Madcos 8

Matses 4midted Esusën pemiaid

(Mat. 15.32-39)

1Adashic Esus yacno matses dadpen padpidec chochoash iuec tabadec pete nibëdnuc bundocuededpanëdash. Adsho issun abëd icquido chomeshun Esusën naden chuipanëdash: 2Matses bunec tabadsho isash nëido tantiec uënësquio iquebi. Aidon ubëd daëdec ushec tabadquin aton pete uesquin piash nec, quiash uënësquio iquebi. 3Aton pete nibëdsho issun pemiambobi utsi utsiec ënapenuësh chochoquido icsho: Min shubuno nidshun petan, cac podquiedën nidannec padishnushe, queshun nidmetiapimbo iquebi, quepanëdash Esus.

4Adoaquien: Shubu nibëdec matses nibëdacno nuqui tabadeque. Nëido pemenun ¿mitsimbo nidshumbimbi pete bedtampe? capanëdash abëd icquidon.

5Adsho tantiashumbien Esusën: ¿Tedtsi pan iquec? caquien: 7ted iquec, quepanëdash abëd icquido.

6Adsho tantiashumbien: Nidaidën tabadbud, quetanquin Esusën pan 7ted icsho bedshun sananquin: Mimbi uaid pete bëdambo iquec, Papa, quequin chuitanquin pan cuëshbudcuenshun: Nëid meneban, cac abëd icquidon ambo tabadquido menebampanëdash. 7Adembidi nuëcquid daëdpactsëcquid bedshun: Mimbi meniaidbidi nëid nec, quequin tantiembi, Papa, queshun: Nëidtsen meneban, Esusën cac menebanuapanëdash. 8Aden menebanac piash abitedimbo: Pequiombi, quecuededpanëdash. Aden pebededan napi uaid bedbanquin sandoaid tsitsan dapa 7ted icpanëdash. 9Aden pebuedotedi tambanac 4midted icpanëdash. Adshumbic Esusën: Nidannec nid, capanëdash. 10Adashic Esus abëd icquidobëd cano antabëdtoanec potec nidec nidaid cuëshë Dadmanuta caid yacno nidpanëdash.

Padiseobon: Nadatiambocquin nata. Isnu, Esus caid

(Mat. 16.1-4; Duc. 12.54-56)

11Aden potiash tabadnubi padiseobo chochoshon: Esus icsambuen namenuna, queshun naden chuipanëdash: Nuquin Papan Chomiaid nebi, quequin Aidën namiac nadatiambocquin nabanquin ubi isme, capanëdash.

12Adsho tantiash uënësquio yec uëshquetanec: ¿Atotsi queshun nëid matsesën: Nuquin Papan Chomiaid icquin nadatiambocquin nabanquin ubi isme, capec? Aden chiaqui: Mibi nadatiambocquin naquin ismenquio iquembi, capanëdash Esusën. 13Aden chuitanec aido nianec cano antabëdtoanquin chian ëquëmatsiuc potec nidpanëdash.

Nuquin Papan Chiaidbëta ambi tantiaid nactsusuaquin chuiquid padiseobo nec, quequin chiaid

(Mat. 16.5-12)

14Adec Esus puduansho isash ambi petequid bedambobi bëshunquiash pan abentsëc cano nantan icnubi abëd icquido cano antabëdtoanec puduanec nidpanëdash. 15Aden potequimbi Esusën naden chuipanëdash: Padiseobobëd icquidonabëd Edodes Antipasbëd icquidona pan bidiscametebimbuecquid iqueque. Tantechoquiota, quequin chuipanëdash Esusën.

16Adoaquien tantienquio iquec abëd icquido: Nuqui pan bëambo icbued chiequi nepanui, quec chuinancuededpanëdash.

17Aden chiec onquecuedednubien ambibi tantiash Esus nadpanëdash: ¿Atotsi quiash: ¿Umbi pan bëambo icbuedta chuipec? mibitedi quepe? ¿Adembidi umbi nabambued tantienquio yanash pashuacbimbuecquidta yano? 18Adembidi ¿Ëshë icquimbida isenquio yano? ¿Pabiate icquimbida umbi chuibambued tantienquio yano? ¿Tantienquioda ique? 19Pan 5ted bedshun cuëshcuëshshun dada 5midted icquid menebanac pequin napi uaid ¿tedtsi tsitsanën sandoaid iccosh? caquien: 12ted iccosh, quepanëdash abëd icquido.

20Adshobien Esusën: Adembidi umbi nëbi 7ted pan icquid bedshun cuëshcuëshshun matses 4midted icquid pemiaidon pequin napi uaid ¿tedtsi tsitsanën sandoaid iccosh? caquien: 7ted iccosh, quepanëdash abëd icquido.

21Adshobien Esusën: ¿Abida tantienquio mibitedishun ique? quepanëdash abëd icquido caic.

Betsaida yacnoshon Esusën bëshuaid bëdanmiaid

22Adashic shubu dadpen icquid Betsaida caid yacno Esus abëd icquidobëd chopanëdash. Adec choacsho issun ambocquidon bëshuaid bëpanëdash. Aden bëshun: Nëid bëshuaid neque. Mishquin bëdanme, capanëdash Esus chuiquin. 23Adsho Esusën bëshuaid mëdinanquin Betsaida caid udictsëc buanshun uicchunën bënoshcatanquin mamishquin: ¿Ada mimbi iseque? Ubi chui, capanëdash Esusën.

