Mateo 21

Edusaden yacnoshon chuiquid tapa ismiacbimbuen Esus bëdambuen ismiaid

(Madc. 11.1-11; Duc. 19.28-40; Uan 12.12-19)

1Adanec nidequi shubu dadpen icquid Edusaden anoentsëqui macuësh tapa Odibos yacno shubu daëdpactsëcquid Bedpaque yacno Esus nidpondash. Adshumbic anoentsëqui choshon abëd icquido daëd nidmenun naden chuipondash: 2Nëid podquiedën nidec shubu daëdpactsëcquid yacno nidshun cabachubitsecquid pabiate ënapen icquid chido aton bacuë caniactsëcbëta nëshac tsadsho mimbi istuidendac. Istuidshun bucun nëshaid chicshun abidaëdi bëta. 3Mimbi bucun nëshaid chicsho isquid: ¿Atotsi canun aid chicquin nai? quesho tantiashun: Cun Icbon: Bedtan, cac naimbi. Nëbi bëuaindambi, quequin chiac: Ai, buantan, quendac, quequin Esusën chuipondash. 4Esusën nate Ambi Chiaid Nuquin Papan ambi oncamiaid dada uamiampicpadombuen nanuen Esusën adopondash. Naden chuiquin dada uapampic:

5Shubu dadpen icquid Sion caidën tabadquido chui.#21.5 Edusaden cashumbic Sion capec.

Min chuiquid tapa cabachubitsecquid iuëmbocquid buanmetequidën bacuë caniactsëc catsadec choeque. Is.

Ancanenquio yec bëdamboshë icquidquio neque. Is, quequin chui,#21.5 Sac. 9.9 tantiaquin nëid dada uapanëdash.

quequin dada uapampic. 6Aden abëd icquidon Esusën: Bedtan, cac bedtampondash.

7Bedtanquin cabachubitsecquid anibëta bëacshobi caniactsëc aton dashcute bëntsecquid abi dasiuidaid chictanquin capucpondash. Adoaidën Esus catsadtopondash.

8Adanec nidsho istanquin matses dadpenshun aton dashcute abi dasiuidaid bëntsecquid chictanquin Esus nidte podqued ansambampondash. Adembidi tantiaquin utsibontsen budëd podobiecquid tebededshun podquied ansambededuapondash: Chuiquid tapa Esus nec, queshun. 9Matses dadpen bëyuc nidnubi aidtedbidi tsiuec chochopondash. Adec nidannec abitedi nadec cuëdënnidpondash:

Adeduya. Cun tsusedpa Dabidën Mado#21.9 Dabidën Mado quequin Nuquin Papan Chomiaid Quidistu quequin tantiapampic. yec mibi bëdamboshë iquec.

Mibi chomequid Nuquin Papatsen abitedishun icbo bëdamboshë iquec. Adeduya,

quec cuëdëncuededpondash.

10Adec Edusaden yacno matses dadpenquio cuëdëncuededec chochosho isashien Edusaden yacnocquido: ¿Tsutsi tantiec cuëdëncuededpec? quecuededpanëdash. 11Adsho tantiaquidon: Esusquio tantiec nec. Nuquin nidaid cuëshë Cadidea caidën shubu dadpen icquid Nasaded yacnouësh caniondaid Nuquin Papan oncamiaid Esus tantiec nec, capondash.

Esusën Nuquin Papa tabadte shubu dapa yacnoshon cuenmiaid

(Madc. 11.15-19; Duc. 19.45-48; Uan 2.13-22)

12Edusaden yacno choash Nuquin Papa tabadte shubu dapa umanuc daquënë uaquin tsicatiaidën Esus puduedpondash. Adec puduedquin isaquien piucquid bedquin sandoaid tabëcte dadpen icnubi piucquid menequin aid bedquido icuapondash. Adecbidi nidaid utsi yacnouësh choquidën piucquid bedshunquin Edusaden yacnocquidon piucquid meneuaquido icpondash. Adsho istanquin tabëcte bidiacbanquimbic piucquid bednun oshpodcobiecquid chedo menebanquidën tsadtetsen bëcunneshumbanquin icbotedi umanuc cuenmequin niacumpondash. 13Adshumbic naden chuipondash: Nuquin Papan chuiquin dada uamiampid nad iquec:

Ubi tabadte shubu dapa ubi chiannec tabadte nec,

quequin chiampid icnubi adoenquio icquin mitsanauidi bedte bunquin ampec tabadte mibitedishun icmiaque. Baded niecun, capondash.#21.13 Isa. 56.7 tantiaquin nëid chuipanëdash Esusën. Ede. 7.11.

