Lucas 3

Juan Ti Doquëpi Yëhuoye

(Mt 3.1-12; Mr 1.1-8; Jn 1.19-28)

1Tiberio César pa̱i ëjaë paji'i. I̱pi quince o̱metëca cua̱ñequë pa'i maca Poncio Pilatopi paji'i, Judea cua̱ñequë ëjaë. Herodespi Galilea cua̱ñequë paji'i. I̱ yo'jei Felipepi Iturea cui'ne Tranconite cua̱ñequë paji'i. Cui'ne Lisaniaspi Abilinia cua̱ñequë paji'i. 2Maija'quë huë'e ñacaicohua'i ëjaohua'i cato Anás cui'ne Caifás paë'ë. Ja̱ohua'i pa'i mu'seña Maija'quëpi Zacarías mamaquë Juanna capi, cue̱ne yejare pa'ina. 3Juan cato Jordán tsiaya quë'roja̱'a sai si'a hue̱'ña pa̱i pa'icohua'ire capi: Ja̱'në co'aye cuasase'ere je̱oni po̱nëñe pa'iji. Po̱nëni oco dosicohua'ini Maija'quëpi mësaru co'aye yo'ose'ere sa̱i de'huaja̱'quë api. Ja̱je yëhuopi. 4Tsoe ja̱'rë Maija'quë caye quëacaiquë Isaíaspi toyaquë pa'ise'eje̱ cui'ne ja̱pi ti̱'api, i̱ toyase'e caji:

Cue̱ne yejapi pa̱i cui'neje asa cua̱ñoji,

Ne de'huajë̱'ë, mai Ëjaë ma'are.

Nuñerepa ma'a necaijë̱'ë, i̱ cu'i hue̱'ña.

5Yo'cohuë pa'ise'ere ne ti̱më ja̱'ñe a'ë.

Jai cu̱ti cui'ne a'ri cu̱ti pa'ise'ere nui yejarepa ne ja̱'ñe a'ë.

Nui ma'aña peose'ere nui ma'aña de'huaye a'ë.

Dea pë̱a quë'i ma'aña pa'ise'ere nui yeja ne ja̱'ñe a'ë.

6Ja̱ maca Maija'quë pa̱ire huasoye si'a pa̱i ñaja'cohua'i a'ë.

7I̱te oco do cua̱ñoñu'u cajë pa̱ipi i̱ quë'rona daicohua'ire Juanpi capi:

“¡A̲ña tsëcapë acohua'i! ¿Nepi mësarute quëare'ni, Maija'quë pë̱i nejoquëna, jëa ja̱'ñere? 8Po̱nësicohua'i pani, po̱nësicohua'i yo'oyere yo'ojë̱'ë. Ja̱je yo'ojëna, ñani dosi'i. Abraham tsëcapë a'ë cama'pë pa'ijë̱'ë. Ja̱ caye ti̱'a ma'ñe a'ë. Maija'quëpi yëni iye quë̱na pë̱aje Abraham tsëcapëre neñe pa'iji. 9Tsu̱'upo tsoe ne de'huasicoa, so̱quë ñëa cue̱ja'core. Si'a so̱quë ñëa de'oye quë̱i ma'ñe cato cu̱eni toana ëocoa. Maija'quë tsu̱'upoje̱ pa'i.”

10Ja̱ maca pa̱ipi i̱te se̱teña:

“¿Ja̱je pa'ito i̱quere neja'cohua'i a'ni?”

11Se̱jëna, Juanpi sehuopi:

“Caya ju'i ca̱ña paquë pani te'ore i̱siye pa'iji, ti peoquëna. A̲iñe paquë pani peoquë ja̱'re co̱ni a̱iñe pa'iji, te'e.”

12Pa'i do'i curiquë se̱cohua'ije̱ oco do cua̱ñoñu'u cajë daisicohua'ipi pa'ijë Juanre se̱i'ë:

“¿Ye'yaquë, i̱quere yëquë neja'cohua'i a'ni?”

13Se̱jëna, Juanpi capi:

“Cua̱ñese'e caye pa'ina, jerepa curiquë se̱ma'pë pa'ijë̱'ë.”

14Soldado pa'icohua'ipi i̱te se̱teña:

“Cui'ne yëquë, ¿i̱quere neja'cohua'i a'ni?”

Cajëna, sehuopi:

“Tutu yo'ojë sioma'pë pa'ijë̱'ë, yecohua'i payere. Coa coso do'ire tsioma'pë. Cui'ne mësarute sa̱iñere ti̱'api cuasajë pa'ijë̱'ë, sihuani.”

15Juanni Cristo pa'ima'quë cuasajë pa̱i utehuë. I̱ a'ë caquëna, asañu'u cajë. 16Cuasajëna, Juanpi capi:

“Ocopi doyë, mësarute. Ja̱ yë'ta'a yë'ë jeteyo'je daija̱'quë api, yë'ë jerepa de'oquëpi. I̱ jo'yaë i̱ zapato joyecaiquë yë'ëre tëto saisiquë api. Yë'ë jerepa teaye pa'i a'ë. Ja̱ë cato doja̱'quë api, Maija'quë joyopi cui'ne toapi. 17Tsoe pala ca̱jiji, trigo jëoquë i̱ti ca̱se'e de'huaquë ja'ose'e huahueja̱'core. I̱ti ca̱re pase'e i̱ de'hua hue̱'ñana de'huaquë ja'ose'e toa ti yayama'cona ëoja̱'quë api.”

