Mateo 17

Jesús Ti̱ñe Pa'i Po̱nëse'e

(Mr 9.2-13; Lc 9.28-36)

1Seis mu'seña tëto sai maca Jesupi sapi, Pedrore, Jacobore cui'ne Juanre Jacobo yo'jeire te'i ja̱ohua'i ja̱'re saji'i, jai ë̱më cu̱tihuëna. 2Ja̱rona i̱ ca̱pë i̱ohua'ique ñajëna, ti̱ñerepa po̱nëpi. I̱ tsia cato ë̱së mëiñeje pa'yere miaco po̱nëpi. Cui'ne i̱ ju'i ca̱pi toaje̱ pa'iorepa po̱nëpi, miañerepa. 3Cui'ne ja̱ maca ñañu'u cuasama'pë pa'ise'ere ñahuë, Moisés cui'ne Elías, Jesús ja̱'re cocare cajëna. 4Ja̱ maca Pedropi capi, Jesure:

“Ëjaë, ¡De'oji. Yureta'a i̱ñore pañu'u! Më'ëpi yëto neñu'u toaso̱ a'ri huë̱'ña: më'ë tse̱core te'ore, Moisés tse̱core, cui'ne Elías tse̱core yecore.”

5Ja̱ yë'ta'a Pedro cocare caquëna, miacore papi sirio nëca meni peo hue̱'ña ca̱'ne huesona sirio jopopi yë'ose'e ñeje pi̱siquëna, asahuë:

“Iquë yë'ë mamaquëre papi i̱ni ai sihuaquë pa'iyë. Asajë̱'ë, i̱ cayere.”

6Iyere asani i̱ ye'yacohua'i yejana i̱ohua'i tsiapi meñe simeni u̱ë'ë, quëquëquë huesëni. 7Ja̱ maca Jesupi i̱ohua'i quë'rona tsioja̱ni patoquë capi:

“Huëijë̱'ë. Ca'rama'pë pa'ijë̱'ë.”

8Caquëna, huëijë coa Jesuse'e te'i pa'ina, ñahuë, yecohua'ita'a peojëna.

9Ja̱ropi cajejëna, Jesupi cua̱ñepi, ja̱ohua'ire:

“Quëama'pë pa'ijë̱'ë, yecohua'ire, iye mësaru ñase'e. Pa̱i Mamaquë ju̱'isiquëpi cui'naëpi huëima'ë pa'ito ju̱ni huëisi maca quëajë̱'ë.”

10Ja̱ maca i̱ ye'yacohua'ipi Jesure se̱i'ë:

“¿Me yo'ojë cua̱ñese'e ye'yacohua'i ja̱je pa'ito Elíaspi du'ru daija̱'quë api, caye'ni?”

11Cajëna, Jesupi sehuopi:

“Nuñerepa cayë. Du'ru daija̱'quë api. Si'aye ne de'huaja̱'quë api. 12Ja̱je pa'iquëta'are yë'ëpi cayë, mësarute. Elíaspi tsoe daji'i. Daisiquëta'are i̱ohua'ipi de'hua ñama'pë coa i̱ohua'i yëyeje̱ yo'ohuë, i̱te. Ja̱je cui'ne Pa̱i Mamaquëje̱ ai yo'oja̱'quë api, ja̱re ja̱ohua'i jë̱ñapi yo'ojëna.”

13Ja̱ maca i̱ ye'yacohua'ipi cuasa ñajaë'ë, Juan oco doquë pa'isiquëni caji cuasajë.

Jesupi Hue'hue Dahuë Paquëre Jujuye

(Mr 9.14-29; Lc 9.37-43)

14Pa̱i pa'i hue̱'ñana daisi maca Jesús quë'rona te'i tsio dani i̱ ña hue̱'ñana do're ja'runi capi:

15“Ëjaë, oijë̱'ë, yë'ë mamaquëre. Ai yo'oji, hue'hue dahuëre hue'equë. Ja̱je pa'ipi jaiye toana ta̱i yequere tsiayana du'i yo'oji. 16Iye macana dahuë, i̱te. Më'ë ye'yacohua'ina, i̱ñosiquëta'are juju ti̱'ama'pë paë'ë.”

