Hechos 13

Bernabéta y Sauluta Espíritu Santu akrashqan

1Antioquía iglesiachömi kayarqan profëtakuna y yachasikuqkuna. Paykunami kayarqan Bernabé, Yana Runa niyashqan Simón, Cirenipita kaq Lucio, Manaén y Saulupis. Manaéntawan rey Herodesta wamra kaptin say wayilachömi ashmayarqan. 2Juk junaq Tayta Diosman yärakuqkuna ayunar alabaykäyaptinmi Espíritu Santu nirqan: <<Bernabéta y Sauluta churayay wilakuynïta wilakur puriyänanpaq. Saypaqmi paykunata qayashkä>>.

3Ayunarkurnami Bernabépa y Saulupa umanman makinkunata churaykur Tayta Diosta manakuyarqan. Nirkurmi paykunata despachayarqan.

Chipricho wilakuyashqan

4Espíritu Santu sayno kachaptinmi Bernabé y Saulo chäyarqan Seleucia markaman. Saypitanami büquiman wisarkur Chipre islaman aywayarqan. 5Salamina markaman chaykurmi sinagögakunacho Tayta Diospa wilakuyninta wilakuyarqan. Marcos niyashqan Juanpis paykunata yanaparmi purirqan.

6Chipripa päsar wilakurmi Pafos markaman chäyashpan Barjesús jutiyuq Israel runata tariyarqan. Paymi profëta tukuq brüju karqan. 7Say brüjumi Chipripa mandaqnin Sergio Pauluta yanapar purirqan. Sergio Pauluqa ali yarpayyuq runami karqan. Tayta Diospa wilakuyninta wiyayta munarmi Bernabétawan Sauluta qayasirqan. 8Brüjunami paykunapa contran sharkur Sergio Pauluta micharqan wilakuyashqanta mana chaskinanpaq. Barjesústa brüju kaptinmi Elimas#13.8 Elimas ninanqa brüju ninanmi. niyaq.

9Sayno michaptinmi Saulo rabyanarqan. (Saulupa jukaq jutinmi karqan Pablo.) Saymi rikärir Espíritu Santupa munayninwan 10nirqan: <<¡Diablu munashqanta rurarmi qamqa Tayta Diospa contran kaykanki! ¿Imayyaqtaq runakunata lulapar Tayta Diospa wilakuqnin tukunki? 11Sayno kashqaykipitami Tayta Diospa castïgunwan qapra rikakur juk tiempuyaq asikyay pasata rikankipaqsu>>.

Sayno niptinmi jinan höra qapra rikakurqan. Maypapis aywayta mana kamäpakurmi janchayänanpaq runakunata ruwakurqan. 12Qaprayashqanta rikaykur y Diospa wilakuynin ali kashqanta tantiyakurmi Sergio Paulo criyirqan.

Pisidiacho kaq Antioquíacho wilakushqan

13Saypitanami büquiman wisarkur Pafos markapita Panfiliacho kaykaq Perge markaman Pablo yanapaqninkunawan aywayarqan. Saycho paykunata kachariykurmi Marcos nishqan Juan Jerusalénman kutikurqan. 14Perge markapita aywarmi Pisidiacho kaq Antioquía markaman Bernabé y Pablo chäyarqan. Jamay junaq kaptinnami sinagögaman aywayarqan. 15Leykunata y profëtakuna qelqayashqanta liyir ushaskiptinmi sinagögacho mandaqkuna Pabluwan Bernabé jamaraykäyashqanman juk runata kachayarqan ninanpaq: <<Wawqikuna, imalapis yachasiyämänaykipaq kaptinqa yachaykasiyälämay>>.

