Ebedeo 7
7
Medquisedecbimbuecquid Esus nec, quequin chiaid
1Medquisedec shubu dadpen icquid Saden yacnocquidon chuiquid tapa nepampic. Aidi Nuquin Papa abitedishun Icbombo icsho matses bëdambuen ismenuen nëish iua cuessunneshun pichicadednequid nepampic.
Adquid icnubi Abadauanën aton utsin mado Dod cuëmëdquid matses utsibon bedshun buansho tsibananshun chuiquid tapabobëta aton sondado cuessun secatanquin aidon bedaid aton utsin mado bedpampic. Adtanec chosho bëquedshun Medquisedequën: Ma Nuquin Papan mibi bëdambuen ispanu, quequin Abadauan chuipampic.#7.1 Ambi Saden cain cuënaidi iuecshun Edusaden cain cuënuapampic. 2Adsho tantiash: Nuquin Papan cun utsi padon mado bedmiaid nebi, quequin tantiaquin ambi cuessun secatambuedëna ambi bedbued 10ted 10tedquien tambanquin diestedi icquid abentsëc Abadauanën Medquisedec menepampic. Aidi Nuquin Papan: Umbi chiacpadombuen bëdambuen naquid bëdambuen isquin icsambuen naquido cuidquid nec, caid icquin nabansho Medquisedec cuëmpampic. Adembidi Saden yacnocquidon chuiquid tapa icquin bëdambuec tabadmequid nec, quequin Medquisedec cuënuapampic.#7.2 Medquisedec quequin chiaid iste bunquin Ene. 14.1-20 isbanta. 3Aidi matsesën: Aton papa icpanëdash. Aton tita icpanëdash. Aton tsusedpabo icpampic, quequin tantienquio icpampic. Abi tishaid tantienquio icquin abi uënësaid tantienquio icpampic. Aidi Nuquin Papan Madobimbuecquid Medquisedec nepampic. Adquid yec Nuquin Papa matses bëdambuen ismenuen nëish iua cuessunneshun pichicaquidon chuiquid tapa ënëdenquioctequid nepampic.
4Tantia. Chuinu. Ubi Nuquin Papa bëdambuen ismenuen nëish iua cuessunneshun pichicaquid bëdambocquid nec, quequin tantiaquin ambi utsibobëd cuesnanquin bedbued 10ted 10tedquien tambanquin 10 icquid abentse abentsen bedbanquin sanshun Abadauanën Medquisedec menepampic. 5Iuecquio icshun Nuquin Papan Moises: Naden nata, quequin chuimiampicpadombuen: Nuquin Papa bëdambuen ismenuen nëish iua cuessunneshun pichicaquid icta, quequin Debin tsiuecquido chuipampic. Adoaido icquin aton matsesën ambi bedaid 10ted 10tedquien tambanquin abentse abentsen bedbanquin sanshun meniaid bedshunquid icta, quequin chuipampic. Debi Abadauanën tsiuecquid icnuc adquidbidi aton matses icpampic. Adec Abadauanën tsiuecquido abitedi icnubi aton matsesën ambi bedaid 10ted 10tedquien tambanquin abentse abentsen meniaid bedquido Debin tsiuecquido icpampic. 6Medquisedequën Debin tsiuecquidpenquio icnubien Debin tsusedpa icquin Abadauanën atona 10ted 10tedquien tambanquin abentse abentsen bedbanquin sanshun meniaid bedshunquin: Ma Nuquin Papan mibi bëdambuen ispanuna, quequin Abadauan chuipampic. Nuquin Papan: Mibi bëdambuen isquin nashunendambi, quequin chiaid Abadauan nepampic. 7Nuquin Papan ma mibi bëdambuen ispanuna, quequin chuiquid bëdamboshëcquidquio nec. Aidën chuibuedien abipadquidpenquio nec. 8Nëbi nuquina 10ted 10tedquien tambanquin abentse abentsen bedbanquin sanshun meniaid bedquid nuquin matses uënëstequid nec. Nuquin Papan Chiaid isbanac: Medquisedec uënësac, quequin chiaid nibëdnuc: Abi iquec, quec tantiadec. 9Adquid icsho Debin tsusedpa icquin Abadauanën ambi bedaid 10ted 10tedquien tambanquin abentse abentsen bedbanquin sanshun Medquisedec menepampic. Aden menequin aton tsiuecquidobëtan meniacbimbuen Abadauanën menepampic. 10Aden aton tsiuecquido ambi tishmetequid aton dadan icnubi Debin tsusedpa icquin Abadauanën Medquisedec bëquedshun menepampic.