17Caquëna, Jesupi sehuopi:

“¡I̱na, necaiquë api cuasama' pa̱i cui'ne co'acohua'i! ¿Je yëhuarepa pa'ija̱'quë a'ni, mësaru ja̱'re co̱ni? ¿Je yëhuarepa quëcoja̱'quë a'ni? Dajë̱'ë, i̱ñona tsihua'ëre.”

18Cani ja̱ maca Jesupi co'a joyore pë̱ni eto saopi, tsihua'ëre pa'isicore. Ja̱re i̱ti macapi tsihua'ë huajëquë co'yapi.

19Ja̱ jeteyo'je i̱se'ere i̱ ye'yacohua'i cahuë:

“¿Me yo'ojë yëquë huatire eto saoye pa̱re'ni?”

20Se̱jëna, Jesupi capi:

“Mësaru ne ti̱'añe peoji, cuasayere payë. Nuñerepa cayë. Mësarupi mostaza ca̱ ja'iore ne ti̱'añe pa'iji cuasayere hue'ecohua'i pani cara'huë ja̱ cu̱tihuëre: ‘Saijë̱'ë, iye macapi yequë hue̱'ñana.’ Carena, ai cu̱tihuëpi saija̱'coa. Ti coa ca jujaye peoji, mësarupi neñe pa'iji cuasacohua'i pani. 21Ja̱je pa'iquëta'are iye co'a joñoare cato, eto saoye pa'iji Maija'quëre se̱ñepi cui'ne a̱o a̱ima'pë se̱ñepi.”

Ti̱jupë Jesús Capi, I̱ Ju̱'iñe Ayere

(Mr 9.30-32; Lc 9.43-45)

22Si'a jupë Galilea quë'rore cu'i maca Jesupi capi, ja̱ohua'ire:

“Pa̱i Mamaquëre tse̱ani pa̱ina i̱si huesoja̱'cohua'i a'ë. 23Ja̱je yo'ojë huani je̱oja'cohua'i a'ë. Ja̱je huani je̱osicohua'ita'are toaso̱ mu'seña pa'i maca cui'naëpi huëija̱'quë api.”

Ja̱je quëaquëna, ai oi ëaye asahuë.

Pa̱i Tsi'si Huë'e Do'i Sa̱iñe

24Jesús cui'ne i̱ ye'yacohua'i Capernaum daripëna ti̱'asi maca Maija'quë huë'e do'ire curiquë se̱cohua'ipi Pedrore sani ñani se̱i'ë:

“¿Mësaru ye'yaquë curiquë sa̱iquë Maija'quë huë'e do'i?”

25Cajëna, Pedropi sehuopi:

“Ja̱je pa'ijë̱'ë. Sa̱iji.”

Ja̱je cani huë'ena Pedropi cacaquëna, Jesupi du'ru i̱te capi, ñeje:

“¿Me cuasaquë'ni, më'ë Simón? ¿Neni iye yeja ëjaohua'i co'amaña pa do'i cui'ne pa'i do'i se̱ñe'ni, i̱ohua'i tse̱cohua'i panita'a ti̱ohua'ini se̱ñe?”

26Caquëna, Pedropi sehuopi, i̱te:

“Ti̱ohua'ini se̱ñë.”

Caquëna, Jesupi capi, i̱te:

“Ja̱je pa'ito i̱ohua'i tse̱cohua'i cato sa̱iñe peoji. 27Ja̱je pa'iquëta'are sa̱ñope yo'oyere coejë sa̱iñu'u. Ja̱je pa'ito jairana sani mojë'ë, hua'ini. Du'ru macarepa hui'yoquëni moni i̱ yë'opore curiquë pa'ina, i̱ni sani sa̱ijë'ë, si'aye, yë'ë pa'i do'i cui'ne më'ë do'i co̱ni te'epi.”

Currently Selected:

Mateo 17: sey

Highlight

Copy