Cakacaka 12

Toso Tikoga na Veivakacacani

1Ena gauna ka tukuni tiko oqo, a sa vakatekivu me vakacacana eso na lewe ni soqosoqo lotu o Eroti na tui. 2E a vakamatei Jemesa, na tuakai Joni, ena i seleiwau. 3Ni sa raica vakaoqo o koya ni ra sa taleitaka na ka o ya o ira na Jiu, a sa la'ki vesuki Pita talega. (E donuya tiko o ya na gauna ni Solevu ni Madrai Sega ni Vakatubu.) 4Ni sa vesuki mai, a sa qai biu o Pita ki valeniveivesu, ka sa soli yani me ratou yadravi koya e va na i wasewase ni matayadra ka ra lewena na veiwasewase yadua e va na sotia. A sa nakita o Eroti me qai la'ki veilewaitaki koya ena matana levu ni sa oti na Solevu ni Lakosivia.#Lako 12.1-27 5A sa mani biu o Pita ki na valeniveivesu, ia o ira na i soqosoqo lewenilotu era a sega ni cegu ena masulaki koya vagumatua tiko vua na Kalou.

Sa Sereki mai Valeniveivesu o Pita

6Ena bogi me kena mataka cake me sa kauti Pita kina o Eroti vei ira na lewenivanua, sa moce koto o Pita ena kedrau maliwa e rua na sotia. E a vesu tu o koya ena rua na sinucodo ka ra yadra tale tikoga eso ena matamata ni valeniveivesu. 7Sa qai tu vakasauri e tikina e dua na agilosi ni Turaga, ka sa cila e dua na rarama ena loma ni valeniveivesu. Sa qai tavia na agilosi na taba i Pita ka vakaduria cake, ka kaya, “Totolo! Mo duri cake mada!” A sa tasere sara vakasauri mai ligana na sinucodo. 8A sa qai kaya na agilosi, “Vakadreta na i vau ni tolomu, ka daramaka na nomu i vava.” A sa cakava vakakina o Pita, ka sa kaya kina na agilosi, “Dara na nomu kote balavu, ka muri au mai.” 9Sa mai curu yani ki tautuba o Pita ka muri koya, ka sega ni kila sara tiko se sa ka dina na ka e cakava tiko o ya na agilosi se sega. E nanuma tikoga ni raica tiko e dua na raivotu. 10E rau sa siviti iratou sara na i matai ni matayadra, kei na kena i karua. E rau sa mani yaco sara yani ki na matamata kaukamea ka gole ki na koro. E a tadola vaka i koya ga vei rau na matamata, ka rau sa curu sara yani ki tautuba. E rau a lakova sara yani e dua na gaunisala, ka sa qai la'ki laivi koya kina vakasauri na agilosi.

11Ia ni sa vakilai koya tale o Pita, sa qai kaya, “Au sa qai kila dina sara oqo ni a tala mai na nona agilosi na Turaga, ka sa vakabulai au mai na liga i Eroti kei na nodra i naki kece talega na Jiu.”

12A sa vakasamataka na veika kece o ya o Pita, ka sa qai lako ki na vale nei Maria, na tina i Joni Marika, ena vanua era sa soqoni ka masu vata tiko kina e lewe vuqa. 13Ni sa tukituki tiko o Pita ena katuba ni matamata ni bai ni vale, sa lako sara yani me la'ki rogoca o Rota, e dua na goneyalewa veiqaravi. 14Ni sa kila o koya na domo i Pita, sa tuburi koya e dua na marau levu ka cici lesu tale ki loma ka a sega mada ga ni bau dolava rawa na katuba, ia sa cici ga ki loma ka la'ki tukuna ni sa tu ena katuba ni matamata o Pita. 15Era sa qai kaya vua, “O sa lialia?” Ia sa kaya tikoga o koya ni sa dina o koya. Era sa qai kaya tale, “Oqori na nona agilosi!”

16A sa tukituki tikoga o Pita. Era sa qai dolava vua na katuba; ia ni ra sa raici koya, a sa duatani na levu ni nodra kurabui. 17Sa qai dodoka yani na ligana vei ira o koya me ra tiko lo, ka sa tukuna vei ira na nona a kauti koya tani mai na Turaga mai valeniveivesu. Sa qai kaya talega, “Ni qai la'ki tukuna na ka oqo vei Jemesa kei ira na kena vo ni vakabauta.” Sa qai lako o koya ki na dua tani tale na vanua.

18Ni sa kida cake na mataka, sa ka levu na nodra kidroa na sotia — a cava beka e sa yaco vei Pita? 19A sa vakarota o Eroti me ra vakasaqarai koya, ia ni ra sa sega ni kunea, sa qai vaqaqai ira na yadra ka vakarota me ra vakamatei.

Ni sa oti oqo, sa qai biuti Jutia o Eroti ka la'ki tiko vakalailai mai Sisaria.

Na Mate i Eroti

20Ia sa cudruvi ira vakalevu na lewe ni koro e rua o Taia kei Saitoni o Eroti. Era sa mani lako vata me ra la'ki raici koya. Era a tekivu mada vei Pilasito, na i vakailesilesi liu ena vale nei Eroti. Ni ra sa rawai koya oti era sa qai la'ki soro vei Eroti ka kerei koya me ra kakua ni cudruvi, ka ni dau kau tiko mai na kedra kakana mai na nona vanua na tui.#2M 9.5-28

21Ia ena siga sa lokuci tu sa qai daramaka o Eroti na nona i sulu vakatui, ka la'ki dabe ena nona i tikotiko vakaturaga, ka tauca e dua na nona vosa vei ira. 22Era sa qai qolou vata yani na tamata, ka kaya, “Sa domo ga ni Kalou oqo, sega ni domo ni tamata!” 23Sa qai samuti Eroti vakasauri e dua na agilosi ni Turaga ka ni a sega ni vakarokorokotaka na Kalou o koya. A sa kanilaka na yagona na baca ka mani mate sara kina.

24Ia sa tubu ka tete tikoga na vosa ni Kalou.

25E rau sa qai lesu tale ki Jerusalemi o Panapasa kei Saula, ni rau sa vakayacora oti na nodrau i tavi, ka rau sa kauti Joni Marika tale tikoga.

Currently Selected:

Cakacaka 12: FNVDC12

Highlight

Copy