Hechos 17

Tesalónicacho Pablupa y Silaspa contran sharkuyashqan

1Saypita Anfípolis y Apolonia markakunapa päsarmi Pabluwan Silas Tesalónica markaman chäyarqan. Saycho sinagöga kaptinmi 2imaypis aywashqanno say sinagögamanpis Pablo aywarqan. Saychömi Tayta Diospa palabranta kimsa jamay junaq yachasirqan. 3Sayno yachasirmi salvamaqninsi Cristo wanushqanta y kawarimushqanta tantiyasirqan. Saynöpis nirqan: <<Jesúsmi salvamaqninsi Cristo kaykan>>.

4Sayno niptinmi wakin Israel runakuna Jesucristuman yärakur Pabluwan y Silaswan juntakäyarqan. Saynölami Tayta Diosta mansapakuq mana Israel runakunapis y rïca warmikunapis Jesucristuman aska yärakuyarqan. 5Jesúsman mana yärakuq Israel runakunami isanqa Pabluta chikiyashpan qela runakunata niyarqan: <<Pablupa y Silaspa contran sharkuyänanpaq runakunata shimita qoyay>>.

Yachasiyashqanno shimita qoyaptinmi Pablutawan Silasta ashir aska runakuna Jasónpa wayinman rabyash yaykuyarqan.

6Saycho mana tariykurnami Jasóntawan wakin wawqikunatana autoridäkunaman apaykur niyarqan: <<¡Kay runakunaqa lutanta yachasirmi maysaypapis puriykäyan! ¡Kananqa kay markamannami chäyämush! 7¡Jasónmi paykunata posädasish! ¡Jesús jutiyuq runa mas munayyuq rey kashqanta nirmi mandamaqninsi rey Césarpa leyninkunata manakaqman churaykäyan!>>

8Sayno niyaptinmi saycho kaq runakuna y autoridäkunapis fiyupa rabyakuyarqan. 9Saymi Jasóntawan wakin kaq wawqikunata autoridäkuna multata pägarkasir kachariyarqan.

Pabluwan Silas Berea markacho wilakuyashqan

10Say sakaymi Pablutawan Silasta wawqi panikuna Berea markaman kachayarqan. Bereaman chaykurmi sinagögaman yachasiq aywayarqan. 11Berea runakuna Tesalónica runakunapita mas tantiyakuq karmi Tayta Diospa wilakuyninta lapan shonqunwan chaskikuyarqan. Pabluwan Silas yachasiyashqan rasunpaypa kashqanta musyayänanpaqmi Tayta Diospa palabranta waran waran yachakuyarqan. 12Say markachöqa aska Israel runakuna, mana Israel runakuna y mana Israel kaq rïca warmikunapis Jesúsman criyiyarqanmi.

13Tayta Diospa wilakuyninta Bereachöpis Pablo wilakuykashqanta musyarmi Tesalónicacho taq Israel runakuna sayman aywayarqan. Chaykurmi runakunata shimita qoyarqan Pablupa contran sharkuyänanpaq. 14Saymi wawqi panikuna jinan höra Pabluta qeshpisiyarqan lamar kuchunman. Silaswan Timoteunami Bereacho quëdakuyarqan. 15Pabluta pushaqkuna Atenas markayaqmi chäsiyarqan. Kutikuyaptinnami Pablo nirqan: <<Bereaman chaykur Silastawan Timoteuta kayman jukla kachayämuy>>.

Atenas markacho Pablo wilakushqan

16Atenascho Silasta y Timoteuta shuyaraqno purirmi aska ïdulukunata rikar Pablo fiyupa rabyanarqan. 17Saynöpis sinagögaman aywarmi Israel runakunata y Diosta mansapakuq mana Israel runakunatapis Tayta Diospa wilakuyninta tantiyasiq. Pläzamanpis waran waran aywarmi runakunata wilapaq.

