Mateo 10

V. ABËD ICQUIDO: NADOMBUEN NATA, QUEQUIN CHUIBANAID

(10.1—11.1)

Esusën: Ubëd iquec cho, quequin 12tedi chiaid

(Madc. 3.13-19; Duc. 6.12-16)

1Adshumbic Esusën abëd icquido 12tedi chomeshun naden chuipondash: Umbi namiaid icquin umbi nabocpadombuembidi podobitsi icsa matses dapuduedaid icsho mimbi cuenmendac. Adembidi daicsaidobëta nënquidotedi mimbi bëdanmendac, quequin ubitedi chuipondash. 2Nëidtedi ambi: Ubi chuibenneta, caido icpondash. Nëidic Simon cashumbic Petedo cuënaid. Nëidic aton utsi Andedes. Nëidic Sebedeon mado Santiacobëd Uan. 3Nëidic Uedipe. Nëidic Badtodome. Nëidic Tomas. Nëidic ubibi Mateo Doma yacnocquidon chuiquidën chiacpadombuen cun matses piucquid bedshundenned. Nëidic Santiaco utsi Adpeon mado. Nëidic Tadeo cuënaid. 4Nëidic Simon utsi cananebo. Nëidic Udas Iscadiote Esus abi chieshënquido bedmetequid. Aidtedi abëd icquido icsho chuipondashi.

Abëd icquido nidmequin: Chuibennetan, Esusën caid

(Madc. 6.7-13; Duc. 9.1-6)

5Adshumbic nadembidi ubitedi chuipondash: Nëbi mibitedi nidmembique. Umbi chiacpadombuen chuibennenuec nidshun isadaidpembo chuibanenda. Aido yacno nidenda. Nidaid cuëshë Samadia yacnocquidon shubu datambidanec nidta. 6Nuquin matses isadaidbouidtsëqui chuibenneta. Aidon obeca bënnudshun podquied tantienquio yacbimbuen Nuquin Papambo tantienquio iqueque. 7Adec nidshun: Nuquin Papan namiacno tabadtequid nëbi iquec, quequin chuibenneta. 8Adembidi daicsaidobëta nënquido bëdanmequinc uënësaido uincuenmequinc dada daush daushpambo yec daicsaido bëdanmequinc podobitsi icsa dapuduedaid icsho dapuduenmequinc cabenneta. Adoshon: Piucquid bec cho, cainda. Umbi nabocpadombuembidi mibi namembique. Piucquid bec cho, cainquio icquin naombique. Mimbitsen adombuembidi nashumbanta. 9Aden chuibennec nidquin min piucquid buanenda. 10Adembidi pete sandoshon buanenda. Dashcute utsibëta tapucudte utsi sandoshon buanenda. Mibi uidënte cueste buanenda. Adec mëdadauidquio chosho issun mimbi chuibanaidon: Mibi bëdambo iqueque. Ubi yacno ushquin pec cho, mibi cac bëdambo ictsiash. Adembidi: Mitsana nibëdsho issun: Mibi menenu, cac bëdambo ictsiash.

11Aden chuibennec shubu daëdpactsëc icquid yacno adecbidi shubu dadpen icquid yacno nidshun matses bëdambocquid istuidta. Istuidshun: ¿Ada ubi min shubun ushmetsia? mimbi cac: Ai, quesho tantiash aidën shubun ushta. Auëshquio nidabi yec aidën shubunuidtsëqui ushta. 12Aidën shubun puduedshun: Mibi isnuec chobi, cata. Adoshombic: Nëid shubun icquido ma Nuquin Papan bëdambo icmepanuna, quequin aido bëdambuen ista. 13Adoac ambocquidon mibi bëdambuen isso Nuquin Papan bëdambo icmendac. Aidon mibi bëdambuen isenquiocshobic Nuquin Papan bëdambo icmenquio ictsiandac. 14Shubu dadpen icquid utsi yacno nidshun chuibanac tantiate bunesa icsho issun naden ismeta. Auëshquio puduanec nidnumbi: Nuquin Papa tantiesabo yec icsaquidombo icsho Nuquin Papan cuidtequidombo mibitedi nec, quequin ismec nidaid putu tabesqueta. 15Mimbi adosho issun abitedimbo cuidte uëshëmbi Nuquin Papan aido cumapenquien cuidendac. Ëndenquimbo shubu dadpen icquid Sodoma yacnocquidobëta Comoda yacnocquidotedi cuidquin Nuquin Papan uesquin uënës uapampic. Aid daëd yacnocquido bëdiactsëc cuidshun mimbi chuibansho tantienquio icquidoen cumapenquien cuidendac, quepondash Esus abëd icquido chiec.#10.15 Nuquin Papan Sodomabëta Comoda nibëdanmiaid iste bunquin Ene. 19.24-28 ista.

