Aj Rom 14

Mi yolbꞌiꞌn kyiꞌj txqantl tukꞌiy

1Ayiꞌy, a ma chi tijiꞌn toj kynimbꞌila, kykꞌmoꞌmqejiꞌy ayeꞌ nya kuj iteꞌ toj kynimbꞌil. Quꞌn at ilaꞌ tumil, a at tajbꞌin te kꞌulbꞌil te qAjaw. Tuꞌnpetziꞌn, mi chi xoꞌn yola tiꞌj tiꞌ t-xilin kyxim, a nya junx taꞌ tzeꞌnku kyeꞌ. 2Jun techil: At junjun nimil qa ntiꞌ tkyꞌi te te, tuꞌn t-xi tchyoꞌn tkyaqil tiꞌ, me at junjuntl toj tnimbꞌil qa noq itzaj bꞌaꞌn txi tchyoꞌn. 3Ayetzin kye nxiꞌ tkyaqil kyuꞌn, nya wen tuꞌn kyyolbꞌiꞌn kyiꞌjjo aye noq itzaj nxiꞌ kyuꞌn. Ex ayetzin kye noq itzaj nxiꞌ kyuꞌn, nya wen tuꞌn kyyolbꞌin kyiꞌjjo aye nxi kychyoꞌn tkyaqil. Quꞌn kykyaqiljo luꞌn ma chi ok te tkꞌwal Dios. 4¿Ma attzin tokliꞌn tuꞌn tkawiꞌn tiꞌj taqꞌnil juntl? ¡Mina! Quꞌn oꞌkx te tajaw aqꞌuntl at toklin tiꞌjjo luꞌn, qa wen toj twutz mo minaj. Me tiꞌjjo a tuꞌn t-xi qchyoꞌn mo minaj, ate qAjaw at tipin tuꞌn tel wen tkyaqil nimil tuꞌn.

5Juntl tumil: At junjun nqꞌmante qa at junjun qꞌij nimxixtl toklin tzeꞌnku juntl, ex at junjun nxi niminte qa kykyaqilx qꞌij junx kyoklin. Me teyilex te junjun bꞌaꞌn tuꞌn t-ximin tiꞌj alkyeꞌ qꞌij wen toj twutz, jaꞌ tuꞌn tkꞌuline. 6Alkye nimil nim toklin jun qꞌij toj twutz, bꞌaꞌn, quꞌn te nimsbꞌil tbꞌi qAjaw. Ex alkye mikyxiꞌ toj twutz, ex te nimsbꞌil tbꞌi qAjaw.#Col. 2:16. Ex ikyxjo, alkye nxi tchyoꞌn tkyaqil tiꞌ, a wen toj twutz, bꞌaꞌn tuꞌn t-xi tchyoꞌn te nimsbꞌil tbꞌi qAjaw, quꞌn kxel tqꞌoꞌn chjonte te qMan Dios tiꞌj. Ex alkyeꞌ mi nxiꞌ tkyaqil tiꞌ tuꞌn, a nya wen toj twutz, ex bꞌaꞌn tuꞌn mi txi tchyoꞌne, quꞌn ex te nimsbꞌil tbꞌi qAjaw, quꞌn ex kxel tqꞌoꞌn chjonte te Dios tiꞌj tkyaqiljo nxiꞌ tuꞌn. 7Mix aꞌlx jun nimil n-anqꞌin ex nkyim noqx tuꞌn tnimsin te tibꞌ. 8Quꞌn qa itzꞌqo, te nimsbꞌil tbꞌi qAjaw; ex aj qkyim, ex ikyxjo, te nimsbꞌil tbꞌi qAjaw. Ex qa itzꞌqo ex qa ma qo kyim, te qAjawqo. 9Quꞌn tuꞌnpetziꞌn, kyime Crist, ex jatz anqꞌin juntl majl, tuꞌn tok te tAjaw tkyaqil itzꞌ ex kyimnin. 10Tuꞌnpetziꞌn, ¿Tiꞌn te toklin tuꞌn tkawiꞌn kyibꞌaj txqantl nimil? ¿Ex tiquꞌnil nchi el tiꞌjliꞌn? Quꞌn qkyaqilx qo pon twutz Crist, tuꞌn qkawajtz tuꞌn.#2Co. 5:10. 11Quꞌn ikytziꞌn ntqꞌmaꞌn toj Tuꞌjil Tyol Dios:

Twutzxix itzꞌqin weꞌ, chi qAjaw.

