Mateo 23

Bëdambo icquid danmianquido tanenda, quiaid

(Madc. 12.38-40; Duc. 11.37-54; 20.45-47)

1Adshumbic Esusën abëd icquidobëta matses dadpen tantiamequin naden chuibampondash: 2Tantia. Moisesën chiampid tantiamequidobëtan padiseobon naid mibi chuibanec. Aidon: Moisesën chiampicpadombuen naden nata, quequin nuquin matses isadaidbo chuidennepec. 3Aden Moisesën dada uampid abimbo chuibanac aidën chiacpaden mimbi nac bëdambo ictsiash. Aden naquin Moisesën chiampid tantiamequidobëtan padiseobon nacpadombuen nainda. Aidon Moisesën chiampid chuibanquimbi ambibi aidën chiaid niac niaquec. 4Adembidi Nuquin Papan ëndenquimbo: Naden nata, quequin chiaidbëta ambibi: Naden nata, quequin chiaid dadpen chuibanquin matses namec. Aden namequid icquimbi utsibouidtsëqui iuëmboshëcquid iuënmemiacbimbuen namequin ambi chiaid ambibi nabanenquio iquec.

5Aidon Nuquin Papa tantiaquidquio danmequin matses ismenuenuidi naic. Nuquin Papan Chiaid dada uaidëmpi sauedten sauedtsash bëdectamëdash abiuc daëdi pëdectamëdshun matses ismenuenuidi naic. Adecbidi: Nuquin Papa chiannequidquio nec, mabi canu, queshun sedquid shoyonaid ënapempactsëcnuc aton dashcute cuididicash matses ismenuec matses tabadacno capucuennepec. 6Chuiquid tapa nec, cameteuidi bunec. Isedec puduedash: Chuiquid tapa icsho icbon abëdi tsadmequid, quiash icbobëduidi tsadte bunquiec. Nuquin Papan Chiaid chuibante shubun puduedash: Chuiquid tapambo nec, camenuec utsibobëd tsadenquio yec chuiquid tapabobëdi tsadte bunec. 7Nuquin Papan Chiaid tantiamequid yec mibi bëdambo iquec, quequin mabi Dabi canu, quiash matses dadpen yacno piucquid bedquin atona menebanacno nidtednepec.

8Mibitedi adenda. Utsibo: Mibiuidtsëqui bëdambo iquec, icbo, camenuec adenda. Min Icbo abentsëcquiobi nebique. Ubi abentsëqui cun Icbo cata. Cun iuabo yec cun utsibimbuecquido mibitedi neque. Bëdambuec isnanta. 9Adembidi mibi nidaidënshun chuibanquid chuiquimbi: Mibiuidtsëqui bëdambo iquec, Papa, cainda. Abuc icquid Nuquin Papa abentsëcquiobi papa quequin chuita. 10Adembidi: Chuibanquid tapa yec mibiuidtsëqui bëdambo iquec, utsibo camenuenuidi nainda. Nuquin Papan Chomiaid Quidistu uidtsëqui mibi Chuibanquid Tapa neque.

11Padnuen ambi chiacpadombuen utsibo nashunquidquio icsho Nuquin Papan: Aid bëdamboshë iquec, caindac. 12Utsien abibi tantiadec: Ubiuidtsëqui bëdambo iquebi, quequin utsibo ismenuenuidi naquido Nuquin Papan: Icsambo iquec, caindac. Padnuen utsi Nuquin Papan chiacpadombuen naquin utsibo nashunquid yec utsibo ismeteuidi bunenquio icsho Nuquin Papan: Bëdambo iquec, caindac, quepondash Esus abi datsidadquido chiec.

Abi chieshënquido Esusën chushcaid

(Madc. 12.40; Duc. 11.39-45, 52; 20.47)

13Adshumbic Moisesën chiampid tantiamequidobëta padiseobo naden chuipondash: Bëdambo icquid danmianquido yec icsambo icquido icsho Nuquin Papan cuidtequidombo mibitedi nendac. Nuquin Papan Chiaid tantienquio icquin aid yacno iuedanquid tantiesa mibitedi nec. Adquid yec mibi aid yacno puduedtiapimbo icquin mimbi chuibanquin mua uac utsibotsen aid yacno puduedtiapimbo icuaindac.

