Malaquías 3

1Lapanta mandaq Tayta Diosmi nin: <<Nänita pisaq japuy runakunata kamarikasinanpaqmi wilakuqnïta puntäta kachashaq.#Mat. 11.10; Mar. 1.2; Luc. 1.76; 7.27. Saypitanami shuyakuykäyashqayki mandaq chämur elaqpita templuman yaykunqa. Paymi qamkunawan pactu rurashqäta wilakunqa. Rikayta munayashqayki wilakuq chämunqanami.

2<<Paymi jusalikuyashqaykipita purificashunaykipaq wararaykaq ninano y taqshakuna jabonno kanqa.#Mat. 3.10-12. Sayno kaykaptinqa chämuptin ¿piraq awantanman? Saynöpis paypa nawpancho ¿piraq ichiraykanman?#Joel 2.11; Apoc. 6.17. 3Payqa qorita y qellayta ninawan sulusir qanranta jorquqnömi levitakunata purificanqa. Noqa munashqänöna sacrificiukunata altarcho rupasiyaptinqa 4Judá y Jerusalén runakuna sacrificiuta apayämushqanta kushishqami chaskikushaq. Unay ayllunkuna sacrificiukunata apayämuptin chaskishqänömi paykunapis apayämuptin kushish chaskikushaq>>.

5Lapanta mandaq Tayta Diosmi nin: <<Kikïmi qamkunata juzgayäshayki brüjuta rurayaptiki, majayuq kaykar jukwan kakuyaptiki, jutïcho promitirkur mana cumpliyaptiki, arusiyashqaykita mana pägayaptiki, viüdata y waksata nakasiyaptiki, jäpa runata mana ali rikayaptiki y mana mansapakayämaptiki>>.

Diezmuta y ofrendata apayänanpaq nishqan

6<<Noqa Tayta Dios imaypis promitishqäta cumplïmi.#Núm. 23.19; Heb. 13.8; Stg. 1.17. Saymi unay aylluyki Jacobta promitishqäta#Gén. 28.13-15; 35.10-12. cumplir qamkunata ushakäsishkäsu. 7Sayno kaptinpis qamkunaqa unay aylluykikuna kawayashqanpita pasami leynïkunata cumpliyankisu. Saymi lapanta mandaq Tayta Dios kar kayno nï: ¡Noqaman kutiyämuy! Noqaman kutiyämuptikiqa yapaymi yanapäyäshayki.#Isa. 55.7; Zac. 1.3.

<<Sayno nikaptïmi qamkuna niyanki: <¿Imatataq mana cäsukuyashkäsu?>

8<<Qamkuna suwapaykäyämankimi>>.

<<Sayno niptïmi qamkunaqa nikäyämanki: <¿Imatataq qamta suwapäyashkä?>

<<Qamkuna suwapäyämashkanki diezmuta y ofrendata mana apamurmi. 9Qamkuna lapan nacionninpa suwapäyämashqaykipitami maldicionädu kaykäyanki.

10<<Diezmukunata lapanta wayïcho tröjäman apayämuy. Saynöpami wayïcho saysika mikuy kanqa. Saynömi ciëlu punkuta kichar qamkunaman bendicionnïta pusuy pusuytami churamushaq. Rasunpaypa churamunäpaq kashqäta musyayänaykipaq diezmuta apayämuy.#Lev. 27.30; Deut. 12.6; 14.22-29; 26.12; Neh. 13.12; Eze. 44.29-31. Noqa lapanta mandaq Tayta Diosmi sayno nï. 11Mikuy ushaq kurukunata ushakäsiptïmi chakraykikuna ali wayunqa y üvaykikunapis tampiraypaqraq wayunqa. Noqa lapanta mandaq Tayta Diosmi sayno nï. 12Markayki täkuy munay kaptinmi lapan nación runakunapis munapäyanqa. Noqa lapanta mandaq Tayta Diosmi sayno nï>>.

Cäsukuq kaqkunata kuyapänanpaq nishqan

13Mastapis Tayta Diosmi nin: <<Qamkuna conträmi parlayashkanki.

<<Sayno niptïmi niyämanki: <¿Imatataq contrayki parlayashkä?>

14<<Qamkunaqa conträ parlarmi niyashkanki: <Walälami Diosta sirvinsi. ¿Imalapaqtaq leyninkunatapis cäsukunsi? Jusalikushqansipita lakikushqapis lapanta mandaq Tayta Dios manami cäsumansisu. 15Orgullösu runakunaqa kushishqami kawayan. Jusalikuqkunapis rïcumi kaykäyan. Tayta Diosta mana cäsukuyaptinpis paykunapaqqa ima castïgupis manami kansu> >>.#Mal. 2.17.

16Saymi Tayta Diosta mansapakuqkuna wilanakur shakyäsinakuyarqan payta imaypis cäsukuyänanpaq. Sayno wilanakuyashqanta wiyarmi Tayta Diosqa rölluman jutinkunata nawpancho qelqasirqan imaypis yarparänanpaq.

17Lapanta mandaq Tayta Diosmi nin: <<Juzganä junaqmi say runakunata kuyapäshaq. Cäsukuq surinta papänin kuyapashqannömi noqapis paykunata kuyapäshaq.#Sal. 103.13. 18Saymi runakuna yapay tantiyayanqa cäsukamaqkunata kuyapashqäta y mana cäsukamaqkunata castigashqäta, sirvimaqkunata ali rikashqäta y mana sirvimaqkunata mana ali rikashqätapis>>.

Currently Selected:

Malaquías 3: qvhB

Highlight

Copy