Hechos 7
7
Esteban Pa̱ire Sehuoye
1Maija'quë huë'e ñacaicohua'i ëjaëre papi Estebanre se̱ji'i.
“¿Më'ëre ja̱je yo'oquëre pani ja̱ohua'i caye caquë?”
2Se̱ina, Esteban sehuoquë capi:
“A'yëohua'i, cui'ne ja'quëohua'i, asajë̱'ë, yë'ë caquëna. Maija'quë de'oquëpi mai ai Abrahamna ñai i̱ñopi, Mesopotamiare pa'ina, Harán yejana ja̱ saima'në. 3I̱ñoquë capi: ‘Më'ë yeja cui'ne më'ë cajeohua'ire je̱oconi saijë̱'ë, yë'ë i̱ñoja'a yejana.’ 4Caëna, Abraham Caldea yejapi etani Harán yejana sani paji'i. Pa'ina, pëca ja'quë ju̱ni huesëpi. Ju̱quëna, jeteyo'je Maija'quëpi Abrahamre iye yejana dapi, yure mësaru pa'i hue̱'ñana. 5Ja̱je pa'iquëta'are i̱ti yejana co'amaña necani i̱siye pa̱pi. Quë̱o tsa'cuja̱'toje̱ i̱siye pa̱pi. Ja̱je pa'iquëta'are i̱sija̱'quë a'ë ca nëopi, i̱ ju̱'isi jeteyo'je i̱ tsëcapë tse̱co pa'ija̱'core. Ja̱ mu'seña cato Abraham mamajëre peoquë pa'inije ja̱je capi. 6Yequeje̱ cui'ne Maija'quëpi capi, i̱te: ‘Më'ë tsëcapë acohua'ipi yequë pa̱i yejare huero pa'ija̱'cohua'i a'ë. Pa'ijëna, jo'yaohua'ire pajë co'aye yo'oja̱'cohua'i a'ë, cuatrocientos o̱metëcarepa.’ 7Yequeje̱ capi, Maija'quë: ‘Yë'ëpi mësarute jo'yaohua'ire neni pasicohua'ire sa̱ija'quë a'ë. Ja̱ jeteyo'je mësaru eta huajëni yë'ëre iye macapi necaijë pa'ija̱'cohua'i a'ë.’ 8Ca nëose'ere yo'oja̱jë caquë Abrahamre Diusupi cua̱ñepi, cuiri ca̱'nire tëajë̱'ë, caquë. Ja̱je pa'ina, Abraham i̱ mamaquë Isaacre ocho mu'seña co̱asiquë pa'ina, cuiri ca̱'nihuë maca tëapi. Ja̱je cui'ne yo'opi, Isaacje̱ I̱ mamaquë Jacobre. Iquë Jacobpi si'aohua'ire i̱ mamajëre ja̱je yo'opi, Israel pa̱i doce tsëcapë̱a pëca ja'quëohua'i pa'ija̱'cohua'ireje̱.
9Mai aipë Jacobo mamajëpi yo'jei Josére pëca ja'quëpi ai oina cui'ne oni cua̱ñoñe peojë i̱si je̱ohuë, Egíptona saja̱jë cajë. Ja̱je pa'iquëta'are Diusupi José ja̱'re co̱ni paji'i. 10Pa'i si'aye i̱ ai yo'oye huasopi. Co̱cai cui'ne ta̱'ñe yo'oye i̱sipi. I̱siquë cui'ne Egípto ëjaëre papi de'oye i̱te ñacai ja̱'ñeje necaji'i. Necaina, Josére Egípto pa̱i ëjaëre hue'yopi. Cui'ne i̱ Faraónrepa pa'i huë'e ñacaiquëre pare hue'yopi.