14Moisesën chiampid tantiamequidobëd padiseobo bëdambocquido danmianquido yec icsambocquido icsho Nuquin Papan cuidtequidombo mibitedi nendac. Muaquin nianten shubu bedshunquido mibitedi nec. Nuquin Papa tantiaquidquio danmenuen utsibo tantiamequinuidi cumapenec cuëdquin Nuquin Papa chiacbimbuen mimbi chiannepec. Aid abimbo mimbi chienquio iquec. Adquid icsho issun Nuquin Papan mibi cumapenquien cuidtequidombo nendac.

15Ai, Moisesën chiampid tantiamequidobëta padiseobo Nuquin Papan cuidtequido mibitedi nec. Mimbi tantiacpadombuenuidi tantiamenuen mibitedishun matses utsibo chuiben chuibenec. Nidaid utsi utsiec yacno nidshun mimbi chuibennesho tantiaquido mimbi tantiacpadombuen tantiaquido yanec Mayan Icsa Satanasën iuabo yanash Nuquin Papan cuidadtequidombo iquendac.

16Nuquin Papan cuidtequidombo mibitedi nec. Isadaidbo chuibanquido icquin pashuaidën tantienquio yacbimbuen bëdambuen tantiamenquien mimbi icchitec. Nuquin Papa tabadte shubu dapa utsi uatiapimbo yacpaden abimbo chiombi, quequid muesa nec, quetiadquidi mibi adenquio iccoc. Padenquio yec: Nuquin Papa tabadte shubu dapan icquid shocosh bëshpiu bëshpiupactsëcquid odo caid nacnenaidquio utsi uatiapimbo yacpaden abimbo chiombi, quequid muesa nec, quechitequien mibi iquec. 17Pashuacbimbuen tantienquio icquido mibitedi nec. Tantienquio icquin mimbi icsambuen chiec. Nuquin Papa tabadte shubu dapa Nuquin Papa tabadtequid yec ¿bëdapenquioda icpec? Aid bëdamboshë icnubi aid nuntan icquid bëdambo iquec, caimbi. Mimbien icsambuen tantiabededec. 18Nadentsen mimbi icsambuen chiec. Nuquin Papa tabadte shubu dapa yacnoshon: Nuquin Papa ismequin nëish iua pichicate nacnenaid tapa utsi uatiapimbo yacbimbuen abimbo caimbi, quequid muesa nec, quetiadquidi mibi adenquio iccoc. Aden pichicate dapan pichicatequid nëish tantiaquin abimbo caimbi, quequid muesa nec, mibi quepec. 19Pashuacbimbuen tantienquio icquido mibitedi nec. ¿Mitsicquid bëdambocquid icpec? Nuquin Papa ismequin nëish iua pichicate nacnenaid tapa bëdamboshë icnuc aidën pichicatequid nëish bëdambo ictsec. 20Nëish pichicate dapa nacnenaid caic: Aid utsi uatiapimbo yacpaden abimbo caimbi, quequin aid nantequid Nuquin Papa ismetequid nëish abitedi chiaidbidi nec. 21Adembidi Nuquin Papa tabadte shubu dapa caic: Aid utsi uatiapimbo yacpaden abimbo caimbi, quequin ambo tabadquid chuiquimbi Nuquin Papambotsen mimbi chiec. 22Adembidi abu caic: Abu utsi uatiapimbo yacpaden abimbo caimbi, quequin Nuquin Papa tsadaidtsen chiec. Nuquin Papa tsadaid cain Nuquin Papambo chiec.#23.22 Nuquin Papan Chiaidquio tantiec: Muanuen abimbo chiacbimbuen chuiquid icsaquid nec, quetiadquidi padiseobobëd Moisesën chiampid tantiaquido adenquio icpampic.

