Hechos 8
8
1Ju̱ni huesëquëna, i̱ti maca Saulo nëcaquë ñaquëpi. De'oji, Estebanre huaise'e cuasaquë ñapi.
Sehuosicohua'ire Saulo Yo'oye
2De'o pa̱ire papi Estebanre ai oijë ta̱ je̱ohuë. 3Ja̱re yo'ojëna, Saulo cato sehuosicohua'ire huë̱'ña ñape cacaquë ë̱mëohua'ire, nomiohua'ire, quërë etoquë co hue̱'ñana cosi'i caquë yo'opi.
Samaria Pa̱ire De'o Coca Quëaye
4Ja̱je yo'ojëna, Jerusalénpi etasicohua'ipi si'a hue̱'ña saijë huaso coca quëahuë. 5Quëajëna, i̱ohua'i aquë Felipepi Samaria daripëna sani Jesús coca quëapi. 6Quëaquë pa̱i yo'o ti̱'a ma'ñe yo'opi. Yo'oquëna, ñajë si'aohua'i tsi'sini ai asahuë, Felipe caye. 7Jai pa̱i huati quë'iohua'i pa'isicohua'ipi huatire eto sao cua̱ñohuë. Huatiohua'ipi etajë cuijë etahuë. Cui'ne jai pa̱i cu'ima'cohua'ije̱, cui'ne do'pëjë cu'icohua'ije̱ co'yasicohua'i paë'ë. 8Ja̱ yo'o do'ire ja̱ daripë acohua'i ai sihuahuë.
9Ja̱ sihua hue̱'ñare te'i ë̱më Simón hue'equë ja̱'në dahuë pa'isiquë paji'i. Samaria pa̱ire care payeje̱ caquë jerepa pa'i a'ë caquë yo'osiquë paji'i. 10Ja̱je pa'ini si'aohua'i a'ricohua'i maña cui'ne jaicohua'ina co̱ni i̱ caye asacaijë cahuë:
“Iquë api, i̱repa Maija'quë tuture paquërepa cahuë.”
11Ja̱je cajë i̱te de'oye i̱ caye sehuocaë'ë. Tsoe hue̱'ña noni i̱ dahuë ñañepi yo'oquë care payeje̱ caquëre sëte ja̱je sehuocaë'ë. 12Ja̱je yo'ojë pa'icohua'ipi Felipe quëayere asani Maija'quë cua̱ñe te̱'te ayere cui'ne Jesucristo ayere asani ë̱mëohua'i cui'ne nomiohua'i sehuohuë. Sehuoni oco do cua̱ñohuë. 13Do cua̱ñojëna, i̱ Simónque sehuoni oco do cua̱ñoni ai de'oyere pare pa̱i yo'o ti̱'a ma'ñere ñaquë ai de'oyere pa'ni cuasaquë Felipe ja̱'re te'e cu'i huëopi.
14Samaria pa̱ipi Maija'quë coca sehuorena, Jesús doce soisicohua'ipi asani Jerusalén pa'icohua'ipi Pedrore cui'ne Juanre jëjo saohuë, Samariana. 15Jëjo saorena, sani Samaria sehuosicohua'ire Maija'quëre se̱cacaë'ë, de'o joyore paja̱jë cajë. 16Jesús mai Ëjaë mamipi do cua̱ñosicohua'ita'a ja̱ yë'ta'a de'o joyo peocohua'i paë'ë. 17Ja̱ do'ire Pedro cui'ne Juanpi jë̱ñapi jëjo pajë Maija'quëre se̱jëna, de'o joyore i̱si cua̱ñohuë.
18Jë̱ñapi Jesús jëjo saocohua'ipi jëjo pajë se̱jëna, Maija'quë joyore i̱siña. I̱sina, ñani Simónpi curipi huerosi'i cuasaquë caëña.
19“I̱sijë̱'ë, ja̱ tuture pare yë'ëje̱ i̱sina, ja̱ tutupi yë'ëpi jë̱ñapi patoquë se̱ina, de'o joyore i̱si cua̱ñoja'cohua'ire.”
20Caquëna, Pedropi i̱te capi:
“Më'ë curiquë ja̱'re më'ë ne huesëye pa'iji. Maija'quë i̱siye curiquëpi hueroye peoji. 21Maija'quë ña hue̱'ña më'ë nui joyo peoyë. Ja̱je pa'ina, ja̱ tutupi i̱si cua̱ñoñe peoji, më'ë. 22Më'ë co'aye cuasayere je̱ocojë̱'ë. Je̱oconi mai Ëjaëre se̱jë'ë. Se̱ina, de'hue oni yeje'ñe pa'i api, më'ë ja̱je cuasase'e. 23Yecohua'ipi de'oye yo'ojëna, ñani sihuama'ë. Ñañepi më'ë ti̱mësiquëpi pa'ina, ñaquë cayë. Ja̱ do'ire më'ë co'aye cuasayepi hue̱siquëre paji, më'ëre.”
