Mateo 9

Shëquëquenquio icquid Esusën bëdanmiaid

(Madc. 2.1-12; Duc. 5.17-26)

1Aden chanchu nëuebudniacnoshon: Nidec nid, cac nidannec chian budash cano antabëdtoshon chian potiash abi iccondacnobidi Capednaun yacno Esus chopanëdash. 2Adnubien utsibon dada shëquëquenquio icquid Esus ismenuen nënquid nandoten nandoshon bëpanëdash. Bësho issumbien Esusën: Ubi caic: Aidën bëdanmetsiash, queshun aidon bëosh, queshun naden daicsaid shëquëquenquiocquid chuipanëdash: Bëdambo yec cuishonqueta, mado. Mibi cuidtiapimbo yec mimbi icsambuen naid tantienquio yec bëshunobique, capanëdash Esusën.

3Adsho tantiash abi datsidadash tabadquid utsi utsiec Moisesën chiampid tantiamequido ambibi tantiec: ¿Adpecta matses icquid? Ma icsambuen Nuquin Papa chuishumpayoc, quepanëdash Esus caic.#9.3 Moisesën chiampid tantiamequido aden Esusën chuisho tantiash nëishpanëdash. Nuquin Papanuidtsëqui matsesën icsambuen naid tantienquio yec bëshunendac, quequin Esus matsesuidquio danec adec nëishpanëdash.

4Adec uannouësh onquesho ambibi tantiashumbien Esusën naden aido chuipanëdash: ¿Atotsi quequin mibitedishun aden icsambuen tantiape? 5Umbi: Mimbi icsambuen naidtedi tantienquio yec bëshunobi, quequin chuinuc ¿bëdantequidpenquioda nedic? Adecbidi mibi daicsaid icbuedi mibi bëdanoque. Nidtoash nidec nid, quequin umbi chuinuc ¿bëdantequidpenquiobidida neuadic? 6Istac. Mibi ismenu. Matsesën Tishaid iquequi nidaidënuësh Nuquin Papan namiaid yec icsambuen naidtedi tantienquio yec bëshunquid nec, quequin mabi tantianu, quetanquin dada shëquëquenquio icquid chuiquin: Nidtoshon mibi bëbued nandote chiadtoshon buanec min shubuno nidec nid, capanëdash Esusën. 7Adoac shëquëquenquio icquid bëdanec nidtoanec aton shubuno nidpanëdash. 8Adosho isash dacuëdtanequien: Adquidshenda icpec. Nuquin Papan namiaid icquimbien nachitec. Abi namequid Nuquin Papa bëdambo iquec, quecuededpanëdash isquido.

Ubëd iquec cho, quequin Esusën Mateo chiaid

(Madc. 2.13-17; Duc. 5.27-32)

9Adnubini cun matses piucquid bedshumbanec podquied cuëman shubumpi tsadquidën tsadpondac. Cun matses iuaquid nidaid Doma yacnocquidon chuiquid tapanquio: Umbi chiactedi piucquid bedshumbanta, cac niondabi. Ambo tsadshobini Esus choquin istuidquin: Nuquibi icnu. Cho, capondash. Adoac badedi tsibananec 10nidequi cun shubun abëd icquidobëta Esus iuedec puduedpondabi.

Adec puduedsho isashien ubipadquid piucquid bedshumënquidobëdi cun matsesën: Icsambo icquidombo nec, caido Esusbëtan penuec pudued puduedpondash. 11Adsho issumbien padiseobon Esusbëd icquido naden chuituidpondash: ¿Atotsi queshun piucquid bedshumënquidobëtan utsibon: Icsambo icquidombo nec, caidobëtan min chuiquidën pepec? capondash.

12Adsho tantiashumbien Esusën: ¿Nënenquio yec bëdambocquidta dauëchoquidën dauë menepadic? Padenquio. Nënquidien dauë menequid. 13Nuquin Papan naden chiampid tantiashun bëdambuen naic nid. Nuquin Papa bëdambuen ismequin nëish iuauidtsëqui pichicainquiocquin naden nata. Icsambuen naquido icsho issun uënësquio icquin bëdambuen ista, quequin chiampid tantiata. Ubien: Abibi mua uadec: Bëdambo icquid nebi, quequid chuinuecpenquio chondabi. Icsambuen naquidombo: Nuquin Papan Chiaid niacniaquec icsaquid nebi, quesho: Ubi tantiata, canuec chondabi, quepondash Esus.#9.13 Oseas 6.6 tantiaquin nëid dada uapanëdash.

Buna mëmunte tantiaquin Esus chiaid

(Madc. 2.18-22; Duc. 5.33-39)

14Adnubien Uan acten mentoanquidbëd icquidon choshon Esus naden chuituidpondash: Nuquin tsusedpabon nacpadombuen buna mëmunquido nebi. Adembidi naquido padiseobo nec. ¿Atotsi queshun mibëd icquidon adembidi nainquio icpec? caquien 15Esusën naden chuipondash: Aton chido bednun abi bednu quequidën abëd icquido pemec. Aden penu. Cho, cac chochoquin cuishonquequin isuidesa abëd icquido nec. Adbuedi iuecash chido inquid nibëdanan abëd icbuedon uënësquiocquin buna mëmunquin isuidpec. Adembidi ubi nibëdanan ubëd icquidon uënësquio icquin buna mëmunendac, quepondash Esus.

