Madcos 4

Utsi chiacbimbuen pete ëshë secaquid chiaid

(Mat. 13.1-9; Duc. 8.4-8)

1Adashic padpidec chian cuëman nidshun Esusën dadpen chuibanuapanëdash. Aden chuibansho matses dadpen abi tantiec chochosho isash Esus cano antsadtopanëdash, chochoquido acte cuëman tabadnubi. 2Adec tabadshobi: Matses nadquio iquec, quequin tantiamenuen utsi chiacbimbuen Esusën dadpen naden chuibampanëdash: 3Tantia. Chuinu. Tied icbo pete ëshë secaic aton tied yacno nidposh. 4Adec nidshun pete ëshë secac maisec utsi utsiec podquied nantan paëdaid istuidshun uicchunën cheposh. 5Pete ëshë utsibic nidaid aniactsëc iquec cuënote dadpen samëdacno pete ëshë utsi utsiec paëdash badedquio dëyucuidtsashi 6tapunenquio yec uëshë chënquequidën badedi shoedash uënësposh. 7Pete ëshë utsibic nisanquid dadpen yacno paëdash dëyucash canidotsëcshobi nisanquidën bëtinac bacuëtiapimbo yec uënësposh. 8Adnubien pete ëshë utsi nidaid bëdambo yacno paëdaid dëyucaid caniash dadpenquio ëshëcquid icposh. Utsi utsiec 30ted icnuc utsi utsiec 60ted icnubi utsi utsiec 100ted ëshëcquid icposh, quepanëdash Esus.

9Aden chiashic: Pabiate shëcuë choquidën Umbi Chiaid bëdambuen tantiata, quepanëdash Esus.

¿Atotsi queshun Esusën utsi chiacbimbuen chuibampec? quequin chiaid

(Mat. 13.10-17; Duc. 8.9-10)

10Aden chuibanquin nainan utsibo nidannian Esus abentsëqui icsho isash abëd nidquid utsibobëtan abëd icquid 12ted icquidonquio: ¿Atotsi queshun utsi chiacbimbuen aid chiaid tantiamequin matses dadpen chuibanquin nao? capanëdash Esus chuiquin.

11Adoaquien Esusën: Utsibo tantiamenquio icnëdaidi nëbi: Nuquin Papan namiacno tabadte iquec, quequin mibitedictsëqui tantiamembi. Utsiboembi aden chienquio icquin utsi chiacbimbuen chuibanendac. 12Aden chiaqui:

Ëshën bëdambuen isquimbi ma isenquiocpanuna.

Adembidi pabiaten bëdambuen tantiaquimbi ma abimbo chiaid tantienquio icuapanuna.

Aidon abimbo tantiaquin ambi icsambuen naid ënnushe. Aden ambi icsambuen naid ënsho isash Nuquin Papa aidën icsambuen naid tantienquio yec bëshunnushe,#4.11-12 Isa. 6.9-10 Nuquin Papan isadaidbo chushcampid tantiaquin nëid Madcosën dada uapanëdash. Aid ista.

quepanëdash Esus abëd icquido chiec.

Utsi chiacbimbuen ambi pete ëshë chuibued Esusën cuembo chuibanaid

(Mat. 13.18-23; Duc. 8.11-15)

13Aden chiashic: ¿Mimbitsenda umbi chuibambued tantienquio ique? Aid tantienquio icquin ¿Mitsipaden adenuidi chuibansho mimbi tantiape? Umbi chuibambued nadquio iqueque. Tantia. Chuinu. 14Pete ëshë secaquidbimbuecquid Nuquin Papan Chiaid chuibanquid nec. 15Pete ëshë secac podquied nantan paëdacsho uicchunën dëyuctiapimbonoc chiacbimbuecquid matses utsi utsiec iquec. Adquid Nuquin Papan Chiaid chuibansho tantiash: Tantianu, queshobi tantiamenquio icquin Mayan Icsa Satanasën badedi bëshunmendac. 16-17Pete ëshë utsi cuënote dadpen samëdacno paëdaidbimbuecquid nad iquec. Nuquin Papan Chiaid chuibansho tantiash: Bëdambo iquebi, quec cuishonquendac. Adsho: Nuquin Papa tantiaquid nec, queshun utsibon chieshënac pete ëshë dëyuquec tapunuidtsashi uënësacbimbuen badedi chieshtoshon Nuquin Papan Chiaid tantienquio yanendac. Adembidi chieshtomiantequid utsi utsiec icnuc Nuquin Papa tantienquio yanuaindac. 18-19Pete ëshë utsi nisanquid dadpen dëyucaid yacno paëdaidbimbuecquid nad iquec. Nuquin Papan Chiaid chuibansho tantiashun ambi natiaquin tantiaiduidi tantiec chieshtoendac. Utsibic ambi bedteuidi tantiaquin nabanquin chieshtoshon tantienquio yanendac. Utsibic abi bunaidtedi nate bunquin tantienquio yanuaindac. Adquidon Nuquin Papan Chiaid tantiesa yanshun bëdambuec tabadaid ismesa yanendac. Adquid nisanquidën bëtinac bacuëtiapimbo yacbimbuecquido nendac. 20Pete ëshë utsi nidaid bëdambo yacno paëdaidbimbuecquid matses utsi utsiec nad iquec. Nuquin Papan Chiaid chuibansho tantiaquioshon aid tantiadonec bëdambuec tabadquid yanshun utsibo tantiamequid iquendac. Adquidën chuibanac ubi tantiaquid 30ted yanendac. Utsin chuibanac 60ted yanendac. Utsin chuibanac 100ted yanendac, quequin Esusën chuibampanëdash.

