Madcos 7

Matses icsamete chiaid

(Mat. 15.1-20)

1Adnubien Edusaden yacnouësh padiseobobëdi Moisesën chiampid tantiamequido Esus yacno chochopanëdash. 2Adec chochoshon tsusedpabon chiampicpadquiec mëpamëdambobi Esusbëd icquidon pesho isash: Icsambo iquec, quecuededpanëdash.#7.2 Padiseobo: Cun mëdante bëchishaid mëpamëdnu, quenquio yec mëpamëdquid nepanëdash. Tsusedpabon: Naden nata, quequin chiaid tantiaquimbien mëpamëdquid nepanëdash. 3Padiseobobëd isadaidbotedi aton tsusedpabon chuinëdacpadquiec penush mëpamëdannequid nec. 4Pete ambi piucquid menequin bedacnouësh choash adecbidi penush aton tsusedpabon chiampicpadquiec mëpamëdannequid isadaidbo nec. Isadaidbo tsusedpabon: Naden nata, quequin ambi tantiacpaden chiampid utsi utsiec dadpen iquec. Ambi chiampicpadombuen dëshotetsen ampantanquin dapanquidquiobidi nec. Adembidi tëchubëta matsu ampantanquin dapanuaquidbidi neuaic. Ushtetsen dapanuaquid.

5Aden nabanquidquio icquin padiseobobëtan Moisesën chiampid tantiamequidon Esusbëd icquidon mëpamëdambobi pesho isash: ¿Atotsi queshun mibëd icquidon nuquin tsusedpabon chiampicpadombuen nainquiocquimbi mëpamëdambobi pepec? quequin Esus chuipanëdash.

6Adoaquien Esusën: Nuquin Papan oncamiaid Isayasën ëndenquimboshë dada uaquin: Bëdambocquid danmianquido mibitedi nec, quequin chiampicpadquid mibitedi nec. Ambi chuiquin dada uamiampid nad iqueque. Tantia:

Isadaidbon: Nuquin Papa bëdambocquid nec, quequin ubi tantienquiocquid nec.

7Nuquin Papan abi tantiasho ubi bëdambuen isec, quequidëmbi ubi bëdambuen tantienquio iquec.

Umbi chiaidquio chuiquin tantiamenquio icquin aton matsesën chiampiduidi chuibanquin tantiamec,

quequin Isayasën chuipampic, quepanëdash Esus.#7.6-7 Isa. 29.13 tantiaquin nëid dada uapanëdash.

8Aden tsusedpabon chuinëdacpadombuen nabanquin Nuquin Papan Chiaid niacquido mibitedi nec, quepanëdash Esus.

9Aden chuishumbic naden chuiuapanëdash: Nuquin Papan Chiaid niac niacquin tsusedpabon: Nadombuen nata, quequin chiampicpadombuen nabanquidquio mibitedi nec. Aden nabanquin ma mibitedishun Nuquin Papan Chiaidquio niac niacpayoc. 10Moisesën chiampid nad iqueque. Tantia. Chuinu. Titabëta papa chieshënenquio icquin bëdambuen isquin tantiata. Adembidi: Aton papabëta aton tita chieshënquin icsambuen chuishunsho cuidquin uënës uaquid, quequin chiampid icuaic.#7.10 Buan. 20.12. Adembidi Buan. 21.17bëta M.I.Ch. 5.16 tantiaquin nëid dada uapanëdash. Aidtedi isbanta. 11Aden chiampid icnubi aidën chiaid niacquin min tsusedpabon ambembi chiampid chuiquin: Aton titabëta aton papa naden cudasënac bëdambo iquec, mibi quepec. Nuquin Papa menetequid nëidted cun piucquid iquec. Mitsana nibëdsho menetiadquidi mibi menenquio iquembi, quequin chuipec. 12Adquidën aton papabëta aton tita nashunenquio icquin cudasënac bëdambo iquec, mibi quepec. 13Aden chuiquimbi: Titabëta papa tantiaquin nashunta, quequin Nuquin Papan Chiaidquio nainquiocquin: Tsusedpabon chiampicpadombuenuidi nata, quequin chuibanquid mibi nec. Adembidi Nuquin Papan Chiaid utsi utsien naisabo icquin min tsusedpabon chiampid chuibanquin tantiamequido mibitedi nec, capanëdash Esusën.

14Aden chiashic Esus utsibo chiec: Tantiec cho, quetanquin: Mibi chuibannu. Abitedishumbi bëdambuen tantiaquiota. 15Tsusedpabon chiampicpadombuen mëpamëdambobi pete pequin ambi chebudaidën matses icsatiapimbo iquendac. Padnuen ambibi ëquëducshun icsambuen tantiec chieshëmënec onquiaidëmbien matsesën icsambuen naindac. 16Pabiate shëcuë choquidën Umbi Chiaid bëdambuen tantiata, quepanëdash Esus.

17Aden chuibanashic abi iccuededquido tabadnubi aido nianec shubun puduedpanëdash. Ambo puduedash tsadshobien: Mimbi chuibambued ubitedi bëdambuen tantiame, capanëdash abëd icquidon. 18Adoaquien Esus: ¿Mimbitsenda adembidi tantienquio ique? Tantia. Mibitedi chuinu. Ambi piaidën matses icsametiapimbo iquec. 19¿Aton tantiate yacnoda pete piaid nidpadic? Padenquio. Pete piaidien pucu yacno budbudec. Adashic iuecpactsëc yash aton dadanouësh puduenuaic. Adquid icnuc pete abitedi bëdambocquid nec, quepanëdash.

