Mateo 18

Nepi Jerepa Do'i Pa'iquë

(Mr 9.33-37; Lc 9.46-48)

1Ja̱re ja̱ macapi i̱ ye'yacohua'i Jesús quë'rona tsioja̱ni se̱teña, i̱te: “¿Nepi jerepa pa'iohua'i pa'ija̱'cohua'i a'ni, ma'tëmo?”

2Cajëna, ja̱ maca Jesupi tsihua'ëre soini i̱ohua'i jopona nëcoquë 3capi:

“Nuñerepa cayë. Mësarupi ja̱'rë pa'ise'e je̱oni cui'ne tsihua'ëje̱ pa'iohua'i de'oma'pë pani ma'tëmo caca ti̱'añe peoji. 4Ja̱je pa'ina, i̱ti jerepa pa'i ma'tëmo pa'i te̱'tequëpi, ai jerepa pa'i a'ë cuasama'quëpi iquë tsihua'ëje̱ pa'i pa'iji. 5Cui'ne yë'ëni cuasajë iquëre tsihua'ëre de'oye necaicohua'i pani yë'ëni necaiyë.

Co'aye Yo'oyena Ta̱iñe

(Mr 9.42-48; Lc 17.1-2)

6Yë'ëre asaquëni yequëpi co'aye yo'oyere ye'yaquë pa'ito jai quë̱na pëpi ñaje tëcana sëani jai tsiayana hua̱i hue̱'ñana je̱o dëoto de'oji. 7¡Co'acore pa'ni, iye yeja, pa̱ire co'aye yo'oyena ne ta̱oco! Pa̱ire co'ayena ne ta̱oñere jëaye ti peoji. Ja̱je pa'iquëta'are yecohua'ire co'aye yo'oyena ye'yaquë ne ta̱ñoquëpi ai jerepa teaye co'aquëpi pa'iji.

8Ja̱je pa'ina, më'ë jë̱tëpi pa̱nita'a më'ë nëcayopi co'aye yo'oyena saco pa'ito tëto tëani so'ona je̱ocojë̱'ë. Ai jerepa de'oji, pa'i hue̱'ñana saiyepi peo tupëpi, pa̱nita'a do'pëquëpi, toa yejana caya jë̱ña cui'ne caya nëcañoa hue'equëpi je̱oco cua̱ñoto co'aji. 9Pa̱nita'a më'ë ñacoapi co'ayena saco pa'ito duta je̱oni so'ona je̱ocojë̱'ë. Ai jerepa de'oji, pa'i hue̱'ñana cacayepi te'e ñacoa hue'equë api, toa yejana caya ñaco ca̱ hue'equëpi je̱oco cua̱ñoto co'aji.

Yëi Ñama Ne Huesësico Ayere Ye'yaye

(Lc 15.3-7)

10Coema'pë pa'ijë̱'ë, icohua'i a'ricohua'ire. Quëare payë. Ja̱ohua'i cato hui̱ñaohua'ire payë, ma'tëmore yë'ë ja'quë ña hue̱'ñare. 11Pa̱i Mamaquë cato daisiquë api, ne huesëse'ere huasosi'i caquë.

12¿Me yo'oquë a'ni? Cien yëi ñamare paquëni te'i ne huesësiquë pa'ito sani co'equë api, noventa y nueve ñamare cu̱tina je̱o sani. 13Ja̱je co'equë ne huesësiquëre ti̱'asiquë pani noventa y nueve ne huesëma'cohua'ire sihuaye jerepa sihuaquë api. 14Ja̱je cui'ne mësaru ja'quë ma'tëmo pa'iquëje̱ co'eji, te'e a'riquëje̱ ne huesëye pa̱ja'quë caquë.

Cajeire Sa̱i De'huacaiye

(Lc 17.3)

15Më'ë yo'jeipi co'aye më'ëre yo'osiquë pa'ito i̱se'ere cajë̱'ë, i̱ tayose'e asa sëtaja̱'quëre. Ja̱je caquëna, më'ë cayere asani sehuocaisiquë pa'ito, më'ë yo'jeire se quëcohuë, më'ëpi. 16Ja̱je pa'iquëta'are më'ë caye asa yëma'ë pa'ito ja̱ maca soijë̱'ë, te'ire pa̱nita'a cayaohua'ire i̱ yo'oye ñacohua'ipi te'e cui'ne pa'ye caja̱'cohua'ire. 17Ja̱ohua'ireje̱ asama'ë pa'ito quëajë̱'ë, jai pa̱i tsi'si sitona. Jai pa̱i catoje̱ asa yëma'ë pa'ina, ja̱ maca Maija'quëre asa ma'ñeje pa'ire je̱ojë'ë, pa̱nita'a pa'i do'i curiquë se̱quëje̱ pa'ire.