11Ja̱ maca si'a Egípto yeja Canaán yeja a̱o ëa ju̱'iñe paji'i, ai yo'o mu'seña. Pa'ina, mai aipëje̱ a̱iñe ti peocohua'i paë'ë. 12Pa'ijëna, Jacobpi Egíptore a̱o pa'iji, asani i̱ mamajëre mai aipëre jëjo saopi. Iye saise'e cato du'ru macarepa saise'e a'ë. 13Ti̱jupë cayaye acore satena, Josépi i̱ maja'yë jupëre yë'ë mësaru yo'jei'ë caquë quëapi. Ja̱je quëaquëna, asani Faraónpi ja̱ tsëcapë aquë api caquë Josére ñapi. 14Ja̱ jeteyo'je Josépi pëca ja'quë Jacobre cui'ne i̱ tsëcapë setenta y cinco pa̱i pa'icohua'ire Egíptona daijë̱'ë, caquë cua̱ñepi. 15Ja̱je cua̱ñeina, Jacob Egíptona sani paji'i. Pa'iquëpi ju̱ji'i. Ja̱je cui'ne i̱ mamajëje ju̱juhuë, mai aipëje̱. 16Ja̱ maca tarase'e Siquemna sani cojena o̱a huesohuë. Abraham curipi Hamor mamajëre hueroquë pa'isi yejana o̱areña.
17Maija'quë Abrahamre ca nëose'e ti̱'añe ja'i maca pa'ina, Israel pa̱i jai pa̱i jojo sateña, Egípto yeja. Ja̱je yo'oni jai pa̱i pateña. 18Ja̱je pa'i maca Josére ñama'quëpi yequepi Egípto pa̱i ëjaë cua̱ñe huëouña. 19Cua̱ñe huëoni iye ëjaëpi mai pa̱ire care payeje̱ pa'ye caquë, co'aye yo'oquë tsi̱re ja̱'a co̱asicohua'ire je̱ocojë̱'ë ju̱'ija'cohua'ire caquë cua̱ñepi, pëca ja'quëohua'ire. 20Ja̱ mu'seña Moisés co̱a. Co̱aëna, Maija'quë sihuaquë ñapi, i̱te. Ja̱ëni pëca ja'quëohua'ipi toaso̱ ñañëohua'ire huë'ena ñajë pahuë. 21Pa jujani je̱ocoye pa'ijëna, Faraón mamacopi i̱te i̱ni mamaquëre pare ai de'huayeje̱ pa'ye ai de'huao. 22Ja̱je pa'ina, Moisés cato Egípto pa̱i ta̱'ñe yo'oyere ye'yesiquë paji'i. Ja̱je pa'ipi tutu caquëpi cui'ne yo'oyeje̱ i̱ case'eje̱ yo'oquë paji'i.
23Cuarenta o̱metëcaña papi i̱ pa̱ire Israel pa̱ire ñasi'i cuasapi. 24Cuasaquëpi ñaquëna, Egípto pa̱ipi Israel pa̱ire co'aye yo'oquëna, ñani Moisés co̱casi'i caquë yo'oquë Egípto pa̱ire huani je̱opi. 25Moisés cato ja̱je yo'oquëna, ñani i̱ cajeohua'ipi Diusu i̱ohua'ire huasoja̱'quëre jëjo daoquë api cuasaja̱jë caquë yo'opi. Yo'oquëta'are i̱ cajeohua'ipi ja̱je cuasaye pa̱huë. 26Yo'osiquëpi ñatasi mu'se Israel pa̱ipi cayaohua'i sa̱'ñe uihuajëna, Moiséspi ti̱'api. Ti̱'ani uihuama'pë pa'ija̱jë caquë capi: ‘¿Me neñu'ju te'e tsëcapëta'a sa̱'ñe uihuaye'ni?’ 27Caquëna, i̱ti se ai huaiquëpi Moisésre jë̱tëpi jëjo saoquë capi: ‘¿Nepi më'ëre pa̱i ëjaëre cui'ne yëquë yo'oye ñaquë ne de'huaja̱'quëre nere'ni? 28¿Ñamina'a Egípto pa̱ire huani je̱ose'eje̱ pa'ye yë'ëre huani je̱osi'i caquë?’ 29Caquëna, iyere asani Moisés Madián yejana cati saji'i. Sani ja̱rote ti̱ yejare huero pa'i caya mamajëre papi.
