1 Joni 4

Vakatovolei Ira na Veimataqali Yalo

1Oi kemuni na wekaqu lomani, ni kakua ni vakabauta na yalo kecega, ia ni vakatovolei ira na yalo mo ni kila rawa kina se ra sa lako mai vua na Kalou, se segai: ni ra lewe levu na parofita vakailasu era sa lako yani ki vuravura. 2O ni na kila na Yalo ni Kalou ena ka oqo: o koya ga sa vakatusa ni sa lako mai o Jisu Karisito ena yago vakatamata sa tiko vua na Yalo sa mai vua na Kalou. 3Ia o koya sa cakitaka na dina oqo me baleti Jisu sa sega ni tiko vua na Yalo sa mai vua na Kalou. Na yalo ka sa tiko vua sa mai vua na meca i Karisito, o koya o ni a rogoca ni na lako mai, ka sa tiko e vuravura ena gauna oqo.

4Ia o ni sa nona ga na Kalou, oi kemuni na luvequ lomani, ka o ni sa vakadrukai ira oti na parofita vakailasu, baleta ni sa kaukauwa cake sara na Yalo sa tiko e lomamuni, ka malumalumu ga na yalo sa tiko e vuravura. 5O ira na parofita vakailasu oqori era sa dautukuna ga na veika vakavuravura, ka sa vakarorogo vei ira o vuravura, baleta ni ra sa nei vuravura. 6Ia eda sa nona ga na Kalou oi keda. O koya yadua sa kila na Kalou sa vakarorogo vei keda; ka sa sega ni vakarogoci keda o koya sa sega ni nona na Kalou. Oqo na sala eda sa kila rawa kina na kedrau duidui na Yalo ni dina kei na yalo ni lasu.

Sa Loloma na Kalou

7Oi kemuni na wekaqu lomani, me da veilomani vakaveiwekani, ni sa mai vua na Kalou na loloma. O koya sa dau loloma sa yaco me luve ni Kalou ka sa kila na Kalou. 8O koya sa sega ni dau loloma sa sega ni kila na Kalou, ni sa loloma na Kalou. 9A sa dusimaka kina na Kalou na nona loloma vei keda ni sa tala mai ki vuravura na Luvena e duabau ga, ka sa vakatubura me da vakabulai ga ena vukuna. 10Sa i koya ga oqo na loloma: sa segai ena vuku ni noda lomana na Kalou, ia ena vuku ga ni nona sa lomani keda na Kalou ka sa tala mai kina na Luvena me i soro ni noda i valavala ca.

11Oi kemuni na wekaqu lomani, kevaka sa lomani keda vakaoqo na Kalou, sa dodonu talega vakakina me da ia na veilomani ena keda maliwa. 12#Joni 1.18E sega ni se bau dua na tamata e sa raica rawa na Kalou; ia kevaka eda sa veilomani, sa bula tiko e lomada na Kalou, ka sa vakataucokotaki kina ena noda bula na nona loloma.

13Ena ka oqo eda sa kila kina ni da sa bula ga vua na Kalou ka sa tiko e lomada o koya, baleta ni sa solia vei keda na Yalona. 14Keitou sa raica oti talega ka tukuna vei ira na tamata ni sa tala mai na Luvena o Tamada me i Vakabula kei vuravura. 15O koya yadua sa vakatusa ni sa Luve ni Kalou o Jisu, sa bula ga o koya vua na Kalou ka sa tiko vata kei koya na Kalou. 16Eda sa kila ka vakadinata na loloma sa lomani keda kina na Kalou.

Sa loloma na Kalou. O koya sa bula tiko ena loloma sa bula ga vua na Kalou, ka sa tiko vata kei koya na Kalou. 17Ni sa qai vakataucokotaki ena noda bula na loloma me da yalodei rawa kina ena Siga ni Lewa; ni da na rawata vakakina baleta ni sa tautauvata tiko kei na bula i Karisito na noda bula voli ena vuravura oqo. 18Sa sega ni tiko ena loloma na lomaleqa. Ia na loloma sa vinaka sara sa vakasava tani na rere kecega. Sa sega kina ni vinaka sara na nona loloma e dua ka sa rere voli ga, baleta ni sa dau rere ga na tamata kevaka sa sotava na veitotogitaki.

19Eda sa dau loloma baleta ni sa lomani keda eliu na Kalou. 20Kevaka sa kaya e dua, “Au sa lomana na Kalou,” ka cata na wekana, sa tamata lasulasu o koya. Ni o koya yadua sa sega ni lomana na wekana, o koya ka sa raica e matana, sa sega ni rawa ni lomana na Kalou, o koya ka sa sega ni raica. 21Ia sa solia mai vei keda na i vakaro oqo o Karisito: o koya sa lomana na Kalou, sa dodonu me lomana talega na wekana.

Currently Selected:

1 Joni 4: FNVDC12

Highlight

Copy