Mateo 16

Pa̱i Yo'o Ti̱'a Ma'ñe Yo'ojë̱'ë Cajë Se̱ñere

(Mr 8.11-13; Lc 12.54-56)

1Fariseohua'i cui'ne saduceohua'i co̱ni Jesure neñañu'u cajë dani ma'tëmo ayere pa̱i yo'o ti̱'a ma'ñere i̱ñojë'ë se̱i, i̱pi yo'ouna, ñani tse̱añu'u cajë. 2Ja̱je cajë se̱jëna, i̱pi sehuopi, ja̱ohua'ire:

“Na'iquëna, ma'tëmo maja'ico pa'ina, ñani mësaru cacohua'i a'ë, ‘De'o mu'se pa'ija̱'coa.’ 3Cui'ne ñataquëna, nea siri pa'ina, ñani cacohua'i a'ë, ‘yure cato co'a mu'se pa'ija̱'coa.’ ¡Mësaru, coa cacohua'i a'ë! Ma'tëmore ñani ta̱'ñe asacohua'ita'a ¿me yo'ojë iye mu'seña yo'oye ñani ta̱'ñe cama'pë ja̱ yë'ta'a huesëcohua'i pa'iye'ni? 4Iye co'a pa̱i nuñe yo'oma'cohua'ipi se̱ñë, ma'tëmo yo'oyere nejë'ë ñañu'u cajë. Ja̱je se̱jëta'are Jonásre yo'ose'eje̱ pa'yepi i̱ñose'e pasipi. Jerepa yo'o i̱ñoñe peoji.”

Ja̱je cani je̱oni saji'i.

Fariseohua'i O'sa

(Mr 8.14-21)

5Jaira je të'huina je̱'ejë i̱ ye'yacohua'i pan sayere hua̱nëyei'ë. 6Hua̱nëyesicohua'ini Jesupi ja̱ohua'ire capi:

“I̱na de'hua ñajë'ë, fariseohua'i cui'ne saduceohua'i o'saque pa'iji.”

7Caquëna, i̱ ye'yacohua'ipi sa̱'ñe i̱ohua'ija̱'a cahuë:

“Mai panre dama'pë patena, caji.”

8Ja̱je yahue caye Jesupi asani capi, ja̱ohua'ire:

“¿Me yo'ojë pan peoyë caye'ni? ¿Ai jerepa mësaru, yë'ëre nequë api, cuasayere peoye'ni? 9¿Ja̱ yë'ta'a asa ti̱'añe pa̱ñe, cui'ne ñañe pa̱re cinco pan pa'ise'ere cinco mil pa̱ire a̱ose'eje̱ cui'ne a̱ni jujarena, do'rohuë̱ana de'huase'eje̱? 10¿Cui'ne siete pan pa'ise'epi cuatro mil pa̱ire a̱o maca do'rohuë̱a nëase'eje̱ cuasaye pa̱ñe? 11¿Me yo'ojë mësaru yë'ë ca maca panre caji, cuasare'ni? De'hua ñajë'ë, fariseohua'i cui'ne saduceohua'i o'sana co̱'me huesëye.”

12Ja̱je ca maca cuasa ti̱'ahuë, Jesús pan neñere cama'ë pa'ise'ere. Coa ai jerepa Fariseo cui'ne saduceohua'i ye'yayere case'ere.

Pedropi Jesús Ayere Caye

(Mr 8.27-30; Lc 9.18-21)

13Jesús Cesarea Filipo yeja quë'rona ti̱'ani i̱ ye'yacohua'ire se̱ji'i:

“¿I̱queipi caye'ni, Pa̱i Mamaquëre?”

14Caquëna, ja̱ohua'ipi cahuë:

“Yecohua'ipi cayë, Juan oco doquë api. Yecohua'ipi cayë, Elíaspi. Cui'ne yecohua'ipi ja̱ yë'ta'a yeque cayë, Jeremiaspi pa̱nita'a yequë Maija'quë jëjo daoquë api, caye.”

15Ja̱ maca ja̱ohua'ire capi:

“Cui'ne mësaruta'a ¿i̱queipi caye'ni?”

