Hebreos 10
10
1Moisés cua̱ñese'e cato pa̱i to'ouje̱ pa'ye paji'i, i̱tirepa dai ja̱'ñe pa'ina. Ja̱je pa'ina, i̱tirepa peopi, ja̱ do'ire cua̱ñese'e yo'ocohua'ire de'ocohua'ire pare necaiye peopi, o̱metëca ñape Maija'quëna tsioja̱ijë nëicohua'ire huaijë i̱sicohua'ire. 2Ja̱je pa'ina, cua̱ñese'epi de'ocohua'ire tsoa to̱ñe pa'ito Maija'quëre i̱sijë nëicohua'ire huaiye je̱ora'huë, co'aye peocohua'ire nëina, asajë. 3Ja̱je pa'iquëta'are nëicohua'ire huaijë i̱sijë yo'oye cato co̱caji'i, i̱ohua'i co'aye yo'oyere o̱metëca ñape cuasayere. 4Ja̱je pa'ina, hue̱quë ë̱mëohua'i tsie, cui'ne jo'ya ñama tsie, co'aye yo'oyere nejocaiye ti̱'a ma'ñe paji'i.
5Ja̱je pa'ina, Cristo iye yejana i̱ caca maca capi, Maija'quëre:
Më'ëre i̱siñu'u cajë, nëicohua'ire huaijë yo'oye, cui'ne co'amaña më'ëre i̱siye më'ë cato coequë ñañë.
Ja̱je pa'ina, më'ëpi yë'ëre ca̱përe i̱sihuë.
6Më'ë cato sihuama'ë pa'iyë, co'aye yo'osi do'ire tsoa to̱ñu'u cajë, nëicohua'ire huani ëojë, cui'ne co'amañare i̱sijë yo'oyere.
7Ja̱ maca ñani cahuë: “Daiyë, yë'ë më'ë yëyeje̱ pa'ye yo'osi'i caquë.
Ja̱je toyase'e pa'iji, toya pëpëna yë'ë yo'o ja̱'ñe ayere.”
8Ja̱je pa'ina, du'ru macarepa caji, Moisés cua̱ñese'ere yo'ojë co'aye yo'o do'ire nejoñu'u cajë nëicohua'ire huani i̱sijë, cui'ne ëojë yo'ojëta'are Maija'quë coequë sihuama'ë ñaji. 9Casiquëpi jeteyo'je acore caji: “Daiyë, yë'ë më'ë yëyeje̱ yo'osi'i caquë.” Ja̱je cani caji, si'aye ja̱'në nëicohua'ire huaijë i̱sijë yo'ose'ere nejoñë caquë. Nejoni huajëyere neñë, caquë. 10Ja̱je pa'ina, Jesucristo i̱ ca̱përe ti i̱si tëjiquë, Maija'quë yëyeje̱ pa'ye ju̱cacai do'ipi, mai Maija'quë tse̱cohua'i de'ohuë.
11Maija'quë huë'e ñacai ëjaohua'i judío pa̱i acohua'i cato si'a mu'señapi i̱sicohua'i a'ë, te'eje̱ pa'yere, si'anë nëicohua'ire huaijë. Ja̱je yo'ojëta'are ja̱ yo'oye pa̱i co'aye yo'ose'ere nejo ti̱'añe peoye a'ë. 12Ja̱je pa'iquëta'are Jesucristo cato te'ore pare i̱si tëjipi, i̱ ju̱'iñepi. Ja̱ jeteyo'je yure cato Maija'quë ëja te̱'tere ja'rusiquëpi ñu'iji. 13Ja̱rote pa'i uteji, i̱te sa̱ñope yo'ocohua'ire Maija'quëpi i̱ quë̱o huë'ehuëna të'ya meni saoja̱quë caquë. 14Te'e i̱ i̱siyepi Maija'quë tse̱cohua'ire ti nuñe pa'iohua'ire nepi. 15Ja̱je pa'ina, Maija'quë joyopi ja̱re nuñere pa'ë caquë quëaquë caji, ñeje:
16Yë'ëpi ja̱ mu'seña tëto saisi maca pa̱ire ñeje yo'oja̱'quë a'ë, caji, mai Ejaë:
I̱ohua'i joñoare pana yë'ë cua̱ñeñere ayaja̱'quë a'ë,
Cui'ne i̱ohua'i cuasa hue̱'ñana toyaja̱'quë a'ë, yë'ë cua̱ñeñere.
17Cui'ne yequeje̱ caji:
Ti cuasa co̱ñe pa̱ja'quë a'ë, i̱ohua'i tayojë co'aye yo'ose'ere.
18Ja̱je pa'ina, yure cato tsoe sa̱i to̱ cua̱ñose'e sëte, co'aye yo'o do'ire sa̱i to̱ñu'u cajë i̱sijë yo'oye peoji.