Esus tantiaquido chieshënquin mëyante chiaid

16Adshumbic padpiden chuiuaic: Nëbi mibitedi nidmembique. Umbi naid chuibenneta. Aden chuibennequido icsho utsin utsinquien mibitedi chieshënendac. Bëdi obeca iuaid pete bunacbimbuec chieshëmënquido dadpen iqueque. Aidobëd chieshënnanenda. Nisi isisquiec tsadacbimbuecquid icta. Adecbidi dëbimbimbuec bëdambocquid icta. 17Mibi chieshënquido iqueque. Tantechoquiota. Aidon mibi bedshun: Ma cuesmenu, queshun aton chuiquido yacno mibi buanendac. Adoac Nuquin Papan Chiaid chuibante shubu yacnoshon mibi cacuesmendac. 18Utsibombic adembidi cuesmenuen chuiquid tapa cobednadod yacno mibitedi buanendac. Adembidi chuiquid tapa utsi yacnotsen mibi buanendac. Ubi chuibanquidon chuiquid tapabëta isadaidpembo ma umbi naid chuibannu, ubi quenuc mibitedi aden buanendac. 19Adoac: Chuiquid tapa yacnoshon ¿Atotsimbi chuipeba? ¿Adambi bëdambuen chuibampeba? quec dacuëdec natienda. Chuiquid tapa mimbi bëisnubi Nuquin Papan ambi tantiacpadombuen mibi oncamendac. 20Mimbi tantiaid chienquiocsho Nuquin Papan Mayanën ambi tantiacpadombuen mibi oncamendac, quepondash Esus.

21Adshumbic padpiden chiec: Ubi chieshënquidon ubi tantiaquidotsen cumapenen chieshënendac. Esus tantiaquid nec, queshun aton buchimbi aton utsi cuessunnemendac. Amëmbi ambi tishmiaido cuessunnemendac. Aton bacuëbombi chieshënquin anibëta amë cuessunnemendac. 22Esus tantiaquid nec, queshun matses dadpenshun mibitedi chieshënendac. Adoaqui chieshtoenquio icquin ubi tantiasho Nuquin Papan abi yacno mibi tabadmendac. 23Shubu dadpen icquid yacno nidacsho natiamequin chieshënac shubu dadpen icquid utsi yacno cuenta. Amboshontsen umbi naid chuisho chieshënuac shubu dadpen icquid utsi yacnotsen cuenuata. Adecuidi cuendedneta. Nëid nidaid Isadaidën shubu dadpen icquid abitedi yacno nidabi icnubi nuquin matses isadaidbo abitedi chiabi icnubini Matsesën Tishaid yec chouaindac, quepondash Esus.

24Adoshombic abi chiec: Ambi tantiamiaidon abi tantiamequid dëniactiapimbo iquec. Adembidi aton iuabon aton icbo dëniactiapimbo iquec. 25Tantiamiac tantiabenash abi tantiamequidbimbuec icac bëdambo ictsiash. Adecbidi iua aton icbobimbuecbidi icac bëdambo icuatsiash. Aden umbi chiacpadombuen nate bunquid icsho mibitsen icsambuen chuishunquin chieshënendac. Ma podobitsi icsan icbo Bedsebu caid neyoc ¿cainquiodabi ictiosh? Adembidi mibitsen chieshënendac, quequin chuipondash Esusën ubitedi chuiquin.

Dacuëdenquio icquin chuibanta, quequin chiaid

(Duc. 12.2-7)

26Adshumbic padpiden chuiquin: Mibi chieshënquido dacuëdënenda. Utsibo ismenquio icquin ompodshon nabanaidtedi tantiadanendac. Adembidi utsibo tantiamenquio icquin nabanaidtedi chiadanendac. 27Nëbi inchëshën umbi mibitedictsëqui chuibued tantiaquin dacuëdenquio icquin badiadën utsibo chuibenneta. Umbi utsibo chiacmaid mibi chiac shubu cacho padapadapambo yacnoshon cuënacbimbuen chuibanquin tantiameta. 28Aden chuibennesho min dadauidtsëqui cuessunnetequid dacuëdënenda. Min mayan uënëstiapimbo icquid icsho nibëdametiapimbo iquec. Min dada uënësambi min mayan abi icsho cuidquin chian annëdënquiacno nësecanquidquio tantiata. Adquid Nuquin Papa icsho dacuëdënta.