Ex twutzxix qa tkyaqil xjal kꞌwel meje,

ex kꞌwel tpaꞌn tbꞌinchbꞌin nwutza,

qa wen ex qa minajch.#Is. 45:23.

12Bꞌiꞌntl quꞌn, qa il tiꞌj tuꞌn qpon twutz Dios chikyꞌbꞌilte tkyaqiljo qxim ex qbꞌinchbꞌin.

Mi qo bꞌujin qxol noq tuꞌn tpaj jun tiꞌ, a nya nimxix t-xilin

13Tuꞌnpetziꞌn, nya wen tuꞌn qyolbꞌiꞌn kyiꞌj juntl. Qalaꞌ kyqꞌonka tilil tuꞌn kybꞌinchintejiꞌy tbꞌanil, ex tuꞌn mi chi jawe takpaje kyermana toj kynimbꞌil tuꞌn kypaja, tuꞌn mi chi kubꞌ tzꞌaqe toj il.

14Quꞌn bꞌiꞌn wuꞌn tuꞌn qAjaw Jesús, qa ntiꞌx jun tiꞌ nya wen tuꞌnx tibꞌx, quꞌn a nya wen ntzaj noq tuꞌn qxim. Tuꞌnpetziꞌn, qa at jun tiꞌ nya wen toj twutz jun xjal, exla nya wentz tuꞌn tkubꞌ tbꞌinchin. 15Qa ma kubꞌ numj termana, noq tuꞌn xi tchyoꞌnjiꞌy a nya wen toj twutz, ntiꞌ tkꞌuꞌja tiꞌj ikyjo. Mi txi tqꞌoꞌn ambꞌil tuꞌn tnaj jun termana, noq tuꞌn tpajjo tnikyꞌbꞌila, a nlabꞌtiꞌy tiꞌj tuꞌn t-xi tchyoꞌn, quꞌn ate Crist o kyim te klolte. 16Ex mi txi tqꞌoꞌn ambꞌil, tuꞌn kyyolbꞌin tiꞌja, noq tuꞌn tpajjo wen n-ele toj twutza. 17Quꞌn a Tkawbꞌil qMan Dios, nya noq tuꞌn qwaꞌn ex tuꞌn qkꞌwan; qalaꞌ tuꞌn tten jun qchwinqil tzꞌaqle, ex jun qmujbꞌil qibꞌ tukꞌa qtzaljbꞌil tuꞌn Xewbꞌaj Xjan. 18Qa ma qo ajbꞌin te Crist tojjo tumil lo, ktzalajil qMan Dios qiꞌj, ex wen qo elile kywutzxjal. 19Tuꞌnpetziꞌn, i tok tilil quꞌn tuꞌn qmujbꞌin te qibꞌ qxolx, ex tuꞌn qchꞌiy toj qnimbꞌil. 20Mi kubꞌ tnajsiꞌn taqꞌnbꞌin qMan Dios toj tanmin juntl, noq tuꞌn tpajjo tnikyꞌbꞌila. Quꞌn twutzx qa tkyaqilx te tiꞌ ntiꞌ tkyꞌi tuꞌn t-xi qnikyꞌbꞌin. Me nya wen tuꞌn tbꞌinchiꞌn, tuꞌn tjaw takpaj juntl toj tnimbꞌil, noq tuꞌn tzaqpiꞌn tiꞌj tkyaqil nikyꞌbꞌil, a taja. 21Tuꞌnpetziꞌn, mi txi tchyonjiꞌy chibꞌj, ex mi txi tkꞌwanjiy vin, qa nya wen toj twutz termana, quꞌn yaj qa noq tuꞌn tpajjo ikyjo xkubꞌe tzꞌaq termana toj il, mo saj numj toj tnimbꞌil. 22Tenxit tnimbꞌila twutz qMan Dios, quꞌn nimxix kyꞌiwbꞌil tibꞌajjo nimil, a ntnaꞌn toj tanmin qa ntiꞌ til tiꞌjjo t-xim, ex tiꞌjjo tbꞌinchbꞌin. 23Me qa at kabꞌe tkꞌuꞌja tiꞌjjo nxi tchyoꞌn, axa n-ok aj paj tiꞌjxa, quꞌn nya tukꞌa tnimbꞌila nxi tchyoꞌn. Ex tkyaqiljo nya tukꞌa qnimbꞌil nbꞌante, atzin iljo.

Currently Selected:

Aj Rom 14: mamC

Highlight

Copy