Mateo 24

XI. NUQUIN PAPAN ABITEDIMBO NIBËDAMETE ESUSËN CHUIBANAID

(24.1—25.46)

Nuquin Papa tabadte shubu dapa chic chicte chiaid

(Madc. 13.1-37; Duc. 21.5-36)

1Adash Nuquin Papa tabadte shubu dapa daquënë uaid yacnouësh puduenanec Esus nidsho istanec choshon abëd icquidon: En is, Icbo. Nuquin Papa tabadte shubu dapa bëdambuen nacnenaidquio iqueque, capondash. 2Adsho tantiashumbien Esusën: Abimbo chuinu. Tantia. Mimbi isaidquio cuënote bëdambuen nacnenaid matses utsibon nibëdquio icnuc chic chiquendac, capondash.

Nuquin Papan cuidte uëshë yannuc icte chiaid

(Madc. 13.3-23; Duc. 21.7-24; 17.22-24)

3Adanec nidequi macuësh Odibos caid yacno poctsebi tsadtuidshun abëd icquido choshon utsibo tantiamenquio icquin Esus naden chuipondash: Mimbi chuibued ¿tedictsishun chicchicpec? Nëbi choec, quequin mibi chote ¿mitsipadembimbi tantiapatsia? Adembidi ¿atotsi isashini: Nuquin Papan abitedimbo cuidte nëbi yanec, quepatsia? En chui. Tantianu, capondash abëd icquidon. 4Adoaquien Esusën naden chuipondash: Tantia. Mibitedi chuinu. Muaquidoba choendac. Aido choshon chuisho tantiash: Abimbuen cachitec, quec mua uadenda. 5Adquido chochoshon: Nuquin Papan Chomiaidquio Quidistu caid Mesias nebi, quequin muaquin chiaqui matses dadpenshun: Ai, abimbuen mimbi caic, capendac.

6Ubi choabi icnuc: Matses dadpenquio cuesnan cuesnannubi nidaid utsi utsiec yacnouësh cuesnantiadpambo tabadac caosh, quequin chuisho mibitedishun tantiendac. Adsho tantiash dacuëdenda. Nuquin Papan matses abitedi cuidte uëshë choabi icnuc ambi tantiacpadec matses adonanendac. 7Adec matses utsi dadpen icquido matses utsibobëd cuesnanendac. Nidaid utsin icquidon nidaid utsin icquidobëd cuesnanendac. Nidaid utsi utsiec yacno pete nibëdnuc bunquiote iquendac. Nidaid utsi utsiec yacno nidaid cumapenec ishcudtednendac. 8Adsho issun chido bacuë nëncuenacbimbuec nëbi matses abitedi natiametequid yanec, quequin tantiata, quepondash Esus.

9Adashic abi onquec: Umbi chiacpadquio yannuc chieshëmënquidon ubi tantiaquid icsho mibitedi bedshun utsi utsien mëyanmendac. Utsi utsien cuessunnemendac. Aden nidaid utsi utsiec yacno tabadquido dadpenshun ubi tantiaquido icsho chieshënquiendac. 10Adoac ubi tantiaquido icbuedombi chieshtoshon ubi tantienquio yanendac. Adshun ubi tantiaquid ompodacsho bedmeshun mëyanmendac. Adec dadpen chieshëmëdendac.

11Adnubien muaquido dadpen yanash: Nuquin Papan oncamiaidquio nebique. Tantia. Chuinu, quependac. Adsho tantiashun dadpenshun: Ai, abimbo mimbi chiec, caindac. 12Matses dadpenquio icsambuecshë tabadec utsibobëd tantiananenquio yanendac. 13Adquido icnubi chieshtoenquio icquin ubi tantiaquido icsho Nuquin Papa yacno tabadmendambi.

14Ubi choabi icnuc: Ma matses abitedishun: Nuquin Papan namiacno tabadte iquec, quequin umbi naid Chiaid Bëda chuibansho ma tantianu, queshun ubi tantiaquidon nidaid utsi utsiec yacno nidshun chuiben chuibenendac. Aden matses abitedi chuibennequin nainambi Nuquin Papan matses cuidte uëshë choendac, quepondash Esus.

Matses icsamboshë icquid chote chiaid

(Madc. 13.14-20; Duc. 21.20-24; 17.22-24)

15Adashic abi onquec: Nuquin Papan: Ubi tabadte shubu yacnoshon adotemaidquio nec, caid pichicate dayunshun icsambuenshë nabanquid iquec, quesho tantiashun: Nëbien icsambocquid chochitec, quequin tantiata. Ëndenquimbo Nuquin Papan oncamiaid Daniedën aden icsambuen nate chuiquin Nuquin Papan Chiaid dada uapampic. Aidën dada uampid isbanquin mimbi tantiendac.#24.15 Ubi tabadte shubu yacnoshon adotemaidquio nec, quequin Esusën chiampid tantiate bunquin Dan. 9.27 isquinc Dan. 11.31 isquinc Dan. 12.11 isquinc caquin isbanta. 16Aden: Nuquin Papa tabadte shubu dapa yacnoshon ambi natemaid icsambuen naic puduedshun chuibanosh, quesho tantiash nidaid cuëshë Udea yacnocquido macuësh tapa yacno ompodec cuenac bëdambo ictsiash.