24Adsho tantiashun isquin: Bëdambuen isenquio icquin cute capuacbipambuec matses capusho isembi, capanëdash bëshuaidën. 25Aden abi chuisho Esusën bëshuaid padpiden bëmishuaquien bëucudquiopanëdash bëdambuen isbenec. 26Aden bëdambuen isbensho issun: Nëbi min shubuno nidec nid. Betsaida caid yacno nëbi nidenda, capanëdash Esusën.

Nuquin Papan Chomiaidquio Quidistu mibi nec, Petedon Esus caid

(Mat. 16.13-20; Duc. 9.18-21)

27Adanec nidaid cuëshë utsi Sesadea Uedipo caid yacno nidash: Shubu utsi utsiec yacno capucuennenu, quiash podquiedën nidequi: Matsesën ¿tsutsi nec, ubi caosh? quepanëdash Esus abëd icquido chiec.

28Adoaquien: Utsin utsinquien: Uan pado acten mentoandenned nepanui, mibi caosh. Utsimbic: Edias Nuquin Papan oncamiampid nepanui, mibi caosh. Utsimbic: Nuquin Papan oncamiampid utsi nepanui, mibi caosh, quepanëdash abëd icquido Esus caic.#8.28 Mad. 4.5-6 tantiaquin aden Edias quequin chuipanëdash.

29Adsho tantiashumbien Esusën: Ma mibitedishun ¿tsutsi nec, mimbi ubi cao? caquien Petedon: Quidistu Nuquin Papan Chomiaidquio nec, mibi caombi, capanëdash.

30Adsho tantiashun: Mimbi chuibued utsibo chienda, capanëdash Esusën.

III. NUQUIN PAPAN CHIACPADOMBUEN NAQUIN NAINASH NIDTE CHIAID

(8.31—16.20)

1. Abi uënës uate Esusën chiaid

(8.31—11.11)

31Aden chuishumbic abi uënës uate tantiamequin abëd icquido Esusën tauaquin chuipanëdash. Matsesën Tishaid icshobi natiamequin nëidtedishun ubi mëyanmendac. Nëidic isadaidbon chuiquido tsësiobon. Nëidic nëish iua cuessunneshun pichicaquidon chuiquidon. Nëidic Moisesën chiampid tantiamequidon. Aidtedshun mëyanmequin uënës uamiaqui daëdec ushash uincuenendabi, quequin Esusën chuipanëdash. 32Aden chuisho tantiashumbien Petedon Esus uannotantsëc buantanquin naden chuipanëdash: Icsambuen mimbi chioque. Aden chienda, capanëdash.

33Aden Petedon chuisho tantiash bidiadshun abëd icquido utsibo isquin Esusën naden Petedo chuipanëdash: Cuenta, Satanas. Nuquin Papan tantiacpadpenquiocnoc ubi niacmenu, quequin icsambuen chuiquid iquec. Mayan Icsa Satanasën tantiamiac matsesën tantiacpaden mimbi tantiec, quepanëdash Esus Petedo cumapenen chushcaic.#8.33 Petedo Mayan Icsan oncamiac nec, quequin Mayan Icsa Satanas, quequin chuipanëdash Esusën Petedo chuiquin.

34Aden Petedo chiashic abëd icquidobëta utsibo abëd icnuec dadpen chochoquido caic: Nëmbo chocho, cashun naden Esusën chuipanëdash: Ubi tantiaquid icquin ambi tantiacpaden atonauidi nainquio icquin umbi chiacpadombuen natsiash. Adsho chieshëmënquidon: Cueste napotiaidën dectanquin uënës uachitono, caqui chieshtoenquio icquin abi ubi tantiatsiash. Adquid ubi tantiaquidquio nendac. 35Matses ambi tantiaiduidi naic tabadquid uënësash Nuquin Papa yacno puduedtiapimbo iquendac. Padnuen ubi tantiaquin umbi chiacpadombuen naquin Nuquin Papan Chiaid Bëda chuibansho chieshënquin cuessunniaid icsho Nuquin Papan abi yacno puduedmendac. 36Aden abi bunaid dadpen bedbanashic ubi tantiesa yec uënësash Nuquin Papa yacno matses puduedtiapimbo iquendac. ¿Adquidta bëdambo icpadic? 37¿Nuquin Papa piucquid menecta matses aid yacno puduedpatsiash? 38Esus tantiaquid yec ambi chiaid tantiaquid nebi, quequid icquimbi ubi tantiesabo icsambuec tabadquido dacuëdënquin ubi caic: Aid tantiaquid nebi, catiapimbocquid icsho isash nadendabi. Matsesën Tishaid icshobi Nuquin Papa nadatiambocquidquio icquin abitedishun Icbombo icmiac Cun Pabëd icquido bëdamboshëcquidobëd choshon nidaidënshun umbitsen: Nëid ubi tantiaquid nec, cauatiapimbo iquendabi, quepanëdash Esus.

Currently Selected:

Madcos 8: mcfNT

Highlight

Copy