Hechos 10

Pedro Cui'ne Cornelio

1Cesarea daripëre te'i ë̱më Cornelio hue'yosiquë paji'i, cien soldado pa̱i ëjaë. Capitán paji'i. I̱ Cien soldado tsëcapë aquë mami cato Italiano hue'yosico paco'ë. 2Ja̱ë cato de'oquë paji'i, Maija'quëre ca'raquëpi. Ja̱je pa'ipi si'a i̱ huë'e acohua'i ja̱'re Maija'quëre se̱i pa'iquë paji'i. Ja̱je pa'ipi peocohua'ire de'oye i̱sipi, co̱casi'i caquë judío pa̱ire, cui'ne si'a mu'seña Maija'quëre se̱i paji'i. 3Pa'ipi te'e mu'se na'iquëna, tres pa'i maca ca̱ni ñañeje pa'ye ñaquëna, Maija'quë jëjo daoquë hui̱ñaëpi i̱ huë'ena cacapi. Cacaquëna, ti̱ñarepa i̱te ñapi. Ñaquëna, capi:

“¡Cornelio!”

4Caquëna, i̱ni ñaquë quëquëni se̱ji'i, i̱te:

“Ëjaë, ¿I̱quere yëquë'ni?”

Caquëna, hui̱ñaëpi capi:

“Më'ë se̱ñe Maija'quë asaji, cui'ne më'ë peocohua'ire de'hue co̱cai yo'oyeje̱ ñaji, Maija'quë capi, ja̱je pa'iye sëte. 5Yure ë̱mëohua'ire Jopena jëjo saojë̱'ë, Simón Pedro hue'yosiquëre quërëja̱ija'cohua'ire. Pedro cato yequë Simón huë'ere pëasiquëpi pa'iji. 6Yequë Simón ca̱'ni de'huaquë huë'ere pa'iji. Ja̱ huë'e cato jaira të̱'tëpare pa'iji.”

7-8Maija'quë jëjo daosiquëpi saisi maca Corneliopi i̱te necaicohua'ire cayaohua'ire cui'ne te'e soldadore soini i̱ ñase'e si'aye quëani Jopena jëjo saopi. Soldado cato Maija'quëre cuasaquë paji'i. Ja̱je pa'ini Cornelioje̱ de'oye cuasaquë paji'i. Ja̱je pa'ini Cornelioje̱ de'oye cuasaquë jëjo saopi.

9Jëjo saouna, se ñatasi mu'se ja̱ yë'ta'a ma'are saijë je̱'në Jope quë̱no macare pa'ijëna, jopo mu'serepa pa'i maca Pedropi huë'e ë̱mëje'e totona mëji'i, Maija'quëre se̱si'i caquë. 10Ja̱ yë'ta'a a̱ore cua'cojëna, a̱o ëaye nëi macapi ca̱ni ñañeje pa'ye ñapi. 11Ñaquëna, ma'tëmopi hui'yoni jai ca̱ ca̱'tipëje̱ pa'iona, cajese'e si̱ca que̱'quesicona, 12si'a nëicohua'ire, u̱ijë cu'icohua'ire cui'ne ja'jëcohua'ire ayasi tu'upi yejare pana cajeo. 13Caje maca yë'ose'e i̱te jutapi ñeje:

“Pedro, huëni huani a̱ijë'ë.”

14Caquëna, Pedropi sa̱ñope capi:

“Pa̱si'i, Ëjaë. A̲i ma'ñe a'ë. Si'si a'ë. Si'siohua'ire yë'ë ti a̱ima'quë a'ë.”

15Caquëna, ti̱jupë yë'ose'e i̱te jutaëña:

“Maija'quë si'si peoye nese'ere si'si a'ë caye peoji.”

16Ja̱je toaso̱ñe pa'ye Maija'quë i̱te ca tëjini co'amaña ayasi tu'ure ma'tëmona mëa huesopi. 17Mëa huesouna, Pedro ¿merepa yo'o ja̱'ñere ja̱je pa'ye i̱ño u'ni? caquë ai cuasaquë paji'i. Pa'ina, Cornelio jëjo saosicohua'ipi ja̱to sa'ro quë'rona ti̱tahuë, ¿Simón huë'e jerore pa'ico'ni? cajë se̱ni asajë daicohua'ipi. 18Ja̱ohua'i ti̱tani tutu cajë se̱i'ë: I̱ño Simón hue'equëpi cui'ne yequë mami Pedro hue'equë pa'ima'quë cajë se̱i'ë. 19Ja̱je se̱ni asajëna, Pedro cato ja̱ yë'ta'a i̱ ñase'ere cuasaquë paji'i. Pa'ina, de'o joyopi capi, i̱te:

“I̱na, më'ëni toaso̱ ë̱mëohua'i co'eroja̱iñë. 20Huëni i̱ohua'i ja̱'re saijë̱'ë, jëa coeye peoyerepa. Yë'ë jëjo daosicohua'i a'ë.”