20Aden chuishumbic: Ambi ëquëducshun icsambuen tantiacpaden nabanec matses icsaindac. 21Aden ëquëducshun tantiec: Naden naimbi, quequin ambi tantiacpadombuen icsambuen naic matses icsatequid nëidted iquec: Nëidic ambi natemaidi naic chudnanquido. Nëidic ampequido. Nëidic cuessunnianquido. 22Nëidic aton chidopenquio chudquido. Nëidic aton bënëpenquio chudmequido. Nëidic abi bunacpadombuen dadpenquio bedquido. Nëidic icsamboshëcquido. Nëidic utsin na isash bunquido. Nëidic utsibo muaquin chuishunquido. Nëidic abi bunaiduidi nate bunquin naquido. Nëidic utsina isash bedte bunquido. Nëidic utsi ambembi icsambuen chuishunquido. Nëidic: Ubiuidtsëqui bëdambocquid nebi, quequido. Nëidic: Aden naic icsatsiabi, quenquio icquin icsambuen naquido. 23Aden umbi chuibuedtedi icsaquin ambibi ëquëducshun tantiacpadombuen nabanec matses icsatequid nendac, quepanëdash Esus.

Isadaidpembo chidon tantiacpadembi Esusën champi bëdanmiaid

(Mat. 15.21-28)

24Aden chiashic auëshquiobi puduanec nidec nidaid cuëshë utsin shubu dadpen icquid Tido caid yacno nidpanëdash. Adash shubun puduedash: Nëmbo aid chosh, quequin chienda, quepanëdash Esus. Adoboqui ompodtiapimbo icnuc chuipanëdash. 25Aden chuisho tantiash podobitsi icsa dapuduedaid champin tita Esus yacno chopanëdash. Adec choequi Esusën taëno dannëshën tinquebudpanëdash. 26Chido isadaidpembo yec nidaid Sidopenisia caid yacnocquid nepanëdash. Aidi Esus chiec: Cun champi podobitsi icsa dapuduedaid iccoshe. Dapuduenme, Icbo, quequin chuipanëdash.

27Adoaquien Esusën: ¿Ma cun bacuëbon bëyuc penu, quenquio icquin bedshuntanquin opaba pemiacta bëdambo icpatsiash?#7.27 Isadaidbotedi cun Pan cun matses caido yec aton bacuëbo nec, quequin tantiec Esus adpanëdash.

28Adsho tantiashien chido: Icbo, mimbi chiaid abimbo iquec. Padnuen aton bacuëbon pequin paëdmiaid cuëshëmpi opan petsëcquid, quepanëdash chido Esus chiec.#7.28 Adembidi mimbi nadatiambocquin nabanaqui isadaidbo dadpen bëdannubi isadaidpembo abentsëc mibi tantiaquid icsho ubi nashunquin cun champi bëdanmeta, quequin tantiaquin chidon aden chuipanëdash.

29Aden chiaquien: Bëdambuen mimbi chiec. Aden tantiaquid mibi neque. Min shubuno nidec nid. Podobitsi icsa dapuduedaid min champi icbuedi dapuduenaque, capanëdash Esusën chido chuiquin.

30Adsho tantianec aton shubuno choash puduedquin isaquien aton champi bëdanash abi ushaidëmbi uesho istuidpanëdash podobitsi icsa cuenan.

Pashuaid onquenquiocquid Esusën bëdanmiaid

31Adashic shubu dadpen icquid Tido caid yacnouësh padpidec puduanec nidequi shubu dadpen icquid Sidon caid datambidanec chian Cadidea caid yacno chouapanëdash Esus. Aid chian ëquëmatsiuc icquid nidaid cuëshë Decapodis caid yacno chopanëdash. 32Adnubien dada onquenquio yec pashuaid Esus yacno bëshun: Nëid mishquin bëdanme, capanëdash.

33Adsho tantiashun iccuededquido ismenquio icquin udictsëc dada buanshun aton mëdante dëshbi pashuaidën pabiaten paosuntanquin chicpanëdash Esusën. Adshun: Min anatsen mishnu, quetanquin uicchun mishtanquin pashuaidën ana mishpanëdash. 34Aden mishec bushquequin abuc isec: Epata, quepanëdash. Paucud, quec adpanëdash Esus aton onqueten. 35Adec Esus cuëdnubi pashuash onquenquio icbuedi tantiadcuenec bëdambuec onquiampanëdash.

36Aden bëdanmeshun ambo tabadquido chuiquin: Esusën bëdanmiosh, quequin utsibo chienda, capanëdash. Adoboqui badedquio niacbidanquin utsibo chuibampanëdash. 37Aden chuisho tantiash tantiadempambo yec: Adquidshenda Esus nepec. Ambi naidtedi bëdambo iquec. Pashuaidi tantiamebenquidquio nec. Adembidi onquesabi oncamianquidquio nec, quec onquecuededpanëdash.

Currently Selected:

Madcos 7: mcfNT

Highlight

Copy