Mateo 25

Chunka jipashkunaman tinkusiypa Jesús yachasishqan

1<<Tayta Dios mandaykashqan imano kashqantapis wilapäshayki. Chunka jipashkunashi aksinkunata apakurkur shuyaq aywayänaq casarakuq maqta shamuptin fiestaman yaykuyänanpaq. 2Pisqa kaq jipashkunashi ali yarpayyuq kayänaq. Pisqa kaqnashi yarpayniynaq kayänaq. 3Yarpayniynaq kaqkunaqa manashi aksinpaq aceitita yapayänanpaq apayänaqsu. 4Ali yarpayyuq kaq jipashkunashi isanqa aksinpaq aceitita apayänaq. 5Casaraq maqta jukla mana chaptinshi say jipashkuna shuyaraykäyashlancho punukäkuyänaq.

6<<Pulan paqasnashi juk runa qayakamunaq: <¡Casarakuq maqta shamuykannami! ¡Chaskikuq yarqayämuy!> nir. 7Sayshi lapan jipashkuna sharkuyashpan aksinkunata sarisiyänaq. 8Aksin upikaptinshi yarpayniynaq jipashkunaqa ali yarpayyuq kaqkunata manakur niyänaq: <Aksïkuna upikäkunmi. Aceitikita manakushayki>. 9Sayno niyaptinshi ali yarpayyuq kaqkuna niyänaq: <Mana ushakäpakunansipaq aceiti rantikuqkunapita jukla rantiyämuy>.

10<<Aceiti rantiq aywayashqanyaqshi casaraq maqta chänaq. Sayshi kamarikush shuyaraykaq jipashkunawan fiestaman yaykuskiyaptin punku wichqakäkunaq. 11Saypitanashi aceiti rantiq aywaq jipashkuna kutiykur punku wichqaraykaqta tariyänaq. Sayshi qayakuyänaq: <¡Taytay, taytay! ¡Punkuta kichapaykayälämay!> nir. 12Sayno qayakuyaptinshi casarakuq maqta ruripita nimunaq: <Qamkunata manami reqïsu. ¡Piraq kakuyankipis!> nir>>.#Luc. 13.25.

13Sayno wilaparkurmi Jesús nirqan: <<¡Qamkunapis maya mayala kaykäyay! Manami musyayankisu imay junaq ni imay höra [Runapa Surin kutimunanpaq kashqantapis]>>.

Ashmayninkunata patronnin qellayta kachapashqan

Lucas 19.11-27

14<<Tayta Dios mandaykashqan imano kashqantapis wilapäshayki. Juk runashi karupa aywakunanpaq ashmayninkunata qayaykur qellayninta arusiyänanpaq kachapänaq. 15Habilidäninkuna imano kashqantapis tantiyaykurshi jukninta pisqa talentu#25.15 Juk talentu karqan juk runa ishkay chunka (20) wata arur gänashqannömi. qellayta kachapänaq, jukninta ishkay talentu qellayta kachapänaq y juknintanashi juk talentu qellayta kachapänaq. Nirkurshi karu markapa aywakunaq. 16Pisqa talentu qellayta chaskiq kaqqa negociuta rurarshi pisqa talentu masta mirasinaq. 17Ishkay talentu qellayta chaskiq kaqpis negociuta rurar ishkay talentu mas qellaytashi mirasinaq. 18Juk talentu qellayta chaskiq kaqshi isanqa pasata uchkuykur pampaykunaq.

19<<Patronnin unayta kutiykurnashi qellayninta kachapashqanpita cuentata mananaq. 20Sayshi pisqa talentu qellayta chaskiq kaqqa pisqa talentu mas qellayta entregar ninaq: <Taytay, pisqa talentu qellayta kachapämashqaykiwan pisqa talentu mastami mirasishkä>.

21<<Sayno niptinshi patronnin ninaq: <Ali ashmaymi qam kanki. Walkalapitapis qellayta mirasishqaykipitami mas mandaq kanaykipaq churashayki. Wayïman yaykamuy fiestata rurar kushikunansipaq>.

22<<Saynölashi ishkay talentu qellayta chaskiq kaqpis ninaq: <Taytay, ishkay talentu qellayta kachapämashqaykiwan ishkay talentu mastami gänashkä>.

23<<Niptinshi patronnin ninaq: <Ali ashmaymi kanki. Walkalapitapis shumaq mirasishqaykipitami mas mandaq kanaykipaq churashayki. Wayïman yaykamuy fiestata rurar kushikunansipaq>.

