotia o Joni na nona i tavi, a sa qai kaya, ‘O cei o ni nanuma ni oi au? E sega ni oi au o koya o ni waraka tiko. Ia mo ni rogoca! O koya e se muri tiko mai, ka sa sega mada ga ni rauti au me'u sereka na nona i vava.’#Joni 1.20; Maciu 3.11; Mari 1.7; Luke 3.16; Joni 1.27

26“Oi kemuni na wekaqu, na kawa i Epara-ama, kei kemuni na kai matanitu tani o ni dau qarava na Kalou, sa kau mai oqo kivei keda na vosa ni veivakabulai oqo! 27Ni ra sa sega ni kila o ira sa vakaitikotiko mai Jerusalemi kei na nodra i liuliu ni sai Jisu ga na i Vakabula. Era a sega talega ni kila na i balebale ni nodra vosa na parofita ka dau wiliki ena Siga ni Vakacecegu kece sara. Ia era sa vakaitavi ga ena kena vakayacori na nodra vosa na parofita ena nodra lewai Jisu me mate. 28E dina ga ni ra sa sega ni kunea rawa e dua na ka me tau kina vua na i totogi mate, era sa kerea ga vei Pailato me vakamatei ga o koya.#Maciu 27.22,23; Mari 15.13,14; Luke 23.21-23; Joni 19.15 29Ni ra sa vakayacora oti na veika kecega sa volai tu ena i Vola Tabu me baleti koya, era sa qai kauti koya sobu mai na kauveilatai ka buluti koya ena dua na i bulubulu.#Maciu 27.57-61; Mari 15.42-47; Luke 23.50-56; Joni 19.38-42 30Ia sa vakaturi koya cake tale mai na mate na Kalou, 31ka sa rairai kina vei ira era a lako vata kaya mai Kalili ki Jerusalemi ena loma ni vica vata na siga. Era sa dautukuni koya tiko o ira o ya vei ira na Isireli.#Caka 1.3 32Keirau sa kauta mai kina vakaoqo vei kemuni na i Tukutuku Vinaka me baleta na yalayala sa vakayacora na Kalou vei ira na noda qase, 33ka sa vakayacora dina sara o koya ena vukuda, vei keda na nodra kawa, ena nona vakaturi Jisu cake tale mai na mate. Me vaka sa volai tu ena i karua ni Same:

‘O iko na Luvequ;

Au sa yaco me'u Tamamu edaidai.’#Same 2.7

34Sa i koya oqo na ka sa kaya na Kalou me baleta na nona vakaturi koya cake tale mai na mate, me kakua sara ni vuca ena i bulubulu:

‘Au na solia vei iko na veivakalougatataki tabu ka sega ni yavalati rawa,

Ka'u a yalataka vei Tevita.’#Aisea 55.3 (LXX)

35A sa kaya talega vakakina o koya ena dua tale tiki ni Vola Tabu,

‘O ni na sega ni laiva na nomuni Le Dua Yalosavasava me vuca ena i bulubulu.’#Same 16.10

36Ia o Tevita, ni sa qarava oti na i naki ni Kalou ena nona i tabatamata, sa qai takali yani, ka sa bulu vata kei ira na nona qase, ka sa vuca kina na yagona. 37Ia sa sega ni yaco na ka o ya vei koya ka a vakatura cake tale mai na mate na Kalou. 38O koya oqo, mo ni kila kina na veiwekani ni sa mai vunautaki vei kemuni na bokoci ni valavala ca ena vukuna. 39Ena vukuna talega era sa vakadonui kina o ira kece era sa vakabauta; era sa vakadonui mai na veika kecega o ni sega ni dau sereki kina oi kemuni mai na Lawa i Mosese. 40Mo ni qai qarauna kina me kakua ni yaco vei kemuni na ka era sa tukuna na parofita:

41‘Raica, kemuni na dauveibeci!

Mo ni kidroa, ka rusa!

Ni veika ka'u sa cakava tiko edaidai

Sa veicakacaka o ni na sega ni vakabauta,

Ka veitalia ga kevaka e dua sa vakamacalataka rawa vei kemuni!’ ”#Ipe 1.5 (LXX)

42Ni rau sa biuta mai na valenilotu o Paula kei Panapasa, era sa qai kerea me rau la'ki vunautaka tale vei ira na veika oqo ena Siga ni Vakacecegu ka tarava. 43Ni ra sa dui suka na i vavakoso, era sa qai muri rau e lewe vuqa vei ira na Jiu kei ira na kai matanitu tani era sa vuki ki na lotu vaka-Jiu. E rau sa qai vosa vei ira, ka vakadreta me ra tudei tiko ga ena loloma-savu ni Kalou.

44Ena Siga ni Vakacecegu ka tarava, e voleka ni lewe ni koro kece era sa soqoni vata yani me ra rogoca na vosa ni Turaga. 45Ia ni ra sa raica na Jiu na kedra lewe levu na tamata, era sa sinai ena vuvu, ka ra vosavosa ca, ka ra vakalasuya tiko yani na veika e tukuna tiko o Paula, ka vakalialiai koya. 46Ia e rau sa qai vosa vakadoudou ga o Paula kei Panapasa, ka kaya, “Sa dodonu ga me vunautaki mada e liu vei kemuni na vosa ni Kalou. Ia me vaka na nomuni sa besetaka ga ka sega ni raica ni ganiti kemuni na bula tawamudu, keirau sa na biuti kemuni kina ka golevi ira na kai matanitu tani. 47Ni sa vakaoqo na i vakaro ni Turaga:

‘Au sa vakaturi iko mo nodra rarama na kai matanitu tani,

Me rawa kina ni vakabulai o vuravura taucoko.’ ”#Aisea 42.6; 49.6

48Ni ra sa rogoca o ya o ira na kai matanitu tani, era sa reki ka vakacaucautaka na vosa ni Kalou; ka ra sa vuki me ra vakabauta o ira era sa vakarautaki tu ki na bula tawamudu.

49A sa tete yani ki na loma ni yasana kece o ya na vosa ni Turaga. 50Ia era sa qai vakayavalati ira na marama lelevu lewe ni veimatanitu tani ka ra lotu vaka-Jiu kei ira na turaga dokai ena koro o ya o ira na Jiu. Era a vakatubura na veivakacacani ka caka vei rau o Paula kei Panapasa, ka vakasavi rau mai na nodra vanua. 51E rau sa qai kuretaka laivi na kuvu ni qele mai na yavadrau ena nodrau vakaraitaka na nodrau kudru me baleti ira ka lako sara yani ki na koro o Ikoniumi.#Maciu 10.14; Mari 6.11; Luke 9.5; 10.11 52Era sa vakasinaiti ena reki kei na Yalo Tabu o ira era sa vakabauta mai Anitioki.

Currently Selected:

Cakacaka 13: FNVDC12

Highlight

Copy