Mateo 25

Diez Nomi Tsi̱ Yo'ose'eje̱ Pa'ye Quëaye

1Ja̱je pa'ito ma'tëmo pa'i te̱'te cato diez nomi tsi̱pi hui'yapepi dani toa tsë̱opë̱are i̱mani hueja hue̱'ñana i̱ohua'i ë̱jëre ti̱'añu'u cajë saise'eje̱ pa'ye a'ë. 2Cinco pa'iohua'i ne de'huama'cohua'i paë'ë. Cui'ne cinco ne de'huasicohua'i paë'ë. 3Ne de'huama'cohua'ipi toa tsë̱o pë̱a sajëta'a hui'yapere sama'pë paë'ë. 4Ne de'huasicohua'ipi sahuë, quë̱na huë̱ana hui'yape dose'ere cui'ne toa tsë̱o pë̱aje si'aye ti̱mëse'ere sahuë. 5Huejaja̱'quëpi esa daima'ë pa'ina, huëo ca̱i ëapi si'a nomiohua'ire ja̱je huëo ca̱i ëaquëna, ute jujani ca̱ë'ë. 6Ja̱ maca ñami jopo pa'i maca asahuë, cuiye: ‘Je̱'nërepa daiji, huejaja̱'quëpi etani i̱te pëpajë̱'ë.’ 7Cui maca si'a nomi tsi̱ huëni i̱ohua'i toa tsë̱o pë̱a ne de'huahuë. 8Ja̱ jeteyo'je cinco ne de'huama'cohua'ipi cahuë, cinco ne de'huasicohua'ire: ‘I̱sijë̱'ë, a'ri maña mësaru hui'yapere yëquë toa tsë̱o pë̱api yaya huëoji.’ 9Ja̱je cajëna, cinco nomi tsi̱ ne de'huasicohua'ipi cahuë: ‘Pa̱ñë, ti̱'añe pama'coni yëquëre cui'ne mësarureje̱ ¿me i̱siye'ni? Saijë̱'ë. I̱ti i̱si hue̱'ñana sani huerojë̱'ë, mësaru tsë̱o ja̱'ñese'e.’ 10Carena, cinco nomi tsi̱ ne de'huama'cohua'ipi hui'yape hueroñu'u cajë saijëna, tsoe ti̱tapi, huejaquë. Nomi tsi̱ cui'ñani utesicohua'i cato i̱ ja̱'re co̱ni cacahuë, hueja hue̱'ña. Cacarena, eta sa'ro si̱o huesopi. 11Ja̱ jeteyo'je ti̱tahuë, yequë nomi tsi̱ ti̱tani cahuë: ‘Ëjaë, ëjaë hui'yocaijë̱'ë.’ 12Ja̱je cajëna, i̱pi capi, ja̱ohua'ire: ‘Nuñerepa cayë, mësarute ñama'quë a'ë, yë'ë.’ ”

13Ja̱ maca Jesupi capi, ja̱ohua'ire:

“Pa̱i Mamaquë daija̱'a maca huesëyë, mësaru, i̱ti dai mu'se cui'ne horaje̱. Ja̱je pa'ina, mësaru sëtasicohua'ipi pa'ijë utejë̱'ë.

Curiquë Yo'ose'e Ayere Quëaye

14Ma'tëmo pa'i te̱'te aye cato pa̱ipi yequë yejana sai huëoni, i̱ jo'yare soini curiquë i̱sisiquë cua̱ñe nëose'eje̱ pa'io.

15Ja̱ohua'i aquëni i̱sipi, cinco mil curiquë të̱'ña. Yequëni i̱sipi, caya mil të̱'ña. Cui'ne yequëni i̱sipi, te'e mil. Pa̱i ñapere i̱ohua'i tutu pa'iye ja'ye i̱sini ja̱ maca saji'i, so'ona. 16Cinco mil të̱'ña i̱sisiquëpi sani ja̱pi hueroni ai jerepa cui'ne cinco mil të̱'ña se ne co̱pi. 17Caya mil i̱sisiquëje̱ cui'ne yeque caya mil se ne co̱pi. 18Ja̱je yo'ojëta'are yequëpi te'e mil i̱si cua̱ñosiquëpi sani yeja coje nesicona, ta̱pi, curiquë.