14Adoambien Nuquin Papa tabadte shubu dapa yacno bëshuaido yec tidinquequido yec quenuc bëbëpondash. Aden bëbëacsho issumbien Esusën aidotedi bëdanmebampondash.

15Adosho isashien Esus chieshënquido Nuquin Papa ismequin nëish iua cuessunneshun pichicaquidon chuiquidobëd Moisesën chiampid tantiamequido nëishpondash. Adnubien bacuëbo: Nuquin tsusedpa Dabidën Mado caid yec mibi bëdamboshë iquec, quec Esus caic cuëdënsho tantiash bëdiactsëc nëishbuedi nëishquiopanëdash. 16Adshumbic: Icsambo iquec, queshun Esus chuituidec: ¿Ada bacuëbo cuëdënsho tantie? caquien: Ai, tantiembi. ¿Nuquin Papan Chiampid isamboda ictio? Adec bacuëbo cuëdënte naden chuipampic:

Nuquin Papan oncamiac bacuë shuma chishquidon aton bacuë utsibobëtan:

Nuquin Papa bëdambo iquec, cabededendac,

quequin chuipampic, quepondash Esus.#21.16 Cuëd. 8.3 tantiaquin nëid dada uapanëdash. 17Adanec Edusaden yacnouësh nidec shubu dadpen icquid Betania yacno nidash ushtuidpondash.

Esusën cute icueda uënës uaid

(Madc. 11.12-14, 20-26)

18Badiadnubi aucbidi Edusaden yacnobidi niduaic Esus bundopondash. 19Adec bundoshon podquied cuëman nidquid cutempi icueda caid istuidash: ¿Ada bacuë iqueque? Chenun isbono, quepondash Esus. Adshun isac podouidquio yec bacuë nibëdsho issumbien Esusën: Adequi bacuëesa yec uënësta, capondash. Adoac bidiquec badedquio uënëspondash.

20Adec uënësso istanec abëd icquido tantiadempambo yec tabadquin: ¿Atotsi quiash badedquio bidiquec uënësposh? capondambi. 21Adoaquien Esusën: Tantia. Mibitedi chuinu. Adembidi mimbi natsiac. Nuquin Papan umbi chiaid nainquien icchitec, quenquio icquin: Nuquin Papa nadatiambocquin nabanquidquio nec, quequin tantiaquin Abi chiannesho Aidëmbi mimbi: Natiapimbo ictequid nec, caidi mibi nametsiash. Adoac umbi cute icueda uënës uabocpadombuembidi tantiaquin mimbi nëid macuësh cain: Mananuc icbuedi adquiecbidi acte nantan icuata, mimbi cac nëid macuësh acte nantan icuatsiash. 22Nadatiambocquin naquidquio Nuquin Papa nec, quequin abimbo tantiaquin Abi chiannesho mimbi chiacpadombuen Nuquin Papan mibi nashuntsiash, quequin Esusën ubitedi chuipondash.

¿Tsuntsin namiac nai? quequin Esus chuimiaid

(Madc. 11.27-33; Duc. 20.1-8)

23Adcuidanec Edusaden yacno padpidec nidshun Nuquin Papa tabadte shubu dapa daquënë uaidën puduedshun Esusën Nuquin Papan Chiaid chuibampondash. Adsho tantiashun cun matses tsësiobobëtan Nuquin Papa ismequin nëish iua cuessunneshun pichicaquidon chuiquidon Esus icsambuen chuimenuen chuituidpondash ¿Tsuntsin: Chuibanta, cac chuibanquin nai? capondash. 24Adoaquien Esusën: En mimbia chui. Umbia tantianu. Mimbi chuisho tantiashun ubi namequidtsen mibi chiembi, capondash. 25¿Tsuntsin namiac Uan padon acten mentopadennec? ¿Ambembida napadennec? ¿Nuquin Papan namiacta napadennec? capondash Esusën.