18Nuñerepa cayë, mësarute. Iye yejana mësaru sëasiquë pani ma'tëmoje sëasiquë pasipi. Cui'ne mësarupi iye yejana joyesiquë pani cui'ne joyesiquë pasipi, ma'tëmoje.

19Cui'ne cayë, mësarute yequeje̱. Mësarupi cayaohua'i iye yejare pa'ijë te'e cuasajë Maija'quë co'amañare se̱to yë'ë ja'quë ma'tëmo pa'iquëpi i̱sija̱'quë api. 20Ja̱je pa'ina, cayaohua'i panita'a toaso̱cohua'i yë'ë mamire cajë tsi'sicohua'i pa'ito ja̱rote yë'ëje̱ pa'ija̱'quë a'ë.”

21Ja̱ maca Pedro sani Jesure se̱ji'i:

“¿Ëjaë, yë'ëni yë'ë yo'jeipi co'aye yo'oquë pa'ito je so̱ñe sa̱i de'huacaija̱'quë a'ni, i̱te?”

22Caquëna, Jesupi sehuopi:

“Sieteja̱'a pa'ye sa̱i de'huacaijë̱'ë caye pa̱ñë. Ai jerepa sa̱i de'huacaijë̱'ë, siete pa'ye setenta.

Sa̱i De'huaye Ë̲sequë

23Ja̱je pa'ina, ma'tëmo pa'i te̱'te cato pa̱i ëjaëpi i̱te necaicohua'i ne do'ire sa̱iñeje pa'ye a'ë. 24Ja̱'a ne de'hua huëoquëna, jaiye curiquë i̱ do'i sa̱iñe paquëre dahuë. 25Darena, i̱ jo'yaë curiquë peoquë paji'i. Ja̱je peoquë pa'ina, i̱ ëjaëpi cua̱ñepi, i̱si je̱ojë'ë, i̱te cui'ne i̱ nëjore, mamajëre cui'ne si'aye i̱ co'amañaje ja̱ curipi i̱ do'i paye sa̱ija'quëre. 26Ca maca i̱ jo'yaëpi i̱ ëjaë ña hue̱'ñana do're ja'runi se̱ji'i: ‘Ëjaë, quëcojë̱'ë, yë'ë macare. Sa̱ija'quë a'ë, si'aye më'ëre.’ 27Caquëna, ëjaëpi i̱te teaye caji cuasani oi ne de'huacani eto huasopi. 28Ja̱ maca jo'yaëpi esa etani sai ti̱'api, yequëre i̱ cajeire, cui'ne necaiquëre ti̱'ani ñaje tëcana tse̱ani huani je̱o huëopi, ñeje caquë: ‘Sa̱ijë'ë, më'ë yë'ëre do'i payere.’ Ja̱ë cato a'ri maña i̱te do'i paquëni ja̱je yo'opi. 29Ja̱ maca i̱ cajeipi do're ja'runi se̱ji'i: ‘Quëcojë̱'ë, sa̱ija'quë a'ë, si'aye më'ëre do'i paye.’ 30Ja̱je catoje̱ yequëpi coequë coa ai jerepa pa̱ire co'a hue̱'ñana sani copi, sa̱isi maca etoja̱'quë api, caquë. 31Ja̱ maca ëjaë jo'yapi iyere ñani ai co'a ju̱'ijë sani quëahuë, i̱ohua'i ñase'ere si'aye. 32Ja̱ maca i̱ ëjaëpi jëjo saopi, i̱te soija̱'cohua'ire. Soini capi, i̱te: ‘Co'a merepa co'a jo'yaë. Yë'ëpi më'ëre sa̱i de'huacaë'ë, si'aye më'ë do'i pa'ise'e më'ëpi se̱ina. 33Më'ëje cui'ne më'ë cajeire quëcoquë sa̱i de'huacaiye paji'i, yë'ë më'ëre teaye caquëna, sa̱i de'huacaise'eje̱.’ 34Ja̱ maca i̱ ëjaëpi pë̱i ja̱je yo'osi do'ire cojë̱'ë, cua̱ñepi, si'aye sa̱ina, je̱ojë'ë caquë.”

35Jesupi ja̱je ca tëjiquë capi:

“Ja̱je cui'ne yë'ë ja'quë ma'tëmo pa'iquëje̱ mësaruteje̱ yo'oja̱'quë api, mësarupi pa̱i ñape cajeire joyore papi co'aye yo'ose'e sa̱i de'huacaiye pa̱cohua'ire.”

Currently Selected:

Mateo 18: sey

Highlight

Copy