19Ai tsoepi co'ipi, i̱ohua'i ëjaë. Co'ini i̱ohua'i nese'e ña huëopi. 20Du'ru macarepa ti̱tapi, cinco mil të̱'ña i̱si cua̱ñosiquëpi. Ti̱tani i̱sipi, i̱ ëjaëre, ñeje caquë: ‘Ëjaë cinco mil më'ë yë'ëre i̱sihuë. I̱sisiquëni yequë cinco mil ne co̱huë, iye më'ë tse̱.’ 21Caquëna, ëjaëpi capi, i̱te: ‘Ai de'oji, më'ë de'o jo'yaë'ë, de'oye yo'osiquëre cato yure ai jerepa jaiye i̱si nëosi'i cacajë̱'ë, yë'ë ja̱'re co̱ni sihuaja̱'quë.’ 22Jeteyo'je daji'i, caya mil i̱sisi jo'yaë. Ja̱ëpi capi, cui'ne: ‘Ëjaë, më'ë yë'ëre caya mil i̱sihuë. Ja̱je i̱sisiquëni yeque caya mil se ne co̱huë, iye më'ë tse̱.’ 23I̱ Ëjaëpi capi, i̱te: ‘Ai de'oji, më'ë de'o jo'yaë'ë, nuñerepa pa'i a'ë. A'ri mañare nuñerepa de'oye yo'osiquëni ai jerepa jaiye i̱sisi'i, ñacai ja̱'ñe. Cacani yë'ë ja̱'re co̱ni sihuajë̱'ë.’ 24Ja̱ë te'e mil i̱sisiquëpi ti̱tani capi, i̱ Ëjaëre: ‘Ëjaë më'ëpi pa̱ire oima'quëpi më'ë ta̱ma'tona coa ti̱'aquë cui'ne më'ë ti je̱a ma'ñere tëaquëre asayë. 25Ja̱je pa'ina, ca'raquë sani më'ë curiquë yejana yahuehuë. Iye më'ë curiquë dacaë'ë.’ 26Caquëna, ëjaëpi sehuopi, i̱te: ‘Jo'yaë co'aquë cui'ne jo̱saë. Yë'ëpi yë'ë ta̱ ma'ñere tëaquëpi cui'ne yë'ë je̱ama'tore tëaquë pa'iye asaquë sëte. 27Ja̱ do'ire yë'ë curiquë bancona tëoyere pa̱ë'ni. Tëosiquë pa'ito co'ini i̱tipi se nesi do'ire curiquë nera'huë, yë'ë tse̱.’ 28Ja̱ maca capi, i̱ti maca pa'icohua'ire: ‘Siojë̱'ë, curiquë të̱'ña. Sioni i̱sijë̱'ë, diez mil të̱'ña paquëna. 29Ja̱je pa'ina, jaiye paquëni ai jerepa se i̱siye pa'iji. I̱sina, jaiye tëto saquëna, nëase'eque paye pa'iji. Ja̱je pa'iquëta'are peoquëni ai jerepa se sioye pa'iji, i̱ a'ri maña payeque.’ 30Ja̱je cani capi, iquë co'a jo'yaëre: ‘Tse̱ani je̱ocojë̱'ë, nea hue̱'ña hue'sena, ja̱ropi oi cui'ne cu̱ji qui̱'coja̱'quëre.’