29Piucquid tsasicquidëmpi abentsëc menequin uicchunëmpi daëd bedtequid iquequi abentsëc ambi tantiacpadequi nidaidën paëdec uënësso Nuquin Papan tantiaquiec. ¿Aid tantiaquid icquimbida Nuquin Papan mibitedi tantienquio icpec? 30Adembidi min manëdaid abitedimbo Nuquin Papan tambanaidquio nec. 31Aden min manëdaid tambanquid icquin uicchun bëdiactsëc tantiaquimbi mibitedi cumapenen tantiec, quequin chuipondash Esusën.

Esus cun Icbo nec, quequin utsibo chiaid

(Duc. 12.8-9)

32Adshumbic padpiden chuiuaic: Utsibon tantianubi: Esus tantiaquid nebi, quequin abimbo chuiquid icsho issun adombuembidi Nuquin Papa yacno chosho: Nëid ubi tantiaquid neque. Puduedmeta, Papa, quequin Nuquin Papambo chiendambi. 33Padnuen utsibon tantianubi: Esus tantiaquid nebi, quequin chuitiapimbo icquid Cun Papa abuc yacno chosho issun: Nëid ubi tantiesa neque. Puduedmenda, quequin Nuquin Papa chiendambi, quequin Esusën chuipondash.

Esusën abi tantiaquido aton matsesbëd cuëshëdte chiaid

(Duc. 12.51-53; 14.26-27)

34Adshumbic padpiden chuiquin: ¿Nidaidën icquidtedi matses bëdambuec tabadmenu, quectabi chodionda? Padenquio. Umbi chiaid tantiesabobëd ubi tantiaquidobi chushcananash cuëshëdtsiash, quequin tantiec chondabi. 35Amëbëd aton mado cuëshëdendac. Adecbidi anibëd aton champi cuëshëdendac. Adecbidi aton chayabëd aton babanën cuëshëdendac. 36Aden aton shubun icquidombi ubi tantiaquid icsho chieshënendac, quequin tantiaquin Esusën aden chuipanëdash.#10.36 Miqueas 7.6 isbanta.

37Padnubic aton papa tantiaquinc aton tita tantiaquinc cain aidën chiacpadombuenuidtsëqui naquidën umbi chiacpadombuen natiapimbo ictsiash. Adembidi aton mado tantiaquinc aton champi tantiaquinc caquin aid bëdambo icmeteuidtsëqui bunquin umbi chiacpadombuen natiapimbo ictsiash. Adquido ubi tantiaquidpenquio nendac. 38Utsibon: Cuessunnenu, quequin chieshënac ubi tantiaquid icbuedëmbi chieshtoshon tantienquio yanshun umbi chiacpadombuen natiapimbo iquendac. Adquidotsen ubi tantiaquid ictiapimbo iquendac. 39Matses ambibi tantiaiduidi naic tabadquid uënësash Nuquin Papa yacno puduedtiapimbo iquendac. Padnuen ubi tantiaquin umbi chiacpadombuen nasho chieshënquin cuessunniacsho Nuquin Papan abi yacno tabadmendac, quequin Esusën chuipondash.

Nuquin Papan bëdamboshëcquid menete chiaid

(Madc. 9.41)

40Adshumbic Esusën ubitedi padpiden naden chuipondash: Mibi bëdambuen isquidën ubi bëdambuen isendac. Ubi bëdambuen isquidën ubi chomequidtsen bëdambuen isendac. 41Nuquin Papan oncamiaid yec aidën chiaid chuibennequid bëdambuen isquid icsho ambi oncamiaid meniacbimbuen Nuquin Papan bëdamboshëcquid menetequid iquendac. Adombuembidi bëdambuec tabadquid icsho bëdambuen nashunsho Nuquin Papan bëdambuen isquin bëdamboshëcquid menetequidtsen iquendac. 42Adembidi ubi tantiaquid acte bundoacsho acte acmequin nashunsho Nuquin Papan bëdambuen isquin bëdamboshëcquid menetequid iquendac, quequin Esusën chuipondash.

Currently Selected:

Mateo 10: mcfNT

Highlight

Copy