Hechos 9
9
Saulo Sehuoye
(Hch 22.6-16; 26.12-18)
1Ja̱je yo'oye pa'ina, Saulopi Jesure sehuosicohua'ire huasi'i caquë yo'oquëpi Maija'quë huë'e ñacaicohua'i ëjaërepa quë'rona saji'i. 2Sani i̱te se̱ji'i: Toyacaijë̱'ë, Damasco pa̱i tsi'si huë̱'ñana, si'aye yë'ëpi cacani co'equë Jesure sehuocohua'ire ë̱mëohua'ire cui'ne nomiohua'ireje̱ tse̱ani hue̱ni Jerusalénna dani coja̱'quëre capi. Caquë se̱ina, toyacaquëna, saji'i. 3Sai je̱'nërepa Damasco quë̱no macare pa'ina, ma'tëmopi Saulona miañerepa ju'api, si'aëre cuasama'tore papi. 4Ju'aquëna, yejana ta̱ni yë'ose'e caquëna, asapi:
“¿Saulo, Saulo, Me yo'oquë yë'ëre jo̱sa yo'oquë'ni?”
5Caquëna, Saulopi se̱ji'i:
“¿Ëjaë, më'ë i̱queipi caquë'ni?”
Caquëna, yë'ose'e sehuopi:
“Jesu a'ë, yë'ë. Më'ë sa̱ñope yo'oquë a'ë. Tsoa tarapë jë̱jësë̱ ñaca quë'iopi duruhue̱quëre jëjo saojëna, hue̱quëpi tarapëna co'ye ti̱toquë pani a'si ju̱'iquë api, më'ë cui'ne yo'oyë, hue̱quë yo'oyeje̱ pa'ye.”
6Caquëna, Saulopi quëquëni tsasiquë capi:
“¿Yë'ë Ëjaë, i̱quere yo'oja̱'quë a'ni, yë'ë?”
Caquëna, capi:
“Huëni ja̱ daripëna cacajë̱'ë. Ja̱ropi më'ë yo'o ja̱'ñe quëaye pa'iji.”
7Caquëna, Saulore co̱cohua'ije̱ asahuë. Asajëta'a i̱ti caquëre ñama'pë ai quëquëni cama'pë paë'ë. 8Pa'ijëna, Saulo yejapi huëni ñacoa sëtaquëta'a ñama'ë paji'i. Ja̱je ñama'ë pa'ina, i̱te co̱cohua'ipi jë̱tëna tse̱ajë Damascona sahuë. 9Sarena, toaso̱ mu'seña ñama'quëpi, a̱ima'quëpi, cui'ne u̱cuma'quëpi coa paji'i.
10Pa'ina, Damasco daripëre te'i Jesure sehuosiquë paji'i. I̱ mami cato Ananías hue'equë paji'i. Pa'ina, ja̱ëna ca̱ni ñañeje pa'yeja̱'a mai Ëjaëpi ñaini capi:
“¡Ananías!”
Caquëna, capi:
“Ëjaë, pa'iyë.”
11Sehuoquëna, mai Ëjaëpi i̱te capi:
“Huëijë̱'ë. Huëni saijë̱'ë, Nui ma'a hue'yosi ma'ana. Sani ‘i̱ñore Saulo Tarso aquë pa'iquë’ caquë se̱jë'ë. Judas huë'ena Maija'quëni se̱i pa'iji. 12Pa'iquëpi ca̱ni ñañeje pa'yeja̱'a ñapi. Te'i ë̱më Ananías hue'equëpi dani jë̱ñapi i̱te jëjo paquë ñaja'quë caquë se̱cacaina, Maija'quëre.”
13Caquëna, asani Ananíaspi capi:
“Ëjaë, iquëpi Jerusalén daripë pa'icohua'ire, më'ëre sehuocohua'ire ai sa̱ñope co'aye yo'oji jai pa̱i cajëna, asahuë, yë'ë. 14Ja̱je pa'ipi yure i̱ñona daji'i, Maija'quë huë'e ñacaicohua'i ëjaëohua'i cua̱ñesi tutupi si'aohua'ire më'ëre se̱cohua'ire tse̱seni hue̱ni sasi'i caquë.”