17Adecbidi shubu macano padapadapambo icquidën tabadquido yec umanuc dectatoten budanec: Cuna bedbono, quenquio yec cuenta. 18Adecbidi tied nantan nidshun: Chonoadtannu, quequin min dashcute bëntsecquid chicshun dectanaid bednuec bidiadenquio yec badedquio cuenta. 19Adquid icnuc cuennuequi bacuë usunquidobëd bacuë chishmequido badedquio cuentiapimbo yec mëyadec natiaquiendac. 20Adec natiatequid icnuc: Ue taëec iquenuanquid icnuc adquid icmenda. Adembidi chonoadtemaid uëshënquio adquid icmenda, quequin Nuquin Papa chianneta. 21Adnubi cumapenen Nuquin Papa chieshënquimbi abi tantiaquidotsen natiamequin iuen mëyadmequiendac. Adec ëndenquimbo Nuquin Papan nidaid uan matses mëyadtequid nibëdpampic. Aden matses mëyadmian adquid utsi nibëdendac. 22Adquid icnuc Nuquin Papan ënmenquio icnuc matsestedi nibëdantsiandac. Adquid icnubi ambi: Umbi tantiamiaido nec, quequin tantiaquin Nuquin Papan ënmendac, quepondash Esus.

23Adashic abi onquec: Nuquin Papa chieshënte uëshë icnuc: Nëid Quidistu Nuquin Papan Chomiaid neque. Isec cho, quequin utsin utsinquien chuisho tantienda.

24Adquid uëshë icnuc: Nuquin Papan Chomiaid Quidistu nebi, quec muaquid utsi utsiec yanendac. Adecbidi: Nuquin Papan oncamiaid nebi, quec muaquid utsi utsiec iquendac. Aidon: Ubi tantiaquid icmenu, quequin ubi chieshënquidombi nadatiambocquin nabanquin ismendac. Adosho issun Nuquin Papan tantiamiaidonquiobi utsin utsinquien ubi tantienquio ictsenendac.

25Adquid yanabicnuc: Muaquido iquendac, quequin mibitedi chiec nebi, quepondash Esus.

26Adashic padpidec onquec: Umbi aden chuibued tantiashun utsibo muasho tantienda. Ubi caic: Utsibo ismenquio yec shubu nibëdacno choac caoshe. Isnunid, cac nidenda. Adembidi: Choash aid shubun ompodac caoshe. Isnunid, cac istanenda. Muambo neque. 27Ubimbo padpidec choquimbimbi abitedimbo ismendac. Abu uëshëmbo yec bed bedquetannesho ¿ada matses abitedishunquio isenquio icpadic? Ai, isec. Adembidi Matsesën Tishaid yec ubi chouasho matses abitedishunquio isendac. 28¿Ada uënësaid pisenaid yacno edeste budenquio icpadic? Ai, budec. Adecbidi Nuquin Papan cuidte uëshë chonoc abitedishun isnuc chouaindabi, quepondash Esus.

Matsesën Tishaid yec abi chouate Esusën chiaid

(Madc. 13.24-37; Duc. 17.26-30, 34-36; 21.25-33)

29Adshumbic padpiden chiec: Aden matses icsamboshë icquidon ubi tantiaquido natiamequin mëyadmequin naimbudnubi uëshë chënquebuedi inchëshquio yanendac. Inchëshën uëshëtsen chënquenquio yanendac. Uispa chedo paëdbudnendac. Abuc tabadquid abitedimbo uëdëquendac.#24.29 Adembidi Nuquin Papan oncamiampido nëidtedishun chuipampic. Adoshombic nëidtedi Oedën Dada uaid isbanta. Nëidic Oed 2.10-11. Nëidic Oed 2.31. Nëidic Oed 3.15. Aidtedi isbanta. Adoshombic chotaquën onqueten dada uaid isquin nëidtedi isbanta. Nëidic Isa. 13.9-10 istanquin Isa. 34.4 isbanta. Adoshombic Ede. 4.23-26bëta Ese. 32.7 isbanta. Adoshombic Amos 8.9 ista. 30Adnubien Matsesën Tishaid yec ubi chotequid icnuc abuc ismiantequid icsho isbededendac. Adsho isash nidaidën tabadquido matses abitedimbo dacuëdec natiaquiec shubiquiendac. Adnubini Matsesën Tishaid iquequi abitedishun Icbo yec nadatiambo icquin nabanquidquio yec bëchamauanquiec abu ushu yacno ubi chosho isbededendac.#24.30 Dan. 7.13 tantiaquin nëid dada uapanëdash. Aid ista. 31Adnuc nua shoncanubimbi Nuquin Papabëd icquidombo naden chuiquin: Ubi tantiaquido bedtan, caindac. Adoac nidaid utsi utsiec yacno nidanneshun ubi tantiaquido abitedimbo bedtanendac.