23Moisesën chiampid tantiamequidobëd padiseobo bëdambocquid danmianquido yec icsamboquido icsho Nuquin Papan cuidtequidombo mibitedi nendac. Nuquin Papan Chiaid abentsëqui tantiactsëcquin min tiedën icquid menta caid yec anis caid yec comino caid yec quequin bedshun 10ted icnuc tambanquin sanshun abentsëc bedtednequin Nuquin Papa mimbi menepec. Aden menequid icquimbi mimbi Nuquin Papan Chiaid utsi dadpen niacpec. Chieshëmënquid icbuedi: Umbi icsambuen naid tantienquio yec bëshunta, quequin chiaqui mibi bëshuntiapimbo iquec. Adembidi bëdambocquidi mua uaquin mimbi cuidte chuiquid icsambuen cuidmec. Nuquin Papa tantienquio icquin ambi chiacpadombuen min tiedën caniquid pistsëc musucshun menequid icquimbi Ambi Chiaid utsi abitedi natiadquidi ma mimbi nainquio icpaboc.#23.23 D.N.Ch. 27.30bëta M.I.Ch. 14.22-23 Nëidtedi tantiaquin aden Esusën chuipanëdash. 24Pashuaidën tantienquio yacbimbuen mimbi utsibo icsambuen chuibanec. Manuampi nibedbantsëcquimbi utsi nuacquid tapa nibedabi abi nësamëdpanumbobi acquin chebudacbimbuen chuibanquido mibitedi nec.#23.24 Nuquin Papa meneta, quequin chiaiduidtsëqui nactsëcshun adenuidtsëqui mimbi utsibo namepec. Adenuidtsëqui namequimbi Nuquin Papan Chiaid utsi utsien mimbi niacniaquec, quequin tantiaquin Esusën aden chuipanëdash.

25Moisesën chiampid tantiamequidobëd padiseobo, bëdambocquid danmianquido yec icsambocquido icsho Nuquin Papan cuidtequidombo mibitedi nendac. Padapadaidbëta dëshote chieshquin cachocuidtsëqui dapanshun anauc ampanambo icquidi ampanaid danmianacbimbuec bëdambuec tabadquid danmianquido mibitedi nec. Nuquin Papan Chiaid dadpen nainquio icquin mitsanauidi bednuen mibi bunaiduidi naquin mimbi ampepec. 26Padiseobo, Bëshuacbimbuen tantienquio icquido mibitedi nec. Dëshote abichobi bëdambuen ampanacbimbuen mimbi icsambuen naid ënash bëdambo icta. Adec icsainquio yec Nuquin Papan chiacpadec mibitedi bëdambuec tabadtsiac. 27Moisesën chiampid tantiamequidobëd padiseobo, bëdambocquid danmianquido yec icsambocquido icsho Nuquin Papan cuidtequidombo mibitedi nendac. Adquid yec nadacbimbuec mibitedi iqueque. Tantia. Chuinu. Utsibo: Bëdambuec tabadquido nec, cameteuidi bunsho issun Nuquin Papan mibitedi cuidendac. Nadacbimbuec mibitedi iquec. Uënësaido chococacno bëdambuen nacnenac bëdambo isadec ënden pisenambi. 28Adembidi bëdambuec tabadquid mimbi danmec. Matses ismec bëdambuec tabadshumbic ompodshon Nuquin Papan Chiaid niacniacquin mimbi icsambuen nabanec, quepondash Esus.

(Duc. 11.47-51)

29Moisesën chiampid tantiamequidobëd padiseobo, bëdambocquid danmianquid yec icsambocquid icsho Nuquin Papan cuidtequidombo mibitedi nendac. Nuquin Papan oncamiaidobëta bëdambuec tabadquido tsusedpabon cuessunniampido tantiaquin aido chocoquiacno shubumpi uaquin bëdambo isadnuc mimbi nacnempec. 30Adoshombic: Nëmbo cun tsusedpabon chieshënquin cuessun secampid chococac. Aidbëd tabadquin umbien Nuquin Papan oncamiaido cuessunnemenquio ictsennëdac, queshun mimbi aido chocoquiacno nacnempec. 31Adobuedëmbi nuquin tsusedpabon bëdambocquid cuessunniampic padombuembidi mimbitsen Nuquin Papan oncamiaid chieshtoshon cuessunnemeuaindac. 32Ai, nuquin tsusedpabon Nuquin Papan oncamiampid uënës uampicpadombuembidi nata, quepondash Esus.#23.32 Nuquin Papan Chiaid isbanquin tantiaquid dadpenshun: Esusën aidon abi uënës uate chiec nec, quequin tantiapec.

