Cakacaka 11

Na i Tukutuku i Pita ki na Lotu mai Jerusalemi

1Era sa mani rogoca na i apositolo kei ira na vakabauta mai Jutia ni ra sa vakabauta talega na vosa ni Kalou o ira na kai matanitu tani. 2Ia ni sa yaco cake yani ki Jerusalemi o Pita, era a qai vakalewai koya o ira na i lala vakabauta ka ra vinakata me ra cilivi talega na lewe ni veimatanitu tani ni ra sa vakabauta. 3Era kaya vua, “O a la'ki curu ena nodra vale na tawa cili, ka la'ki kana vata sara kei ira!” 4Sa qai vakamacalataka vei ira o Pita na veika sa yaco mai na kena i vakatekivu me vakaoqo:

5“Au a tiko mai na koro o Jopa, ka'u masu tiko. Au a qai raica e dua na raivotu. A lako sobu mai e dua na ka e vaka na i tutuvi levu, ka sa vakalutulututaki sobu mai lomalagi ena tutuna vava, ka yacovi au sara mai. 6Au mani vakaraica matua ka'u raica kina na manumanu yavai va ni vanua, na manumanu kila, na manumanu dau qasi, kei na manumanu vuka ni macawa. 7Au qai rogoca talega e dua na domo ni kaya mai vei au, ‘Duri cake Pita, vakamatea ka kania!’ 8Au sa qai kaya, ‘Turaga, me kakua sara vei au! E sega vakadua ni se bau curu ki gusuqu e dua na kakana tabu se tawa savasava.’ 9Sa qai vosa tale mai vei au na domo mai lomalagi, ka kaya, ‘Mo kakua ni vakatoka me tawa savasava na ka sa vakasavasavataka na Kalou! 10E a yaco vakatolu na ka oqo, ka sa qai kau kece tale ki lomalagi. 11Ena gauna vata o ya, e ratou sa yaco yani kina e lewe tolu na tamata ki na vale au tiko kina. E ratou a talai yani kivei au mai Sisaria. 12E a qai kaya vei au na Yalo Tabu me'u lako vata kei iratou, me kakua ni'u lomalomarua tale. E ratou a salavata kei au e lewe ono vei ira na vakabauta ka keitou la'ki curu sara ki na vale ni tamata o ya. 13Sa qai tukuna vei keitou o koya na nona a raica na agilosi ena nona vale ni tucake tu, ka kaya vua, ‘Mo talatala ki Jopa, me lakovi e dua na tamata, o Saimoni Pita na yacana. 14Ena qai tukuna vei iko o koya na vosa mo na bula kina o iko kei ira kecega na lewe ni nomu matavuvale.’ 15Ni sa tekivu me'u vosa, sa sobuti ira sara na Yalo Tabu me vaka ga na kena sa yaco vei keda ena kena i vakatekivu. 16Au sa qai nanuma na vosa ni Turaga, ni sa kaya, ‘Sa papitaisotaki kemudou o Joni ena wai, ia dou na papitaisotaki ena Yalo Tabu.’#Caka 1.5

17Ia kevaka sa solia vei ira na Kalou na i solisoli vata ga ka a solia vei keda ena noda sa vakabauta na Turaga o Jisu Karisito, o cei oi au me'u via tarova na Kalou?” 18Ia ni ra sa rogoca o ya, era sa galu ga, ka vakatekivu me ra vakalagilagia na Kalou, ka kaya, “Sa solia talega na Kalou vei ira na kai matanitu tani na gauna oqo me ra veivutuni ka bula kina.”

Na i Soqosoqo Lewenilotu mai Anitioki

19Eso vei ira na vakabauta era a veiseyaki ena veivakacacani ka tubu ena vuku i Sitiveni era a yaco sara vaka ki na yasana o Finisia, na yanuyanu o Saipurusi kei na koro o Anitioki. Era a vunautaka voli na i tukutuku vinaka vei ira ga na Jiu, ka sega ni ra tukuna vei ira na veimatanitu tani.#Caka 8.1-4 20Ia eso vei ira na vakabauta era kai Saipurusi ka so e kai Kirini. Era a lako o ira o ya ki Anitioki ka vosa talega vei ira na kai matanitu tani, ka vunautaka kina na Turaga o Jisu. 21A sa tiko vata kei ira na kaukauwa ni Turaga, ka ra sa lewe vuqa era vakabauta ka saumaki vua na Turaga.

22Sa mani yaco na kena i tukutuku vei ira na i soqosoqo lewenilotu mai Jerusalemi, ka ra mani talai Panapasa me lako me yaco sara ki Anitioki. 23Ia ni sa yaco yani ka sa raica na levu ni veivakalougatataki ni Kalou vei ira na tamata, sa marau sara, ka sa vakauqeti ira me ra kabita matua na Turaga ena yalodra taucoko. 24A sa dua na tamata vinaka o Panapasa, ka sinai ena Yalo Tabu kei na vakabauta. Era sa lewe vuqa na tamata era sa vuki vua na Turaga.

25Ni sa oti o ya, sa qai lako o Panapasa ki na koro o Tarisu me la'ki vakasaqarai Saula kina. 26Ni sa kunei koya, sa qai kauti koya ki Anitioki. E a dua na yabaki taucoko na nodrau dausoqoni vata voli kina kei ira na i soqosoqo lewenilotu, ka rau vakatavulici ira e lewe vuqa. A sa vakatekivutaki na nodra vakatokai na tamata vakabauta me ra lotu Vakarisito mai Anitioki.

Na Dausiga Levu

27Ena gauna vata o ya era a lako sobu kina ki Anitioki eso na parofita mai Jerusalemi. 28A qai tu cake e dua vei ira, a yacana o Akapo, ka tukuna ena kaukauwa ni Yalo Tabu ni na yaco e dua na dausiga levu ena vuravura raraba. (E a mani yaco na ka o ya ena gauna e tui tiko kina o Kolotiu.)#Caka 21.10 29Era sa mani lewa vata o ira na tisaipeli, me ra vakauta, me vaka na ka era dui rawata, na nodra veivuke vei ira na vakabauta mai Jutia. 30Era sa qai cakava vakakina, ka ra solia na i lavo vei rau o Panapasa kei Saula me rau kauta vei ira na qase ni lotu maikea.

Currently Selected:

Cakacaka 11: FNVDC12

Highlight

Copy