Utsi chiacbimbuen tabote chiaid

(Duc. 8.16-18)

21Aden chuishumbic abëd icquido naden Esusën chuipanëdash: Tabote taboshon tsadte tëdionda ¿dectampadic? Adembidi uete tëdionda ¿dectanuapadic? Padenquio. Tabote taboshon abuc nënantan dectanac chënqueshoen icbon isquid. 22Adembidi utsibo ismenquio icquin ompodshon nabanaidtedi tantiadanendac. Adembidi utsibo tantiamenquio icquin nabanaidtedi chiadanendac, quepanëdash Esus. 23Aden chiashic: Pabiate shëcuë choquidën Umbi Chiaid bëdambuen tantiata, queuapanëdash Esus.

24Aden chiash Esus: Chiaid Bëda tantiashun bëshunenquio icquin tantiadednequiota. Aden chiaiduidi tantiec utsibobëd tantiananec tabadsho mibitedi bëdambocquid icmequin Nuquin Papan udictsëc mibi bëdambuen tantiamendac. 25Nuquin Papa tantiate bunquidën ubi tantiabensho bëdambuen tantiamendambi. Nuquin Papa tantiate bunenquio icquidëmbi umbi utsi chiacbimbuen chiac tantienquio icsho tantiamenquio iquendambi, quepanëdash Esus.#Mat. 13.12; 25.29; Duc. 19.26.

Utsi chiacbimbuen pete ëshë caniash bacuëte chiaid

26Adec onquequin abëd icquido chuishumbic chochoquidtsen naden Esusën chuiuapanëdash: Nuquin Papan namiacno tabadte nadquio iqueque. Chuibannu. Tantiata. Nidaid bëdan pete ëshë secash 27tabadquin cainquidquio icbo nec. Dadpen ushquin ambi secabued isenquio yec icbo tabadnubi 28nidaidën secaid dëyuquec canitanec dadpen ëshëec. 29Adash sinacsho ambi bedtequid uëshë icnuc badedquio bedquid icbo nec, quepanëdash Esus.

Utsi chiacbimbuen Mostasa caid ëshëmpi chiaid

(Mat. 13.31-32; Duc. 13.18-19)

30Aden chuibanshumbic Nuquin Papan namiacno tabadte tantiamenuen Esusën naden utsi chiacbimbuen chuipanëdash: 31Tied icbon mostasa caid ëshëmpi aidpadquid pistsëcquidquio cuëte ëshë utsi nibëdnuc aton tiedën seposh. 32Aden siaid ëshë pistsëcbuedi caniec cuidi cuidipambo yec tiedën nitsinaidtedi dëniaquec nuamboshë caniposh. Aid cuidin dadpen tabadtonequin shubu uashun uicchunën aton bacuë tishposh.#4.32 Adquiecbidi ubi tantiaquid abentsëc icbuedi dadpenquioshë yanendac, quequin tantiaquin Esus aden chuinëdash.

Naden tantiaquin Esusën utsi chiacbimbuen chiaid

(Mat. 13.34-35)

33Aden utsi chiacbimbuenuidi Esusën chuidednepanëdash. Aden chuibanac: Aidtedi tantiabentsiash, queshun adenuidi chuibampanëdash. 34Aden utsi chiacbimbuen abitedi chuibanshumbic abëd icquidouidtsëqui bëdambuen tantiamequin cuembo chuibampanëdash.

Acte bocquequid ënëd, cac ënëdaid

(Mat. 8.23-27; Duc. 8.22-25)

35Adashic aid uëshëmbi inchëshbudtsëqui abëd icquido caic Esus: Chian potec ëquëmatsiuc nidnunid, quepanëdash. 36Adoac chian cuëman tabadquido nianec canon nidquin Esus buampanëdash. Aden abëd icquidobëtan potenubien adembidi cano antabëdtoanquin utsin utsinquien poteuapanëdash. 37Aden potenubien cunquequid tapa choquin acte bocquequidën acte ancushadaidën cano mentoadtiadtsëcquio icpanëdash. 38Adnubi cano tsitsumi Esus tëotadec uec ushpanëdash. Adec ushshobi: Cunquequid tapan acte boccaidën nuqui mentoadeque. Isucun, Icbo. ¿Tantiadenquioda iquec? quequin Esus timpanëdash.

39Aden tinac nidtotanquin Esusën: Mibi cumapenec cunqueque. Ënëd, cac badedquio ënëdpanëdash. Adembidi chiac acte bocquequid badedquio ënëduapanëdash.

40Aden ënëdmetanec Esus: ¿Atotsi quiash natiaquiec dacuëdtancuededo? Ubi bëdiactsëc tantiaquidoen mibitedi nec, quepanëdash. 41Adec Esus cuëdnubi cunquequid tapabëd acte bocquequid ënëdsho isash: ¿Mitsipadquidën napeba? Ënëd, cacpadequi ma badedquio ënëdpaboc, quec ambibi tantiec dacuëdcuededpanëdash.

Currently Selected:

Madcos 4: mcfNT

Highlight

Copy