16Saymi Pablo ichirkur runakuna upälakuyänanpaq makinta joqarishpan nirqan: <<Israel runakuna y Tayta Diosta mansapakuq mana Israel runakunapis, yachasimushqäta shumaq wiyayämay. 17Adorashqansi Tayta Diosshi unay ayllunsikunata akraykur Egiptucho jäpa kaykäyaptinpis jatun nación rikakuyänanpaq yanapänaq.#Éxo. 1.7. Nirkurnashi milagrukunata rurashpan Egiptupita jorqamunaq.#Éxo. 12.51. 18Chusku chunka (40) watano sunyaq jirkapa purir mana cäsukuyaptinpis pacienciakunaqshi.#Núm. 14.34; Deut. 1.31. 19Saypita Canaánman chaykasirnashi qanchis nacionkunata#Deut. 7.1. ushakaykasir herenciankuna qoykunaq.#Jos. 14.1. 20Egiptucho kayashqanpita Canaáncho herenciankunata chaskishqanyaq chusku pachak pisqa chunka (450) watanöshi päsanaq.

<<Canaánchönashi profëta Samuel#1Sam. 3.20. kawashqan wisanyaq Tayta Dios juezkunata churapänaq mandayänanpaq.#Jue. 2.16. 21Saypitanashi mandaqnin rey kananta runakuna manakuyaptin#1Sam. 8.5. Benjamín trïbu Cispa surin Saúlta churapänaq.#1Sam. 10.21. Payshi chusku chunka (40) wata rey kanaq. 22Saypitanashi Saúlta jorqurir Davidtana rey kananpaq churanaq. Paypaqshi Tayta Dios ninaq: <Isaípa surin Davidqa shonqüpaqnömi kaykan. Payqa lapan nishqäkunatami cäsukunqa>.#1Sam. 13.14; 16.12-13; Sal. 89.20.

23<<Saypitanami Tayta Dios promitishqannöla rey Davidpa ayllunpita salvamaqninsi Jesús Israelcho yurirqan. 24Manaraq Jesús wilakuptinmi Israel runakunata Bautizaq Juan wilaparqan jusalikuyta wanakur bautizakuyänanpaq.#Mar. 1.4; Luc. 3.3. 25Saypita wanunanpaq walkalana pishiykaptinmi Juan nirqan: <¿Pï kashqätataq yarpäyanki? Manami noqasu Cristo kä. Cristuqa qepätaraqmi shamunqa.#Juan 1.20. Noqaqa lanqi watunta paskapänaläpaqpis manami merëcïsu>.#Mat. 3.11; Mar. 1.7; Luc. 3.16; Juan 1.27.

26<<Abrahampita miraq Israel wawqikuna y Tayta Diosta mansapakuq mana Israel runakunapis, noqansimanmi salvakunansipaq ali wilakuy chämush. 27Jerusaléncho taq runakuna y autoridäninkunaqa profëtakuna qelqayashqanta cada jamay junaq sinagögacho liyirpis manami tantiyayarqansu Jesúspita qelqayashqanta. Saymi profëtakuna qelqayashqanta cumplir Jesústa wanusiyarqan. 28Jusaynaq kaykaptinpis payta wanusinanpaqmi Pilatuta manakuyarqan.#Mat. 27.22-23; Mar. 15.13-14; Luc. 23.21-23. 29Profëtakuna qelqayashqannölami lapanpis päsarqan. Wanurkuptinnami cruzpita jorqurir pampayarqan.#Mat. 27.57-61; Mar. 15.42-47; Luc. 23.50-56; Juan 19.38-42. 30Wanusiyaptinpis Tayta Diosmi kawarisimush. 31Kawarirkamurmi Galileapita Jerusalénman#Hech. 1.3. paywan aywaq discïpulunkunata aska kuti yuriparqan. Paykunami Jesúspita kanan wilakuykäyan.

32<<Saynölami noqakunapis Tayta Diospa wilakuyninta wilapaykäyä. Unay ayllunsikunata promitishqantami 33Tayta Dios cumplish. Sayno cumplirqan Jesucristuta kawarisimurmi. Ishkay kaq salmuchöpis Jesucristupaq kaynömi qelqaraykan:

<< <Qamqa surïmi kanki.

Kanan junaqpitaqa taytaykinami kaykä>.#Sal. 2.7.

34Jesucristo kawarimur imaypis manana wanunanpaq kashqantaqa Tayta Dios kaynömi nikan:

<Davidta promitishqä santu bendicionkunata qamtami qoykushayki.