21Caëna, Pedro cajeni capi:

“Yë'ë a'ë, mësaru co'equë. ¿I̱quena date'ni?” 22Caquëna, i̱ohua'ipi cahuë:

“Yëquë cato Cornelio jëjo daocohua'ipi daë'ë. Maija'quë hui̱ñaëpi më'ëni soija̱tena. Cornelio huë'ena dani quëaquëna, i̱pi më'ë quëaye asaja̱quë caëna, asani Cornelio, soldado pa̱i ëjaëpi jëjo daoquëna, daë'ë. Nuñe pa'iquëpi, Maija'quëre se̱quëpi, cui'ne si'a judío pa̱i de'oye yo'oquë api cajë oiquëpi jëjo daocohua'i a'ë.”

23Cajëna, Pedropi capi: “Cacani pëajë̱'ë.” Caëna, cacani i̱ ja̱'re co̱ni pëahuë, ja̱ ñami. Ñatasi mu'se Pedropi i̱ohua'i ja̱'re co̱ni saji'i. Saina, i̱te co̱ñu'u cajë Jope acohua'ije̱ i̱ ja̱'re saë'ë, Maija'quëre sehuosicohua'ipi.

24Ja̱je saisicohua'ipi se ñatasi mu'se Cesareana ti̱'ahuë, Cornelio cui'ne i̱ tsëcapë cui'ne i̱ ai oi cajeohua'i co̱ni tsi'sini ute hue̱'ñana. Ja̱ohua'i cato Cornelio huëosicohua'ipi daisicohua'ipi paë'ë. 25Pa'ijëna, Pedropi huë'ena ti̱'aquëna, Corneliopi pëpasi'i caquë etaquëpi Pedrote yë'ë ëjaërepa caquë do're ja'ruëña. 26Ja'ruquëna, Pedropi i̱te naë huëo nëcoquë capi:

“Yë'ëje̱ më'ëje pa'i a'ë.”

27Ja̱je i̱ ja̱'re caquë sa cacaquë ñaquëna, jai pa̱i tsi'sicohua'ipi paë'ë. 28Pa'ijëna, ñani Pedropi capi:

“Mësarupi asacohua'i a'ë, Israel pa̱i ti ti̱ pa̱i ja̱'re tsioye peoye. Pa̱nita'a yequë pa̱i huë'ena cacaye peoye. Israel pa̱i yo'oye ja̱je pa'iji. Ja̱je pa'iquëta'are yë'ëre Maija'quëpi ye'yapi pa̱ire co'acohua'i a'ë, si'siohua'i a'ë caye pa̱jë'ë caquë. 29Ja̱je pa'ina, ja̱ohua'i sani yë'ëre se̱jëna, ai cuasaye peoyerepa esa daë'ë. De'oji. Yureta'a quëajë̱'ë. ¿I̱quere cajë yë'ëre soire'ni?”

30Caquëna, Corneliopi capi:

“Pa'iji, cuatro mu'seña, iye ja'i maca na'iquëna, tres pa'i maca yë'ë huë'ere pa'i a̱o a̱ima'quëpi Maija'quëre se̱i pa'ise'e. Pa'iquëpi na'iquëna, Maija'quëre se̱ñere se̱ina, Maija'quë jëjo daoquëpi ai mia ju'i ca̱repa ju'iquëpi ñaini capi: 31‘Cornelio, më'ë Maija'quëre se̱ñe Maija'quë asaji, cui'ne më'ë peocohua'ire co̱caiyeje̱ Maija'quë ñaquë sihuaji de'oyerepa yo'oji caquë ñaji. 32Ja̱je pa'iye sëte yurepi ë̱mëohua'ire Jopena jëjo saojë̱'ë, Simón Pedro hue'equëre quërëja̱ni i̱ñona daja̱'cohua'ire. I̱ cato yequë Simón huë'ere pa'iji, ja̱ë yequë Simón cato ca̱'nipi de'huaquë api. I̱ huë'e cato jaira të̱'tëpare pa'iji,’ capi, yë'ëre. 33Caëna, asani esa më'ëre quërëja̱ija'cohua'ire jëjo saohuë. Ja̱je jëjo saouna, yure më'ëpi daquëna, de'oji. Maija'quë coca asañu'u cajë yëquë tsi'sisicohua'ipi pa'iyë, më'ëre mai Ëjaërepa cajë̱'ë caquë i̱siyere caquëna, asañu'u, yëquë.”

