Madcos 5

Podobitsi icsa dadpenquio dapuduedaid bëdanmiaid

(Mat. 8.28-34; Duc. 8.26-39)

1Aden chian Cadidea caid bocquequid ënëdmiash nidquimbi ëquëmatsiuc potec nidquin nidaid Cadada cashumbic Quedasa caid yacno Esus abëd icquidobëd nidpanëdash. 2Ambo nidash pudundoshobi podobitsi icsa dapuduedaid dada choquin Esus bëquedtuidpanëdash. Aidi uënësaido chococaid shëcuë yacnouësh puduenanec choquin bëquedpanëdash. 3Aidi uënësaid chococate cuënote shëcuë uaidën tsadcuennequid nepanëdash. Aidi shocosh bucun mëtanetanquin tataniaid ictednebuedi nadatiambo yanec adoadtiapimbo yampanëdash. 4Abi mëtaniaid tataniaidbëtabi shocosh bucu tëstëstednepanëdash. Aden nacsho isac utsi abi tanebocpadquid nibëdnuc tanetiapimbo icpanëdash. 5Aidi badiadën capucuennequi inchëshën capuec cumapenec sidquecuennec capuequi cuënotempi bedash abibi dasiadcuennepanëdash. Uënësaid chococaidi utsi utsiec yacno nidquin macuësh tapa utsi utsiec yacno capucuennepanëdash.

6Aidi Esus chosho uannoshon isanec titinquianec choec aid ismec dannëshën tinquebudpanëdash. 7-8Adsho issun aid dapuduedaid chuiquin Esusën: Dapuduen, caqui podobitsi icsa cumapenec cuëdec: ¿Atotsi ubi canuec ne? Mimbi namiaidpenquio nebi. Esus, nadatiambocquid Nuquin Papan Madombo icquin ubi cumapenquien mëyanenda, quepanëdash podobitsi icsa dapuduedaid Esus chiec. 9Adsho tantiashun Esusën: ¿Tsutsi cuëmëdquid ne? capanëdash.

Adoaquien: Dadpenquioshë dapuduedaid yec Dequion nebi, quepanëdash podobitsi icsa dadpenquioshë dapuduedaid abentsëc yacbimbuec onquec.

10Adshumbic: Mibi nadatiambocquid neque. Ubitedi nëid nidaidënshun cuenmenda, quequin chuidonepanëdash podobitsi icsatedishun.

11Ambobi uannopactsëc macuësh yacno chanchu dadpenquio pec tabadpanëdash. 12Aden pec tabadsho isashien: ¿Ada mimbi ubitedi chanchun dadan dapuduedmebantsia? quepanëdash podobitsi icsabo Esus caic.

13Adoaquien: Ai, chanchun dadan dapuduedcuededta, Esusën cac matsesën dadanouësh dapuduencuededec chanchu 2midted icquid dapuduedcuededash niquianec abucquio quiusudacnouësh chian nëpaëdbudnec mentoadbudnepanëdash, chanchu nibëdquio yec.

14Adsho istanec chanchu pemequin isquido titinquianec nidannepanëdash. Adec nidshun shubu dadpen icquid yacno tabadquidobëta uanno icquido ambi isbued chuituidac aidotsen isec chochopanëdash. 15Esus yacno choshon podobitsi icsa dapuduembued dashcute dasiuidenquio icbuedi dasiuidash tsadsho istuidpanëdash. Tantienquiocbuedi bëdambuen tantiec tsadsho istuidpanëdash. Adec tsadsho isbededequi: Nadatiambocquin naid nec, quequin tantiec dacuëdcuededec tabadpanëdash. 16Adec tabadquin isquidon podobitsi icsa dapuduedaid bëdanmequin chanchu dapuduedmesho isbuedon chochoquido tantiamequin chuibampanëdash. 17Aden chuisho tantiashun chochobuedon: Nëmbo iquenquio yec nidec nid, capanëdash Esus chuiquin.

18Adoac aucbidi budec Esus cano dapa antsadtoshobien podobitsi icsa dadpen dapuduenmebued choquin: Mibëd nidte bunebi. ¿Ada ubi buantsia? capanëdash. 19Adoaquien Esusën: Padi. Min shubuno nidec nid. Ambo nidshun Nuquin Papan mibi tantiaquin podobitsi icsa dadpen dapuduedaid dapuduemequin mibi bëdamebued min matses chuibanta, capanëdash. 20Aden chiac nidshun nidaid cuëshë Decapodisën icquid shubu dadpen icquid yacno yacnombuec puduedcuennequin abi Esusën bëdanmebued chuibennepanëdash. Aden chuisho tantiaquidtedi: Adopenshenda Esusën bëdanmiash, quec tantiadempambo iccuededpanëdash.

