Lucas 6

Jesure Ye'yecohua'ipi Huajë Mu'se Yo'oye

(Mt 12.1-8; Mr 2.23-28)

1Te'e huajë mu'se Jesús ta̱ sitoja̱'a saina, i̱re ye'yecohua'ipi trigo tsa̱'ña tëajë saë'ë. Yo'oni jeteyo'je jë̱ñapi i̱ti ca̱se'e po'tejë a̱ë'ë. 2Ja̱je yo'ojëna, fariseo acohua'ipi ñani se̱i'ë:

“¿Moisés cua̱ñese'e caji huajë mu'se yo'oye peoji. Ja̱je pa'iquëta'are me neñu'ju yo'oye'ni?”

3Cajëna, Jesupi sehuopi:

“¿Ñama'cohua'ini David cui'ne i̱ cajeohua'i co̱ni a̱o ëa ju̱'ijë yo'ose'e? 4Maija'quë huë'e ñacaicohua'ise'e Maija'quëna i̱sise'ere a̱o a̱iñere a̱o ëa ju̱'i Maija'quë huë'ena cacani a̱ore i̱mani a̱i cui'ne i̱ ja̱'re pa'icohua'ireje̱ a̱opi.”

5Cui'ne capi, ja̱ohua'ire:

“Pa̱i Mamaquëre papi tutu payë, huajë mu'se pa'itoje̱ cua̱ñeñe.”

Jë̱të Cue̱nesicore Paquëre Jujuye

(Mt 12.9-14; Mr 3.1-6)

6Yëquë huajë mu'se Jesús pa̱i tsi'si huë'ena cacani, ye'ya huëoquëna, ja̱rote paji'i, te'i ë̱më ëja të'hui jë̱tëre cue̱nesicore hue'equë. 7Pa'ina, cua̱ñese'e ye'yacohua'i cui'ne fariseohua'i co̱ni cuasahuë. Jesupi huajë mu'sere jujuquëna, ñani i̱te sa̱ñope cañu'u cajë utejë ñahuë. 8Ja̱je cuasaye ñaquëta'a cue̱nesi jë̱të hue'equëre capi:

“Huëijë̱'ë. Huëni ja̱ maca jopore pare nëcajë̱'ë.”

Caquëna, huëni nëcapi. 9Ja̱ maca Jesús yecohua'ire capi:

“Se̱si'i, mësarute te'ore. ¿I̱quepi de'oquë'ni, huajë mu'se yo'oye, de'oye panita'a co'aye? ¿Pa̱ire huasoye panita'a pa̱ire coa nejoñe?”

10Ja̱ maca si'ahua'ire se̱ña të'ija̱ni Jesús capi, ju̱'iquëre:

“Më jë̱tëre mëajë'ë.”

Caquëna, i̱ case'eje̱ yo'opi. Yo'oquëna, i̱ jë̱të cue̱nesico pa'isico de'oco paco'ë. 11Ja̱je yo'oquëna, ñani yecohua'i ai pë̱ti ëaye ñajë ca huëohuë, sa̱'ñe i̱quepi Jesure sa̱ñope ne'ñe pa'ioni cajë.

Jesús Doce Ye'yecohua'ire Soiye

(Mt 10.1-4; Mr 3.13-19)

12Ja̱ mu'seña Jesús Maija'quëre se̱si'i caquë saji'i, ai cu̱tihuë. Ja̱ropi si'a ñami Maija'quëre se̱ji'i. 13Ñata to̱mesi maca i̱ ye'yacohua'ire soini doce pa'iohua'i i̱ ja̱'re pa'icohua'ire hue'yopi, jëjo daocohua'ire. 14Ja̱ohua'i cato paë'ë: Simón, ja̱re ja̱ëni se hue'yo co̱siquë paji'i, Pedro. Cui'ne i̱ yo'jei, Andrés paji'i. Jacobo, Juan, Felipe, Bartolomé, 15Mateo, Tomás, cui'ne Alfeo mamaquë Jacobo paji'i. Simón Cananista tsëcapë aquë paji'i. 16Judas Jacobo yo'jei paji'i. Cui'ne yequë Judas Iscariote Jesure yehuoja̱'quëje̱.

Jesús Jai Pa̱ire Ye'yaye

(Mt 4.23-25)

17Jesús ai cu̱tihuëpi i̱ ye'yacohua'i ja̱'re co̱ni cajequëpi perepë yejana pëapi. Ja̱rote jai pa̱i paë'ë. Si'a hue̱'ña acohua'i, yecohua'ipi Judea cui'ne Jerusalén cui'ne jai tsiaya të̱'tëpa Tiro cui'ne Sidón quë'ro acohua'i daisicohua'i paë'ë, Jesús cayere asañu'u cajë cui'ne i̱ohua'i ju̱'i dahuëre jujucaija̱quë cajë daisicohuaipi. 18Huati yo'oquëna, ai yo'ojë pa'icohua'ipi juju cua̱ñosicohua'i de'ohuë. 19Si'a pa̱i Jesure patosicohua'ipi i̱ tutupi si'ahua'i co'yasicohua'i paë'ë. Jujusicohua'ire ñani pato do'ire si'ahua'i yëhuë, patoye.