30Cuarenta o̱metëca tëto saisi maca, zarza ñëpi toa corohuërepa tsë̱'isicoja̱'a hui̱ñaëpi ñai nëcapi, Sinaí cu̱tihuëna cue̱ne yejana. 31Ca̱ni ñañeje pa'ye Moisés ñaquë i̱quere pa'ni cuasaquë ñapi. Ja̱je cuasaquë de'oyerepa ñasi'i caquë tsioja̱i asapi, Ëjaë yë'ore ñeje caquëna: 32‘Yë'ë cato më'ë aipë Diusu a'ë. Abraham, Isaac, cui'ne Jacob Diusu a'ë, Yë'ë.’ Ja̱re asani Moisés i̱ti ca hue̱'ña ñama'ë, ca'raquë coa tsasi huëouna. 33Ja̱ maca Ëjaëpi caëña: ‘Dutajë̱'ë, quë̱o ju'iye. Më'ë nëca hue̱'ña cato de'o hue̱'ñare pa'ë. 34Egípto yejare pa'ijë yë'ë pa̱i ai yo'oye ti̱ñarepa ñaquë pa'iyë. Aiohua'ipi ai yo'ojë oijëna, asani huasosi'i caquë cajehuë. Ja̱je pa'iye sëte daijë̱'ë, yë'ëpi më'ëre Egíptona jëjo saosi'i.’
35Israel pa̱i coejë ‘¿nepi më'ëre pa̱i ëjaëre cui'ne yëquë yo'oye ñaquë ne de'huaquëre nere'ni casiquëni?’ Maija'quëpi pa̱i ëjaëre cui'ne pa̱ire huasoquëre neni jëjo saopi, i̱ohua'i quë'rona. A'ri so̱quë yë ñasiquë hui̱ñaëpi co̱caina, yo'o ti̱'ajaquë caquë. 36Iquë Moisés mai aipëre Egíptopi etopi, pa̱i yo'o ti̱'a ma'ñere yo'oquëna, cuarenta o̱metëcahuëa̱ña. 37Ja̱re iquë Moiséspi capi, Maija'quëpi mësaru aquëni yë'ëje̱ pa'ire neja'quë api, i̱te quëacaiquë pa'ija̱'quëre. 38Cui'ne ja̱re iquë Moiséspi Israel pa̱i ja̱'re tsi'sini coca ca'a̱ji'i, jeto cue̱ne yejana. Ja̱re i̱pi hui̱ñaëre coca ca'a̱ji'i, Sinaí cu̱tihuëna. Ja̱re i̱pi mai aipë ja̱'re pa'a̱ji'i. Cui'ne ja̱re i̱pi pa'i cocarepa asapi, maire quëa ja̱'ñeje̱.
39Ja̱je pa'iquëta'are mai aipë cato sehuocaiye coehuë. Coejë Egíptona co'iñu'u cahuë. 40Ja̱je cajë Aarónre cahuë, yëquëre saja̱'a diusuohua'ini necaijë̱'ë. Huesëyë. Me sa'repa yëquëre Egíptopi etosiquë Moisés neni jo'cuarepa nëiji, cahuë. 41Ja̱je cani duruhue̱quëje̱ pa'ire diusu api cajë de'huahuë. De'huani i̱te i̱siñu'u cajë nëicohua'ire huani i̱sijë cui'ne jai pa̱i tsi'sini i̱ohua'i de'huasi diusure sihuajë yo'ohuë, Maija'quë api cajë. 42Ja̱je yo'ojëna, Maija'quëpi ja̱ohua'ire ña jujani je̱ocopi ma'ñocohua'i ma'tëmo pa'icohua'ini se̱cohua'i pa'ija̱jë caquë. Ja̱je pa'ina, Maija'quëre quëacaicohua'i toyapëna toyase'e pa'iji, ñeje:
Israel pa̱i, ¿mësaru jeto cue̱ne yeja cuarenta o̱metëca pa'i maca,
Yë'ëre sihuajë de'oye se̱ñu'u cajë nëtëroja̱icohua'ire huani i̱sijë, cui'ne co'amaña coa i̱sijë yo'ore?
43Pa̱huë, mësaru ja̱je yo'oye. Coa ai jerepa Moloc diusu huë'ere hue'ejë sajë,
Cui'ne Refán diusu ma'ñoconi hue'ejë sajë
Cui'ne mësaru se̱ñu'u cajë de'huasi diusuohua'ini hue'ejë sajë yo'ohuë.
Ja̱ do'ire mësarute yë'ëpi Babiloniana jëjo saoja̱'quë a'ë.
