Marcos 6

Jesús Pa'iye, Nazaret Daripëre

(Mt 13.53-58; Lc 4.16-30)

1Ja̱ropi etani i̱ quë'rona co'iña, i̱re ye'yecohua'i ja̱'re co̱ni. 2Huajë mu'se ti̱'asi maca pa̱i tsi'si huë'ena ye'ya huëouña. Ye'yaquëna, i̱ pa̱ipi ai de'oyerepa ye'yaquë'ni cuasareña. Ja̱je cuasajë careña:

“¿Jerona iquë jerepa si'aye ye'yei'ni? ¿I̱querepa ta̱'ñe ye'yaye a'ni, cui'ne nepi i̱te pa̱i yo'o ti̱'a ma'ñe yo'o ja̱'ñe i̱sire'ni? 3Iquë cato mai ñaquë api, María mamaquë api, huë̱'ña de'huaquë api, Jacobo, José, Judas cui'ne Simón maja'yë api, cui'ne i̱ yo'jeohua'ije̱ mai ja̱'re co̱ni pa'iyë, i̱ñore.”

Ja̱je cajë i̱ caye asaye coereña. 4Ja̱je cajëna, Jesupi ja̱ohua'ire caëña:

“Si'a hue̱'ña yecohua'i cato Maija'quëre quëacaiquëre yëcohua'i a'ë. Ja̱je pa'iquëta'are i̱ yeja acohua'ipi cui'ne i̱ cajeohua'ipi cui'ne i̱ huë'e acohua'ipi coeyë.”

5Ja̱rona airepa pa̱i yo'o ti̱'a ma'ñe yo'oye pa̱ëña, pa̱ipi i̱te asaye coe do'ire. Ja̱je pa'ina, coa ju̱'icohua'i mañase'ere pato co'yaquë a'ri pa̱i mañare jujuña. 6Ja̱je pa'ina, nequë api cuasama'pëna, ñani me yo'ojë ja̱je pa'iye'ni cuasaëña. Ja̱ jeteyo'je yeque huë̱'ñana sani cu'i ye'yaroja̱quëña.

Jesupi I̱ Ye'yacohua'ire Jëjo Saoye

(Mt 10.5-15; Lc 9.1-6)

7I̱ ye'yacohua'ire doce pa'iohua'ire soini, huatire eto saoja̱'a tutu i̱sini cayaohua'ise'ere jëjo saouña. 8Jëjo saoquë cua̱ñeiña:

“Sama'pë pa'ijë̱'ë, a̱o tupë, curiquëje̱. Coa topë macase'e sajë̱'ë. 9Cui'ne zapato cui'ne camisa sajë̱'ë, yeque su̱ña ja̱'ñe sama'pë.”

10Cui'ne caëña, ja̱ohua'ire:

“Huë'ena cacasicohua'i pani i̱ti macana pëajë̱'ë, ja̱ daripë quëa tëjini sai macaja̱'a. 11Cui'ne yequë hue̱'ñapi mësarute coecohua'i pa'ito, pa̱nita'a asaye coecohua'i pa'ito mësaru quë̱o ya'o tsa'cuse'ere ti̱'to to̱ni eta saijë̱'ë. Ja̱je yo'ojë i̱ñoñe pa'iji, i̱ohua'ire sa̱ñope yo'oye. Nuñerepa cayë, pa̱i ñape yo'ose'e ña mu'se ti̱'aëna, ja̱ohua'ire ai co'ayerepa sa̱iñe pa'iji, mësarute ë̱sesicohua'ire. Sodoma cui'ne Gomorra yeja pa̱ire cato a'ri ja'ye sa̱iñe paji'i.”

12Ja̱je jëjo saosicohua'ipi huajëye pa'iyena po̱nëñe pa'iji cajë quëareña, pa̱ire. 13Cui'ne huatiohua'ireje̱ eto saoreña. Ju̱'icohua'ire hui'yapepi nejëna, co'yareña, jai pa̱i.

Juan Oco Doquë Ju̱'iñe

(Mt 14.1-12; Lc 9.7-9)

14Ja̱ maca romano pa̱i ëjaë Herodesje̱ asaëña, si'a pa̱i Jesús yo'oye asajëna. Ja̱je asani Herodespi caëña:

“Juan oco doquëpi huëji'i. Ja̱je pa'ina, tutu paquë yo'oji.”

15Yecohua'ipi careña:

“Tsoe aquë Maija'quëre quëacaiquë Elíaspi.”

Cui'ne yecohua'ipi careña:

“Tsoe hue̱'ña Maija'quëre quëacaicohua'i pa'ise'eje̱ pa'i api.”

16Ja̱re Herodespi asani caëña:

“Ja̱ë cato Juanpi yë'ë cua̱ñeina, si̱opë tëto tëasiquë api. Ja̱ëpi ju̱'isiquëpi huëni yo'oji.”