Nuñerepa Case'e Pa̱i Ayere

(Mt 5.1-12)

20Ja̱ maca Jesús i̱ ye'yacohua'ire ñani capi:

“Sihuacohua'i pa'ijë̱'ë, mësaru teaye pa'iohua'i, Maija'quë te̱'tena de'oye cacani paja̱'cohua'i a'ë.

21Sihuacohua'i pa'ijë̱'ë, mësaru a̱o a̱i ëa ju̱'icohua'ipi jeteyo'je si'aye ti̱'aja'cohua'ipi. Sihuacohua'i pa'ijë̱'ë, oicohua'i pa'isicohua'ipi jeteyo'je soja̱'cohua'ipi.

22Pa̱i Mamaquëre tui do'ire pa̱ipi mësarute pë̱ijë coejë i̱ohua'i quë'rore etojë cue'cueye pa'iji. Ja̱je yo'oto sihuajë̱'ë, yë'ëre tui do'ire. 23Ja̱je yo'ojëna, ai sihuajë̱'ë, ma'tëmona mësarute caquë de'huacaisi co'amañare jerepa paja̱'cohua'ipi. Mësarute co'aye yo'oyeje̱ pa'ye yo'oa̱'huë'ë, Maija'quë tsoe hue̱'ña quëacaicohua'ire.

24Ja̱je pa'iquëta'are jaiye yure co'amaña pajë sihua to̱sicohua'ireta'a, sihuaye peoja̱'coa.

25Teayerepa mësarureta'a yure a̱o a̱ni ti̱mëni sihuajë pa'isicohua'ire jeteyo'je a̱o ëa ju̱'iñe pasipi. Teayerepa mësaru yure so huajëjë pa'isicohua'ireta'a jeteyo'je oiye pasipi.

26Teayerepa mësaru pa'iye'ni si'a pa̱i de'o pa̱ire pa'ë cajëna, pa'icohua'i maña. Tsoe acohua'ije̱ ja̱je cui'ne de'ocohua'i a'ë ca'a̱huë'ë, Maija'quë jëjo daocohua'ije̱ pa'icohua'ita'a coa cosocohua'ini.

Mësarute Sa̱ñope Yo'ocohua'ire Oiye

(Mt 5.38-48; 7.12)

27Ja̱je pa'iquëta'are mësaru yë'ëre asacohua'ire cayë: Oijë̱'ë, mësarute sa̱ñope cacohua'ire. De'oye yo'ocaijë̱'ë, mësarute coecohua'ire. 28De'oye pa'i ja̱'ñere cacaijë̱'ë, mësaruni sa̱ñope ai yo'o ja̱'ñere de cacohua'ini. Se̱cacaijë̱'ë, mësarute tea ju̱'icohua'ireje̱. 29Yecohua'ipi tsiana te'e te̱'te tëtoru yequë te̱'te tsiaje̱ nëocaijë̱'ë. Cui'ne yecohua'ipi më sësëquëna ju'iconi jioni sato huë'ehuë ju'icoreje̱ se i̱si saojë̱'ë. 30Se̱cohua'i pa'ito i̱sijë̱'ë. Yeque më tse̱coni jiosicohua'i pa'ito, coa ñajë'ë, cui'naoni se̱ñe pa̱jë'ë. 31Yecohua'ipi mësaruni de'oye yo'oja̱jë cuasayeje̱ pa'ye yecohua'ini se de'oye yo'ojë̱'ë, mësarupi.

32¿Ja̱je pa'iquëta'are mësarupi mësarute oicohua'ise'ere oicohua'i pani, i̱quere de'oye yo'oye'ni? Co'ahua'ije̱ cui'ne sa̱'ñe oiyere yo'ocohua'i pani. 33¿Ja̱je pa'ina, mësarupi mësarute de'oye yo'ocohua'ise'ere de'oye yo'oni i̱quere de'oye yo'oye'ni? Co'acohua'ije̱ cui'ne yo'oyere yo'oni. 34¿Ja̱je mësarupi de'oye co'yocohua'ise'ere co'yoja̱'cohua'i a'ë cuasajë i̱sicohua'i pani i̱quere de'oye yo'oye'ni? Co'acohua'ije̱ co'yoja̱'cohua'i a'ë cuasajë yo'oyere yo'oni. 35Ja̱je pa'iquëta'are mësaru cato oiye pa'iji, mësarute sa̱ñope yo'ocohua'ire. Ja̱ohua'ire de'oye yo'ojë i̱siye pa'iji, co'yoja̱'cohua'i a'ë cuasaye peoyerepa. Ja̱je yo'osicohua'ini ma'tëmo jaiye de'o co'amaña i̱siye pa'iji. Cui'ne mësaru pa'ija̱'cohua'i a'ë, Maija'quë Ëjaërepa mamajë, cui'ne i̱je oiquë api, co'acohua'ire cui'ne i̱ i̱siyere de'oji cama'cohua'ireje̱. 36Ja̱je cui'ne mësaruje̱ oijë̱'ë, yecohua'ire, Maija'quë oiyeje̱.

