Lucas 2

Jesús Co̱ase'e

(Mt 1.18-25)

1Ja̱ mu'seña pa̱i ëjaë César Augustopi si'a yeja pa'icohua'ire cue̱cueye pa'iji caquë cua̱ñepi. 2Iye du'ru macarepa pa̱ire cue̱cueye cato yo'ohuë, Cirenio Siria cua̱ñequë pa'i maca. 3Ja̱je pa'ina, si'ahua'i saiye paji'i, pa̱i ñape i̱ohua'i daripëre pana ja̱rona cue̱cue cua̱ñoja'cohua'ipi.

4José cato David tsëcapë aquë paji'i. Ja̱ do'ire Galilea yeja daripë Nazaretpi sani Judea yeja daripë Belénna saji'i, Davidre co̱a sitona. 5Toya cua̱ñoja'quëpi Belénna saji'i, María i̱ huejaja̱'coa ca nëosicopi co̱añe ti̱'a huesësico ja̱'re. 6Ja̱je sani Belénre pa'ijëna, María co̱añe ti̱'aëna, 7ja̱rona pao, i̱o du'ru mamaquëre. Pani ca̱ña ca̱tipëpi tu̱nani hue̱quë a̱i de'huana o̱ao, pa̱i pëa hue̱'ña peo do'ire.

Hui̱ñaëpi Yëi Ñamare Ñacohua'ire Quëaye

8Belén quë̱no macare yëi ñamare ñacohua'ipi ñamique tsiore i̱ohua'ini ñajë paë'ë. 9Pa'ijëna, cuasama'tore papi Ëjaë hui̱ñaë ñai nëcaquëna, Maija'quë miañepi i̱ohua'ire mia huesoquëna, ai quëquë huesëhuë. 10Ja̱je ña quëquëjëna, Maija'quë hui̱ñaëpi capi:

“Ca'rama'pë pa'ijë̱'ë, mësarute huajë coca quëasi'quë daiyë, mësaru si'ahua'i asani ai sihua ja̱'ñere. 11Yure David daripëna tsi̱tu'ure co̱ao, mësarute huasoja̱'quëpi. Ja̱ë cato Cristo Ëjaëre papi. 12Mësaru ñani i̱ api cuasa ja̱'ñere ca̱ña ca̱tipëpi tu̱nani hue̱quë ai de'huana o̱asiquëpi u̱ina ti̱'aja'cohua'i a'ë.”

13Te'i Maija'quë jo'yaë hui̱ñaë ñai macapi yecohua'i ma'tëmo acohua'ije̱ ñaihuë. Ñeje cajë Maija'quëre sihuajë:

14Sihuajë de'oyerepa cañu'u, Maija'quëre ma'tëmo aquëre,

De'oye pa'iyere pa'ijë̱'ë, i̱pi sihuaquëna pa'icohua'ipi.

15Maija'quë jëjo daosicohua'i ma'tëmona co'isi maca yëi ñamare ñacohua'ipi i̱ohua'ija̱'a sa̱'ñe ca huëohuë.

“Ja̱je pa'ito esa Belénna sani ñañu'u, ëjaë maire quëase'ere.”

16Sani ti̱'ahuë, Maríare, Josére cui'ne tsihua'ëpi hue̱quë a̱ocona o̱asiquëpi u̱ina. 17Ja̱je i̱te ñani Maija'quë jo'yaë i̱ohua'ire quëase'ere quëareña. 18Quëajëna, asacohua'ipi ai cuasareña. 19Ja̱je yecohua'i yo'ojëta'are María cato i̱o joyona de'huao, si'aye iye, ti yo'ose'ere cuasaco. 20Yëi ñamare ñacohua'i si'aye i̱ohua'ire case'eje̱ paye pa'ina, ñani Maija'quëna sihuajë jë̱jëjë co'ihuë.