16Caquëna, Simón Pedropi capi:

“Më'ë cato Cristo a'ë, Diusu huajëquërepa mamaquë a'ë.”

17Caquëna, Jesupi sehuopi:

“De'oji. Simón Jonás mamaquë yecohua'ije̱ më'ëre quëaye pa̱huë. Coa yë'ë Ja'quë ma'tëmo pa'iquëpi i̱ñopi. 18Ja̱je pa'ina, yë'ëpi më'ëre cayë Pedro ja̱re iye quë̱na pë ë̱mëje'ena yë'ë huë'e nesi'i. Neina, ju̱'iñe tutuje̱ quëcoquë ti neñe peoji. 19Yë'ëpi më'ëre ma'tëmo pa'i te̱'te hui'yocore i̱sija̱'quë a'ë. Më'ëpi iye yejana sëaquë pa'ito ma'tëmoje sëaye pa'iji. Cui'ne më'ëpi iye yejana joyequë pa'ito ma'tëmoje joyeye pasipi.”

20Ja̱ maca Jesupi cua̱ñepi, i̱ ye'yacohua'ire. Yë'ëre Cristo api, cajë pa̱ire quëama'pë caquë.

Jesús Capi, Ju̱'ija'quë A'ë

(Mr 8.31–9.1; Lc 9.22-27)

21Ja̱re ja̱ macapi Jesupi quëa huëopi, i̱ ye'yacohua'ire. Jerusalénna sani ai yo'oja̱'quë a'ë, Maija'quë huë'e ñacaicohua'i ëjaohua'ipi cui'ne cua̱ñese'e ye'yacohua'ipi yo'ojëna, caquë. Cui'ne capi, ja̱je yo'ojë huani je̱oja'cohua'i a'ë. Ja̱je huani je̱osicohua'ita'are toaso̱ mu'seña pa'i maca huëija̱'quë a'ë. 22Ja̱ maca Pedropi ti̱rona i̱te sani yëhuosi'i caquë capi:

“¡Maija'quëje̱ ja̱je yo'oye coeji, Ëjaë! ¡Ja̱je yo'oye ti peoja̱quë më'ëre!”

23Ja̱je caquëna, Jesús co'ye po̱nëni ñani i̱te Pedrore capi:

“Saijë̱'ë. Yë'ë quë'ro pa'ima'ë, huati ëjaë. Yë'ëre jo̱sa tëhuoquë, ai. Më'ë cato Maija'quë cuasayeje̱ cuasama'quë a'ë. Coa pa̱i cuasayeje̱ cuasaquë a'ë.”

24Ja̱ maca Jesupi i̱ ye'yacohua'ire capi:

“Yë'ëre tuiye yëcohua'i pani hua̱nëyeye pa'i co'ye de'oye pa'iyere. Ja̱je yo'oni ai yo'oye pa'ito quëcojë tuiye pa'iji, co'ye cuasama'pë. 25Ja̱je pa'ina, co'ye de'oye pa'iyere cuasaquë yo'oquëpi coa ne huesoja̱'quë api, i̱ pa'iye. Ja̱je pa'iquëta'are yë'ë do'ire ai yo'oquë i̱ pa'iye ne huesosiquëpi ti̱'aja'quë api, pa'iye. 26Ja̱je pa'ina, ¿I̱quere co̱caiye pa'iquë'ni, pa̱ipi si'aye iye yejana co'amañare pajëta'a joyore ne huesoto? ¿Je ja'ye sa̱iñe pa'iquë'ni, i̱ joyo do'ire? 27Ja̱je pa'ina, Pa̱i Mamaquë daija̱'quë api, si'a i̱ pëca ja'quë de'o tutu quë'ipi cui'ne i̱ hui̱ñaohua'ina co̱ni. Ja̱ maca i̱pi sa̱ija'quë api, te'ohua'ise'e yo'ose'eje̱ pa'ye. 28Ja̱je pa'ina, nuñerepa cayë, ja̱ yë'ta'a yure pa'icohua'i ju̱'ima'pë Pa̱i Mamaquë i̱ quë'ropi daina, ñaja'cohua'i a'ë.”

Currently Selected:

Mateo 16: sey

Highlight

Copy