17Herodes cato Juanre tse̱ani quë̱na meapi hue̱ni co'acohua'ire co hue̱'ñana co'a̱ji'i, Herodías do'ire. Herodías cato yo'jei Felipe nëjo paco'ë. Ja̱je pa'ioni Herodespi yo'jei nëjore jioni i̱ nëjore nepi. 18Ja̱je yo'oquëna, Juanpi caëña, Herodesre:

“Më'ë yo'jei nëjoni jioni paye co'aji.”

19Ja̱je caquëna, Herodíaspi Juanre ai coeco pacoña. Ja̱je pa'ina, huani je̱osi'i cacota'a huani je̱oñe ti̱'añe pa̱oña. 20Herodespi i̱te Juanre nuñerepa de'oquë api caquë ca'raëña. Ja̱je pa'ina, i̱pi huani je̱oñe ë̱sequëna, pa̱oña. I̱ caye si'aye asama'quëta'a Herodes cato i̱ caye yë asaquë paquëña. 21Ja̱je pa'iquëta'are Herodías ti̱'aoña, i̱o huani je̱oñe oise'e. Herodespi i̱te co̱asi mu'se ti̱'aëna, pa̱i ëjaohua'ire, soldado ëjaohua'ire, cui'ne Galilea ëjaohua'ire soini a̱o a̱i maca. 22Herodías mamacopi cacani de'oyerepa pairacona, ñani ai sihuareña, si'aohua'i i̱ti ñacohua'i. Ja̱je pa'ina, Herodes sihuaquë caëña, nomi tsi̱ore:

“Më'ë yëyere se̱jë'ë. I̱sisi'i, më'ëre.”

23Cui'ne caëña, care payë. Coa caye pa̱ñë. Si'a co'amaña më'ë se̱se'e i̱siye pa'iji. Yë'ë cua̱ñeñe jopore paja̱'a i̱sinije i̱siyë, caëña. 24Ja̱je caëna, asani sani pëca ja'core se̱coña:

“¿I̱quere se̱ja'coa'ni, i̱te?”

Cacona, i̱opi caoña:

“Se̱jë'ë, Juan oco doquë si̱opëre.”

25Ja̱je quëaona, asani pa̱i ëjaë pa'i hue̱'ñana sani caoña:

“Yurepi Juan oco doquë si̱opëre quë̱na de'huana ayasiconi i̱sijë̱'ë.”

26Ja̱re pa̱i ëjaëpi asani ai co'a ju̱quëña. Ja̱je pa'iquëta'are tsoe ca huesosiquë sëte pa̱ñë caye peouña, cui'ne i̱ soisicohua'ije̱ asasi do'ire. 27Ja̱ do'ire ja̱re i̱ti macapi te'e soldadore jëjo saouña, Juan si̱opë quërëja̱ija'quëre. 28Caëna, soldadopi sani Juanre huani je̱oni si̱opë yëto tëani quë̱na de'huana ayani dani i̱siña. I̱sina, Herodespi nomi tsi̱ona i̱sina, ja̱opi pëca ja'core i̱sio.

29Ja̱ yo'ose'ere asani Juanre ye'yecohua'ipi dani Juan ca̱pë maca sani ta̱ je̱oreña.

Cinco Mil Ë̲mëohua'ire A̲oñe

(Mt 14.13-21; Lc 9.10-17; Jn 6.1-14)

30Ja̱ jeteyo'je doce pa̱ire jëjo saosicohua'ipi co'ini tsi'sini Jesure quëareña, i̱ohua'i yo'ose'ere, cui'ne i̱ohua'i ye'yase'ere.

31Quëajëna, Jesupi caëña, ja̱ohua'ire:

“Daijë̱'ë. Sani pa̱i peo hue̱'ñana pëa huajëñu'u.”

A̲o a̱iñeque peoyerepa pa̱i tsi'si ja̱'ñere asaquë capi. 32Ja̱je caëna, saë'ë, yohuëja̱'a i̱ohua'ise'e pa̱i peo hue̱'ñana. 33Ja̱je saijëta'are jai pa̱i ñareña, i̱ saiye. Ja̱je ñani Jesupi saiji cani huë'huëjë, i̱ sai hue̱'ñana si'a daripë̱a pa'icohua'i sateña. Ja̱ ti̱'ama'në du'ru ti̱'areña, pa̱ipi. 34Ja̱je yo'ojëna, Jesupi yohuëpi tu̱mani pa̱i mañare teaye oi ñaëña, yëi ñama ñacaiquëre peocohua'ije̱ pa'iohua'i mañapi. Pa'ijë yo'ojëna, ñani jaiye i̱ohua'ire ye'ya huëouña.