24Caquëna, Simónpi capi:
“Mësarupi yë'ë do'ire se̱cacaijë̱'ë, Ëjaëre. Si'aye mësaru case'eje̱ pa'ye tëto saiye pa̱ja'core yë'ëre.”
25Iye a'ë, maire caquë Jesús yo'ose'e cajë quëajë cui'ne Maija'quë coca quëa tëjini Jesús jëjo saocohua'ipi Samaria yeja a'ri daripë̱ana, de'o coca quëahuë. Quëa tëjini yureta'a Jerusalénna co'ihuë.
Felipe Cui'ne Etiopia Aquë Yo'ose'e
26Ja̱ jeteyo'je mai Ëjaë hui̱ñaëpi Felipere capi:
“Huëni Jerusalén ma'ana saijë̱'ë, Gazana sai ma'ana huë'ehuë te̱'tena.”
Iye ma'a cato cue̱nesi yejaja̱'a sa sai ma'a paji'i. 27Caëna, asani Felipe huëni ja̱ ma'aja'a saji'i. Saiquëpi ma'ana Etiopia pa̱ire ti̱'api. Ja̱ë cato ëjaërepa paji'i. Etiopia ëjao curi de'huacaiquë paji'i. Ja̱ëpi Jerusalénna Maija'quëre se̱si'i caquë saisiquë paji'i. 28Ja̱je saisiquëpi i̱ yejana co'iquë caballopi quërëcore ñu'i sai Maija'quëre quëacaiquë Isaías toyase'ere ñaquë saji'i. 29Saina, joyopi Felipere capi:
“Caballo quërëco quë'rona saijë̱'ë.”
30Caëna, Felipe tsioja̱i asaquëna, Isaías toyase'ere ñaquë caquë saji'i, Etiopia aquëpi. Ja̱ maca i̱te se̱ji'i:
“¿Asaquë më'ë, më'ë ñase'e?”
31Se̱ina, sehuopi:
“¿Me asa ti̱'añe'ni, i̱ti quëaquëpi peoto?”
Cani Felipere yë'ë ja̱'re mëni ñu'i saijë̱'ë caquë se̱ji'i.
32Toyasico i̱ ñasico cato ico paco'ë, ñeje caco:
Huai hue̱'ñana yëi ñamare sayeje̱ pa'ye sahuë, i̱te.
Sarena, tëacohua'i ña hue̱'ñana yëi ñama memeñe pa̱ñeje pa'ye memeñe pa̱pi.
33Teaye pa'i paji'i. Ja̱je pa'ita'are nuñerepa de'oye i̱te necaiye pa̱huë.
Iye yeja pa'iquëni i̱ pa'iye naë tëa je̱oñere, ¿nepi cacaija̱'cohua'i a'ni, i̱ tsëcapë?
34Etiopia aquëpi Felipere se̱ji'i:
“Quëare pajë̱'ë, yë'ëre. ¿Neni caquë'ni, Maija'quëre quëacaiquë i̱ja'a co'ye caquë pa̱nita'a yequëni caquë?”
35Caquëna, ja̱ maca Felipe Etiopia pa̱i ñasico acopi toyase'e cayepi huëoni Jesús aye de'o coca quëapi, i̱te. 36Quëaquëna, oco quë'roja̱'a sa sai Etiopia aquëpi capi:
“¿I̱na oco i̱ñore pa'iji, yë'ëre doye de'oma'quë?”
37Caquëna, Felipepi capi:
“Më'ëpi si'a joyorepa de'oye sehuoquë pa'ito doye de'oji.”
Caquëna, i̱pi capi:
“Jesucristo Maija'quë mamaquë api asayë, yë'ë.”
38Caëna, ja̱ maca o̱mejani si'a jupë cayaohua'i Felipe cui'ne Eunuco co̱ni oco quë'rona sa cajeni Felipepi oco dopi. 39Do tëjini tu̱masi maca mai Ëjaë joyopi Felipere sapi. Ti̱rona saëna, Etiopia aquë ti̱jupë ñama'ë paji'i. Ja̱je pa'iquëta'are sihuaquë saji'i. 40Felipe cato Azoto daripëre paji'i. Pa'i pa̱i ñape dari Maija'quë coca quëaquë Cesarea daripëna ti̱'api.
Currently Selected:
Hechos 8: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.