Adoaquien badedquio chienquio yec uannotantsëc tabadec onquecuededpondash Esus chieshënquido. ¿Atotsi nuqui chiendac? Nuquin Papan namiaidquio Uan pado nepadennec, cac Esusën: ¿Atotsi queshun aidën chiacpadombuen nainquio icconda? canushe. Aden chienquien ictiad. 26Matsesën: Nata, caid Uan pado nepadennec, nuqui quesho tantiash nëmbo icquidon: Nuquin Papan oncamiaid Uan pado nepadennec, quequin tantiec nëishtanquin nuqui cuesnushe, quiash dacuëdec: Aden chienquien ictiad, quepanëdash Esus chieshënquido. 27Adshumbien Esus padpiden chiec: Tsaudi. ¿Tsundan namiaquien nachitondash? queshobien: Mimbi chienquio yacpadembidi umbitsen ubi namequid chienquio iquembi, capondash Esusën.

Esusën utsi chiacbimbuen dada aton mado daëd icquid chiaid

28Adshumbic Esusën utsi chiacbimbuen padpiden chuipondash: Tantia. Mibitedi chuinu. Umbi chiaid tantiashun ¿mitsicquid: Bëdambo iquec, catsia? Dada aton mado daëdpambo icquid icposh. Abentsëc chuiquin: Neshcaic nid, mado, caquien: 29Padi, quec chieshbuedi iuec iuecpactsëctanec: Tiedimbi neshcatanchitec, quiash neshcaic nidposh.

30Adshumbic amën aton mado utsi chuiquin: Neshcaic nid, mado, cac badedi: Ai, adonona, quebuedi neshcaic nidenquio icposh. 31¿Mitsicquidën aton papan chiacpadombuen naoshe? En chui. Tantianu, caquien Esus chieshënquido: Abia chiac chieshuidbuedën, quesho tantiashumbien Esusën: Adquidpenquien mibitedi nec. Mibitedi tantiatiapimbo yec tabadnubi mimbi: Icsambo iquec, caido Nuquin Papa yacno puduedendac. Chieshuidacbimbuecquid aido nec. Aton matses piucquid bedshundednedo yec piucquid bedec chudadquid chidobo yec quec icbuedi Nuquin Papa tantiabenash aidbëd tabadtequido yanendac. Mibitedien padenquio iquendac. 32Uan acten mentoandennedën Nuquin Papan Chiaid chuiquin bëdambuec tabadte chuipadennec. Adsho mibitedishun tantienquio icnubi mimbi: Icsambocquido nec, caidombi Nuquin Papa tantiabempanëdash. Adsho issun Uan padon chiacpadombuen mimbi icsambuen naid ëntiadquidi mimbi ënenquio iccondac. Aton papan chiaid niacquidbimbuecquid mibitedi nec, capondash Esusën abi chieshënquido chuiquin.

Utsi chiacbimbuen neshcashunquidon icsambuen naid chiaid

(Madc. 12.1-12; Duc. 20.9-19)

33Adshumbic Esusën: Utsi chiacbimbuen naden chuipondash: Tied Icbon aton tiedën ubauidquio nitsinshun tsicatequin daquënë uashumbic iuecshun sinacsho bedshun ma chinnu, quequin chintequidtsen nacnemposh. Aden nacnenshumbic: Uba ampenushe, queshun isec tsadte shubumpi abucquidtsen shubu uaposh. Aden aid shubu uashic: Nidnu, quequin abi nashunquidotedi chuiquin: Uba dadpen bednun ubi neshcashunquin ista, quequin chianec icbo nidposh. 34Adash iuectanneshumbien abëd nidondaido aton iuabo chuiquin: Nëen uba sinashe. Cuna cuëstan, cac aton iuabo nidanneposh. 35Adec aton icbon tiedno nidanniacshobien neshcashunquidon cudasënquin chieshëmposh. Abentsëc cuestanquimbic utsi cuessunnetanquimbic utsi cuënoten seseposh. 36Aden cuenmiac choshon icbo chuituidaquien ambi bëyuc nidmebuedtedpenquio aton iua utsibo uditsëc dadpenquio chuiuaquin: Cuna uba cuëstan, quequin nidmiac tiedno chochoacsho issun adembidi mëyanquioposh.