Chido nacchoadec nënquid bëdanmiaidbëta champi uënësaid uincuenmiaid

(Mat. 9.18-26; Duc. 8.40-56)

21Adshumbic cano dapan abëd icquidobëtan Esusën padpiden abi chobocmibidi chian poteuapanëdash. Aden potiash Esus mananuc pudundosho isash matses dadpen chian cuëman padpidec chochouash badedquio tsucus tsucustsëcquio yec datsidadpanëdash. 22Adnubien Nuquin Papan Chiaid chuibante shubun tabadquido namequid chuiquid tapa Aido cuëmëdquid chopanëdash. Adec choquimbi Esus istuidash: Mibi bëdambocquid nec, quequin tantiaquin ismec Esusën tayun dannëshën sebudec nidaid bëccuësquebudshun 23naden Esus chuipanëdash: Cun champi uënëstiadtsëcquio iccoshe. Aid mishquin bëdanmec cho, quequin chuidoniac 24Aido cuëmëdquidbëd Esus nidpanëdash.

Adec nidsho issun matses dadpenshunquio tsucus tsucustsëcquio yec nidquin Esus tsibanampanëdash.

25Adec nidannenubien ambobi chido abentsëc seta 12ted matanmec intac mëyanec nacchoadquid icpanëdash. 26Dauë choquidën dauë meniaid chequi bëdanenquio icpanëdash. Aton piucquid uesquin menequin dauë bedshun chequi bëdanenquio yec intac nuambo yampanëdash. 27Adec intac iquequi capuquin Esusën nadatiambocquin nabanaid chuisho tantianec nidquimbi matses dadpenshun tsibananshobi aidëntsen tsibananuapanëdash. Aden matses dadpenshun tsibanannubi ismenquio icquin cachoc choshon aidën Esusën dashcute cuëma mishpanëdash. 28Aden aton dashcute cuëmauidtsëqui mishec bëdantsiash icmane, queshun mishequi bëdampanëdash. 29Aton intac bëdantiapimbo icbuedi Esusën dashcute cuëma mishec bëdampanëdash. Adash: Umbi tantiacpadquiequi bëdanobi, quequin ambibi tantiapanëdash.

30Adec chido bëdannubien: Umbi nadatiambocquin nac bëdanosh, quequin tantiec amibidi bidiadquin isec Esus: ¿Tsuntsin cun dashcute mishosh? quepanëdash.

31Adoaquien abëd icquidon: Is. Ma tsucus tsucustsëcquio matses dadpenquio icpayoc. ¿Adquio icnubida: ¿Tsuntsin cun dashcute mishosh? mibi quepe? capanëdash.

32Aden abëd icquidon chiaqui ëcbedenquio icquin: ¿Tsuntsinquio mishoshibique? Isnu, quequin bidiad bidiadquin matses utsi utsien bëisbampanëdash Esusën. 33Aden bëisbannubi: Umbi mishboc nec, quenquio yec chido bëdambued dacuëdec uëdëquec choequi: Mibi nadatiambocquin naquidquio nec, quequin tantiec Esusën taëno dannëshën sebudshun abi mishec bëdambued Esus chuipanëdash. 34Aden chiac Esusën: Champi, mimbi tantiacpadquiequi mibi bëdanaque. Dada icsambo icbuedi nëbi mibi bëdanoque. Bëdambuec nidec nid, capanëdash chido chuiquin.

35Aden chiec abi onquenubi Nuquin Papan Chiaid chuibante shubun icquidon chuiquid tapa Aido cuëmëdquidën shubun icquido chochoshon: Min champi uënësoshe. Bëdambuen chuibanquin tantiamequidi ancabudenda, capanëdash.

36Adsho tantiashumbien Esusën niacbidanquin Nuquin Papan Chiaid chuibante shubun icquidon chuiquid tapa Aido cuëmëdquid chuiquin: Dacuëdenquio icquin ubi tantiata, capanëdash.

37Aden Aido cuëmëdquid chuitanquimbi Esusën: Chochoenda, capanëdash abi tsibanquido chuiquin. Adotanec Petedo yec Santiaco yec Santiacon utsi Uan yec quenuc buanec Esus nidpanëdash. 38Adec nidquimbi Aido cuëmëdquidën shubuno choquin cumapenec shubiec sedenquecuededsho tantiatuidpanëdash. 39Adsho tantianec puduedquimbien Esusën nadopanëdash: ¿Atotsi quec cumapenec sedenquecuededec ne? Champi uënësambo yec ushash uec nec, capanëdash Esusën.

40Adshobien mamënshumbededpanëdash. Adoaquien mamënshunquidotedi puduenmiash champin tita aton papa chedo abëd icquidobëd champi uiacno Esus puduedpanëdash. 41Ambo puduedshun champi mëdinquin Esusën: Tadita, cum, capanëdash. Aton onqueten: Nidto, champi, quequin adopanëdash. 42Adoac badedquio uincuenec nidtopanëdash. Aidi seta 12ted icquid nepanëdash. Aden isucunmequin nidtomiac capusho isash tantiadempambo yec abitedi tabadpanëdash. 43Aden champi uincuenmeshun Esusën: Umbi nabued utsibo chuibanenda, quequin chuitanquin: Champi peme, capanëdash Esusën.

Currently Selected:

Madcos 5: mcfNT

Highlight

Copy