Medquisedecbëta Adon chiaid
11Nuquin Papan: Naden nata, quequin chuiquin Moises dada uamiampicpadombuen Adonëmba aton matses Nuquin Papa bëdambuen ismenuen nëish iua cuessunneshun pichicaquid icmeshun aidën matses tsiuecquidon ambi nacpadombuen naquidon aton matses bëdambocquiduidquio icmian Medquisedecbimbuecquid choenquio ictsempampic.#7.11 Adon Moisesën buchi icsho aidba Nuquin Papan: Ubi bëdambuen ismenuen nëish iua cuessunneshun pichicaquid icta, caid icpampic. 12Aden Moisesën chiacpadquid Nuquin Papa bëdambuen ismenuen nëish iua cuessunneshun pichicaquid namenquio icquin utsi icmeshun Nuquin Papan: Naden nata, quequin chiaid utsi uatequidbidi nendac. 13Adec Nuquin Icbo Esus Nuquin Papa bëdambuen ismequid yec Debin tsiuecquidpenquio nepanëdash. Utsin tsiuecquidobi chuiquin Nuquin Papan: Ubi matses bëdambuen ismenuen nëish iua cuessunneshun pichicaquid icta, cambo icpanëdash. 14Udan tsiuecquidien Nuquin Icbo Esuquidistu nec. Moisesën Udan tsiuecquid cain: Nuquin Papa matses bëdambuen ismenuen nëish iua cuessunneshun pichicaquid iquendac, quequin chiambo icpampic.
15Nuquin Papa matses bëdambuen ismequid utsi choaid Medquisedecbimbuecquid nec, quesho tantiashun nuqui naden bëdambuen tantiec. 16Nuquin Papan: Naden nata, quequin chiaid Moisesën dada uaid tantiaquin Adombëta aton tsiuecquidouidi nëish iua cuessunneshun pichicaquin Nuquin Papa bëdambuen ismequid icmepampic. Esusien uënës uacsho nadatiambocquid icquin uincuenmiac uënësesambo yec Nuquin Papa matses bëdambuen ismequid yampanëdash. 17Aid chuiquin Nuquin Papan dada uamiampid nad iquec:
Matses ubi bëdambuen ismequid Medquisedecbimbuecquid mibi nendac.
Adquid yec nibëdantiapimbo ictequidquio mibi nendac,
quequin chuipampic.#7.17 Chotaquën dada uaid Cuëd. 110.4 tantiaquin nëid dada uapampic.
18-19Aden Nuquin Papan: Naden nata, quequin chuiquin Moises dada uamiampidën Nuquin Papa matses bëdambuen ismequid tapa caic: Ënenquio icquin matses bëdambuen ismequid tapa nec, catiapimbo icnuc uënësquin ënac. Moisesën: Naden nata, quequin chiac matsesën aiduidi natiapimbo icpampic. Nëbi Nuquin Papa nuqui bëdambuen ismequid utsi tantiasho#7.18-19 Nuqui Papa nuqui bëdambuen ismequid utsi Esuquidistu nec. Nuquin Papan bëdambuen isaido yec aidën dayuntsëc choacbimbuen aid chiannequid nuqui yanac. Adquid icnuc Moisesën chiacpadombuen nëish iua cuessunneshun pichicaquidën matses bëdambuen nashuntiapimbo icpanëdash.
