Mateo 24

Templuta juchusiyänanpaq kashqanta Jesús wilashqan

Marcos 13.1-2; Lucas 21.5-6

1Templupita yarqurir Jesús aywaykaptinmi discïpulunkuna rikasiyarqan templu kuyaylapaq kashqanta.

2Saymi Jesús nirqan: <<Rasunpami nï: Kay lapan rikaykäyashqaykita chipyaqmi juchusiyanqa. Manami ni juk rumilapis perqaranqanasu>>.

Manaraq kutimuptin imano kananpaq Jesús nishqan

Marcos 13.3-13; Lucas 21.7-19

3Saypitanami Olivos lömaman aywaykur Jesús jamakurqan. Saychömi kikilankuna kaykar discïpulunkuna tapur niyarqan: <<Wilaykayämay, tayta. ¿Imaytaq nishqaykino kanqa? Kutimunaykipaq y kay pasa ushakänanpaq ¿ima señaltaq kanqa?>>

4Sayno niyaptinmi Jesús nirqan: <<Cuidätaq pipis lulapaykäyäshunkiman. 5Askaqmi jutïcho shayämunqa <noqami Cristo kä> nir. Sayno nirmi aska runakunata engañayanqa. 6Guërra kaptinpis y guërra kananpaq kashqanta mayarpis ama mansakäyaysu. Puntataqa saykunaraqmi kanqa. Sayno kaptinpis kay pasa manaraqmi ushakanqaraqsu. 7Juk nacionmi juk nacionwan guërrata rurayanqa y juk marka runakunami juk marka runakunawan wanusinakuyanqa. Saynölami [pestipis,] muchuypis, terremötupis maysaycho kanqa. 8Say nakaykuna kanqa qalaykunalanraqmi.

9<<Say wisanmi nakasiyäshunki y wanusiyäshunki. Noqaman yärakayämashqaykipitami pïmaypis chikiyäshunki.#Mat. 10.22. 10Sayno nakarmi yärakayämashqanpita qepaman askaq kutikuyanqa. Paykunami qepaman mana kutiqkunata chikir autoridäkunaman juknintapis juknintapis apasiyanqa. 11Lula profëtakunapis askaq yuriyämushpanmi lutanta yachasir aska runakunata criyisiyanqa. 12Maysaychöpis jusalikur kawarmi kuyanakuyanqanasu. 13Sayno kaptinpis wanuyashqanyaq yärakamaqkunaqa salvashqami kayanqa.#Mat. 10.22. 14Tayta Dios mandaykashqanpa ali wilakuyninta maysay nacionkunachöpis wilakuskiyaptinraqmi kay pasa ushakanqa.

Nakaykuna kananpaq kashqanta Jesús tantiyasishqan

Marcos 13.14-23; Lucas 21.20-24

15<<Profëta Daniel qelqashqannölami Tayta Dios mana munashqanta sagrädu templucho rikayanki.#Dan. 9.27; 11.31; 12.11. (Kay qelqashqäta liyiqkunaqa shumaq tantiyakuyäsun.)#24.15 Kay qelqashqäta liyiqkunaqa shumaq tantiyakuyäsun nishqanqa manami Jesucristo nishqansu kaykan, sinöqa kay libruta qelqaq Mateo yapashqanmi. 16Sayno kaykaqta rikar Judea markakunacho taqkuna jirkakunapa qeshpir aywakuyäsun. 17Wayi janancho kaykaqkuna#24.17 Say wisanmi wayita qatananpa trukan terrädu jananman saqlarkur mituwan tortarkuyaq. Say jananchönami warmikuna y runakuna awakuyaq, aqakuyaq y trïgutapis akrayaq. imankunatapis mana jorquylapa qeshpikuyäsun. 18Chakracho kaykaqkunapis ni punchunta jorquqpis kutiyäsunsu.#Luc. 17.31.

19<<¡Ay imanöraq nakaykuyanqa qeshyaq warmikuna y iti wawayuq warmikuna! 20Tayta Diosta manakuyay qeshpiyashqayki junaq tamya killacho ni jamay junaqcho mana kananpaq. 21Say wisanqa runakuna fiyupami nakayanqa. Tayta Dios kay pasata kamashqanpita pasa imaypis manami sayjinanpa nakayashsu.#Dan. 12.1; Apoc. 7.14. Saynöpis yapayqa mananami imaypis sayno nakayanqanasu. 22Akrashqan runakunata kuyaparmi Tayta Dios say nakay junaqkunata päsasinqa. Mana päsasiptinqa lapanpis wanurmi ushakäyanman.

23<< <Tayta Dios kachamushqan Cristo kaychömi kaykan> niyäshuptikipis ama criyiyankisu. <Wakchömi kaykan> niyäshuptikipis ama cäsupäyankisu. 24Say wisanmi Cristo tukuqkuna y lula profëtakunapis yuriyämunqa. Runakunata criyisiyänan kashqami admiraypaq milagrukunatapis rurayanqa. Sayno rurarmi Tayta Dios akrashqan runakunatapis engañayta munayanqa. 25Manaraq sayno kaptinmi musyayänaykipaq qamkunata wilaykä.

