Hebreos 9
9
Iye Yeja Maija'quë Huë'e Cui'ne Ma'tëmo Huë'e
1Tsoe hue̱'ña Maija'quë ca nëose'e cato, iye yeja Maija'quë huë'ena Maija'quë se̱jë yo'o ja̱'ñe quë'ye paji'i. 2Ja̱ ca̱'ni huë'e cato ñeje ne de'huasico paji'i, du'ru macarepa tu'rihuëre, de'o hue̱'ña hue'yo sitore toa tsë̱oni nëco saihuë, cui'ne Maija'quëre i̱sisi a̱o, cui'ne mesa paji'i. 3Cayaye acore ca̱pi tëhuosico je te̱'tere paji'i, yequë tu'rihuë ñeje hue'eco ai de'o hue̱'ñarepa. 4Ja̱rote paji'i, huëo së̱ ma'ñare ëoco oropi de'o saihuë nesico cui'ne i̱ti ca nëose'e de'hua mahuë, si'a te̱'ña oropi jasico paji'i. Cui'ne mahuë sa̱'nahuëre te'e oro u̱cu duruhuë paji'i. I̱ona ma'tëmopi to̱mesi a̱ore ayasicopi paji'i. Cui'ne ja̱rote paji'i, Aarón tse̱'equë pa'isi tupë. Ja̱o cato cui'naopi huajëco de'oni joro quë'ico pa'isico paji'i, cui'ne quë̱na to̱ñana ca nëose'ere toyase'ere ayasico paji'i. 5Cui'ne ja̱ mahuë ë̱mëje'ere paë'ë, hui̱ñaohua'i capë̱a quë'iohua'ipi, Maija'quë pa'iye i̱ñoja'cohua'ire nesicohua'ipi. I̱ohua'i capë̱api mahuë si̱o toto si'aore peo hue̱'ña pë'pëhuë, pa̱i co'aye yo'ose'ere oni yeje hue̱'ñare. Ja̱ ayere ai jerepa quëaye peoji, yure cato i̱tise'e pa'ija̱quë.
6Ja̱je de'huasicona Maija'quë huë'e ñacaicohua'ipi si'anë je̱oñe peoyerepa cacayë, du'ru tu'rihuëna Maija'quëre necaiye yo'ocohua'ipi. 7Ja̱je pa'iquëta'are yeco se̱ña maca tu'rihuë cato Maija'quë huë'e ñacaicohua'i ëjaëre pase'e cacaye paji'i, te'e o̱metëcahuëre te'erepa. Cui'ne ja̱rona cacaquë pani saye pa'iji, nëicohua'i tsiere i̱ co'aye yo'o do'ire sa̱iquë, cui'ne pa̱i co'aye yo'o do'ire sa̱icasi'i caquë. 8Iye yo'ose'eja̱'a, Maija'quë joyopi maire quëaji, ja̱ yë'ta'a du'ru maca tu'rihuëna Maija'quëre se̱ñe pa'ito, Maija'quëre ca hue̱'ñare pana sai ma'api ja̱ yë'ta'a hui'yoma'copi paji'i. 9Si'aye iye yo'ose'e cato quëaji, iye mu'seña pa'icohua'ini. Ja̱je pa'ina, ja̱rona Maija'quëre i̱sijë, cui'ne nëicohua'ire huaijë ëojë se̱cohua'ire de'oye cuasaye ti necaiye pa̱pi. 10Ja̱ yo'oye cato coa a̱o a̱iñese'e, u̱cuyese'e cui'ne si'si cuya to̱ñese'e ë̱mëje'ese'e co̱caji'i. Ja̱je pa'ina, Maija'quë si'aye yeque po̱na macaja̱'a ja̱je yo'oye paji'i.
11Ja̱je pa'iquëta'are Cristo tsoe daji'i. Ja̱ë api, Maija'quë huë'e ñacai Ëjaërepa, si'a de'o co'amaña caraja̱i ma'ñere paquërepa. I̱ ñacai huë'e cato ai de'o huë'ere pa'ë, nuñerepa yo'o huë'e a'ë, pa̱i nema' huë'e a'ë, iye yeja huë'ere caye pa̱ñë. 12Cristo Maija'quë huë'ena cacapi, i̱ tsierepa i̱sisi'i caquë, cacama'ë paji'i, hue̱quë tsiere, pa̱nita'a jo'ya ñama tsiere i̱sisi'i caquë. Ja̱je pa'ina, te'erepa caca tëjipi. Cacani maire ti̱'acaji'i, huaso cua̱ñoni ti pani huesëyere. 13Hue̱quë ë̱mëohua'i tsie cui'ne jo'ya ñama ë̱mëohua'i tsie cui'ne hue̱quë nomi tsi̱ tsie Maija'quëre i̱si hue̱'ñana ëosi hua̱ta tutu quë'ye paji'i. Ja̱je pa'ina, i̱tipi co'aye yo'osicohua'ina tsoaru si'sire peocohua'i de'ocohua'ire ne tutu quë'ye pa'iji, ë̱mëje'ese'e. 14¡Ja̱je pa'iye sëte, je ja'yerepa Cristo tsie tutu paquë'ni! Maija'quë joyopi ti pani huesëquëpi yo'oquëna, i̱ja'a co'ye Maija'quëna i̱siquë ti si'si te̱'ña peoquëpi yo'ose'e. Ja̱je pa'ina, i̱ tsiepi ju̱'iñena sayere mai cuasayere peo hue̱'ña tsoa to̱caiji, Maija'quë huajëquëre pare de'oye necaija̱jë caquë.
