Mateo 20

Utsi chiacbimbuen chonoadquido chiaid

1Adshumbic ubitedi Esusën utsi chiacbimbuen naden chuiuapondash: Tantia. Ubi tantiaquido Nuquin Papan namete mibi chuinu. Badiadnubi tied icbo nidquin piucquid menequin aton tied neshcamenuen matses istuidnuec nidposh. 2Istuidshumbic: Badiadnuc bedanquin inchëshbudtsëqui mimbi ënacsho badiad abentsëc meneteted mibi piucquid menenu. Chonoadec nidta, cac: Ai, quiash chonoadec chochoposh. 3Uëshë abuctoec 9 yannuc tied icbon matses tabadte yacno nidshun utsibo chonoadenquio yec tabadsho istuidposh. 4Adoshombic aidotsen chuiquin: Cun tied neshcaic nidta. Mibi bëdambo icmenuen piucquid menenu, cac tied neshcaic nidposh. 5Uëshë cuembo icnubi tied icbo padpidec niduashun utsibotsen istuidshun adembidi chiac tied neshcaic nidposh. Uëshë budec 3 icnuc padpiden utsibotsen istuidshun chiac tied neshcaic nidposh. 6Uëshë budtsec 5 icnuc niduaquin utsibotsen chonoadenquio yec tabadsho istuiduashun: ¿Atotsi quiash chonoadenquio ique? caquien 7tabadquido: Chonouanquid nibëdec, quesho tantiashun tied icbon: Mibitsen cun tied neshcaic nidta. Mibi piucquid menenu, cac tied neshcaic nidanneuaposh.

8Inchëshbudtsëqui tied icbon ambi: Chonoadquido isquid icta, caid naden chuiposh: Chonoadquido chomeshun piucquid menebanta. Tsiuec chobuedba menequin uëshë budtsëcnuc 3 icnuc chobuedo meneta. Adoshombic uëshë cuembo icnuc chobuedotsen. Adoshombic uëshë 9 icnuc chobuedotsen. Adoshombic badiadnubi abia chobuedo ënquimbi meneta, cac menequin tauaposh. 9Uëshë budec 5 icnuc chonoadec chobuedoba menequin badiadnuc bedanec chonoadacbimbuecnuc tied icbon: Aidtedquio menenu, cac aidted piucquid menebamposh.

10Aden menebansho isashien badiadnubi chobuedo: Aido aden meneshun nuqui iuec chonoadbued icsho iuapambo nuqui menec, queshobi aidtedtsëcbidi piucquid meneposh. 11Aidtedtsëcbidi meniaquien tied icbo naden chushcaposh: 12Tsiuec choash chonoadbued meniactedtsëcbidi menioshi. Icsambo iquec. Inchëshbudtsëqui chotanec aniactsëc chonoadtsëcbued meniactiontsëcbidi iuec chonoadbuedi piucquid daëdpactsëc menianec icsambo iquec. Chun mëyadec iuecquio chonoadbuedi aidtedtsëc meniansho isac mibi chieshanquiec iquec. Ubi dadpen meniac bëdambo ictsiash, quequin chushcaposh.

13Adoaquien tied icbon: ¿Chieshanquiectabi ique? Umbi: Nëidted piucquid mibi menenu. Chonoadec nidta, cac ma mibi: Ai, quepaboc. Mambi aidtedquiobi mibi menepaboc. 14Mimbi bedbued buanec nid. Ubi bunacpaden tsiuec choash chonoadquido mibi meniactedquiobidi meniombi. ¿Icsamboda iquec? 15Icbon ambi tantiacpadombuen atona dadpen meniac ¿ada aid icsambo icpec? ¿Utsibotsen menesho issunda mimbi ubi nëishëmpe? Aden nëishënac ¿ada bëdambo iquec? quequin tied icbon chuiposh, quequin utsi chiacbimbuen Esusën chuipondash. 16Adashic abi onquec: Adombuembidi abi yacnoshon ambi tantiacpadombuen Nuquin Papan naindac. Nidaidënuësh chuiquidpenquio icbuedi Nuquin Papa yacnouësh utsi utsiec chuiquid iquendac. Adecbidi utsi utsiec nidaidënuësh chuiquid icbuedi Nuquin Papa yacnouësh chuiquidpenquio iquendac, quepondash Esus.

Abi uënës uate Esusën padpiden chuiuaid

(Madc. 10.32-34; Duc. 18.31-34)

17Adec Edusaden yacno nidquimbi abëd icquido yec ubitedi 12ted icsho chuinuen Esusën uannotantsëc buampondashi. 18Buanshun naden chuipondashi: Nëbi Edusaden yacno nidnunid. Ashunquio Matsesën Tishaid icsho ubi chieshënquidon ubi bedmendac. Nëish iua pichicaquidon chuiquidobëtan Moisesën chiampid tantiamequidon ubi bedshun: Ma uënës uamenu, queshun 19matses utsibo isadaidpembo ubi menendac. Aden meniac aidon mamënshunquin ubi cueshcanten cumapenen cacuesendac. Adshumbic ubi uënës uanuen cueste napotiaidën dectanendac. Aden uënës uaqui daëdec ushash uincuenendac, quequin Esusën abi uënës uate padpiden chuiuapondash.