18Ñeje caquë pa̱ire de'o coca yëhuoquë cui'ne jaiye yequeje̱ Juan quëapi. 19Cui'ne Herodes pa̱i ëjaëpi yo'jei Felipe nëjo Herodíasni jioni paquëña. Ja̱je yo'o ma'ñe a'ë caquë cui'ne i̱ yeque co'aye yo'ose'ena co̱ni yëhuopi, Juan. 20Ja̱je quëaquëta'are Herodespi i̱ caye asama'ë. Ja̱ yë'ta'api yeque co'aye yo'o co̱quë Juanre co'a pa̱ire co hue̱'ñana copi.

Jesure Doye

(Mt 3.13-17; Mr 1.9-11)

21Ja̱ yë'ta'a co cua̱ñoma'quëpi Juan oco doquë pa'ina, Jesuje̱ do cua̱ñosiquë paji'i, cui'ne i̱pi Maija'quëre se̱ maca ma'tëmopi ja̱ca saiona. 22Maija'quë joyopi su'teje̱ pa'ipi i̱na nëca meni pa̱ije ñajëna, ja̱ maca yë'ose'e ma'tëmopi jutapi, ñeje:

“Më'ë a'ë, yë'ë mamaquërepa. Më'ëni ai sihuaquë pa'iyë.”

Jesús Ñecuëohua'i

(Mt 1.1-17)

23Jesús treinta o̱metëca paquëpi Maija'quë co'amañarepa ne huëopi. Pa̱i caye cato José mamaquë paji'i. 24José paji'i, Elí mamaquë. Elí paji'i, Matat mamaquë. Matat paji'i, Leví mamaquë. Leví paji'i, Melqui mamaquë. Melqui paji'i, Jana mamaquë. Jana paji'i, José mamaquë. 25José paji'i, Matatías mamaquë. Matatías paji'i, Amós mamaquë. Amós paji'i, Nahúm mamaquë. Nahúm paji'i, Esli mamaquë. Esli paji'i, Nagai mamaquë. 26Nagai paji'i, Maat mamaquë. Maat paji'i, Matatías mamaquë. Matatías paji'i, Semei mamaquë. Semei paji'i, José mamaquë. José paji'i, Judá mamaquë. 27Judá paji'i, Joana mamaquë. Joana paji'i, Resa mamaquë. Resa paji'i, Zorababel mamaquë. Zorobabel paji'i, Salatiel mamaquë. Salatiel paji'i, Neri mamaquë. 28Neri paji'i, Malqui mamaquë. Melqui paji'i, Adi mamaquë. Adi paji'i, Cosam mamaquë. Cosam paji'i, Elmodam mamaquë. Elmodam paji'i, Er mamaquë. 29Er paji'i, Josué mamaquë. Josué paji'i, Elizer mamaquë. Elizer paji'i, Jorim mamaquë. Jorim paji'i, Matat mamaquë. 30Matat paji'i, Leví mamaquë. Leví paji'i, Simeón mamaquë. Simeón paji'i, Judá mamaquë. Judá paji'i, José mamaquë. José paji'i, Jonán mamaquë. Jonán paji'i, Eliaquim mamaquë. 31Eliaquim paji'i, Melea mamaquë. Melea paji'i, Mainán mamaquë. Mainán paji'i, Matata mamaquë. Matata paji'i, Natán mamaquë. 32Natán paji'i, David mamaquë. David paji'i, Isaí mamaquë. Isaí paji'i, Obed mamaquë. Obed paji'i, Booz mamaquë. Booz paji'i, Salmón mamaquë. Salmón paji'i, Naasón mamaquë. 33Naasón paji'i, Aminabab mamaquë. Aminabab paji'i, Aram mamaquë. Aram paji'i, Esrom mamaquë. Esrom paji'i, Fares mamaquë. Fares paji'i, Judá mamaquë. 34Judá paji'i, Jacob mamaquë. Jacob paji'i, Isaac mamaquë. Isaac paji'i, Abraham mamaquë. Abraham paji'i, Taré mamaquë. Taré paji'i, Nacor mamaquë. 35Nacor paji'i, Serug mamaquë. Serug paji'i, Ragau mamaquë. Ragau paji'i, Peleg mamaquë. Peleg paji'i, Heber mamaquë. Heber paji'i, Sala mamaquë. 36Sala paji'i, Cainán mamaquë. Cainán paji'i, Arfaxad mamaquë. Arfaxad paji'i, Sem mamaquë. Sem paji'i, Noé mamaquë. Noé paji'i, Lamec mamaquë. 37Lamec paji'i, Matusalén mamaquë. Matusalén paji'i, Enoc mamaquë. Enoc paji'i, Jared mamaquë. Jared paji'i, Mahalaleel mamaquë. Mahalaleel paji'i, Cainán mamaquë. 38Cainán paji'i, Enós mamaquë. Enós paji'i, Set mamaquë. Set paji'i, Adán mamaquë, cui'ne Adán paji'i, Diusu mamaquë.

Currently Selected:

Lucas 3: sey

Highlight

Copy