Maija'quëna Jesure I̱siye

21Ocho mu'seña pa'i maca tsihua'ë ca̱'ni maña tëajë cui'ne i̱ mamije hue'yohuë, Jesús, hui̱ñaë Maríare ja̱ peoco pa'i maca quëase'ere.

22Tsi̱tu'ure pasi jeteyo'je si'sire tsoa to̱ mu'seña ti̱'aëna, Jerusalén daripëna saijë tsi̱tu'ureje̱ sahuë, Maija'quëna i̱siñu'u cajë, Moisés cua̱ñese'epi ja̱je caye sëte. 23Ja̱je yo'ohuë, ëjaë cua̱ñese'epi ñeje toyase'e pa'i do'ire: “Si'a ë̱më tsi̱ du'ru co̱acohua'i Maija'quëna i̱sisicohua'i pa'ija̱'cohua'i a'ë.” 24Ëjaë cua̱ñeñepi caji: “Caya pi̱'are pa̱nita'a caya su'tere i̱sijë̱'ë.” Ja̱ yo'oyere cajë saë'ë.

25Ja̱ mu'seña Jerusalén pa'iquëpi Simeón hue'equëpi paji'i. Nuiñerepa pa'iquëpi Maija'quëre se̱i pa'iquëpi, Israel pa̱ire huasoyere utequë paji'i. Ja̱je pa'ina, Maija'quë joyopi Simeón ja̱'re pa'i 26quëapi, më'ë ju̱'iñe pa̱ja'quë a'ë, ëjaë jëjo daoquë Cristore ñama'ë pani. 27Maija'quë joyopi quëaquëna, Maija'quëre se̱ huë'ena sani pa'ina, Jesús pëca ja'quëohua'i tsihua'ëre cua̱ñese'e cayeje̱ neñu'u cajë Maija'quëre se̱ huë'ena dahuë. 28Dajëna, Simeónpi tsihua'ëre co̱ani Maija'quëna sihuaquë capi:

29Ëjaë, yë'ë yureta'a sihuaquë ju̱'iñe pa'iji.

Më'ë ca nëose'ere ñasiquëpi.

30Yë'ë ñaco ca̱pi huasoquëre ñahuë,

31Si'a pa̱i ña hue̱'ñana më'ë necaisiquëre.

32Ja̱ë api, Israel peocohua'ire miacaija̱'quë

Cui'ne i̱ do'ire yecohua'ipi Israel pa̱i ai de'ocohua'i a'ë, caja̱'cohua'i a'ë.

33Simeón tsihua'ëre ñaquë cayere ai cuasareña, pëca ja'quëohua'i. 34Ja̱ maca Simeón Maija'quëpi de'oye ñacaija̱'quë icohua'ire caquë Maija'quëre se̱ji'i. Se̱ni tëjini Maríare capi, Jesús pëca ja'core:

“Asajë̱'ë. Iquë tsihua'ë jai pa̱ire Israel pa̱ire ne ta̱ñojaquë api. Cui'ne jai pa̱ire Israel pa̱ire Maija'quëre tuiye huëoquë yo'oja̱'quë api. Ja̱je pa'ina, jai pa̱i i̱te sa̱ñope caja̱'cohua'i a'ë. 35Cui'ne, iquë do'ire jai pa̱i pa̱i ñape i̱ohua'i joñoa cuasaye ñañe pa'ija̱'coa. Ja̱je pa'iquëta'are më'ëreta'a si'aye iye yo'oyete cuasani hua'tipi më joyoja̱'a tota etoja̱iñeje pa'ye pa'ija̱'coa, oi do'ire.”

