Ebedeo 8
8
Nuquin Papa matses bëdambuen ismequid tapa Esus chiaid
1Tantia. Mibi naden chiombique. Adec Esuquidistu abi tantiaquido abi bëdambuen ismequid tapa yanash Nuquin Papa aton tsadte dapan tsadacnombo pudueduash abitedishun Icbombo yec Aidën dayun abiucquio tsadec.#8.1 Aton Papan dayun abiucquio tsadash, quequin abëdi abitedishun Icbombo nec, quec adec tsadec. 2Adec tsadquin Nuquin Papan uaid abi tabadte shubu matsesën shubu uacmaidënquio puduedshun Nuquin Papa Esuquidistun matses bëdambuen ismequin chiannendac.#8.2 Ëndenquimbo Nuquin Papan chiacpadombuen Moisesën Nuquin Papa tabadte shubumpi aton matses isadaidbo nacnenmepampic. Nuquin Papan abuc abi yacnouëshquio tabadtebimbuecnuc uamepampic. Aden chiaid iste bunquin Buan. 26.1-37 isbanta.
3Matses icshobi nëish iua cuessunneshun pichicaquidon chuiquid tapa icta, caid icquin: Cun matsesbëtambi icsambuen naquid nebi, queshun nëish iua cuessunneshun pichicadennepampic. Adembidi Nuquin Papa tantiaquin: Menenu, quequin aton matsesën bëbëaid bedshun Nuquin Papa menedednepampic. Adembidi Esuquidistun nuqui bëdambuen ismequid tapa icquin Nuquin Papa menetequid icpec.#8.3 Aden aton dada meniacbimbuen matses icsambuen naid bedshunash abided uënëspanëdash. Moisesën chiacpadquid iste bunquin Buan. 26 isbanta. 4Adec Esus nidaidën tabadec Moisesën chiampicpadquid Nuquin Papa matses bëdambuen ismenuen nëish iua cuessunneshun pichicaquid ictiapimbo icpanëdash. Nëbi Adonën tsiuecquidoen Nuquin Papa matses bëdambuen ismenuen nëish iua pichicaquimbic Nuquin Papa bëdambuen ismenuen utsi menequid abi iquec. 5Nidaidën icquid Nuquin Papa tabadte shubun puduedshun nëish iua cuessunneshun pichicaquid Nuquin Papa matses bëdambuen ismequidën nacnempec. Nuquin Papa yacnombo abi tabadte shubumbo abia icquidquio nec. Nidaidën icquid aidbimbuecquid nec. Adquid nec, quequin naden chiaid nuqui tantiec. Ëndenquimbo Nuquin Papan abi abuc tabadtembo tantiaquin Moises naden chuipampic: Umbi macuësh tapa yacnoshon mibi ismeboedbimbuecquid ubi tabadte shubu uata, quequin chuipampic.#8.5 Buan. 25.40 tantiaquin nëid dada uapanëdash. 6Padnuen nuqui Nuquin Papa bëdambuen ismequid tapa icquin Esuquidistun bëdambuenshë naic. Utsibic Nuquin Papa matses bëdambuen ismenuen nëish iua cuessunneshun pichicaquidon chuiquid tapa yec matses icquin bëdiactsëc bëdambuen naic. Nuquin Papan: Aden matsesën tantiasho bëdambuen isendambi, quequin chiaid chuca bëdamboshë icsho aid tantiamequid Esus nec.
Matsesën natiapimbo icte chiaid
7Ëndenquimbo Nuquin Papan: Naden nata, quequin chiampid aton matses Moises chuimiampicpadombuen nabanec matses icsambuen naisa yannuc: Mimbi naden nasho bëdambuen isembi, quequin chiaid chuca Nuquin Papan chienquio ictsempanëdash. 8Naden nata, caqui umbi chiacpadombuen nauidquid matses icsambuen naisa yantiapimbo icsho issun Nuquin Papan naden chuipampic:
Iuecshun umbi: Naden naindambi, quequin chiaid chuca isadaidbobëta Udan tsiuecquido chiendambi.
9Ëndenquimbo min tsusedpabo Equipito yacnoshon buanmequin
Umbi: Naden nata, quequin chiampid niaquec icsambuec tabadsho
issun isadaidbo nianondambi, quepampic Nuquin Papa.
10Nadembidi Nuquin Papan chuipampic: Aden umbi isadaidbo nianondaid tantiaquin
naden chiaid chuca aido chiendambi.
Umbi: Naden nata, quequin chiaid chuca isadaidbo bëshunenquiocnoc tantiamendambi. Adoac umbi chiacpadombuen nate bunquiendac.
Aden tantiamiash aidon: Cun Icbo, quequin cuënaid iquendabi.
Adecbidi aido cun matsesquio iquendac.
11Adec ubi tantiaquid icsho: Nuquin Papa tantiaquid icta, utsin cainquio iquendac.
Nëidtedshun ubi tantiendac. Nëidic amëbëtan anin. Nëidic bacuëbobëtan champibon.
Nëidic caniabon. Nëidic tsësiobobëtan machobon.
Aidtedshun ubi tantiendac.
12Aidon icsambuen naidtedi
tantienquio yec bëshunendabi,
quequin Nuquin Papan Chiaid utsi nendac.#8.8-12 Ede. 31.31-34 tantiaquin nëid dada uapanëdash. Min onquete nibëdnubi chotaquën onquete Ede. 31.31-34 isbanta. 13Nuquin Papan: Umbi ënden: Naden nata, quequin chiaid shëni nec, queshun ambi: Naden naindambi, quequin chiaid chuca icnuc ënden chiaid nëbi nibëdquio yanendac, quequin chuipampic.
Currently Selected:
Ebedeo 8: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.