Uambëtan Santiacon titan Esus chiaid

(Madc. 10.35-45)

20Adnubien Sebedeon chido Uanën titan Esus chuituidpondash. Aton mado Uambëta Santiaco bëshun ismequin dannëshën sebudtanquin naden chuipondash: ¿Ada umbi chiacpaden ubi nashuntsia? Icbo, caquien: 21¿Atotsi bunec ne? capondash Esusën. Adoaquien: Nëid cun mado daëdi nec. Abitedishun icbo yanquin mibëtan chuiquid tapa cun mado abidaëdi icmeta. Aden chuiquid tapa icmeshun min dayunquio tsadmeta. Abiuc utsi tsadunquin copioc utsi tsadunta, capondash. 22Adoaquien: Umbi naid tantienquio icquin mimbi chuipec, quequin Uanën tita chuitanquin Uambëta Santiaco Esusën chuipondash: ¿Ada ubi mëyadacpadquiecbidi mëyadtsia? ¿Ada ubi uënësacpadec uënëstsia? ¿Ada chieshtoenquio ictsia? caquien abidaëdi: Ai, chieshtoenquio ictsiabi. Mibëd mëyadtsiabi, quepondash.

23Adsho tantiashien: Ai, ubi tantiaquid yec mibi mëyadquiendac. Padnuembi umbimbo mibi chuiquid tapa icmequin mibi ubi datsadmetiapimbo iquec. Cun Pambien ambi tantiacpadombuen ubëtan chuiquid tapa icmendac, quequin Esusën chuipondash.

24Aden chuisho tantiashumbimbi ubitedi 10tedshun Uambëta Santiaco nëishëmpondac. 25Adsho issun Esusën ubitedi naden chuipondash: ¿Mitsipadquid isadaidpembon chuiquid tapa icpec? Aton chuiquid tapan badedbadedquien ancabudac dacuëdquin aton iuabon badedi naic, quequin mibitedishun tantiec. 26Ubi tantiaquido icquin mibitedishun adoenquio ictsiac. Bëdambo mibi iquec, Nuquin Papa camete bunquin utsibo tantiaquin nashunquidquio icta. 27Mibitedi chuiquid tapa icte bunquin iuan aton icbo nashunacbimbuen utsibo nashunta. 28Adecbidi Matsesën Tishaid icsho mabi matsesën nashunnu, quecpenquio chondabi. Adenquio icquin matses nashunquin Nuquin Papa icsambuen naquidobi cuidmenquio icnuec ubided cuidadec uënësendabi, quequin Esusën ubitedi chuipondash.#20.28 Isa. 52.13—53.12 tantiaquin Esusën aden chuichitanëdash.

Dada bëshuaid daëd Esusën bëdanmiaid

(Madc. 10.46-52; Duc. 18.35-43)

29Adashic shubu dadpen icquid Edico yacno tabadanec auëshquiobi puduanec abëd icquidobëd Esus nidpondash. Adsho isanec nidquin matses dadpenshun Esus tsibanampondash. 30Adnubien aid podquied cuëman bëshuaid dada daëd tsadquid: Esus cuenec, quesho tantiashien aid daëdi cumapenec cuëdec: Tsusedpa Dabidën Mado caid icquin ubi daëdi bëdambuen isquin nashunta, Icbo, quepondash Esus caic.#20.30 Nuquin Papan Chomiaid Quidistu nec, quequin Dabidën Mado capanëdash.

31Adsho tantiashun matses dadpenshun naden chushcapondash: Padi. Aden cuënenda. Aden cuënsho tantiac chieshanquiec mibi iqueque. Otacquio tabad, caquien abi niacbidanec buëdanquiec: Tsusedpa Dabidën Mado caid icquin ubi bëdambuen isquin nashunta, Icbo, cauapondash.

32Adoaquien Esusën nidtuidshun ëcbedpondash: ¿Atotsimbi mibi daëdi nashune? caquien: 33Isbente bunebique. Cun ëshë bëdameta, Icbo, capondash. 34Adsho tantiashun aid daëd uënësquio icquin bëdambuen isquin Esusën bëshuaid daëdi bëmishnubi badedquio bëdanquin isbempondash. Adshun abidaëdshumbi Esus nidsho tsibanampondash.

Currently Selected:

Mateo 20: mcfNT

Highlight

Copy