15Caquëna, Ëjaëpi capi:
“Ja̱je pa'ita'are sani ñajë'ë. Yë'ëpi i̱te soihuë, yë'ë cocare Israel pa̱ire quëacaiquë, cui'ne yequë pa̱ire quëacaiquë, cui'ne ëjaohua'ire quëacaiquë pa'ija̱quë caquë. 16Yë'ë coca quëa do'ire i̱pi ai yo'oye pa'i ja̱'ñere i̱te i̱ñosi'i.”
17Caëna, Ananíaspi Saulo pa'i huë'ena sani cacani i̱ jë̱ñapi Saulore patoquë capi:
“Saulo, yë'ë yo'jei, Ëjaë Jesupi yë'ëre ma'aja'a më'ëre daina, ñasiquëpi jëjo daopi. Më'ëpi ñaquë pa'ija̱quë caquë, cui'ne Maija'quë joyo quë'i pa'ija̱quë caquë.”
18Ca macarepa ñacoa pa'ise'epi so'coje̱ pa'yepi to̱mepi. To̱meina, de'oye ñaquë de'oni huëni oco do cua̱ñopi. 19Do cua̱ñosi jeteyo'je, a̱o a̱ni, tutu tsi'soni, Damasco sehuosicohua'i ja̱'re pëani tsoe maca mu'seña paji'i.
Damasco Pa̱ire Saulopi Yëhuoye
20Tutu tsi'sosiquëpi Israel pa̱i tsi'si hue̱'ñana Jesucristo Maija'quë mamaquë api, quëa huëopi. 21Quëaquëna, si'a asacohua'ipi ai cuasajë co'a ju̱'ijë cahuë:
“Iquëpi Jerusalén pa'icohua'ire hue̱ni Maija'quë huë'e ñacaicohua'i ëjaohua'ina sani i̱sisi'i caquë daisiquë api.”
22Ja̱je catoje̱ Saulopi ai jerepa nuñerepa capi, Jesús cocare ca'raye peoyerepa. Ca'rama'ë quëaquë capi, Cristo api, mai huasoquërepa. Ja̱je quëaquëna, Israel pa̱i Damasco acohua'ipi asajë ai cuasahuë, ¿merepa neni ja̱ jerepa caquë'ni? cajë.
Saulo Yahuerepa Saiye
23Ai tsoe mu'seña quëaquë pa'ina, ñani Israel pa̱ipi Saulore huani je̱oñu'u cuasahuë. 24Cuasani yo'ojëna, Saulo de'hue asapi, i̱ohua'i yo'oye huañu'u cajë si'a mu'señapi, cui'ne ñamiñapi daripë eta sa'noa ñape utehuë, Saulote. 25Utejë pa'ina, Jesure sehuosicohua'ipi ñami jai do'rohuëna Saulote ayani jai daripë tëhuopaja̱'a meñe casahuë. Casarena, de'hue catipi. Ja̱je jëapi, de'hue.
Saulo Jerusalén Pa'iye
26De'hue jëasiquëpi Jerusalénna Saulopi ti̱'ani Jesure ye'yecohua'i ja̱'re co̱ni pasi'i caquë yo'oquëna, ja̱ohua'ipi sehuoma'quë api cuasajë i̱te ca'rahuë. 27Ca'rajëna, Bernabépi Saulore Jesús jëjo saocohua'i quë'rona dani i̱ñoquë quëapi, i̱te yo'ose'ere ñeje: Iquë Damasco ma'ana mai Ëjaëre pare ñasiquë api. Mai Ëjaëre papi i̱te coca caquëna asasiquë api, cui'ne Damasco daripëna ca'raye peoyerepa quëcoquë Jesús coca de'oye quëasiquë api, capi Bernabé. 28Ja̱je quëaquëna, “de'oji,” careña. Saulo Jerusalénna pëapi. Pëani i̱ohua'i ja̱'re cu'i yo'oquë Jesús cocare ca'raye peoyerepa quëapi. 29Israel pa̱ita'a griego cocapi cacohua'ire coca caquë cui'ne sa̱ñope cajëna, i̱je sa̱ñope caquë yo'opi. Quëaquëna, ja̱ohua'ipi i̱te huañu'u cajë yo'ohuë. 30Yo'ojëna, sehuosicohua'ipi asani Cesareana sahuë, i̱te. Ja̱ropi yureta'a Tarso yejana jëjo saohuë, Saulore.
