Mateo 19

X. ESUSËN NABANAID UTSI DADPEN CHIAID

(19.1—23.39)

Aton chidobëd cuëshëdte Esusën chiaid

(Madc. 10.1-12; Duc. 16.18)

1Aden chuibanquin nainanec nidaid cuëshë Cadidea yacnouësh puduanec nidec nidaid cuëshë utsi Udean nidquin acte Odan potebidanec Esus uëshë choacmi nidpondash. 2Adec nidshobien matses dadpenshun tsibanampondash. Abi tsibananquido utsi utsiec nënquidobëd daicsaido icsho issun Esusën bëdanmebampondash.

3Adnubien Esus yacno choshon padiseobon Esus chieshënquin: Nuquin Papan Chiaid icsambuen chuimenu, queshun Esus naden chuituidpondash: Aton bënën aton chido icsambuen nabi icshobi ambembi chuiquin dada uashun cuenmiac ¿ada bëdambo icpatsiash? capondash.#19.3 Aden isadaidbon dadauate iste bunquin M.I.Ch. 24.1 ista.

4Adoaquien Esusën: ¿Nuquin Papan Chiaid isamboda ictio? Nuquin Papan tauaquin dada abentsëc uashumbic chido abentsëcbidi uapampic, quequin dada uampid ma mimbi ispaboc.#19.4 Ene. 1.27bëta Ene. 5.2 tantiaquin nëid chuipanëdash Esusën. 5Aden Nuquin Papan Chiampid icnuc aton chido bednuen dadan aton papabëta aton tita nianquin aton chido bedash aidbëd iquequi matses abentsëc icbuedi daëdash abentsëc yacbimbuec iquendac.#19.5 Ene. 2.24 tantiaquin nëid dada uapanëdash. 6Aden Nuquin Papan dada aton chido bedmequin daëd uaquin abentsëc yacbimbuecnuc icmiaid yec cuëshëdec ma niannanenquio icpanuna, quepondash Esus. 7Adsho tantiashien padiseobo: ¿Abimboda mimbi cape? Nuquin Papan Chiaid dada uaquin ¿atotsi queshun Moisesën naden chuipampic? Aton chido bunenquio yanshun dadan naden dada uashun menequid. Mibëd ictiapimbo yanobi, quequin dada uashun aton chidobi menequin cuenmequid, quequin Moisesën dada uampid ma icpayoc, quequin chuipondash.#19.7 M.I.Ch. 24.1-4 tantiaquin nëid chuipanëdash Esusën.

8Adsho tantiashun Esusën naden chuipondash: Ai, min tsusedpabobëd mibitedi Nuquin Papan chiacpadec aton chidobëd bëdambuec tabadenquio yec icsambuec tabadsho issun Nuquin Papan Moises aden chuiquin dada uamepampic. Tauambuen matses uaquin Nuquin Papan aden chiambo icpampic. 9Tantia. Chuinu. Aton chido dada utsi chudmesa icshobi aid cuenmequimbi chido utsi bedquin Nuquin Papan Chiaid niaquec icsaindac, quepondash Esus.

10Adshobien abëd icquidon: Adotiapimbo icte mimbi chuipec. Aton chido nianenquio icte mimbi chuisho tantiashun: Dadan aton chido bedenquio yac bëdambo ictsiash, caimbi, capondash. 11Adsho tantiashun Esusën: Ai, utsin utsinquien umbi aden chiaid tantiatiapimbo iquec. Nuquin Papan tantiamiaidënuidtsëqui aden chiaid tantiendac. 12Nadquidtedi chido bedesa nec. Nëidic aton padibi impadishtsaid. Nëidic matsesën inicsa uaid. Nëidic: Nuquin Papan namiaid icquin aidën chiacpadombuenuidi naquin chido bedtiapimbo iquebi, queshun chido bedesa. Adquidtedi chido bedesa nec. Umbi chuisho tantiaquidën ma bëdambuen tantiapanuna, quepondash Esus.

Esusën bacuëbo chiaid

(Madc. 10.13-16; Duc. 18.15-17)

13Adnubien Esus ismenuen bacuëbo bëbëpondash. Mamishquin ma Nuquin Papa Esusën chuinu, quequin bëbësho issumbimbi abëd icquidobëtan: Padi. Nëmbo bëbëenda, capondac. 14Adshobien Esusën: Padi. Ma bacuëbo ubi yacno bënu. Cuenmenda. Nëid bacuëbo amën chuisho tantiash badedi: Abimbo caic, quiacbimbuen ubi tantiaquid Nuquin Papan namiacno puduedtequido nendac. Bacuëbo bëdambo iqueque. Bec cho, cac bëbëpondash. 15Adshobien bacuëbo mamishbanquin Nuquin Papa chuipondash. Adobidanec Esus nidpondash.