32Aden chuishumbic: Ambi chuibued uëshë yante tantiamenuen Esusën naden chuipondash: ¿Mitsi paden: Seta taëec, quequin tantiapec? Suc seccuduquiaid issun: Nëbi seta taëec, quequin matsesën tantiec. 33Adembidi umbi chuibuedtedi yansho issun puduedte shëcuë dayun choacbimbuec: Nëbimbobi Matsesën Tishaid yec cun Icbo choec, quequin tantiata. 34Abimbo chiembique. Tantia. Umbi chuibambuedtedi yanabicnuc nëbi matses icquido uënësec naimëdenquio iquendac. 35Abubëd nidaid nibëdanendac. Padnuen Umbi Chiaid nibëdantiapimbo icquid icnuc umbi chuibocpadquio iquendac, quepondash Esus.

(Madc. 13.32-33; Duc. 17.26-35)

36Adashic abi onquec Esus: Aid uëshënquio chouaindac, quetiapimbo matses iquec. Nuquin Papabëd icquido adtiapimbo icuaic. Aton madombo iquequi ubitsen adtiapimbo iquebi. Cun Pa abentsëcshunquiobien ubi chote tantiec. 37Ubi Matsesën Tishaid caic matses: Nëbi choec, quetiapimbo icnubini padpidec chouaindac. Noen cano dapa nacnennubi ¿mitsipadec aton matses tabadpampic? 38Nidaid abichobi mauanambo icnuc: Nuquin Papan nuqui cuidendac, quequin tantienquio icquin peshun acquinc aton chido bedquinc aton champi bedmequinc caic tabadpampic. Adnubien Noen Nuquin Papan chiacpadombuen cano dapa anshubu uaquin nacnenquin nainash puduedpampic. 39Aton matses: Nëbimbobini Nuquin Papan cuidchitec, quenquio icnubi ue dapambo sequec mauanquidën matses abitedimbo maboccac uënësbudnepampic. Adnubi Noe ambi cano dapa anshubu uaidën nuadtopampic. Adquiecbidi Matsesën Tishaid ubi icsho: Aid choec, quequin tantienquio icnubini chouaindac.#24.37-39 Noen nampid istiadquio icquin Ene. 6.5-12bëta Ene. 7.6-24 isbanta.

40Adec choquin Nuquin Papa yacno tabadmenuen umbi: Bedtan, cac tied nantan dada daëd icsho istuidshun ubi tantiaquid abentsëc beduanquimbi utsi ubi tantiesa icsho nianendac. 41Adembidi chido daëdshun macuesso istuidshun Nuquin Papa yacno tabadmenuen ubi tantiaquid abentsëc beduanquimbi utsi ubi tantiesa icsho nianendac.

42Aden umbi chuibued tantiashun: ¿Nëbida cun Icbo chopeba? quequin ënenquio icquin ubi tantiata. Ubi chote uëshë mibitedishun tantienquio iqueque. 43Tantia. Chuinu. ¿Nëbi ampequid choshon cuna ampec, quequinda shubu icbon tantiapadic? Padenquio. Tantiaquidënquien: Ampe choshon cuna bedtsiash, queshun atona bëdambuen isquin ampemenquio ictsiash. 44Adquiecbidi Matsesën Tishaid yec ampe choacbimbuec chosho: Umbibi tantienquio icchitomane, queshun chieshtoenquio icquin ubi tantiaquin cainta, quepondash Esus.

Iua chieshtoenquiocquidbëta iua chieshtoquid chiaid

(Duc. 12.41-48)

45Adshumbic abi cainte Esusën naden chuiuapondash. ¿Icbon chiac Mitsi padquid iuan abipadquid utsibo bëdambuen namepec? Adquid chuinu. Tantia. Pete tambanquin musucshun umbi namiaid utsitedi bëdambuen menebanta, quequin ambi namiaid utsi abentsëc chianec icbo nidec. 46Adec nidashic aton icbo chouashun ambi chiacpadombuen ambi namiaidën nacsho istuidshun: Bëdambo iquec, caindac. 47Umbi namiaid utsibon chuiquid icta. Adquid icquin cunatedi dayun uaquin isquid icta, quequin icbon chiendac. 48Adquid icnubi adombuen naisa icbo utsin namiaid icpec. Aton icbo baded choenquio icsho issun 49aton icbon namiaid icquimbi abëta iuaid utsibo chieshënquin cuesbanshun nua peshun tantiadennuen acte paë uaid acquidobëtan nua acpec. 50Aden nabanec: ¿Nëbida cun icbo chopeba? quequin tantienquio icnubien aton icbo chopec. 51Adec choshon ambi chiacpadombuen nainquio icsho istuidshun: Icsambo iquec, queshun cumapenquien cuidendac. Adombuembidi Nuquin Papan icsambuen naquido cuidendac. Bëdambo icquid danmianquido cuidacno matses mëyadtequid yacno nidmendac. Adoac natiaquiec shëta chëquëdëshquec shubiquiendac, quequin Esusën chuipondash.

Currently Selected:

Mateo 24: mcfNT

Highlight

Copy