Marcos 7

Pa̱ire Co'aye Neñe

(Mt 15.1-20)

1Jesús quë'rona Fariseo pa̱i cui'ne cua̱ñese'e ye'yacohua'i tsio dateña, Jerusalénpi daisicohua'ipi. 2Ja̱je daisicohua'ipi ñajëna, Jesús ye'yacohua'ipi jë̱ña tsoama'pë a̱ë'ë. Ja̱je tsoama'cohua'ipi a̱ijëna, ñani cue'cuehuë, si'si jë̱ñapi a̱iñë cajë. 3Ja̱ohua'i cato ja̱ yë'ta'a a̱o a̱ima'në jë̱ña tsoajë̱'ë. Aipë case'ere yo'ocohua'i paë'ë. 4Ja̱je pa'iohua'ipi a̱o huero hue̱'ñapi co'ini ai jë̱ña tsoacohua'i pateña. Cui'ne jaiye yeque yo'ocohua'i pateña, i̱ohua'i aipë yo'oye, u̱cu duruhuë̱a tsoaye, quë̱na ne'ña tsoaye, ca̱isi saihuë tsoaye, yo'ocohua'i pateña.

5Ja̱je yo'ocohua'ipi fariseo pa̱i cui'ne cua̱ñese'e ye'yacohua'ipi se̱teña, Jesure ñeje:

“¿Me yo'ojë më'ë ye'yacohua'i jë̱ña tsoajë̱'ë ja̱ yë'ta'a a̱ima'në case'e yo'oma'pë, si'si jë̱ñapi a̱iñe'ni?”

6Ja̱je cajëna, Jesupi capi, ja̱ohua'ire:

“Nuñerepa ja̱je mësaru coa cacohua'i pa'ijëna, asaquë co'aji Maija'quëre quëacaiquë Isaías ñeje caquë toyapi:

Icohua'i cato yë'ëre coa yë'opose'e oiyë cayë.

Ja̱je pa'iquëta'are i̱ohua'i joñoapi yë'ëre oiye pa̱ñë.

7I̱ohua'i yë'ëre se̱ñë cajë yo'oye do'i peoye a'ë.

Coa pa̱ise'e cua̱ñese'ere ye'yajë yo'o do'ire.

8¿Me yo'ojë mësaru Maija'quë cua̱ñese'ere yo'oma'pë yequere coa pa̱i cua̱ñese'ere yo'oye'ni? ¿U̲cu duruhuë̱are tsoaye, quë̱na ne'ña tsoayere cui'ne jaiye ja̱je pa'ye yequeje̱ yo'oye'ni?”

9Caëña, Jesús yequeje̱:

“Mësaru aiohua'i case'ere yo'oñu'u cajë Maija'quë cua̱ñese'ere ti̱rona je̱oni yo'oyë, mësaru. 10Moisés cato capi: ‘Më'ë ja'core cui'ne më ja'quëre de'oye oi sa̱ñope cama'ë pa'ijë̱'ë. Pëca ja'core cui'ne pëca ja'quëre sa̱ñope co'aye caquëre cato huani je̱oñe pa'iji.’ 11Ja̱je case'e pa'iquëta'are mësaru caye pa'iji: ‘Ja'quëre cui'ne ja'core co̱caiye pa̱ñë. Si'aye yë'ë paye Maija'quëna i̱sihuë.’ 12Ja̱je mësaru cani cayë, ja'core cui'ne ja'quëre co̱caiye peoji, cajë. 13Ja̱je mësaru yo'ojë Maija'quë cua̱ñese'ere pare je̱ocoyë, pa̱i case'ere yecohua'ina se ye'yajë. Ja̱je pa'ye yequeje̱ jaiye yo'oyë, mësaru.”

14Ti̱jupë Jesús soini capi, pa̱ire:

“Asajë̱'ë, si'a pa̱i. Coa tayo asama'pë de'huajë̱'ë. 15Si'aye ë̱mëje'epi se cacaye cato pa̱ire co'aye ne ma'ñe a'ë. Sa̱'nahuë joyopi co'aye etaye a'ë, pa̱ire co'aye si'si neñe. 16Ca̱joro pacohua'i sëte asajë̱'ë.”