Cania atona dadpenquio dayun uaquid Esusbëd onquiaid

(Madc. 10.17-31; Duc. 18.18-30)

16Adnubien dada canianquio Esus naden chuituidpondash: Chuibanquin tantiamequidquio mibi neque. En ubi chui. Nuquin Papa yacno ënëdenquio yec bëdambuec tabadnuen ¿atotsimbi nape? capondash. 17Adoaquien Esusën: ¿Mitsipadquid bëdambocquid cai? Nuquin Papa abentsëcquiobi bëdambocquid nec. Aidbëd ënëdenquio yec tabadnuen Ambi Chiaid Moises dada uamiampidtedi nata, capondash.#19.17 D.N.Ch. 18.5 tantiaquin aden chuipanëdash Esusën. 18Adoaquien cania: Nuquin Papan Chiaid ¿Mitsi padquid cai? quesho tantiashumbien Esusën: Naden chiaid caimbi. Cuessunnenda. Dadan utsin chido chudenda. Chidon utsin bënë chudmenda. Ampenda. Cuidmenuen utsi mua uainda.#19.18 Buan. 20.12-16bëta M.I.Ch. 5.16-20 tantiaquin nëid dada uapanëdash. 19Titabëta papa chieshënenquio icquin bëdambuen tantiata. Adembidi mibibi min dada datantiadacbimbuen utsibotsen tantiaquiota, quequin chiaid caimbi, capondash Esusën.#19.19 D.N.Ch. 19.18 tantiaquin nëid chuipanëdash Esusën. 20Adoaquien canian: Aidtedi niaquenquio icquin bacuë icquimbi bedanquin ënenquio icquin nabanquidquio nebi. Nuquin Papabëd tabadnuen ¿atotsimbi utsi nape? capondash.

21Adsho tantiashumbien Esusën: Nuquin Papan Chiaid nabanquidquio yec bëdamboshë icquid icte bunquin mimbi dayun uaidtedi uesquin menequin piucquid bedta. Aden bedshumbic piucquid nibëdquido mitsana uesquin menebanta. Adosho issun abëd tabadmenuen Nuquin Papan mibi bëdambuen istsiashe. Adota. Adotanec ubëd iquec cho, capondash. 22Adoaquien cania: Cuna dadpenquio icquid uesquin menetiapimbo iquebi, quiash uënësquio icquin Esusën chiacpadombuen natiapimbo yec nidpondash.

23Adsho issun Esusën abëd icquido naden chuipondash: Tantia. Abimbo chuinu. Atona dadpen dayun uaquid atonauidtsëqui tantiec Nuquin Papan namiacno puduedtiapimbo iquendac.#19.23 Nëid chiacbimbuen chiaid Sadomonën Bëdambuen Tantiaid B.T.Ch. 11.28 iqueque. Aid ista. 24¿Ada nëish tapa camecho caid pinchuc chicte shëcuë nasiadpatsiash? Padenquio. Adecbidi atona dadpenquio dayun uaquid atonauidtsëqui tantiec Nuquin Papan namiacno puduedtiapimbo iquendac, quequin Esusën chuipondash.

25Aden chuibansho tantiashien tantiadempambo yec tabadec abëd icquido nadpondash: ¿Tsudain Nuquin Papa yacno puduedtequid icpec? quesho tantiashumbien 26Esusën ubitedi bëisquin naden chuipondash: Matsesën natiapimbo ictequid icnuc Nuquin Papain namianquidquio nec. Ambi natiapimbo ictequid nibëdec, quepondash.

27Adsho tantiashumbien Petedon: Mimbi: Nuquibi icnu. Cho, cac ubitedishumbi cuna abitedi nianec mibëd icnuec chopondabi. ¿Atotsi bëdambocquid ubitedi menepatsiash? capondash. 28Adoaquien Esusën: Tantia. Mibi abimbo chuinu. Nuquin Papan ambi uaid abitedi chuca uacnouëshquio Matsesën Tishaid yequi chuiquid tapan tsadte dapa bëdamboshëcquidën tsadquin umbi abitedi namiacnouëshquio ubëd icquido icsho issun Nuquin Papan mibitedi matses namequid icmendac. Abuc tsadte dapa 12ted icquidën tsadquin mibitedishun namendac. Nuquin tsusedpa Acobon mado 12tedi icpampic. Aidtedshun tsiuecquidon tsiuecquidonquien isadaidbo chuiquid tapabo 12tedquiobidi mibitedi iquendac. 29Utsibontsen ubi tantiaquiendac. Aden tantiaquin aton shubu nianquinc abëta tishaid aton utsibo nianquinc aton tita nianquinc aton papa nianquinc aton bacuëbo nianquinc aton tied nianquinc cain ubi tantiaquin umbi chiacpadombuen naquid iquendac. Adoquid icsho ambi nianaidtedi dëniacquin dadpenquioshë Nuquin Papan icmeshunendac. Adembidi abëdi ënëdenquio yec tabadtequid icmendac. 30Adshumbic: Utsitsen mibitedi chuinu. Nidaidënuësh chuiquid tapa icbuedi Nuquin Papa yacnouësh utsi utsiec chuiquidpenquio iquendac. Adecbidi utsi utsiec nidaidënuësh chuiquidpenquio icbuedi Nuquin Papa yacnouësh chuiquid tapa iquendac, quepondash Esus.

Currently Selected:

Mateo 19: mcfNT

Highlight

Copy