Hechos 18

Corintucho Pablo wilakushqan

1Saypitanami Atenaspita aywakur Corinto markamanna Pablo charqan. 2Saychömi Aquila jutiyuq Israel runawan reqinakuyarqan. Aquilaqa Ponto provinciacho yuriq runami karqan. Warminpa jutinmi karqan Priscila. Paykuna sayraqmi Italiapita Corintuman chäyash kayarqan. Corintuman aywakuyarqan Claudio César lapan Israel runakunata Romapita qarquptinmi. Reqinakuyashpanmi 3paykunawan Pablo tarqan toldërata rurayashpan. Pablunölami Priscilawan Aquilapis toldëra rurayta yachayarqan.

4Cada jamay junaq sinagögaman aywarmi Israel runakunata y mana Israel runakunatapis Jesucristupita Pablo yachasirqan. 5Macedonia provinciapita Silaswan Timoteo chäyaptinnami Pabluqa aruyninta kachaykur waran waran Tayta Diospa wilakuyninta wilakurqan. Wilakurmi Israel mayinkunata tantiyasirqan Jesúsqa salvamaqninsi Cristo kashqanta. 6Sayno wilakuptinmi Israel runakuna Pablupa contran sharkuyashpan tukuyta ashliyarqan. Saymi mödananta tapshirishpan Pablo nirqan: <<Tayta Dios castigayäshunaykipaq kikikikunami jusayuq kaykäyanki. Noqaqa Tayta Diospa wilakuyninta wilapashkänami. Kananpitaqa mana Israel runakunatanami wilapäshaq>>.

7Sayno nirmi say sinagögacho yachasinanpa trukanqa Ticio Justupa wayinchöna yachasirqan. Justuqa mana Israel runa kaykarpis Tayta Diosta mansapakuq runami karqan. Paypa wayin karqan sinagöga nawpalanchömi. 8Saycho yachasiptinmi sinagögacho mandaq runa y say runapa wayincho taqkunapis Señor Jesucristuman yärakuyarqan. Say runapa jutinmi karqan Crispo. Saynölami Corintucho taq wakin runakunapis Pablo wilakushqanta wiyar Jesúsman yärakuyashpan bautizakuyarqan.

9Juk sakaymi Pabluta revelacioncho yuriparkur Jesucristo nirqan: <<Mana mansariypa y mana upälakuypa wilakuynïta wilakuy. 10Kay markacho salvanäpaq kaq runakuna askaqmi kaykäyan. Saymi wilakuptiki pipis mana yatashunaykipaq qamwan kaykäshaq>>.

11Sayno niptinmi Tayta Diospa wilakuyninta yachasishpan juk wata soqta killantin Corinto markacho Pablo tarqan.

12Galión jutiyuq runa Acaya provinciapa#18.12 Acaya provinciachömi Corinto marka karqan. mandaqnin kanan wisanmi Pablupa contran Israel runakuna sharkuyarqan. Saymi Pabluta Galiónpa despächunman apaykur 13niyarqan: <<Kay runaqa Tayta Diospa leyninkunata mana cäsurmi lutanta yachaykäsin>>.

14Pablo parlananpaq kaykaptinnami Galión nirqan: <<Israel runakuna, kay runa suwakush o pitapis wanusish kaptinqa qamkunata atiendïmanmi. 15Leynikikunapita rimanakuyashqaykitaqa manami musyayta munäsu. Kikikikuna imanöpis saytaqa arreglakuyay>>.

16Sayno nirmi despächunpita qarqurqan. 17Saypitanami sinagögacho mandaq Sóstenesta despächu punkucho sarikuykur runakuna fiyupa maqayarqan. Maqayaptinpis Galiónta manami imapis qokurqansu.

Antioquíaman Pablo kutishqan

18Saypita aska killaraqmi Corinto markacho Pablo tarqan. Nirkurnami wawqi panikunapita despidikur Cencrea markaman aywarqan. Saychönami Tayta Diosta promitishqanta cumplir aqsanta rutukurqan.#Núm. 6.18. Nirkurnami Priscilawan y Aquilawan büquiman wisarkur Siria provinciaman aywakuyarqan.

19Éfeso markaman chaykurmi Priscilawan Aquila saycho quëdakuyarqan. Pablunami Éfesupita manaraq päsar sinagögaman aywaykur Israel runakunata Jesúspita wilaparqan. 20Sinagögacho kaq runakuna paykunata qoyäpänanpaq ruwakuyaptinpis Pablo manami munarqansu. 21Saypa trukanqa paykunapita despidikurmi nirqan: <<[Pascuapaqmi Jerusalénman imaykanöpapis chayta munaykä.] Tayta Dios munaptinqa yapaymi kutimushaq>>.

Sayno nishpanmi büquiman wisarkur Éfesupita aywakurqan.

22Cesarea markaman charnami büquipita yarqurir Jerusalénman aywarqan wawqi panikunata watukaq. Saypitanami Antioquíaman kutikurqan. 23Saycho tarkurnami Galacia y Frigia provinciakunapa yapay kutir markan markan purirqan discïpulukunata#18.23 Discïpulukunapaq parlarqa Jesucristuta chaskikuqkunapaqmi parlaykan. shakyäsir.

Éfesucho Apolos wilakushqan

24Say wisanmi shumaq parlayta yachaq Apolos jutiyuq Israel runa Éfeso markaman charqan. Pay karqan Alejandría markapitami. Saynöpis Tayta Diospa palabranta shumaqmi yacharqan. 25Tayta Diospa wilakuyninta ali yacharpis bautismupitaqa Juan yachasishlantami yacharqan. Sayno karpis Señor Jesucristupita lapan shonqunwanmi kushish yachasirqan. 26Sinagögacho pitapis mana mansapaypa wilakuykaqta wiyarmi Priscilawan Aquila jukläman pushaykur Tayta Diospa wilakuyninta masta tantiyasiyarqan.

27Acaya provinciaman Apolos aywayta munaptinmi wawqi panikuna shakyäsiyarqan. Saymi Acayacho kaq wawqi panikunaman cartakuyarqan chaptin payta chaskikuyänanpaq. Say wawqi panikuna yärakuyänanpaqmi Tayta Dios kuyapar tantiyasirqan. Acayaman Apolos chashqanmi Jesucristuman yärakuqkunapaq seqaypa ali karqan. 28Paymi Israel runakunata Tayta Diospa palabranta shumaq yachasir Jesús salvamaqninsi Cristo kashqanta tantiyasirqan.

Currently Selected:

Hechos 18: qvhB

Highlight

Copy