Hechos 14

Iconio markacho wilakuyashqan

1Saypitanami Iconio markacho Pabluwan Bernabé sinagögaman yaykuyarqan. Shonqunkunaman chaqpaq wilapäyaptinmi Israel runakuna y mana Israel runakunapis Jesucristuman yärakuyarqan. 2Mana yärakuq kaq Israel runakunami isanqa wakin mana Israel runakunata shimita qoyarqan Jesúsman yärakuqkunapa contran sharkuyänanpaq.

3Contran sharkuyaptinpis Pabluwan Bernabé Tayta Diosman yärakur aska junaqmi mana mansakuypa wilakuyarqan. Salvamänansipaq kaq wilakuynin rasunpaypa kashqanta musyayänanpaqmi Tayta Dios paykunata yanaparqan milagrukunata rurayänanpaqpis.

4Sayno kaptinpis say markacho taq runakuna kikinpura apänakuyashpan wakinqa Israel runakunapa favornin sharkuyarqan y wakinnami apostolkunapa favornin sharkuyarqan. 5Saymi Israel runakuna y mana Israel runakunapis autoridäkunawan wilanakuyarqan apostolkunata samqaypa wanusiyänanpaq. 6Sayta musyaykurmi Pabluwan Bernabé qeshpikuyarqan Listraman, Derbiman y Licaoniacho kaq wakin markakunamanpis. 7Say markakunachönami Tayta Diospa ali wilakuyninta wilakuyarqan.

Listra markacho Pabluta samqayashqan

8Listra markachömi yurishqanpita pasa mana puriq weqru runa karqan. Paymi jamaraykarqan 9Pablo parlashqankunata wiyar. Pablo payta rikärir aliyänanpaq Tayta Diosman yärakuykashqanta tantiyarmi 10sinchipa nirqan: <<¡Sharkur shumaq ichiy!>>

Sayno niptinmi jukla ichirkushpan puriyta qalaykurqan.

11Sayta rikaykurmi runakuna kikinkunapa idiömancho niyarqan: <<¡Dioskunami runa tukular noqansiman shayämush!>>

12Saymi Bernabéta niyarqan Zeus kashqanta. Y Pablutana wilakuq kaptin Hermes kashqanta niyarqan.#14.12 Zeustami latín idiömacho Jupiter niyan y Hermestanami Mercurio niyan. 13Say marka yaykunachömi Zeus niyashqan diosta adorakuyänan templu karqan. Apostolkunata adorayänanpaq törukunata pishtar rupasiyta munayaptinmi say templucho sirviq cüra waytan walqash törukunata marka punkuman qatirqan.

14Sayta tantiyaskirmi apóstol Pabluwan apóstol Bernabé mödanankunata rachiriykuyashpan#Gén. 37.29; Jos. 7.6; 2Rey. 2.12; Mar. 14.63. runakuna kaqman cörriyla aywaykur niyarqan: 15<<¡Taytakuna, ama sayta rurayaysu! Noqakunapis qamkunano runalami kayä. Shayämushkä manakaq dioskunata kacharir imayyaqpis kawaq Tayta Diostana adorayänaykipaq tantiyasiqmi. Paymi jana pasata, kay pasata, lamarta y lapan imaykatapis kamash. 16Nawpataqa kikinkuna munayashqannöla kawakuyänanpaqmi runakunata Tayta Dios kachapariykurqan. 17Sayno kachaparirpis pïmaytami tantiyasin rasunpaypa kaq Dios kashqanta y kuyakuq kashqanta. Paymi mikuynikikuna ali wayunanpaq tamyatapis tamyasimun y kushish kawanansipaq mikuytapis kamaripämansi>>.

18Sayno nir tantiyasiptinpis Pabluta y Bernabéta mana adorayänanpaq ajataraqmi tantiyayarqan.

19Saypitanami apostolkunata chikiq Israel runakuna Antioquíapita y Iconiupitapis Listraman chäyarqan. Pablupa contran sharkuyänanpaq shimita qoyaptinmi runakuna Pabluta pitiqpaq samqayarqan. Nirkurmi wanushna kashqanta yarpar qarachash apaykur marka waqtanman jitaskiyarqan. 20Saycho discïpulukuna juntaparaykäyaptin kawarirkamurmi markaman Pablo kutirqan. Saypita warayninnami Derbe markaman Bernabéwan aywakuyarqan.

Pabluwan Bernabé Siriaman kutiyashqan

21Derbiman chaykur ali wilakuyta wilakuyaptinmi aska runakuna Jesúsman yärakuyashpan discïpulunkuna rikakuyarqan. Saypitanami kutiyarqan Listra, Iconio y Antioquía markakunaman. 22Say markakunaman chaykurmi Jesúspa discïpulunkunata#14.22, 28 Discïpulukunapaq parlarqa Jesucristuman yärakuqkunapaqmi parlaykan. mana ajayaypa yärakuyänanpaq shakyäsir niyarqan: <<Tayta Dios mandaykashqanman yaykunansipaq nakashunraqmi>>.

23Saynöpis wawqi panikunata rikayänanpaqmi cada iglesiacho mayor wawqikunata churayarqan. Nirkurnami ayunar y Tayta Diosta manakur yärakuyashqan Señor Jesucristupa makinman kachakuyarqan.

24Pisidia provinciapita kutirnami Panfilia provinciamanna chäyarqan. 25Perge markachöpis Tayta Diospa wilakuyninta wilakuskirmi Atalia markaman aywayarqan. 26Nirkurmi büquiwan Antioquíaman kutikuyarqan. Antioquíapitami puntatapis wawqi panikuna paykunata kachash kayarqan wilakur puriyänanpaq. Kacharmi Tayta Diosta manakuyarqan yanapaykunanpaq. 27Antioquíaman kutirnami wawqi panikuna shuntakäyaptin wilapäyarqan Tayta Dios ali yanapashqanta. Saynöpis wilapäyarqan mana Israel runakunapis Jesucristuman yärakuyänanpaq Tayta Dios kamakäsishqanta. 28Pabluwan Bernabé saycho unaylami discïpulukunawan täyarqan.

Currently Selected:

Hechos 14: qvhB

Highlight

Copy