Aj Rom 13

1Kyqꞌonx kyibꞌa tjaqꞌ kawil tzaluꞌn twutz txꞌotxꞌ, quꞌn tuꞌn ntiꞌ jun kawbꞌil, a nya tuꞌn Dios; ex tkyaqil kawil, ax Dios qꞌolte kyoklin. 2Tuꞌnpetziꞌn, qa at jun xjal mi nkubꞌ tnimiꞌn kawbꞌil, n-el tiꞌjliꞌn a tkubꞌ tuꞌn Dios. Ex ankyeꞌ nkubꞌ tbꞌinchin ikyjo, ax n-ok aj paj tiꞌjx, ex kkawil Dios tiꞌj. 3Quꞌn aye kawil nya tuꞌn kykawin kyiꞌjjo nchi bꞌinchin wen; qalaꞌ kyiꞌjjo nya wen nkybꞌinchin. Tuꞌnpetziꞌn, qa taj te tuꞌn mi txi kawiniꞌy tuꞌn kawil, bꞌinchinkutzinjiꞌy wen, ex axte kawil k-yolil tiꞌja qa wena, 4quꞌn tkubꞌ tuꞌn qMan Dios tuꞌn tajbꞌin te. Me qatzin qa mina xkubꞌ tnimiꞌn, kxel kawin tuꞌn, quꞌn nya noq tokku te kawil; qalaꞌ ax Dios qꞌolte tuꞌn tkawin kyiꞌjjo kykyaqil nchi bꞌinchin nya wen. 5Tuꞌnpetziꞌn, il tiꞌj tuꞌn tokx kyqꞌoꞌn kyibꞌa tjaqꞌ kawbꞌil, nya noq oꞌkx tuꞌn mi cheꞌxe kawiniꞌy tuꞌn, qalaꞌ ikytzin ikyx tumiljo.

6Tuꞌnpetziꞌn, kychjonxjiꞌy tkyaqil wiq kꞌaybꞌil kye kawil, quꞌn aye kawil nchi ajbꞌin te Dios, ex at kyoklin tiꞌjjo aqꞌuntl lo. 7Ex kychjonxjiꞌy tkyaqil kykꞌasa, jaꞌ kꞌasbꞌinaqiꞌy, tzeꞌnku chojbꞌil te kawil, ex jniꞌ kꞌaybꞌil. Ex qa at jun at toklin tuꞌn tkubꞌ nimit, kyniminkuy.#Mt. 22:21; Mr. 12:17; Lc. 20:25.

8Mi chi anqꞌiꞌn noq tuꞌn txꞌex, me at jun kykꞌasa; noq tuꞌn kykꞌuꞌjlin te kyibꞌa kyxolxa. Quꞌn alkye nkꞌuꞌjlin tiꞌj tukꞌa, tuꞌntzintzjo njapin tkyaqiljo tajbꞌil qMan Dios tuꞌn, a tzeꞌnku ntqꞌmaꞌn toj ojtxe kawbꞌil. 9Quꞌn ntqꞌmaꞌn kawbꞌil tuꞌn mi kyꞌaꞌjiniy,#Ex. 20:14; Deu. 5:18. ex mi bꞌiyiꞌn,#Ex. 20:13; Deu. 5:17. ex mi tzꞌelqꞌiꞌn,#Ex. 20:15; Deu. 5:19. ex mi ja bꞌant jun yol tuꞌn tiꞌj juntlch,#Ex. 20:16; Deu. 5:20. ex mi pon tkꞌuꞌja tiꞌjjo kyexjal.#Ex. 20:17; Deu. 5:21. Quꞌn tkyaqiljo luꞌn ex jniꞌ txqantl kawbꞌil npon bꞌaj noq tukꞌa nukꞌbꞌil lo: Tuꞌn tok kykꞌuꞌjliꞌn kykyaqil kyxjalila tzeꞌnkuxjo kyeꞌ.#Lv. 19:18. 10Ankye nkꞌuꞌjlin kyiꞌj tukꞌa, nlay kubꞌ tbꞌinchin jun nya bꞌaꞌn kyiꞌj. Atzintza njapine bꞌajjo t-xilin ojtxe kawbꞌil quꞌn, tuꞌn qkꞌuꞌjlin te qibꞌ.

11-12Toj tkyaqiljo lo, tzꞌeltzin kynikyꞌa tiꞌj tqꞌijil jaꞌlin, quꞌn o qo klet, ex chꞌix tul qAjaw qꞌilqe te jun majx. Tuꞌnpetziꞌn, kyqꞌonktziꞌn tilil, tuꞌn kyjaw sakꞌpaja toj kynimbꞌila. Quꞌn tkyaqiljo il chꞌix tjapin bꞌaj, tzeꞌnku jun qnikyꞌin, aj ttzaj t-xe kyaꞌj. Tuꞌn ikyjo, kytzaqpinkjtzinjiꞌy tkyaqil taqꞌnbꞌin qxopin, a bꞌinchj il, ex kyktxunk kyibꞌa tukꞌa taqꞌnil spikyꞌin, a tajbꞌil qMan, tzeꞌnku jun xoꞌl qꞌaqꞌ at xbꞌalin ex tkxbꞌil te joybꞌil qꞌoj. 13Qo bꞌet-xix toj tumil ex toj spikyꞌin, nya noq tuꞌn qloꞌn, tuꞌn qtxꞌujte, tuꞌn qkyꞌaꞌjin, ex jniꞌ tzeqbꞌil, ex tuꞌn qqꞌojin, ex tuꞌn tloꞌchj qkꞌuꞌj. 14Qalaꞌ tuꞌn tyekꞌin qAjaw Jesucrist toj qchwinqil, tzeꞌnku jun xbꞌalin saq tok qiꞌj kywutzxjal. Ex mi txi qqꞌoꞌn ambꞌil tuꞌn qbꞌinchin a ntqanin ojtxe qteꞌn, a nya wen.

Currently Selected:

Aj Rom 13: mamC

Highlight

Copy