31Ja̱ maca si'aohua'i sehuosicohua'i Judea yeja pa'icohua'i, Galilea yeja pa'icohua'i cui'ne Samaria yeja pa'icohua'i sa̱ñope yo'oye je̱orena, de'oye pa'i huëohuë. Pa'ijë joyo pa'iye ai tutu quë'iohua'i de'ohuë. De'ojë Maija'quë yëyere de'oye sehuocaijë paë'ë. Pa'ijëna, de'o joyopi co̱caina, si'a mu'señaja'a sehuocohua'ije̱ pa'ijë jai saë'ë.
Eneas Ne Co'yaye
32Pedropi sehuosicohua'ire do'i ñasi'i caquë saisiquëpi Lida pa'icohua'ireje̱ sehuosicohua'ire ñasi'i caquë saji'i. 33Saisiquëpi ñaquëna, Ja̱rote te'i ë̱më Eneas i̱ mami hue'equëpi, ocho o̱metëca u̱iquë paji'i, ti cu'ima'quëpi. 34Pa'ina, Pedro ñani i̱te capi:
“Eneas, Jesucristopi më'ëre ne co'yaji, huëni më ca̱iñe de'huajë̱'ë.”
Ca macarepa huëji'i. 35Huëina, ñasicohua'ipi Lida acohua'ipi cui'ne Sarón acohua'ipi Ëjaë Jesucristore sehuohuë.
Dorca Ju̱'isico Huëiye
36Ja̱ mu'seña Jope daripëre te'o nomio sehuosico paco'ë. I̱o mami cato Tabita hue'ecopi, griego coca cato Dorcas caye pa'iji. Ja̱o cato peocohua'ire de'oye co̱caico paco'ë. 37Ja̱je pa'iopi ju̱'i huëoni ju̱co'ë. Ju̱cona, i̱o ca̱'nihuë tsoani ë̱mëje'e tu'rihuëna o̱ahuë. 38O̲ani Pedrore esa Jopena daijë̱'ë, tsoe nëiñe peoyerepa cajë huëoja̱'cohua'ire cayaohua'ire jëjo saohuë, sehuosicohua'ipi. Jope cato Lida quë̱no macare pa'iye sëte. Ja̱je yo'ohuë, Pedropi Lidare pa'iji asani.
39Sani huëojëna, Pedropi i̱ohua'i ja̱'re co̱ni saji'i. Sa ti̱'asi maca ju̱'isico u̱i hue̱'ñana ë̱mëje'e tu'rihuëna i̱te sahuë. Sasi maca si'a hua'jeohua'i oijë i̱o necaisi ca̱ñare i̱te i̱ñohuë. 40Ja̱ maca Pedropi si'aohua'ire eto saoni do're ja'runi Maija'quëre se̱ji'i. Se̱si jeteyo'je ju̱'isicore ñaquë capi:
“Tabita huëijë̱'ë.”
Caquëna, sëtani i̱te ñani huëni ja'ruo. 41Ja'ruona, Pedropi i̱o jë̱tëna tse̱ani huëo nëcopi. Huëo nëconi sehuosicohua'ire cui'ne hua'jeohua'ire soini huajëco pa'ico yure caquë i̱ñopi. 42Iye yo'ose'ere si'a Jope daripë pa'icohua'i asahuë. Asani jai pa̱i Ëjaëre sehuohuë. 43Iye yo'osiquëpi Pedro Jope daripëna pëapi. Pëani tsoe mu'seña maña Simón huë'ena, ca̱'ni de'huaquë huë'ena.
Currently Selected:
Hechos 9: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.