24<<Juk talentu qellayta chaskiq ashmayninshi isanqa ninaq: <Noqa musyämi mana kuyapäkuq kashqaykita, taytay. Qamqa mana murushqaykipitami cosechanki. Mana uryashqaykipitami shuntanki. 25Sayno kaptiki mansakurmi qellaynikita pampaykurqä. Kä qellayniki, tayta. Kashlantami apamushkä>.

26<<Sayno niptinshi patronnin ninaq: <¡Qamqa mana yärakuypaq qela ashmaymi kanki! Mana murushqäpita cosechashqäta musyaykar y mana uryashqäpita shuntashqäta musyaykarqa 27qellaynïta banculamanpis churankiman karqan kutimur mirashtana shuntakunäpaq>.

28<<Nirkurnashi saycho kaykaq runakunata ninaq: <¡Sararashqan qellaynïta qechuskir chunka talentu qellay sararaqta qoykuyay! 29Yärakuypaq kaqtaqa mastami kamaripäshaq. Mana yärakuypaq kaqtami isanqa sararashlantapis qechushaq.#Mat. 13.12; Mar. 4.25; Luc. 8.18. 30Kay yarpayniynaq ashmayta yanawyaykaq sakayman jitarpuyay. Saychömi fiyupa waqar kiruntapis uchunqa> >>.#Mat. 8.12; 22.13; Luc. 13.28.

Juiciu finalcho imano kananpaq kashqanpis

31<<Runapa Surin chipipiykar santu angilninkunawan shamurmi#Mat. 16.27. chipipiykaq trönunman jamaykunqa.#Mat. 19.28. 32Say junaqmi maysay nacionpitapis lapan runakuna nawpanman shuntakäyanqa. Saychömi misikuq runa uyshakunata cabrakunapita rakishqanno runakunata rakinqa. 33Uyshakunatami aluq kaqläman rakinqa y cabrakunatanami isuq kaqläman rakinqa.

34<<Aluq kaqlächo kaykaqkunatami ninqa: <Qamkunata seqaypami Taytä kuyayäshunki. Tayta Dios mandaykashqanman yaykuyänaykipaq shayämuy. Kay pasata manaraq kamarmi mandashqanta qamkunapaq Taytä kamarish. 35Qamkunami mikanaptïpis qarayämashkanki. Yakunaptïpis yakuta qoyämashkankimi. Jäpa kaptïpis päsasiyämashkankimi. 36Mödanaynaq kaykaptïpis mödanata kamaripäyämashkankimi. Qeshyaptïpis jampiyämashkankimi. Carcilcho wichqaraptïpis watukayämashkankimi>.#Heb. 13.3.

37<<Sayno niptinmi say ali ruraqkuna tapuyanqa: <Taytay, ¿imaytaq mikanaptiki qarayashkä? ¿Imaytaq yakunaptiki yakuta qoyashkä? 38¿Imaytaq jäpa kaptiki päsasiyashkä? ¿Imaytaq mödanaynaq kaptiki mödanata kamaripäyashkä? 39¿Imaytaq qeshyaptiki o carcilcho wichqaraptiki watukaq shayämushkä?> 40Sayno niyaptinmi rey ninqa: <Rasunpami nï: Pitapis sayno nakaqkunata kuyaparqa noqatami kuyapäyämashkanki>.#Eze. 18.7.

41<<Nirkurmi isuqnincho kaykaq runakunata ninqa: <¡Maldicionash kaqkuna, nawpäpita witikuyay! ¡Diablupaq y angilninkunapaq kamarish imaypis mana upiq ninaman aywayay! 42Qamkunaqa mikanaptïpis manami qarayämashkankisu. Yakunaptïpis manami yakuta qoyämashkankisu. 43Jäpa kaptïpis manami posädasiyämashkankisu. Mödanaynaq kaptïpis manami mödanata kamaripäyämashkankisu. Qeshyaptïpis carcilcho wichqaraptïpis manami watukayämashkankisu>.

44<<Sayno niptinmi isuqnincho kaq runakunapis tapuyanqa: <Taytay, ¿imaytaq qam mikanaykaqta, yakunaykaqta, jäpa kaykaqta, mödanaynaqta, qeshyaykaqta, carcilcho wichqaraykaqta rikaykar yanapäyashkäsu?> 45Saymi paykunata ninqa: <Rasunpami nï: Pitapis sayno nakaqkunata mana kuyaparmi noqata kuyapäyämashkankisu> >>.#1Cor. 8.12.

46Sayno wilaparkushpanmi Jesús nirqan: <<Say mana kuyapäkuq runakunaqa imayyaqpis castigashqami kayanqa. Tayta Dios munashqanno kuyapäkuq runakunami isanqa mana ushakaq kawayta tariyanqa>>.#Dan. 12.2.

Currently Selected:

Mateo 25: qvhB

Highlight

Copy