Pedro Quëaye

34Caquëna, Pedropi quëapi:

“Yureta'a asayë, Maija'quëpi pa̱ire cui'ne pa'iohua'ise'ere ñaquë pa'iye. 35Ja̱je pa'ina, Maija'quë cato si'a pa̱ire i̱te de'oquëre pa'ni cacohua'ire cui'ne nuñerepa yo'ocohua'ire de'oji caquë ñaji, coa si'a tsëca acohua'ire. 36Ja̱je pa'ina, si'aohua'i Ëjaë Jesucristoja̱'a de'oye pa'iye ti̱'añere, Maija'quë i̱ coca Israel pa̱ina i̱sipi. 37Mësarupi si'aohua'i asayë, Juan oco doquë cui'ne quëaquë yo'osi jeteyo'je Jesupi Galileapi huëoni si'a hue̱'ña judío pa̱i pa'i hue̱'ña yo'ose'e cu'ise'e. 38Ja̱je pa'ina, Maija'quëpi Jesús Nazaret aquëre de'o joyo tuture i̱sipi. I̱sina, huati tutupi yo'oquëna, ai yo'ojë pa'icohua'ire jujucai cui'ne pa̱ire de'oye yo'ocai cuji'i, Maija'quëpi i̱ ja̱'re pa'i do'ire. 39Ja̱je yo'oquëna, yëquë ñasicohua'i a'ë, Jesús yo'oye. Jerusalénna cui'ne Judea yejana yo'oquëna, ñasicohua'i a'ë. Ja̱ jeteyo'je yureta'a i̱te so̱quë sarahuana que̱ deoni huani je̱ohuë, judío pa̱ipi. 40Ja̱je huaisiquëta'a toaso̱ mu'seña pa'i maca Maija'quëpi huajëquëre huëopi. Huëoni yëquëre i̱ñopi. 41Coa yëquëse'ere ñai i̱ñopi. Si'a pa̱ire ñai i̱ñoñe pa̱pi. Yëquë i̱ tsoe sahua nëosicohua'ise'ere ñai i̱ñopi. Ja̱je pa'ina, yëquë i̱ ja̱'re co̱ni u̱cujë cui'ne a̱ijë yo'ohuë, i̱ huëisi jeteyo'je. 42Ja̱re ja̱ëni Maija'quëpi ju̱'isicohua'ire cui'ne huajëcohua'ire ñani ca tëjiquëre nepi cajë quëaja̱'cohua'ini yëquëre jëjo daopi. 43Ja̱je pa'ina, tsoe Maija'quëre quëacaicohua'i Jesús ayere cajë cahuë, i̱te Jesure sehuocohua'ipi i̱ohua'i co'aye yo'ose'ere sa̱i de'huani oni yeje cua̱ñoja'cohua'i a'ë.”

Judío Pa̱i Peocohua'ita'a Maija'quë Joyo I̱si Cua̱ñose'e

44Ja̱ yë'ta'a Pedro caquëna, de'o joyopi i̱ caye asacohua'ina tsio daji'i. 45Tsio daquëna, Israel pa̱i sehuoye sehuocohua'ipi Pedro ja̱'re daisicohua'ipi ai cuasajë ñahuë, Israel pa̱i peocohua'ipi de'o joyore i̱si cua̱ñojë, 46yequë pa̱i cocapi cajë cui'ne Maija'quëre de'oquëre pa'ni cajë yo'ojëna. 47Ja̱je ai cuasajëna, Pedropi capi:

“Icohua'ire oco doye de'oji, mai i̱si cua̱ñose'eje̱ pa'ye de'o joyore i̱si cua̱ñosicohua'ire.”

48Cani i̱ohua'ire Jesucristo mamipi do cua̱ñoñe pa'iji cani docaji'i. Ja̱ jeteyo'je i̱ohua'ipi Pedrore cahuë, yëquë ja̱'re tsoe mu'seña maña pëani pa'ijë̱'ë.

Currently Selected:

Hechos 10: sey

Highlight

Copy