Hebreos 11
11
Pa'ire Paji Cuasaye
1Pa'ire paji cuasaye cato mai uteyere paja̱'cohua'i a'ë cuasajë pa'iye a'ë, cui'ne mai ña ma'ñere tsoe ñase'eje̱ pa'ye cuasajë pa'iye a'ë, ti jëa coema'pë. 2Ja̱je pa'ina, mai aiohua'i tsoe pa'isicohua'i ja̱je cuasa do'ipi de'ocohua'irepa ca cua̱ñohuë.
3Ja̱je pa'ina, mai pa'ire paji cuasacohua'ipi si'a co'amaña mai ñañe peose'ere Maija'quëpi i̱ yë'ose'epi de'huapi, cuasayë.
4Pa'ire paji cuasa do'ipi Abel ai de'oyere Maija'quëre i̱sipi, Caín i̱siye jerepa pa'yere. Ja̱je pa'ina, Maija'quëpi i̱te nuñe yo'oquëre caquë i̱ i̱siyere sihuacaji'i. Ja̱je pa'ina, tsoe ju̱'isiquëta'a Abel ja̱ yë'ta'a pa'ire paji cuasayeja̱'a caji.
5Pa'ire paji, cuasa do'ire Enocre ma'tëmona Maija'quëpi ju̱'ima'quëre huajëquëre sa'a̱ji'i. Saëna, pa̱ipi i̱te co'e juja'a̱huë'ë. Ja̱je pa'ina, toyase'e caji, Enoc ja̱ yë'ta'a ma'tëmona sa cua̱ñoma'në Maija'quë yëyere yo'oquë pa'a̱ji'i. 6Ja̱je pa'ina, pa'ire paji cuasaye peocohua'i, Maija'quë yëye yo'o ti̱'añe peoji. Pa'ire paji cuasaye a'ë Maija'quëna tsioja̱iñe. Cui'ne, Maija'quëpi i̱te co'ecohua'ire jaiye de'oyere pare i̱si ja̱'ñere ti̱'añe.
7Maija'quëpi ti ña ma'ñepi pa'ija̱'coa, yequë mu'se caquë quëaëna. Pa'ire paji cuasa do'ire Noé de'oye sehuoni jai yohuë de'huapi, i̱ tsëcapëre huasoja̱'core. Ja̱je pa'ina, Noé pa'ire paji cuasasi do'ipi huaso cua̱ñopi, iye yeja pa̱ise'e ne huesëjëna.
8Pa'ire paji cuasa do'ire Abraham Maija'quë soiye de'oye sehuoni i̱ yeja je̱oni, Maija'quë soi hue̱'ñana saji'i, i̱te i̱sija̱ yejana. Ja̱rona saiyë, cuasama'ë huesërepa sa'a̱ji'i. 9Sani pa'ire paji cuasa do'ipi Maija'quë i̱sisi'i ca nëosi yejare ti̱je pa'ipi ca̱'nipi nesi huë̱'ñare pa'a̱ji'i. Pa'isiquëni cui'ne Isaacje̱ cui'ne Jacobje̱ ca̱'ni huë̱'ñare pa'a̱huë'ë, i̱ i̱sisi'i ca nëose'e pacohua'ipi. 10Ja̱je pa'ina, Abraham Maija'quëpi cue̱cueni jëacore pare nesi daripëre utequë pa'a̱ji'i.
11Pa'ire paji, cuasa do'ire Zara aiopi cui'ne caraopi tutu i̱si cua̱ñoni mamaquëre co̱ao, i̱ote i̱sisi'i ca nëosiquëni, care papi caco sehuo do'ire. 12Ja̱je pa'ina, Abraham pani tëji mu'señapi i̱ acohua'ire jai pa̱ire papi quë̱na huë ma'ñoco ja'i pa'ire pare cui'ne jai tsiaya të̱'tëpa mejahuëje pa'yere pare, cue̱cue saoye peoyerepa.