17Ja̱je casi jeteyo'je pa̱ire je̱oni huë'ena Jesús cacasi maca i̱ ye'yacohua'ipi ja̱ case'ere quëajë̱'ë cajë se̱teña.

18Se̱jëna, caëña:

“¿Ja̱je pa'ito mësaruje̱ asa ti̱'añe pa̱re? Mësarupi asahuë, si'aye ë̱mëje'epi cacase'e cato pa̱ire co'aye neñe peoji. 19A̲o cato joyona saiye pa̱ji. Coa a̱i ë̱tatu'una saise'epi jeteyo'je eta saiji. 20Cui'ne pa̱i joyopi etaye a'ë, co'aye neñe. 21Sa̱'nahuë joyore cayë ja̱ropi etaji, si'aye co'aye cuasaye: yecohua'ini nomiohua'ire, ë̱mëre yo'oye, pa̱ire huani je̱oñe, 22co'amaña i̱mañe, yecohua'i co'amañare pa ëaye ñañe, si'aye co'ayere yëye, cosojë yo'oye co'ayena sëo measicohua'i pa'iye, yecohua'i payere ëa ñajë pë̱iñe, yequëna co'a coca ca ma'ñere se quëaye, jerepa pa'i a'ë cuasaye, cui'ne yecohua'i pa'iyere cuasacaima'pë coa jo̱sa yo'oroja̱iñe. 23Si'aye iye joyo sa̱'nahuëpi etaji. Ja̱pi pa̱ire si'si neñe a'ë.”

Yequë Yeja Acopi Jesure Sehuoye

(Mt 15.21-28)

24Ja̱ropi Jesús Tiro cui'ne Sidón yejana saji'i, huë'ena cacani pa̱ije huesëja̱jë yë'ëre caquë. Yo'oquëta'are catiye peopi. 25Ja̱ do'ire tsoe Jesu api asaco, huati quë'io pëca ja'copi i̱ quë'rona dani do're ja'runi se̱co'ë, huatire eto saocaijë̱'ë, yë'ë mamacore pa'icore. 26Ja̱o cato Sirofenicia pa̱io paco'ë, yequë yeja aco. 27Ja̱je cacona, Jesupi capi, i̱ote:

“Mamajëpi du'ru a̱ijajë, co'aji, mamajë a̱iñere sioni jo'ya yaina i̱siye.”

28Caquëna, i̱opi sehuoña:

“Ja̱je pa'ijë̱'ë, Ëjaë. Ja̱je pa'iquëta'are jo'ya yaije̱ a̱icohua'i a'ë, mamajë a̱ijë ne to̱ ne'ña mañaje.”

29Cacona, Jesupi caëña:

“De'oyerepa më'ë cayë, tsoe më'ë mamacore huati eta saji'i, se̱ñaco saijë̱'ë, de'oji.”

30Caëna, huë'e ti̱'ani ñacona, ca̱i saihuë u̱icopi mamaco tsoe huatire peocopi de'oye pacoña.

Jesupi Asama'quëre Jujuye

31Jesús Tiro yejapi etani Sidón yeja sa tëto sani cui'ne Decápolis daripë̱aje tëto sani Galilea jaira ti̱'aëña. 32Ja̱rote pa'ina, asama'quëpi cui'ne hua̱'hua̱ coca caquëni dareña. Dani pato co'yacaijë̱'ë, cajë se̱teña. 33Se̱jëna, Jesupi pa̱i peo te̱'tena sani moñopi ca̱jorona sa̱quëña. Sa̱'i copi i̱ moñona tse'seni tse̱meñoje papiña. 34Papiquë ma'tëmona ñaquë ai yë'eni caëña:

“¡Efata!” Ja̱je cani capi, Hui'yojë̱'ë.

35Ja̱ maca tsoe ca̱joro hui'yopi. Ja̱ maca de'oye coca caquë paquëña. 36Ja̱je yo'oni capi, ja̱ohua'ire, yecohua'ire quëama'pë. Ja̱je caëna, coa jerepa quëareña. 37Quëarena, de'oyerepa yo'oquë'ni cuasajë careña:

“Si'aye de'oye yo'oji. Yo'oquëna, asama'cohua'ije̱ asacohua'i de'oyë, cama'cohua'ije̱ cayë.”

Currently Selected:

Marcos 7: sey

Highlight

Copy