44Ja̱ maca cato mai aiohua'i ca̱'nipi nesi huë'ere pahuë, Maija'quë ja̱'re. Ja̱je yo'oñu'u, cajë nejaquë nese'ere i̱ño huë'ere. Ja̱ huë'e cato Moisésre Maija'quë caquë i̱ñoni ñeje pa'iore nejë'ë caquë cua̱ñese'eje̱ pa'iore nesico paji'i. 45Ja̱ huë'e mai aiohua'i tsoe pasiconi Josué ja̱'re daicohua'ipi te'e i̱ohua'i daiyeje̱ dahuë, yecohua'i yeja jio maca Maija'quëpi i̱ohua'i ñajëna, yequë pa̱ire nejo maca. Ja̱je pahuë, ja̱ huë'e David pa'i macaja̱'a. 46Pajë pa'icohua'ini Davidpi Maija'quëre de'oye ña cua̱ñoquëpi Jacob Diusu huë'e necasi'i cuasapi. 47Cuasaquëta'a pa̱pi. Necaiye pa̱quëna, mamaquë Salomónpi necaji'i. 48Ja̱je pa'iquëta'are Maija'quë i̱repa cato pa̱i nesi huë'ere pa'ima'quë api. Ja̱je pa'ina, Maija'quëre quëacaiquëpi capi, ñeje:
49Ma'tëmo cato yë'ë pa'i hue̱'ña'ë. Yë'ë ñu'i cua̱ñe hue̱'ña'ë.
Yeja cato yë'ë quë̱o meñe tsa'cupa hue̱'ña'ë.
¿Ja̱je pa'ito me yë'ë huë'e necaija̱'cohua'i a'ni? caji, Ëjaë.
¿Jero a'ni, yë'ë pëa huajëja̱'to?
50Si'aye yë'ë ne saose'epi pa'ito.
51Ja̱je pa'iquëta'are mësaru cato nuiñerepa asajëta'a nuñere pare yo'oyere coecohua'i a'ë. Ja̱je pa'iohua'ipi ca̱jonoaje asama'cohua'ipi cui'ne joñoaje̱ ti Maija'quëre cuasama'cohua'i a'ë, mësaru. De'hue Maija'quë joyore sa̱ñope yo'ocohua'i a'ë. Aiohua'i pa'ise'eje̱ pa'iohua'i a'ë. 52Ja̱je pa'ina, ¿jequë a'ni, Maija'quëre quëacaiquë mësaru aiohua'i co'aye yo'oye pa̱siquë? Ti peoji, te'ije̱. Ja̱je pa'ina, co'aye yo'ojë huani je̱ohuë, nuñerepa pa'i dai ja̱'ñere quëacohua'ire. Yure i̱pi nuñerepa pa'ipi daquëna, mësarupi tse̱ani huani je̱ohuë. 53Mësaru hui̱ñaohua'ipi cua̱ñese'e i̱sijëna, i̱sicohua'i de'oye sehuocaima'pë pa'iyë.” Ja̱re capi, Esteban.
Estebanre Huani Je̱oñe
54Ja̱je caquëna, asani Estebanre ai pë̱ijë cu̱ji qui̱'cohuë. 55Ja̱je yo'otoje̱ Esteban cato de'o joyo ti̱mësiquëpi ma'tëmore ñaquë Maija'quë de'oyere pare ñapi. Ñaquë cui'ne Jesure ñapi, Maija'quë ëja të'hui quë'rore nëcaquëna. 56Ñani capi:
“I̱na ma'tëmo hui'yosiconi ñañë, cui'ne Jesupi Maija'quë ëja të'huire nëcaquëna.”
57Caquëna, asani pë̱ijë ca̱jonoa pë'pëni cuijë i̱na da to̱me daë'ë. 58Da to̱me dani tse̱ani pa̱i daripëpi etoni quë̱na pë̱api je̱a hue̱ahuë, co'aye yo'oquë api cajë. Huaicohua'ipi i̱ohua'i ca̱ña du'teni te'e po̱së Saulo hue'equëna, i̱sihuë, ñacaijë̱'ë cajë. 59Quë̱na pë̱api je̱ajëna, Estebanpi Maija'quëre se̱i capi:
“Ëjaë Jesús, yë'ë joyo më'ëpi de'huacaijë̱'ë.”
60Cani ja̱ maca do're ja'runi ai tutu capi:
“Ëjaë yë'ëre huaicohua'i yo'ose'e sa̱ima'ë pa'ijë̱'ë.” Ja̱re cani ju̱ji'i.
Currently Selected:
Hechos 7: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.