13Si'aohua'i ja̱ohua'i cato Maija'quë ca nëose'e pama'pë ju̱jua'huë'ë. Ja̱je pa'iquëta'are pa'ire paji cuasacohua'i sëte so'opi se ñajë, pa'i ja̱'ñere sihua'a̱huë'ë. Ja̱je pa'ina, iye yejare ti̱ohua'ipi coa pa'iyë, cuasa'a̱huë'ë. 14Ja̱je cacohua'i cato ti̱ñarepa quëayë, ja̱ yë'ta'a yequë yejare i̱ohua'i paja̱ yejare co'ejë cu'iyë cajë. 15Ja̱je pa'ina, i̱ohua'i daisi yejare cuasajë cacohua'i pani tsoe co'ira'huë, i̱ohua'i daisi yejana. 16Ja̱je pa'iquëta'are i̱ohua'i cato ai de'o yejare pare yëhuë, ma'tëmo yejare. Ja̱je pa'ina, tsoe de'huacaisiconi de'o daripë, i̱ohua'i pa'ija̱'to paye sëte Maija'quë huajëya' coema'ë pa'iji, i̱ohua'i pëca ja'quëre hue'yoto.
17Pa'ire paji cuasa do'ire Abraham Maija'quëpi neñasi'i caquë caëna, i̱ ca nëosi mamaquëni huani ëoquë i̱siquë se̱si'i caquë yo'opi. I̱ mamaquë te'i macani i̱sire pasi'i caquë yo'opi, 18Maija'quëpi Isaac do'ija̱'a jai pa̱ire më'ë acohua'ire paja̱'quë a'ë ca nëosiquëta'are. 19Ja̱je pa'ina, Abraham cato coa huesë yo'oye pa̱pi. Asaquë yo'opi, Maija'quëpi ju̱'isicohua'ire huëoquë pa'iyere. Ja̱je pa'ina, ju̱'isiquëje̱ pa'ini mamaquëre huajëquëre pa co̱pi.
20Pa'ire paji cuasa do'ipi Isaac, yequë mu'se Jacob cui'ne Esau de'oye pa'i ja̱'ñere caca'a̱ji'i. 21Pa'ire paji cuasa do'ipi Jacob José mamajëre, pa̱i ñapere i̱ohua'i de'oye pa'i ja̱'ñere caca'a̱ji'i, i̱ ju̱'iñe ti̱'asi maca. Cui'ne i̱ doquë cu'i tupëna jëaye tota paquë nëcaquë Maija'quëre de'oquëre pa'ni caquë sihua'a̱ji'i. 22Pa'ire paji cuasa do'ipi José i̱ ju̱'i maca Israel mamajëpi Egíptopi yequë mu'se etani saija̱'cohua'i a'ë capi. Caquë i̱ tara ja̱je yo'ojë̱'ë caquë cua̱ñepi.
23Pa'ire paji cuasa do'ire Egípto pa̱i ëjaëpi tsi̱re huani je̱oñe pa'iji cua̱ñese'e pa'itoje̱, ca'rama'pë tsihua'ëre de'oquë macani ñani oijë Moisésre ja̱'a co̱asiquëni pëca ja'quëohua'i toaso̱ ñañëohua'ire yahueni pahuë. 24Pa'ire paji cuasa do'ipi Moisés po̱së de'osi maca coepi, Egípto ëjaë mamaco, mamaquë hue'yo cua̱ñoñe. 25Coa ai jerepa Maija'quë pa̱i ja̱'re co'aye yo'o cua̱ñoñere yëpi, co'ayere yo'oquë nëhui tëcahuë maca sihuaye pa'iyere coequë. 26Ja̱je pa'ina, cuasapi, ai jerepa de'oji, Cristo do'ire Maija'quë tse̱cohua'i ja̱'re ai yo'oyepi. Ja̱je pa'ina, Egípto de'o co'amañare do'i peoye ñapi, Maija'quë i̱te i̱sija̱'a co'amañare jerepa pa'ye cuasaquë. 27Pa'ire paji cuasa do'ipi Moisés Egípto pa̱i ëjaë i̱te pë̱iñe ca'rama'ë Egíptopi etani sani, Maija'quëre ñañeje pa'yerepa i̱ yëyere cuasaquë o̱cue pa'i macarepa paji'i.