18Saychömi Epicúreo y Estoico nishqan yachaq runakunawanpis wilanakuyaq. Jesúspita wilapaptin y wanushkuna kawariyämunanpaq kashqanta wilapaptinmi wakin runakuna niyarqan: <<Kay yachaq tukuq runa ¿imataraq parlakunpis?>>

Y wakinnami niyarqan: <<Kay runaqa mana reqishqansi dioskunapitami parlakun>>.

19Saymi masta tantiyasinanpaq say runakuna Pabluta pushayarqan autoridäkuna shuntakäyashqan Areópago nishqanman. 20Saychömi Pabluta niyarqan: <<Qam yachaykäsinki imaypis mana wiyayashqätami. Saymi imano kashqantapis shumaq musyayta munayä>>.

21(Atenas runakuna y saycho taq jäpa runakunapis mushuq yachasikuy kaptinqa imaypis wiyayaqmi. Nirkurmi waran waran say wiyayashqankunalata parlayaq.)

22Saymi Areópagucho shuntaraykaq autoridäkunapa nawpanman ichiykur Pablo nirqan: <<Atenas runakuna, noqa tantiyaykä dioskunata adorayman umayki churakash kaykäyashqaykitami. 23Markapa purirmi capillakunata, altarkunata y ïdulukunatapis rikashkä. Saynöpis juk altarcho rikashkä <kay altarqa mana reqishqansi diospaqmi> nir qelqaraykaqtami. Say mana reqiyashqayki Diospitami wilakuykä.

24<<Paymi kay pasata y lapan imaykatapis kamash. Jana pasatapis y kay pasatapis munayninchömi sararaykan. Saymi runakuna rurayashqan templucho tansu.#1Rey. 8.27; Isa. 42.5. 25Noqansi manami imatapis payta kamaripansisu. Saypa trukanqa paymi kawanansipaqpis jämayta qomansi y lapan munashqansikunatapis kamaripämansi.

26<<Juk runalata kamarkurmi bendicionninta churamurqan askaqman miraptin nacionkuna maysaychöpis kayänanpaq. Paymi destinarqan say nacionkuna imayyaq kayänanpaq y kuchunkuna may maypa kayänanpaqpis. 27Tayta Dios sayno kamakäsish imaykanöpapis payman yärakunansipaqmi. Payqa manami noqansipita karuchösu kaykan, sinöqa nawpansichömi kaykan. 28Tayta Dios yanapämashqaraqmi kawansipis y purinsipis. Marka mayikipis shumaq yarpachakurir kayno nirmi qelqarqan: <Lapansipis paypa wamrankunami kaykansi>.

29<<Tayta Diospa wamran kaykarqa ama yarpäshunsu qoripita, qellaypita o rumipita rurash ïdulukunano Dios kashqanta. Saykunataqa runakuna kikinpa yarpaylanpitami rurayan. 30Runakuna mana musyayninpa ïdulukunata rurayashqanpita Tayta Dios manami castigarqansu. Kananqa maysaycho taq runakunata nikan ïdulukuna adorayta kacharir pay munashqannöna kawayänanpaqmi. 31Lapan runakunata mana jananpaypa juzgananpaqmi#Sal. 9.8. Tayta Dios juk runata akrash. Say runa pï kashqantapis musyanansipaqmi wanushqanpita kawarisimush>>.

32Wanushqanpita kawarimushqanta Pablo niptinmi wakin runakuna asipäyarqan. Wakin runakunanami niyarqan: <<Yapaychömi qayasiyäshayki masta tantiyasiyämänaykipaq>>.

33Saymi say runakuna shuntakäyashqanpita Pablo aywakurqan. 34Juk ishkay runakunami isanqa Pablo wilapashqankunata criyir paywan shuntakäyarqan. Paykunami kayarqan Areópagucho mandaq Dionisio, Dámaris jutiyuq warmi y mas wakinkunapis.

Currently Selected:

Hechos 17: qvhB

Highlight

Copy