Apocalípsis 7
7
Payman yärakuqkunata Tayta Dios señalashqan
1Saypitanami chusku angilkuna kay pasapa chuskun kuchuncho ichiraykäyaqta rikarqä.#Dan. 7.2; Zac. 6.5. Say angilkunami wayrata saparäyarqan kay pasamanpis ni lamarmanpis ni ima jachamanpis mana wayrämunanpaq. 2Paykunami munayyuq kayarqan kay pasatapis lamartapis castigayänanpaq.
Saynöpis rikarqä inti yarqamunan kaqpita imayyaqpis kawaq Tayta Diospa sëllun aptash juk ángel shamuykaqta. Say angilmi pasapa kuchunkunacho kaykaq chusku angilkunaman sinchipa qayakur 3nirqan: <<¡Tayta Diosninsipa sirviqninkunata urkunkunacho manaraq señalaptïqa#Eze. 9.4, 6. amaraq ushakäsiyayraqsu kay pasacho kaqkunata, lamarcho kaqkunata ni jachakunatapis!>>
4Saypitanami ayka runakunata señalashqantapis wiyarqä. Say runakuna kayarqan pachak chusku chunka chusku waranqa (144,000) runakunami. Paykuna kayarqan lapan Israel trïbu runakunapitami:
5Judá trïbupitami chunka ishkay waranqa (12,000) kayarqan.
Rubén trïbupitami chunka ishkay waranqa (12,000) kayarqan.
Gad trïbupitami chunka ishkay waranqa (12,000) kayarqan.
6Aser trïbupitami chunka ishkay waranqa (12,000) kayarqan.
Neftalí trïbupitami chunka ishkay waranqa (12,000) kayarqan.
Manasés trïbupitami chunka ishkay waranqa (12,000) kayarqan.
7Simeón trïbupitami chunka ishkay waranqa (12,000) kayarqan.
Leví trïbupitami chunka ishkay waranqa (12,000) kayarqan.
Isacar trïbupitami chunka ishkay waranqa (12,000) kayarqan.
8Zabulón trïbupitami chunka ishkay waranqa (12,000) kayarqan.
José trïbupitami chunka ishkay waranqa (12,000) kayarqan.
Benjamín trïbupitami chunka ishkay waranqa (12,000) kayarqan.
Saysika runakuna yuraq mödanash jana pasacho kayashqan
9Saypitami rikarqä Tayta Dios jamarashqan trönupa nawpancho y Carnishpa nawpancho yupaytapis mana atipaypaq saysika runakuna palmankuna aptash y yuraq mödanan jatish kaykäyaqta. Paykuna kayarqan maysay nación runakuna, maysay trïbu runakuna, maysay marka runakuna y tukuy idiömata parlaq runakunami. 10Paykunami sinchipa niyarqan: <<¡Trönucho jamaraykaq Tayta Dios y nawpaykicho kaykaq Carnish, qamkunami salvayämashkanki!>>
11Saymi Tayta Diospa puntancho kaykaq chusku kawaykaqkuna, ishkay chunka chusku (24) mayor runakuna y lapan angilkunapis lätakuykur Tayta Diosta alabar 12niyarqan:
<<¡Amén!
¡Tayta Diosninsi alabash kaykuläsun!
¡Pay japalanmi lapantapis musyan!
¡Imayyaqpis payta agradëcikushun!
¡Pay japalanmi lapanpaq munayyuq kaykan!
¡Imayyaqpis payta alabashun!
¡Amén!>>
13Saymi Tayta Diospa nawpancho kaykaq ishkay chunka chusku (24) mayor runakunapita juknin tapumarqan: <<¿Pïkunataq say yuraq mödanan jatish runakuna kaykäyan? ¿Maypitataq shayämush?>> nir.
14Sayno nimaptinmi nirqä: <<Taytay, qammi musyanki>>.
Sayno niptïmi nimarqan: <<Paykunaqa seqaypa nakaykunata päsaq runakunami kaykäyan.#Dan. 12.1; Mat. 24.21; Mar. 13.19. Carnish yawarninta jichar wanushqanpitami perdonashna kaykäyan. Carnishpa yawarninwan taqshakush kayaptinmi mödanankuna yuraq kaykan.#Juan 1.29; 1Juan 1.7. 15Say runakunaqa Tayta Dios jamarashqan trönun nawpanchömi kaykäyan.
<<Paqasta junaqtami templuncho alabaykäyan.
Trönucho jamaraykaq Tayta Diosmi paykunata imaypis rikanqa.
16Paykunaqa imaypis mananami mikanäyanqanasu ni yakunäyanqanasu.
Intipis paykunata manami rupanqanasu.
Shanaypis mananami ajayäsinqanasu.#Sal. 121.6; Isa. 49.10.
17Tayta Dios jamarashqan trönun nawpancho Carnishmi paykunata misinqa.#Sal. 23.1; Eze. 34.23; Juan 10.1-16.
Imaypis mana yakunäyänanpaqmi kawasikuq yakuman pushanqa.#Sal. 23.2; Isa. 49.10; Juan 4.10; 7.37.
Kikin Tayta Diosmi shoqashpan weqinkunatapis pisapanqa>>.#Isa. 25.8; Apoc. 21.4.
Currently Selected:
Apocalípsis 7: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