15Jesucristo api, huajëye ca nëose'ere yo'oquë, Maija'quë cajeohua'ire pa̱ire necaiquë. Ja̱je pa'ina, i̱ ju̱'iñepi sa̱i to̱caji'i, ja̱'në ca nëose'ere yo'ojë tayose'ere, Maija'quë soisicohua'ipi ti pa'iyere i̱ ca nëose'ere paja̱jë caquë. 16Ja̱je pa'ina, i̱ co'amaña huahueyere ca nëose'epi do'i quë'yerepa pa'ija̱quë cani du'ru macarepa i̱ti ca nëosiquëpi ju̱'isiquë api asayerepa pa'iji. 17I̱ti cuasa nëosiquëpi ja̱ yë'ta'a huajëquë pa'ito ca nëose'e do'i peoye pa'iji. Ju̱quëna, do'i quë'ye paji'i. 18Ja̱ do'ire du'ru macarepa cuasa nëose'epi do'i quë'ye pa'ija̱quë cajë tsie casose'epi, huëose'e a'ë. 19Ja̱je pa'ina, Moisés si'aohua'ire quëapi, Israel pa̱ire cua̱ñese'e cayere. Quëa tëjini maja'i naña sëohuë nesicopi ca̱të yoje̱ pa'iona, hisopo tarana hue̱ni hue̱quë cui'ne jo'ya ñama tsiena ocopi co̱'mesicona co co'i meni cua̱ñese'e toya pëpëna tsiepi sa'cuapi, cui'ne pa̱ireje̱ si'aohua'ire tsiepi sa'cuapi. 20Ja̱je yo'oquë capi, ja̱ohua'ire: “Iye tsie cato, Maija'quë mësaru yo'o ja̱'ñere cua̱ñe nëoñere do'i quë'ye neñere i̱ñoñe a'ë.” 21Ja̱je caquë Moisés, Maija'quë ca̱'ni huë'eje̱ tsiepi si'a huë'e sa'cuapi cui'ne Maija'quëre necaijë yo'o co'amañaje si'aye tsiepi ne saohuë. 22Ja̱je pa'ina, cua̱ñese'e caji: ti si'aye tsie do'ipi de'ocohua'ire neñe pa'iji. Tsie casoye peoto, co'aye yo'osi do'ire sa̱i to̱ñe peoji.
Cristo Ai Yo'ose'epi Co'aye Yo'ose'e Nejocaji'i
23Iye yeja ayere ma'tëmo co'amañaje pa'ye nëicohua'ire huaijë i̱si do'ipi tsoa to̱ñe paji'i. Ja̱je pa'iquëta'are ma'tëmo pa'ija̱'cohua'ire cato nëicohua'ire huaijë i̱siye jerepa pa'yepi tsoa to̱ñe pa'iji. 24Ja̱je pa'ina, Cristo, pa̱ipi ma'tëmo huë'eje̱ pa'iore nesi huë'ena cacaye pa̱pi. I̱ cato ja̱re ma'tëmore pana cacapi. Yure ja̱rote pa'i mai do'ire se̱cacai pa'iji, i̱ pëca ja'quë ña hue̱'ñana. 25Maija'quë huë'e ñacai ëjaërepa judío pa̱i cato de'o hue̱'ñare pana o̱metëca ñape cacaquë api, i̱ tsie peoyere i̱sisi'i caquë. Ja̱je pa'iquëta'are Cristo cato si'anëpi ju̱'i i̱ tsie i̱siquë pa'iye pa̱ji. 26Ja̱je yo'oye pa'ito Cristo yeja de'hua maca aquëpi si'anë ju̱cacai patira'pi. Ja̱je pa'iquëta'are Cristo cato yure tëji mu'seña pa'i maca dani i̱ ju̱'i do'ipi si'aye co'aye yo'oyere nejocaji'i. 27Pa̱i ju̱'iñe je̱'quë te'erepa ju̱'iñe pa'iji. Ja̱ jeteyo'je cato i̱ohua'i yo'ose'e ñani ca tëjiyese'e pa'iji. 28Ja̱je pa'ye cui'ne Cristoje̱ te'erepa ju̱cacani tëjipi, jai pa̱i co'aye yo'o do'ire nejocasi'i caquë. Ti̱jupë ñai co̱ maca cato co'ayere nejocasi'i caquë daiye pa̱sipi, i̱te utejë pa'icohua'ire huasosi'i caquë daija̱'quë api.
Currently Selected:
Hebreos 9: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