37Adoacsho tantiatanquimbien aton madombotsen chuiquin: Bedtan, quequin nidmeposh. Ma cun mado bëdambuen isquin cuessunnenquio icquin umbi chetequid menenu, queshun aton madombotsen nidmeposh. 38Aden nidmiac ancuenquio chosho isash: Is. Tied icbon madombo choeque. Aton papa uënësan aton papa yacpadecbidi tied icbo yantsiashe, queshun tied icbo nuquimbo icnun aidi cuessunnenuna, queshun 39chosho bedtanquin tied tsitsuno tied icbon mado buanshun tied icbo neshcashunquidon cuessunneposh, quequin Esusën chuibampondash.

40Adshumbic ambi chuibuedquio abi datsidadquido chuimenuen naden chuipondash: Umbi chuibued tantiashun: Min mado cuessunniaccosh, cac ¿atotsi tied icbon aido napatsiash? ¿Mitsipaden mibitedishun tantie? capondash. 41Adoaquien: Aido icsamboshë icsho cumapenen cuidquin cuessun secametsiash. Adoshombic tied icbon: Ubi uba sinacsho dadpen meneta, quequin utsibotsen aton tied neshcametsiash, quecuededpondash abi datsidadquido.

42Adsho tantiashun Esusën: ¿Nuquin Papan Chiaid isbanamboda ictio? Naden chiampid ma mimbi isbanaid icpayoc:

Buintad bëdambocquid istuidash: Nëidquio shubu uaquin nitsinnun tenu, quetiadquidi isuidposh.

Aden buintad isuidaidi utsin teshun shubu uaquin aidba nitsinaid iquendac.#21.42 Nuquin Papan Chomiaid icshobi tantienquio yaid Esus nec, quequin chiampid nec. Ebedeo aton onqueten isadaidbon nëid dada uaquin buintad quenquio icquin aid matsesën shubu uate cuënote quepampic.

Adosho issun: Adombuenshenda Nuquin Papan napec, quiash nuqui cuishonquec: Bëdamboshë iquebi, quependac,

quequin dada uapampic.#21.42 Cuëd. 118.22-23 tantiaquin nëid dada uapanëdash. Chotaquën onqueten Cuëd. 118.22-23 isbanta. 43Aden ambi Chomiaid chieshënsho isash mibitedi caic Nuquin Papa nadpec: Umbi cun matses caid isadaidbo ubi bëdambuen tantiametiadquidi chuiquid tapabon namenquio icsho issun matses utsibo: Ubi chuibanquid icta, caindambi, quendac Nuquin Papa. Aden ambi tantiamiaidën bëdambuen chuibanac abi tantiaquido dadpen yanendac. 44Padnuen abi tantiesabo icsho Nuquin Papan cute uebudquin cuesac canite uesadec podquëd podquëdacbimbuecnuc cumapenen cuidtequido nendac, quepondash Esus.

45Aden utsi chiacbimbuen chuibansho tantiashun padiseobobëtan nëish iua cuessunneshun pichicaquidon chuiquidon: Nuquibien cachitec, quequin tantiapanëdash. 46Adshun Esus bedtiadquio icquimbi bedenquio icpondash. Abi datsidadquidon: Nuquin Papan oncamiaidquiobi Esus bedec, queshun Esus bedsho cuessunnenushe, queshun aton matses dacuëdënquin bedenquio icpondash.

Currently Selected:

Mateo 21: mcfNT

Highlight

Copy