36Cui'ne ja̱rote te'o nomio yequë mu'se pa'i ja̱'ñere asaco quëaco. Ana hue'eco, Fanuel mamaco paco'ë. Aser tsëcapë aco, aio maca paco'ë. Nomi tsi̱opi huejani siete o̱metëca ë̱jëre pani hua'jesicopi paco'ë. 37Yure cato hua'jeopi ochenta y cuatro o̱metëca paco'ë. Maija'quëre se̱ huë'epi etama'copi ñamiña cui'ne mu'seña Maija'quëre sihuaco a̱o a̱ima'o se̱o paco'ë. 38Ja̱o Anapi i̱ti ja̱je yo'ojë ca maca dani Maija'quëre du'ru se de'oji caco pëpa to̱ni Jerusalén pa̱ire huaso ja̱'ñere utecohua'ini quëao, tsihua'ë Jesús yo'o ja̱'ñe ayere.

Nazaretna Co'iye

39Ja̱ maca si'aye ëjaë cua̱ñese'e yo'o tëjini co'ihuë, Galileana i̱ohua'i pa'i daripë Nazaretna. 40Tsihua'ë i̱ ai de'oyeje̱ ai tutu quë'i cui'ne ai ta̱'ñe pa'i de'opi, Maija'quëpi i̱te de'oyerepa ñacaina.

Jesús Maija'quë Huë'ere Pa'iye

41I̱ pëca ja'quëohua'i coa si'a o̱metëcaña Jerusalénna saë'ë, Israel pa̱i Egíptopi etasi mu'sere cuasajë tsi'siyena. 42Jesús doce o̱metëca ti̱'ani pa'i maca si'ahua'i Jerusalénna ja̱ fiesta yo'oyena tsi'siñu'u cajë saë'ë, noni ja̱je yo'ojë pa'icohua'i sëte. 43Ja̱ fiesta caraja̱quëna, co'i maca tsihua'ë Jesús Jerusalénna pëapi, pëca ja'co cui'ne José huesëjëna. 44Te'e mu'serepa ma'aja'a Jesuje̱ daiji jai pa̱i co̱ni cuasajë saë'ë. Saijëta'a do'ijë quë'ro cui'ne i̱ohua'i ñacohua'i quë'ro co'ejëna, peopi. 45Peoquëna, ñani ja̱ maca yureta'a co'ihuë, Jerusalénna co'eñu'u cajë.

46Toaso̱ mu'seña pa'i maca ti̱'ahuë, Maija'quë huë'ere pa'ina, cua̱ñese'e ye'yacohua'i ja̱'re co̱ni ja'rusiquëpi ñu'i i̱ohua'i cayere asaquë cui'ne i̱ohua'ireje̱ sa̱ñope se̱i yo'oquëna. 47Si'a pa'icohua'i Jesús si'aye ta̱'ñe asaquëpi sa̱ñope de'oyerepa sehuoyere asajë quëquëhuë. Merepa ai asaquë'ni, ja̱ë cajë ai cuasareña. 48Pëca ja'quëohua'ipi i̱te ti̱'ajë ai cuasajëna, pëca ja'copi cao:

“Tsihua'ë, më'ëni më ja'quë cui'ne yë'ë co'a ju̱'ijë co'eroja̱iñë. ¿Me nesi'quë ja̱je yëquëre, huesë ëaye yo'ou'ni?”

49Ja̱je cacona, Jesupi i̱ote capi:

“¿Me yo'ojë yë'ëre co'eye'ni? Huesëma'pë yë'ë cato ja'quë co'amañare yo'oja̱'quë a'ë.”

50Ja̱je caquëna, i̱ohua'ipi cuasaquë cayere asa ti̱'ama'pë paë'ë.

51Ja̱ maca i̱ohua'i ja̱'re co̱ni co'ipi, Nazaretna. Si'anë de'oye sehuoquë paji'i, pëca ja'quëohua'ire. Pëca ja'copi iyere si'aye i̱o joyona de'huao. 52Ja̱je yo'oquë Jesús ai de'opi, i̱ ca̱pë cui'ne i̱ cuasayeje̱. Maija'quëpi cui'ne pa̱ipi co̱ni i̱ de'oye pa'iyere ñajë de'oquë api cuasahuë, tayoye peoquëna.

Currently Selected:

Lucas 2: sey

Highlight

Copy