26<< <Tayta Dios kachamushqan Cristo sunyaq jirkachömi kaykan> niyäshuptikipis rikaq ama aywayankisu. <Say wayichömi kaykan> niyäshuptikipis ama criyiyankisu. 27Elqukuptin ciëlupa juk kuchunpita jukaq kuchunyaq asikyashqanta rikayashqannömi Runapa Surin kutimuptin lapanpis rikayanqa.#Luc. 17.23-24. 28Maychöpis wanushkuna jitaraykäyashqanmanmi wiskurkuna juntakäyanqa>>.#24.28 Sayno nirmi Jesucristo tantiyasirqan nishqankuna maysaychöpis päsananpaq kashqanta.#Luc. 17.37.

Jesús kay pasaman kutimunanpaq kashqan

Marcos 13.24-37; Lucas 17.26-30, 34-36; 21.25-33

29<<Fiyupa nakaykuna päsarkuptinmi intipis sakakäkunqa, killapis asikyämunqanasu, qoyllarkunapis shikwayämunqa y jana pasapis suksukyanqa.#Isa. 13.10; 34.4; Eze. 32.7; Joel 2.10, 31; 3.15; Apoc. 6.12-13. 30Saypitanami Runapa Surin shamunanpaq señal jana pasacho rikakämunqa. Runapa Surin shamuptinnami pukutay janancho seqaypa chipipiykar munayyuq shamuykaqta maysaychöpis runakuna rikayanqa. Sayno shamuykaqta rikarmi lapan nación runakuna mansarir waqayanqa.#Dan. 7.13; Apoc. 1.7. 31Cornëta sinchipa waqamuptinmi angilninkunata Runapa Surin kachamunqa akrashqan kaqkunata maysaypitapis shuntayämunanpaq.

32<<Hïgus jachata rikar tantiyakuyay. Raprankuna chinkimuptinmi usya tiempu qalaykunanpaqna kashqanta musyayanki. 33Saynölami nishqäno päsaykashqanta rikar musyayanki Tayta Dios mandaykashqan cercachöna kashqanta. 34Rasunpami nï: Kanan tiempu runakuna manaraq ushakaptinmi lapan nishqäkuna cumplikanqa. 35Jana pasa y kay pasa ushakaptinpis noqa nishqäkuna manami ushakanqasu.

36<<Runapa Surin imay junaq imay höra kutimunanpaq kashqanta manami runapis ni angilpis [ni Diospa Surinpis] musyayansu. Saytaqa Taytä japalanmi musyaykan.

37<<Noé kawashqan wisan runakuna kawayashqannömi#Gén. 6.5-8. Runapa Surin shamushqan wisanpis kawaykäyanqa. 38Diluviu manaraq kaptin arcaman Noé yaykushqan junaqyaqmi runakuna mikur, upyar y majasakar kaykäyarqan. 39Sayno kaykäyaptinmi diluviu elaqpita shamuptin#Gén. 7.6-24. lapanpis shenqaypa wanur ushakäyarqan. Saynölami mana musyayashqan höra Runapa Surinpis elaqpita shamunqa.

40<<Say hörami ishkaq runakuna chakrancho aruykaqpita jukaqta pushakunqa y jukaqta kachaykunqa. 41Maraycho ishkaq warmikuna aqakuykaqpitami jukaqta pushakunqa y jukaqta kachaykunqa. 42Saymi kamarikushlana kaykäyänayki. Manami musyayankisu imay junaq Señorniki kutimunanpaq kashqantapis.

43<<Tantiyakuyay. Imay höra suwa shamunanpaq kashqanta musyarqa mana punuypami wayinta pipis täpanman. 44Saynöla qamkunapis kamarikushla kaykäyay. Mana musyayashqayki hörami elaqpita Runapa Surin shamunqa.#Luc. 12.39-40.

Ashmayman Jesús tinkusishqan

Lucas 12.41-48

45<<Mas yärakuypaq y tantiyakuq kaq ashmaynintami wayinman patronnin churan wakin ashmaykunatapis höralancho qarananpaq. 46Patronnin kutimur yäsishqanno lapantapis ruraykaqta tariykuptinqa say ashmay seqaypami kushikunqa. 47Rasunpami nï: Say ashmaypa makinmanmi lapan imaykantapis patronnin churanqa. 48Mana yärakuypaq ashmay karmi isanqa <patronnï manaraqmi kutimunqaraqsu> nir 49ashmay mayinkunata maqan y upyaq mayinkunawan mikur upyar jitaräkun. 50Sayno kaykaptinmi mana yarpashqan höra elaqpita patronnin kutimur 51mana kuyapaypa ishkay cära runakunatawan say ashmayta castiganqa. Saychömi fiyupa waqar kiruntapis uchunqa>>.

Currently Selected:

Mateo 24: qvhB

Highlight

Copy