28Pa'ire paji cuasa do'ipi Moisés Egípto eta huajë mu'se ti̱'aquëna, sihuaquë cua̱ñepi, eta sa'noana tsiepi tsoajë̱'ë caquë. Ja̱je tsoarena, huani je̱o hui̱ñaëpi te'ireje̱ Israel pa̱i du'ru mamaquëre pare huaiye paja̱'quëre capi. 29Pa'ire paji cuasa do'ipi Israel pa̱ije jai Maja'iña yeja ja̱jucore saiyeje̱ pa'ye je̱ë'ë, yequë je te̱'tena, ñani cui'ne Egípto pa̱ije je̱ñu'u cajë yo'ojë dutu ju̱jua'huë'ë.
30Pa'ire paji cuasa do'ipi Israel pa̱i siete mu'seña Jericó daripë tëhuopa yërëhueja̱'a të'ija̱'ahuë'ë. Të'ija̱isi maca tëhuopapi jë'ye darëa̱'co'ë. 31Pa'ire paji cuasa do'ipi Rahab co'a nomioje Maija'quë pa̱i a'ë cuasama'cohua'i ju̱'ijëna, te'e ju̱'iñe pa̱o, Israel pa̱ire, yahue peocohua'ire de'oye ñacaisi do'ire.
32¿I̱quere yeque caja̱'quë a'ni? Ja̱je pa'ina, yë'ëpi, Gedeón, Barac, Sanson, Jefté, David, Samuel, cui'ne Maija'quëre quëacohua'i yo'ose'ere quëaquë pa'ito mu'sepi caraja̱'co pa'ini. 33Pa'ire paji cuasa do'ipi yecohua'i yejaña siohuë, nuñerepa de'oye cua̱ñecohua'i de'ohuë, Maija'quë ca nëose'ere i̱si cua̱ñohuë, jai e̱mu yaiohua'i yë'opo̱aje si̱'ñe saohuë. 34Jai toana u huesëyere yayohuë, hua'tipi huani je̱oñu'u cajë yo'ojëna, catihuë. Sëyë huesësicohua'ipi tutu i̱si cua̱ñoni tutu hue'ejë, yequë yejaña soldado pa̱ire i̱ohua'ire sa̱ñope yo'ocohua'ire uihua quëco saohuë. 35Paë'ë, cui'ne nomiohua'ije̱ cajeohua'i ju̱'isicohua'ipi cui'naohua'ipi huëtena pasicohua'ije̱. Yecohua'ipi ai de'oye pa'iyena ju̱ni huëni pa'iyere cajë joye huaso cua̱ñoñe coejë ju̱ë'ë, huaijëna, ai yo'ojë. 36Yecohua'ipi ai yo'ohuë, co'acohua'i a'ë cajëna, si'sejëna, quë̱na meapi sëajëna, cui'ne co hue̱'ñana cojëna. 37Yecohua'ipi, quë̱na pë̱api je̱a hue̱a cua̱ñohuë, yecohua'ipi jopore paja̱'a yëto tëa cua̱ñojë, pa̱nita'a hua'tipi të'ca tëtejëna ju̱ë'ë. Yecohua'ipi cabra cui'ne yëi ñama ca̱'nire ju'ijë si'a hue̱'ña coa cuniroja̱ë'ë, co'amaña peocohua'ipi, ai co'a ju̱'ijë oicohua'ipi yecohua'ipi jo̱sa yo'ojëna, paë'ë. 38Airepa de'o pa̱ini, si'aohua'i iye yeja pa̱ipi de'oye yo'oyere carasicohua'ipi coejëna, i̱ohua'i sani pëaja̱'to peocohua'ipi yeja co̱ñare, cue̱ne yejañare cui'ne ainoare paniroja̱ë'ë. 39-40Maija'quë ña hue̱'ñana pa'ire paji cuasajë de'oye i̱te yo'o i̱ñosicohua'ita'a i̱ ca nëose'e i̱si cua̱ñoñe pa̱huë, Maija'quëpi yequë mu'seña de'oyerepa necaquëna, mai ja̱'re tsioni nuñe pa'icohua'irepa pa'ija̱jë caquë ña nëosi do'ire.
Currently Selected:
Hebreos 11: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