Si'a Pa̱ire Ñañe, Jesupi

31Pa̱i Mamaquë pa̱i ëjaërepa cua̱ñequë hui̱ñaohua'ipi të'ija̱isiquëpi daisi maca i̱ de'o ñu'i saihuëna ja'ruja̱'quë api, cua̱ñequëre papi. 32Ja̱ maca si'a yeja pa'icohua'ipi tsi'sija̱'cohua'i a'ë, i̱ ña hue̱'ñana. Ja̱ pa̱ire huahueja̱'quë api, yëi ñamare cui'ne cabrare ñaquëpi huahueyeje̱ pa'ye. 33I̱ ëja te̱'tena yëi ñamare cui'ne ari te̱'tena cabrare huahuesipi, ti̱ tsëcapë̱ase'e. 34Ja̱ maca pa̱i ëjaëpi caja̱'quë api, i̱ ëja te̱'te pa'icohua'ire: ‘Daijë̱'ë, mësaru yë'ë ja'quë ñacaina, de'oye pa'isicohua'i. De'oye pa'ijë̱'ë, ma'tëmore mësarure caquë yeja de'hua maca Diusu de'huacai pa'i sitore. 35A̲o ëa ju̱'ina, mësarupi de'hue a̱ohuë. Oco ëa ju̱'ina, cui'ne o̱cuahuë. Mësarupi huë'e peoquëpi coa cu'iquë paë'ë. Pa'ina, pëa hue̱'ña i̱sihuë. 36Ca̱ña peoquë pa'ina, mësarupi de'hue i̱sihuë. Ju̱'iquë paë'ë. Pa'ina, yë'ëre do'i sani ñahuë. Tayo yo'ocohua'ire co hue̱'ñana co cua̱ñosiquë paë'ë. Pa'ina, dani ñahuë, yë'ëre.’ 37Ja̱ maca i̱ti nuñerepa yo'osicohua'i etasicohua'ipi caja̱'cohua'i a'ë: ‘¿Ëjaë, je yëhua më'ëre a̱o ëa ju̱'iquëre ñani a̱ore'ni, pa̱nita'a je yëhua oco ëa ju̱'iquëre ñani oco o̱cuare'ni? 38Pa̱nita'a ¿je yëhua huë'e peoquëpi coa cu'ina ñani pëa hue̱'ñana i̱sire'ni? Pa̱nita'a ¿je yëhua ca̱ña peoquë pa'ina, ñani i̱sire'ni, ju'iye? 39Pa̱nita'a ¿je yëhua ju̱'iquëre më'ëre ñare'ni? Pa̱nita'a ¿co hue̱'ñana cosiquëpi pa'ina, sani ñare'ni më'ëre?’ 40Cajëna, pa̱i ëjaëpi sehuoja̱'quë api, ja̱ohua'ire: ‘Nuñerepa cayë, mësarute. Si'aye mësaru ja̱ohua'ire yë'ë yo'je tsi̱ni a'ricohua'ire teaye pa'iohua'ire ñajë de'oye yo'ose'e cato ja̱re yë'ëni de'oye yo'ose'e pa'iji.’

41Ja̱ maca cui'ne Ëjaëpi caja̱'quë api, ari te̱'te pa'icohua'ire: ‘Saijë̱'ë, yë'ë quë'ro pa'ima'pë nejosi te̱'tere pa'icohua'i. Saijë̱'ë, huatire cui'ne i̱ jo'yare caquë toa yeja de'hua sitona. 42A̲o ëa ju̱'ina, mësaru a̱oma'pë paë'ë, yë'ëre. Oco ëa ju̱'ina, ocoje̱ cui'ne o̱cuaye pa̱huë. 43Huë'e peoquëpi coa cu'iquë paë'ë. Ja̱je pa'ina, mësarupi pëa hue̱'ña i̱siye pa̱huë. Ca̱ña peoquë paë'ë. Pa'ina, mësarupi i̱sima'pë paë'ë. Ju̱'iquë paë'ë. Pa'ina, mësaru dani ñañe pa̱huë. Cosiquë paë'ë. Pa'ina, sani ñama'pë paë'ë, mësaru.’ 44Ja̱ maca i̱ohua'ipi caja̱'cohua'i a'ë, i̱te: ‘¿Ëjaë, je yëhua më'ëre a̱o ëa ju̱'iquëre pa̱nita'a oco ëa ju̱'iquëre, pa̱nita'a coa cu'iquëre, pa̱nita'a ca̱ña peoquëre pa̱nita'a ju̱'iquëre, pa̱nita'a cosiquëre ñajëta'a co̱caiye pa̱re'ni?’ 45Ja̱je cajëna, pa̱i ëjaëpi sehuoja̱'quë api: ‘Nuñerepa cayë, i̱ohua'i teaye pa'i pa̱ire ñajëta'a co̱caiye pa̱jë cui'ne yë'ëreje̱ ai jerepa ti necaiye pa̱huë, mësaru.’ 46Ja̱je casi maca i̱ohua'i saija̱'cohua'i a'ë, ti nejo hue̱'ñana. Cui'ne nuiñe yo'osicohua'ipi ti pa'i hue̱'ñana saija̱'cohua'i a'ë.”

Currently Selected:

Mateo 25: sey

Highlight

Copy