Say promitishqäta imaypis cumplishaqmi>.#Isa. 55.3.

35Mas juk salmuchöpis kaynömi qelqaraykan:

<Santu sirviqniki kaptïmi sepultüracho ayä ismunantapis munankipaqsu>.#Sal. 16.10.

36<<Manami kikinpaqsu David sayno qelqarqan. Davidqa Tayta Dios munashqanta cumpliskir wanukuptinmi unay ayllunkuna pamparäyashqancho paypapis ayan ushakarqan. 37Jesústami isanqa Tayta Dios kawarisimush. Saymi paypa ayanqa sepultüracho ushakashsu.

38<<Wawqikuna, nishqäta shumaq tantiyakuyay. Jesucristo kayninpami jusansikunata Tayta Dios perdonamansi. 39Lapantapis payman yärakuq kaqtaqa jusaynaqtanami Tayta Dios chaskin. Moisés qelqashqan leykunata cumplishqanpitaqa manami pipis salvakunsu. 40Cuidä profëtakuna qelqayashqancho nishqanno qamkunatapis päsayäshunkiman. 41Paykuna qelqayashqanmi nikan:

<< <Mana criyikuqkuna, pasaypa mansakäyay.

Seqaypa mansariypaq kaqkunata ruranäpaqnami kaykä.

Imano ruranäpaq kashqanta wilayäshuptikipis manami criyiyankipaqsu> >>.#Hab. 1.5.

42Sinagögapita Pablo y Bernabé yarquyaptinmi [mana Israel runakuna] ruwakuyarqan jukaq jamay junaqpis yapay yachasiyänanpaq. 43Pabluwan y Bernabéwanmi Israel runakuna y Diosta cäsukuq mana Israel runakunapis askaq aywayarqan. Paykunatami Pablo shakyäsirqan kuyapäkuq Tayta Diosman imaypis yärakuyänanpaq.

Mana Israel runakunatana yachasiyashqan

44Jukaq jamay junaqnami say markacho cäsi lapan runakuna Diospa wilakuyninta wiyayta munar sinagögaman shuntakäyarqan. 45Askaq runakunata rikaykurmi wakin Israel runakuna chikiyashpan Pablo parlashqanta manakaqman churayarqan.

46Saymi Pabluwan Bernabé mana mansariypa niyarqan: <<Israel runakuna kayaptikimi Tayta Diospa wilakuyninta qamkunata puntata wilapäyashkä. Sayno wilapäyaptïpis mana ushakaq kawayta manami chaskikuyta munayankisu. Mana chaskikuyaptikimi mana Israel runakunatana wilapäyäshaq. 47Paykunata wilapänansipaqmi Tayta Dios kayno nish:

<< <Maysay nacionkunapaqpis aksi kanaykipaqmi churashkä.

Saynöpami maysaychöpis runakuna salvakuyanqa> >>.#Isa. 49.6.

48Sayno parlayashqanta wiyarmi mana Israel runakuna kushikur Tayta Diosta alabayarqan. Saynöpami mana ushakaq kawayta tariyänanpaq Tayta Dios akrashqankuna lapanpis Jesucristuman yärakuyarqan.

49Saymi Tayta Diospa wilakuyninta Pabluwan Bernabé markan markan wilakuyarqan. 50Sayno wilakuyaptinmi Tayta Diosta mansapakuq reqish warmikunata y respitash runakunata Israel runakuna shimita qoyarqan Pablupa y Bernabépa contran sharkuyänanpaq. Contran sharkur say markakunapita qarquyaptinmi 51chakinkunacho kaykaq polvuta tapshiriykur#Mat. 10.14; Mar. 6.11; Luc. 9.5; 10.11. Iconio markapana Pabluwan Bernabé aywakuyarqan. 52Jesucristupa discïpulunkunaqa#13.52 Discïpulukunapaq parlarqa Jesucristuta chaskikuqkunapaqmi parlaykan. Espíritu Santupa munaynincho kayashpanmi kushish kawayarqan.

Currently Selected:

Hechos 13: qvhB

Highlight

Copy