Maija'quëna Tsioja̱iñe Pa'iji
19Ja̱je pa'iye sëte Maija'quë do'ijë yure cato ca'raye peoyerepa Jesús tsie do'ipi Maija'quë huë'ena i̱ pa'i hue̱'ñare pana cacaye pa'iji. 20Jesús ju̱'i do'ipi huajë ma'a, ti̱ pa'i ma'arepa tsoe tëhuose'ere maire hui'yocaisi ma'aja'a saijë ti̱'añe pa'iji, i̱ pa'i hue̱'ñare pana. 21Ja̱je pa'ina, Jesu api, Maija'quë huë'ere pa'i maire se̱cacai Ëjaërepa, Maija'quë huë'e ñacai Ëjaë sëte. 22Ja̱je pa'ina, nuñe pa'i joñoapi pa'ire paji Maija'quëre cuasacohua'ipi, co'aye cuasaye tsoa to̱sicohua'ipi, ca̱pëje̱ de'o ocore papi tsoa to̱sicohua'ipi, ja̱ yë'ta'a co'acohua'ire nëiñe peocohua'ipi, ca'rama'pë Maija'quë quë'rona sa tsioja̱ñu'u. 23Ja̱je pa'ina, Maija'quëpi i̱ ca nëose'ere i̱sire paja̱'quë api cuasa do'ire, ti jëa coema'pë o̱cue pa'i macarepa pañu'u, Maija'quëre pa'ire paji cuasajë mai utejë yo'oyere. 24Ja̱je pa'ina, co'eñu'u, pa̱ire ai oiyepi, cui'ne de'o co'amañare neñepi, ai pa'ija̱'core. 25Ja̱je pa'ina, mai Ëjaë dai mu'se jerepa ja'yere pa'iye sëte pa̱i ñape yecohua'ire ca sëtoñu'u, de'oye yo'oja̱'cohua'ire. Ja̱je pa'ina, si'anë je̱oma'pë tsi'siye pañu'u, tsi'sima'cohua'i yo'oyere ye'yema'pë pañu'u.
26Ja̱je pa'iquëta'are maipi tsoe nuñerepa pa'iye asasicohua'ita'a ja̱ yë'ta'a co'ayere yëjë yo'ocohua'i pa'ito peoji, yeque mai co'aye yo'o do'ire sa̱i to̱caiye. 27Coa Maija'quëre sa̱ñope yo'ocohua'ire nejo hue̱'ñase'e huajëya'ye pa'iose'e uteye pa'iji, toa coro mëi hue̱'ñapi pa̱i ñape yo'ose'e ñani nejo hue̱'ñapi. 28Ñajë'ë, Moisés cua̱ñese'ere, sehuoma'ë yo'osiquëre, cayaohua'i, pa̱nita'a toaso̱cohua'i i̱ yo'oye ñasicohua'ipi. Sa̱ñope cacohua'i pa'ito ti oima'pë ja̱ëte huani je̱oñe paji'i. 29Ja̱je pa'ito jerepa si'se cua̱ñoja'cohua'i a'ë, ja̱ tsiepi Maija'quë tse̱cohua'ire necaisicohua'ita'a, Maija'quë mamaquëre meñe tsa'cujë, Maija'quë ca nëose'e tsiere coecaisicohua'i cui'ne Maija'quë joyore i̱ohua'ire oi necai joyore sa̱ñope casicohua'i. Ja̱ tsie cato huajëye ca nëose'ere do'i quë'yerepa meñe necaiye a'ë. 30Maipi asayë, Maija'quë case'e: “Pa̱i yo'ose'e nuñerepa ñaquë ne de'huaye cato yë'ë yo'oye a'ë. Yë'ëpi sa̱isi'i.” Cui'ne yequeje̱ capi: “Maija'quë i̱ pa̱ire ñaquë i̱ohua'i yo'ose'eje̱ pa'ye sa̱ija'quë api.” 31Ai huajëya'ye pa'ye a'ë, Maija'quë huajëquërepa jë̱ñana to̱meñe, ja̱je pa'iohua'ipi.
32Mësaruja̱'a mia hue̱'ña pa'i coca asasi maca ai yo'oye ai pa'ina, quëco paye pajë quëcose'ere cuasajë̱'ë. 33Ja̱je quëcojëna, mësaru acohua'ire ai co'aye cajë cui'ne co'aye yo'ohuë, si'a pa̱i ña hue̱'ñana. Ja̱je yo'ojëna, yecohua'ipi i̱ti co'aye yo'o cua̱ñocohua'ina se tsioni ai yo'oyere paë'ë. 34Co cua̱ñosicohua'ire mësarupi teaye ñajë co̱caë'ë. Cui'ne mësaru co'amañare peo hue̱'ña jiotoje̱ sihuajë ñahuë, jeto ma'tëmore ti caraja̱ima'co'a maña payë, cuasajë quëcojë. 35Ja̱je pa'ina, mësaru, Maija'quëpi necaija̱'quë api cuasajë quëcoyere je̱ocoma'pë pa'ijë̱'ë. Ja̱ cuasase'epi mësaru ai pa ja̱'ñe ti̱'aja'cohua'i a'ë. 36Ja̱je pa'ina, quëcojë pa'ijë̱'ë, Maija'quë yëyere yo'oñu'u cajë. Ja̱je yo'ojë mësaru i̱ si'aye i̱ ca nëose'ere paja̱'cohua'i a'ë. 37Ja̱je pa'ina, toyase'e caji:
Esa, ai esa daija̱'quë api,
I̱ti daija̱'quëre casiquëpi, ai tsoe nëima'ë pasipi.
38Yë'ë tse̱quë nuñe pa'i cato Maija'quë pa'ire paji cuasa do'ipi pa'ija̱'quë api,
Ja̱je pa'iquëta'are sihuama'ë pa'iyë, ja̱'në pa'ise'ena co'iquëre cato.
39Ja̱je pa'iquëta'are mai cato ja̱'në pa'ise'ena co'ijë nejo cuañocohua'i acohua'i peoyë. Mai cato Maija'quë pa'iji cuasa do'ipi joyo pa'iyena ti̱'acohua'i acohua'i a'ë.
Currently Selected:
Hebreos 10: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