33Adashic abi padiseobo chiec: Nisibimbuecquido yec icsa uanquido mibitedi nec. Adquido icsho Nuquin Papan chian annëdënquiacno nësecaquin mibitedi cuentiapimbo icnuc cuidendac. 34Icsaquido dadpen icsho issun: Ma Nuquin Papan bëdambuen iste tantiamenu, queshun Nuquin Papan oncamiaido yec bëdambuen tantiaquido yec chuibanquin tantiamequido yec quenuc mibi yacno nidannemendambi. Adquid mibi yacno chochoacsho mibitedishun dadpen cuessun secaindac. Utsi utsien cueste napotiaidën dectanquimbi utsi utsien Nuquin Papan Chiaid chuibante shubunoshon cueshcanten mimbi cacuesendac. Utsi utsien cuessunnenu, quequin nadancactannequin shubu dadpen icquid utsi utsiec yacno yacnombuen mimbi cuenmetannendac.#23.34 Esus tantiaquid yanabi Pabado padiseobo icquin nabanaid chiec. 35Adosho issun Nuquin Papan mibitedi cuidendac. Nuquin Papan chiacpadec bëdambuec tabadsho tsusedpan chieshënquin intac mëyanmequin tauambuen Abed cuessunnepampic. Adembidi bëdambuec tabadsho tsusedpa utsibon utsi utsien cuessun secapampic. Adoshombic ënquimbi Bedequias caidën mado Sacadias cuëmëdquid cuessunnepampic. Aidi Nuquin Papa tabadte shubu dapa në icnuc udictsëc nëish iua pichicate icnuc nënantanshunquio intac mëyanmequin Sacadias cuessunnepampic. Aidtedi cuessun secampido tantiaquin aid cuessunnequido cuidacbimbuen Nuquin Papan mibitedi cuidquiendac. 36Aden aid cuessunnequido cuidacbimbuen nëbimbobi mibitedi cumapenquien cuidendac, capondash Esusën abi chieshënquido chuiquin.

Edusaden isec Esus shubiaid

(Duc. 13.34-35)

37Adshumbic Esusën chuiuapondash: Tantia, Edusaden yacnocquido, mibitedi chuinu. Mibi tantiac uënësquio iquec. Mibi yacnobidi tabadquin Nuquin Papan oncamiaidon chuisho nuquin tsusedpabon cuessun secapampic. Adembidi Nuquin Papan: Isadaidbo chiec nid, caido chosho utsi utsien cuënoten sesequiopampic. Adembidi mimbi nëbi naindac. Adquidombo icshobi mibitedi tantiaquiembi. ¿Mitsipadec cachina aton bacuë cudasquid icpec? Penushe, quiash nua shoccoshon madadec aton bacuë cudasquid. Adecbidi mibitedi cudasquin Nuquin Papa tantiametiadquio iccobi. Tantiamenu, caqui tantiate bunenquio mibi iccoc.#23.37 Ediasën abipadquid Nuquin Papan oncamiaido cuessun secampid chiaid istiadquio icquin Ch.D.1. 19.10 ista. 38Adsho issun Nuquin Papan mibitedi nianquiendac. Abi tabadte shubu nianquinc, mibi tabadaid nianquinc caic mibi cudasenquio iquendac. 39Nëbi ubi nidacsho iuenquio mibitedishun ubi isenquio iquendac. Iuecquiocshon mibitedishun: Ambi Chomiaid Nuquin Papan bëdambuen isaidquio bëdambo iquec, quequin ubi tantiashun padpiden mimbi ubi isuaindac.

Currently Selected:

Mateo 23: mcfNT

Highlight

Copy