Esus Nuquin Papa matses bëdambuen ismequid bëdamboshëcquid tapa chiaid
20Adquidën matses bëdambuen nashuntiapimbo icnuc Nuquin Papan naden chuipampic: Muatiapimbocquid icquin ubi matses bëdambuen ismequid mibi icmendambi, Mado, quequin Nuquin Papan chuipampic. Abi bëdambuen ismenuen nëish iua cuessunneshun pichicaquid utsi aden chiambo icpampic. 21Aton Madombo chuiquin Nuquin Papan dada uamiampid nad iquec:
Mado, muatiapimbocquid icquin mibi abimbo chuiquin utsi uainquio iquembi.
Matses ubi bëdambuen ismequid mibi nendac.
Adquid yec nibëdantiapimbo ictequidquio mibi nendac,
quequin chuipampic.#7.21 Chotaquën onqueten Cuëd. 110.4 isbanta. 22Adquid nëbi icnubi Adombëtan aton tsiuecquidon Nuquin Papan: Naden nata, quequin Moises chiaid tantiaquin nauidpanëdash.#7.22 Ënden Nuquin Papan Chiaid chiac isadaidbo: Ai, adoembi, campid iste bunquin Buan. 19.3-9 ista. Nëbien Nuquin Papan utsi chuca uain chiaid tantiaquin abi tantiasho Esusën Nuquin Papa matses bëdambuen ismendac. Ëndenquimbo Nuquin Papan Chiampid bëdambocquid icnubi chiaid chuca utsi bëdamboshëcquid iquec.
23Matses bëdambuen ismenuen nëish iua cuessunneshun pichicaquido dadpen icpampic. Aidon uënëstequido icquin ënenquio icquin Nuquin Papa bëdambuen ismetiapimbo icpanëdash. 24Esusien uënësash uincuennëdaid yec padpidec uënëstiapimbocquid icquin Nuquin Papa matses bëdambuen ismequid nendac. Adquid icnuc Nuquin Papan matses bëdambuen ismequid utsi icmenquio iquendac. 25Adec uënësesambo yec Nuquin Papa yacno ënëdenquio yec tabadquin abi tantiaquido Nuquin Papa yacnobidi tabadmendac. Adquid icquin: Ubi tantiaquido bëdambuen ista, quequin aton Papa chiannequid nec.
26Aden nuqui bëdambuen ismequid chuiquid tapa uënësenquio ictequid Esus adquid yanan nuqui bëdamboshë iquec. Aidi bëdamboshëcquid icquin icsambuen naisambo nec. Matses icsambuen naquido nibëdacno Nuquin Papa yacnoshon abitedishun: Cun Icbombo yec mibi bëdamboshëcquid nec, capec. 27Adonën tsiuecquidon Nuquin Papa matses bëdambuen ismenuen nëish iua cuessunneshun pichicaquidon chuiquid tapan nacpadombuen Esusën nainquio icpanëdash. Adonën tsiuecquidombien badiadquidën badiadquidënquien nëish iua cuessunneshun pichicadennepanëdash. Ambi icsambuen naidba Nuquin Papa bëshunmenuen pichicashumbic aton matsesën icsambuen naidtsen bëshunmenuen pichicauapanëdash. Padnuen Esuquidistu matsesën icsambuen naidtedi bedshunash abided cuidadec abentsecquiobi uënëspanëdash padpidec uënësenquio icnuec. 28Moisesën chiampicpadombuen Nuquin Papa bëdambuen ismenuen nëish iua cuessunneshun pichicaquidon chuiquid tapa matses icsambuen naquidobi icmepampic. Ëndenquimbo Nuquin Papan: Naden ubi bëdambuen ismequid tapa icmeta, quequin Moises chuipampic. Adoshombic iuecshun Nuquin Papan: Muesambo icquid icquin abimbo caimbi. Cun Mado ënenquio icquin matses ubi bëdambuen ismequid icmendambi. Adoac Abi tantiaquidon icsambuen naid bëshunmequid icsho Nuquin Papan ambi tantiacpadombuen icsambuen naisambo icmepanëdash ënëdtiapimbo icnuc.
Currently Selected:
Ebedeo 7: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.