35Ai na'i huesëquëna, ñani i̱ ye'yacohua'ipi i̱te careña:

“Tsoe na'iji, i̱ño pa̱i peo hue̱'ña'ë. 36Jëjo saojë̱'ë, sani pa̱i pa'i hue̱'ñana a̱o maña hueroni a̱ijajë. I̱ño cato peoyë, i̱ohua'ire a̱oñe.”

37Cajëna, Jesupi sehuouña i̱ohua'ire:

“Mësarupi a̱ojë'ë.”

Caquëna, i̱ohua'ipi careña:

“¿Ja̱je pa'ito yëquëpi sani veinte mil të̱'ña do'ire papi pan hueroni a̱oñe?”

38Cajëna, Jesupi caëña:

“¿Je so̱ pan paye'ni, i̱ño? Sani ñajë'ë.” Caquëna, careña:

“Pa'iji, cinco pan cui'ne caya tsiaya hua'i.”

39Cajëna, Jesupi cua̱ñeiña, pa̱ire. Ja̱je pa'ito si'aohua'i tayahuëna ja'rujë̱'ë, caëña. 40Caëna, cien pa̱ise'e cui'ne cincuenta pa̱i de'o tsëcapë̱a ja'rureña. 41Ja̱ maca Jesupi cinco pan cui'ne caya tsiaya hua'ire i̱ni ma'tëmona ñaquë de'oji caquë Maija'quëre pëpani, panre i̱ ye'yacohua'ina i̱siña. I̱siquëna, ja̱ohua'ipi pa̱ire se i̱sicateña. 42Ja̱ maca si'aohua'i a̱ni sihuacohua'i pateña. 43A̲ni tëjisi jeteyo'je a̱ni jujase'ere tsi'soreña, doce do'rohuë̱a hua'ina co̱jë. 44Ja̱ pan a̱isicohua'i cato cinco mil ë̱mëohua'i pateña.

Oco Da'ca Ë̲mëje'eja'a Cu'iye

(Mt 14.22-27; Jn 6.16-21)

45Ja̱ jeteyo'je Jesús i̱ ye'yacohua'ire capi, du'ru saijë̱'ë, yohuëja̱'a Betsaidana. Yë'ëse'e pa̱ire saiyë caquë pëpa tëjini sasi'i, caëña. 46Saiyë, caquë pëpa tëjini ai cu̱tihuëna Maija'quëre casi'i caquë saquëña. 47Ñami de'osi maca Jesús te'i yejare pa'ina, yohuë saisicohua'i cato jaira jopore pateña. 48Ja̱ropi pa'i i̱ ye'yacohua'i ai yo'ojë co̱'mejëna, ñaëña, tutupi sa̱ñope tutuquëna. Je̱'në ñata to̱me maca Jesupi oco da'ca ë̱mëje'eja'a nëcaquë saquëña, i̱ ye'yacohua'i quë'rona. Coa sa tëto sasi'quë saiyeje̱ pa'ye saquëña. 49Oco da'ca ë̱mëje'eja'a nëcaquë saina, ñani huati pa'ima'co cuasajë quëquëni cuihuë.

50Si'aohua'i ñani quëquëni cuijëna, i̱pi capi, ja̱ohua'ire:

“Ai yo'ojë cama'pë yë'ë a'ë. Ca'rama'pë pa'ijë̱'ë.”

51Ja̱je cani i̱ohua'i pa'i yohuëna aya mëina, tutupi je̱ouna, ja̱ maca merepa ja̱je yo'oquë'ni cuasajë ñareña, i̱ yo'ose'e. 52A'ri maña pan pa'ise'ere jaiye neni pa̱ire a̱ose'ere cuasaye pa̱reña, i̱ohua'i joyo jëa do'ire. Ja̱je pa'ina, ai cuasareña.

Genesaret Ju̱'icohua'ire Jujuye

(Mt 14.34-36)

53Je̱ni ti̱'areña, Genesaret yejana. Ja̱rona i̱ohua'i yohuë sëa huahuoreña. 54Yohuëpi sa tu̱masi maca Jesu api cajë ñareña. 55Ñani ja̱ maca si'a hue̱'ña cu'ijë ju̱'icohua'ire da huëoreña, ca̱i saihuëre u̱ijëna, Jesús quë'rona. 56A'ri dari mañana saina, pa̱i daripë̱ana saina, tsio huë̱'ñana saina, ju̱'icohua'ire i̱ sai ma'añana o̱ereña, jujucaija̱quë cajë. Jesure ai se̱teña, më'ë ju'i ca̱na patoni ju̱'icohua'i co'yaja̱jë cajë. Si'aohua'i i̱ ju'i ca̱ patocohua'i co'yareña.

Currently Selected:

Marcos 6: sey

Highlight

Copy