Pa̱i Yo'oyere Ña De'hua Caye

(Mt 7.1-5)

37Ja̱je pa'ina, co'acohua'i a'ë cama'pë pa'ijë̱'ë, yecohua'ire. Ja̱je pa̱jëna, Maija'quëje̱ mësarute co'acohua'i a'ë caye pa̱ja'quë api. Yecohua'ire nejoñe pa̱jë'ë. Ja̱je pa̱jëna, Maija'quëje̱ mësarute nejoñe pa̱sipi. Yecohua'i tayo yo'oyere sa̱i de'huacaijëna, Maija'quëje̱ mësaru tayo yo'oye sa̱i de'huacaija̱'quë api. 38Yecohua'ire i̱sicohua'i pa'ijëna, Maija'quëje̱ mësarute i̱sisipi. I̱sija̱'quë api, i̱ topëna de'oye cuasa ti̱'acore pani. Dëso quiosiconi, ña'co quiosiconi, ti̱mësicore pani, mësaru yecohua'ire i̱siyeje̱ pa'ye Maija'quëje̱ i̱sija̱'quë api, mësarute.”

39Jesupi ñeje yo'oyeje̱ pa'ye a'ë capi:

“Ñama'quëpi yequë ñama'quëni sai saquë pa'ito cojena to̱meja'cohua'i a'ë, si'a jupë. 40Ye'yecohua'ipi i̱ohua'ire ye'yaquëre tëto saisicohua'i peoyë. Ye'ye tëjinita'a ti̱'añe pa'iji, i̱ohua'ire ye'yaquëje̱ pa'iohua'i.

41¿Me ja̱je pa'ito, më'ë yo'jei ñacoare ne'cua pa'icore se ñaquë casi'ni? ¿Më'ë ñacoare so̱quë tiro ja'iore papi ju'icore du'ru ñama'ë pa'ini? 42Më'ë ñacoare pare so̱quë tiropi ju'iona ti ñama'ë pa'iquëpi me më'ë yo'jeire casi'ni: ‘Huau, më'ë ñacoare ne'cua ju'icore dutasi'i, nëocaijë̱'ë.’ De'oquëre pa'ë coa caquë yo'oquë maca. Më'ëpi du'ru macarepa më'ë ñacoare so̱quë tiro ju'iconi duta je̱ojë'ë. Jeteyo'je de'oye ñaquëpi më'ë yo'jeire ne'cua ju'icore dutacaiye pa'iji.

Më'ë Yo'oyere Ñajë Asaja̱'cohua'i A'ë, Më'ëre

(Mt 7.17-20; 12.34-35)

43De'o so̱quë yëpi co'a ca̱ quë̱iñe peoji. Ja̱je cui'ne co'a so̱quë yëje̱ de'o ca̱ quë̱iñe peoji. 44Ja̱je pa'ina, so̱quë ñëa ñape ñañe pa'iji, i̱ti quë̱iñena. Miu so̱quë yë pani quë̱iñe pa̱ji, co̱sa ca̱re. Ja̱je cui'ne miu pi̱si pani quë̱iñe pa̱ji, cuiya'i ca̱re. 45Ja̱je pa'ina, de'o pa̱i pani caji, de'oyere, i̱ joyo de'oyepi pa'iyere. Cui'ne co'aquë pani co'ayere caji, i̱ joyo co'ayepi pa'iyere. Yë'opopi caji, joyo pa'iyepi etaquëna.

Caya Huë̱'ña Ne Hue̱'ña

(Mt 7.24-27)

46¿Me yo'ojë mësaru yë'ëre Ëjaë, Ëjaë cajëta'a yë'ë cayeje̱ ne ma'ñe'ni? 47Quëasi'i, yë'ëna dani asacohua'ipi cui'ne yë'ë cayeje̱ yo'ocohua'i pa'iyere. Iyeje̱ pa'ye pa'iji. 48Ja̱ohua'i cato ë̱më cu̱tihuëna nëconi huë'e nesiquëje̱ pa'i pa'iji. Tsiayapi co'jenije ti̱'ama'ëna ta̱iñe pa̱ja'quë api. De'o yejana nesi do'ire. 49Ja̱je pa'iquëta'are asaquëta'a yë'ë case'eje̱ yo'oma'quëpi mejahuëna nëconi huë'e nesiquëje̱ pa'i pa'iji. Tsiaya co'jeni ai tutu tsa̱'ina ta̱iñe pa'iji.”

Currently Selected:

Lucas 6: sey

Highlight

Copy