16Tantia. Mibi chuinu. Dashcute shëni canchedaid dashcute chucambocquid cuëshë bëtuscaisa matses nec. Shënin chucambocquid bëtuscaid panac shëcuë amëec cancheduaic. 17Adembidi nuquin matsesën uba chinaid chuca paë uaid nëish bitsi nacnenaid shënin cushtoac bitsi canchednuc chiuidec mëyadec. Adnushe, queshun nëish bitsi nacnenaid chucanquio cushtoac chiuidtiapimbo iquendac, quepondash Esus buna mëmunquido chiec.#9.16-17 Esusën naid bëdambuen tantianuen matsesën ambi tantiaid tantienquio yanquin utsi chuca tantiendac, quequin tantiamenuen aden chuipanëdash.

Champi uincuenmiaidbëta chido bëdanmiaid

(Madc. 5.21-43; Duc. 8.40-56)

18Aden Esusën chuibannubien isadaidbon chuiquid Esus yacno choequi dannëshën sebudshun naden chuipondash: Cun champi uënësoshe. Mishec cho. Mimbi mishac uincuentsiashe, capondash Esusën. 19Adoac Esus aidbëd nidsho isash abëd icquido nidpondash.

20-21Adnubien chido intac mëyanec seta 12ted matanmec bëdanenquio yec nacchoadquid Esusën cachoctsëqui choquin: Bëdamianquidën dashcute mishec bëdampatsiash icmane, queshun ismenquio icquin dashcute cuëma mishpanëdash. 22Adoac bidiadquin chido isquin Esusën naden chuipondash: Dacuëdenda. Mibi: Aidën bëdanmiac bëdanebi, quequin mimbi tantiacpadquiequi mibi bëdanoc, Esus quenubi bëdanquiopanëdash.

23Aid bëdanmebidanec nidequi chuiquidën shubun puduedshun isaquien matses dadpenquio tabadec. Champi uënësacsho isash shubiec sedenquecuededec tabadquid nëidted icpondash. Nëidic matses uënësan cun matsesën nacpadombuen shoncate shoncaquido. Nëidic cumapenec shubiec sedenquecuededquido dadpen icpondash. 24Adshobien Esusën aidtedi chuiquin: Baded umanuc niecun. Champi uënësambo yec ushash neque, capondash. Adoac: Champi uënësabi iquec, quepequien iquec, queshun Esus mamënshumbededpondash. 25Adec niecunan champi uiacno quënën puduedtanquin Esusën mëdinac champi uincuenec nidtopondash. 26Adsho issun: Champi uënësaidi uincuenmiosh, quequin ambocquidobëtan Capednaun yacno pauequidtedishun tantianuc chuibennepanëdash.

Bëshuaid daëd Esusën bëdanmiaid

27Auëshquio puduanec nidshobien bëshuaid daëdshun tsibambanquin cumapenec cuëdquin Esus naden chuipondash: Dabidën Mado icquin ubi daëdi bëdambuen tantiaquin ubi bëdanme, quequin cuëmpondash.#9.27 Isadaidbo icquin Dabidën mado caic Dabidën tsiuecquid Nuquin Papan Chomiaid quepanëdash. 28Shubu utsin puduednuc abëdi puduedash tabadshobien Esusën: Ubi bëdanmetsiash, ¿quequinda tantie? bëshuaid daëd caquien: Ai, adebi, quepondash.

29Adsho tantiashumbien aid daëdi bëmishquin: Aidën ubi bëdanmendac, quequin mimbi tantiacpadquiequi mibi bëdanec, Esus quenubi 30badedquio bëdanquin isbempondash. Adsho issun Esusën: Aidën bëdanmioshi, quequin utsibo chuibanenda, capondash. 31Adoboqui aid nidaid cuëshën icquidotedishun Esusën naid chuiben chuibempanëdash.

Esusën dada onquesa bëdanmiaid

32Aden Esusën bëdanmiac bëshuaid puduennubien dada podobitsi icsa dapuduedshun eme uac onquesa Esus ismenuen bëpondash. 33Bësho issun Esusën podobitsi icsa dapuduedaid cuenmeshunquin bëdanmiac onquiampondash. Aden bëdanmesho isash tantiadempambo yec tabadec: Nuquin nidaid Isadaidënshun adoenquio ictennec, quecuededpondash.

34Adnubien padiseobo: Podobitsi icsabon icbon namiaid icquimbien Esusën podobitsi icsa dapuduenmequin nachitec, quecuededpondash Esus caic.

Esusën matses tantiaquiaid

35Aden onquesa bëdanmianec nidash shubu daëdpactsëcquidbëd shubu dadpen icquid yacno yacnombuec capucuennequin Nuquin Papan Chiaid chuibante shubun puduedcuennequin: Nuquin Papan namiacno tabadte iquec, quequin Chiaid Bëda chuibennepondash. Adshumbic ambocquido daicsaidobëta nënquidotedi bëbëacsho bëdanmebampondash. 36Abi tantiesabo dadpen chochosho isash uënësquio icnuc shubiantiadtsëcquio icpondash Esus. Abi dayun uaquid nibëdnuc nëish iua obeca icsambuec tabadacbimbuec icsambuec tabadec. Nuquin Papa bëdambuen ismete chiabi icac tantienquio yec bëdambuec tabadtiapimbo iquec, quiash shubiantiadtsëcquio icpondash Esus.

37Adshumbic abëd icquido naden chuipondash: Pete dadpenquio nitsinshun sinaid bedtanenquio icac mëyadec chodquequid. Adecbidi Nuquin Papan Chiaid chuibanquido daëdpactsëcquio icnuc matses dadpenquio icsambuec tabadeque. 38Naden Nuquin Papa chianneta: Matses dadpenshunquio mimbi bëdambuen iste tantiabi iqueque. Ma tantiabennu, Mimbi Chiaid Bëda chuibanquido dadpen icmeta, Papa, quequin chianneta, quequin Esusën chuipondash.

Currently Selected:

Mateo 9: mcfNT

Highlight

Copy